ओली प्रधानमन्त्री केपी शर्मा ओलीं जनसङ्ख्याया मुद्दायात आर्थिक, सामाजिक व राजनीतिक रणनीतिया कथं स्वयेमाः धका धयादीगु दु।

खुक्वःगु एसियाली जनसङ्ख्या सम्मेलनया थौं उलेज्या यानादिसें वय्कलं विकास व जनघनत्वया सहसम्बन्धयात ध्यान बियाः सीमान्तकृत नापं विपन्न समुदायतय्त अःपुक म्वाये निंतिं मजिमगाःगु आवश्यकतात चुलाकेत सरकारपाखें थी थी कुतः जुयाच्वंगु धका धयादिगु दु।

प्रधानमन्त्री ओलीं काठमाडौँ मेडिकल कलेजपाखें न्ह्याकाःच्वंगु अस्पतालय् नकतिनि बूम्हं छम्ह मचाया मांम्हलिसे भर्चुअल खँल्हाबल्हा यानाः सम्मेलनया उलेज्या यानादीगु खः। वय्कलं समानता व समावेशी नीति नालाः तःम्हि व चीम्हि दथुइया गाः त्वःपुइमाःगु, आत्मसम्मान नापं मानव अधिकार, स्वस्थ्य व भलसा नापंया हलिं निर्माणय् सकलें छवाः जुइमाःगुली बः बियादिगु खः।

वय्कलं पृथ्वी व मनूतय्गु रक्षाया लागि जुयाजुसें मानवीय विकास, असल जीवनयापनया समस्या व ज्यंकेगु उपायया निंतिं थजाःगु विषयय् जुइगु सम्मेलनं दुग्यंगु न्वाखँ बिइगु अपेक्षा यानादिल। वय्कलं जलवायु ह्यूपाःया मुद्दानाप ल्वायेत विश्वव्यापी साझेदारीयात महत्व बियाः न्ह्याःवनेमाःगु धासें दिगो विकास, सुशासन व सामूहिक कुतः तसकं आवश्यक जूगु धयादिल। प्रधानमन्त्री ओलीं ‘समृद्ध नेपाः, सुखी नेपाःमि’ आकाङ्क्षायात खनेदूगु कथंया उपलब्धिइ हिइके माःगुलिइ बः बियादिल।

नेपाली कांग्रेसया सभापति नापं पूर्व प्रधानमन्त्री शेरबहादुर देउवा, त्रिभुवन विश्वविद्यालयया उपकुलपति प्राडा केशरजङ्ग बराल, एसियाली जनसङ्ख्या एशोसिएशनया अध्यक्ष रेइको हायाशीलिसें सम्मेलनया उलेज्याया झ्वलय् ब्वति कयादीगु खः। सम्मेलनय् थी थी विषयगत सत्रत न्ह्याकिइ। (रासस)

लुँ तोलां थौ गुसः थहावंगु दु। लुँ तोलां गुसः थहावना थौ १ लाख ४९ हजार ६ सय तका न कारोबार जुगु दु धका नेपाल सुनचाँदी व्यवसायी महासङ्घं धाःगु दु।

अथहे वहः तोलां थौ झीतका थहावंगु दु। वहः तोलां झीतका थहावना १ हजार ८ सय ३० तका न कारोवार जुगु दु धका महासङ्घं धाःगु दु।

प्रधानमन्त्री केपी शर्मा ओलीयात २१ क्वःगु राष्ट्रिय ज्यापु दिवसया मूपाहाँ कथं ब्बनेगु कथं थौ ग्वय् दाँ तयेगु ज्याझ्वः जुगु दु।

