प्रधानमन्त्री केपी शर्मा ओली थियाजिनय् जूगु शाङ्घाई सहयोग सङ्गठन (एससिओ) प्लसया शिखर सम्मेलनय् ब्वति कयाः थौं बेइजिङ थ्यंकादीगु दु।

प्रधानमन्त्री ओली रेलमार्ग जुयाः थन थ्यंकादीगु खः। थ्वसिबें न्ह्यः प्रधानमन्त्री व वय्कः नेतृत्वया प्रतिनिधिमण्डलयात थियाजिन रेल स्टेशनय् स्थानीय सरकारया प्रमुख व कलाकारपिंसं बिदाइ याःगु खः।

प्रधानमन्त्री केपी शर्मा ओली व गणतन्त्र माल्दिभ्सया राष्ट्रपति डा मोहमद मिज्जु नापलानादीगु दु।शाङ्घाइ सहयोग सङ्गठन (एससिओ) प्लसया शिखर सम्मेलनया झ्वलय् चीनया थियानजिनय् झायाच्वनादीम्ह प्रधानमन्त्री ओली व राष्ट्रपति मिज्जु नापलानादीगु खः। \

वय्कःपिं दथुइ जलवायु ह्यूपालं लाकूगु लिच्वः व उकी तःधंगु देय् तय्सं म्हितेमाःगु भूमिकाया विषय ज्वःलागु बिचाः तयादीगु खः। प्रधानमन्त्री ओलीं हिमालनिसें समुद्रतकया सुरक्षाया अवधारणाय् नापं जानाः ज्या यायेत इनाप यानादीगु प्रधानमन्त्रीया सचिवालयं धाःगु दु।

नापलायेगु झ्वलय् प्रतिनिधिमण्डलय् दुथ्यापिं उच्चपदस्थ पदाधिकारीपिनिया नं ब्वति दूगु खः।ञंलाथ्व नवमी ११४५, भाद्र १६ सोमवाः