सरकार सञ्चालनया लागि मंकाः न्यूनतम कार्यक्रमया मस्यौदा तयार जूगु दु। सत्तारुढ गठबन्धनया कार्यदलं बुँदागत रुप मस्यौदा तयार यागु दु।

उगु मस्यौदाय् थौं छलफल जुइगु धका कार्यदलया सदस्य केशवराज जोशीं जानकारी बिगु दु। मस्यौदा क्वछिइ धुकलकि जक सार्वजनिक यायेगु तयारी दु। गठबन्धनं कांग्रेस महामन्त्री पूर्णबहादुर खड्काया संयोजकत्वय् कार्यदल गठन याना सरकारया न्यूनतम मंकाः कार्यक्रम दयकूगु खः।

कार्यदलय् कांग्रेसया मिनेन्द्र रिजाल, रमेश लेखक, माओवादी केन्द्रया देव गुरुङ व वर्षमान पुन, जसपापाखे राजेन्द्र श्रेष्ठ व महेन्द्र राय यादवपिं च्वगु खः। सरकारया प्राथमिकता, सरकारया नीति व कार्यक्रम, सङ्घीयताया कार्यान्वयन लगायतया विषय कार्यदलं मागु खाका तय यागु खः। देउवा नेतृत्वया सरकार गठन जुगु स्वंगु वाः दुने तक न मन्त्रिपरिषद् विस्तार जुइ मफुनि।

बालुवाटारय् शीर्ष नेतापि म्हिगः जुगु छलफलय् मंकाः कार्यक्रम लिपा जक मन्त्रिपरिषद् विस्तार यायेगु सहमति जूगु खः। बैठकय् प्रधानमन्त्री शेरबहादुर देउवा, माओवादी केन्द्रया अध्यक्ष पुष्पकमल दाहाल प्रचण्ड व जसपा अध्यक्ष उपेन्द्र यादव सहभागी जूगु खः।

सभामुख अग्निप्रसाद सापकोटां भुखाचं क्षतिग्रस्त जूगु संसद् भवनयात सङ्ग्रहालय दयकेगु योजना दु धका धागु दु।

विसं २०७२ वैशाखय वंग भुखाचं क्षतिग्रस्त जुया आः जीर्ण अवस्थाय् दुगु सिंहदरबारया संसद् भवन अवलोकन यासे वयकलं पुरातात्विक महत्व दुगुलि संरचना यात संरक्षण यायेमाःगु धका धयादीगु खः। ‘संसद् भवनया संरक्षण आवश्यक दु, प्राविधिक टोली नाप छलफल याना आवश्यक पलाः ल्ह्वनेमाः’, अवलोकन लिपा वयकल धयादीगु दु, ‘सङ्ग्रहालय नाप थुकियात पुस्तकालयया रुपय् विकास यायेमाः।’

निदँ न्ह्यः प्रतिनिधिसभाया विकास व प्रविधि समितिं पुलागु संसद् भवनयात थुना ‘स्टेट गेस्ट हाउस’ दयकेत सरकारयात निर्देशन बियागु दु । वया यलिपा थुगु भवनबारे सरकारं छु न पलाः ल्ह्लंगु मदु। सभामुख सापकोटां अवलोकन भ्रमणलिपा जीर्ण भवनबारे धिसिलागु पलाः छिलिइगु भलसा कयादीगु दु।

वंगु २४ घण्टाया दुने स्वनिगलय् थप ७७० म्ह कोरोना सक्रमित जुगु दु।

उकि मध्ये येँ जक ५५६ म्हेसित कोरोना सक्रमित जूगु दु। अथेहे यलय् ११५ म्ह व ख्वपय् ९९ म्हेसित संक्रमित जूगु दु।

मन्त्रालयया कथं कास्कीइ १७४, मकवानपुरय् १३६, मोरङय् १३५, बागलुङय् १३२, व सुनसरीइ ११६ म्हेसित संक्रमित जूगु दु।

अथेहे काभ्रेय् १०७, चितवनय् ९०, झापाय् ४६, रामेछापय् ४५, रुपन्देहीइ ४२, दोलखा व धादिङय् ३६÷३६ म्ह व नुवाकोटय् ३४ म्हेसित कोरोना भाइरस संक्रमण जूगु दु।

कैलालीइ ३३, गोरखाय् २८, सिन्धुपाल्चोकय् २६ व धनकुटाय् २२ म्ह संक्रमितपि थपे जुगु दु।

वंगु २४ घण्टाया दुने देयन्यक ३ हजार १२५ म्हेसित कोरोना भाइरस संक्रमण पुष्टि जुगु दु।

१० हजार ६१३ म्हेसिगु नमुना पीसीआर परीक्षणय् २ हजार २७९ म्ह व ३ हजार १९८ एन्टिजेन परीक्षण यागुलि ८४६ म्ह याना ३ हजार १२५ म्हेसित कोरोना संक्रमण खनेदुगु धका स्वास्थ्य तथा जनसंख्या मन्त्रालयं धागु दु।

अथेहे वंगु २४ घण्टाय् कोरोना संक्रमणपाखे २३ म्ह सीगु दु सा १ हजार ९२५ म्ह कोरोनामुक्त जुगु दु। थ्व नाप आःतक नेपालय् कोरोना संक्रमितपि ७ लाख ६२ हजार ४३२ म्ह थ्यंगु दु।

उकि मध्ये ९ हजार ८९८ म्ह सी धुकुगु दु सा आःतक ६ लाख ५८ हजार १२२ म्ह कोरोनामुक्त जुइ धुकुगु दु।

गणपति लघुवित्त वित्तीय संस्थाय् ३३ शाखा कार्यालयया प्रमुखपिन्स मंकाः राजीनामा बिगु दु।

चालु आर्थिक वर्षय् सेवा सुविधा थमकागु धासो शाखा प्रमुखपिन्स सोमबाः प्रमुख कार्यकारी अधिकृत किरण विष्ट समक्ष सामुहिक राजीनामा बिगु खः।

गणपति लघुवित्तं ३६ शाखा कार्याल दुगु खः। स्वगू बाहेक दक्को शाखाया प्रमुखपिन्स राजनीामा बिगु धका कास्कीया विजयपुर शाखाया प्रमुख रिजन लामिछाने न धागु दु।

लामिछानेया कथं साउन २५ गते तक ई बिया उमिसं राजीनामा बुझे यागु खः।