प्रधानमन्त्री निवास, बालुवाटारय् थौ सङ्घीय सांसद कृृष्णगोपाल श्रेष्ठ, ज्यापु संस्कृति विकास कोषया अध्यक्ष मङ्गलकृष्ण महर्जन नाप पदाधिकारीपि मूपाहाँ कथं ब्बने बालुवातारय् वःगु खः। थ्व हे वइगु मंसिर ३० गते यःमरी पुन्ही कुन्हु ज्यापु दिवसय् मूपाहाँ कथं झायेत ब्बनेगु ज्या जुगु खः। उगु दिं वसन्तपुरय् मू ज्याझ्वः जुइगु खः।

उगु ज्याझ्वलय् ज्यापु प्रतिभा सिरपा नाप थीथी मनूतयेत हनिइगु ज्याझ्वः दुगु खः। उगु ज्याझ्वलय् प्रधानमन्त्री ओलीं नेवाः संस्कृति नेपाःया संस्कृतिया म्हसिका बिइगु मौलिक, उन्नत व परिस्कृत व इतिहास ज्वनातःगु संस्कृति दुगुलि दक्को मिले जुया थुकियात संरक्षण व प्रवद्र्धन यायेमाःगुलि बःबियादीगु खः।

प्रधानमन्त्री ओलीं ज्यापु संस्कृति विकास कोषया माःगु अक्षयकोषया निति माःगु  सरकारं ग्वहालि यायेगु जुइ धका धयादीगु खः।

देशय् पश्चिमी फय्या सामान्य प्रभाव लानाच्वंगु धासें जल व मौसम विज्ञान विभागं पहाडी ब्वय् आंशिक बदली जुया ल्यंगु ब्वय् लकस यचुइ धाःगु दु।

तराई व पहाडया छुं थासय् खसु कुहाँवःगु दु।स्वनिगःया तापक्रम न्हियान्हिथं कुहाँ वनाच्वंगु दु। थौं सुथय् थनया न्यूनतम तापक्रम ८ डिग्री सेल्सियस दूगु खसा न्हिनय् १९ निसें २१ डिग्री सेल्सियसया दथुइ च्वनीगु अनुमान यानातःगु दु। विभागया कथं थौं न्हिनय् कोशी, बागमती, गण्डकी व कर्णाली प्रदेशया पहाडी लागाया छुं थासय् बदली जुया ल्यंगु ब्वया मौसम यच्चुइ ।

अथेहे बहनी कोशी, बागमती व गण्डकी प्रदेशया पहाडी लागाय् आंशिक बदली जुया ल्यंगु ब्वया मौसम यचुइ। कोशी व गण्डकी प्रदेशया छथाय् निथाय् फुलुफुलु वा वइगु सम्भावना दु।

वइगु २४ घौ दुने कोशी, बागमती व गण्डकी प्रदेशया छथाय् निथाय् फुलुफुलु वा वइगु व कोशी व गण्डकी प्रदेशया तःगु व हिमाली ब्वया छथाय् निथाय् च्वापु गायेपूm धासें थुकिं बुँज्या, स्वास्थ्य, पर्यटन, पर्वतारोहण, सतक व हवाई यातायातय् छुं भचा लिच्वः लाये पूmगुलिं सतर्क जुयाच्वनेत धाःगु दु।

प्रधानमन्त्री केपी शर्मा ओलीं सामाजिक सुरक्षाया लागायात चकंकेगु घोषणा यानादीगु दु। थौ न्हय्क्वःगु सामाजिक सुरक्षा दिवसया छगु ज्याझ्वलय् वयकलं अथे घोषणा यानादीगु खः।

सामाजिक सुरक्षा कोषपाखें ग्वसाः ग्वःगु ज्याझ्वलय् प्रधानमन्त्रीं वइगु ९० न्हु लिपा योगदान ब्यूपिनि काय् म्ह्याय्पिं नं कोषपाखें लाभान्वित जुइगु व छगू लख स्वयां अप्वः वासः खर्च जुइपिं योगदानकर्ता तय्त कूल खर्चया ५० प्रतिशत कोषं फइगु घोषणा यानादिल।

प्रधानमन्त्री ओलीं संविधानय् दूगु मौलिक हकया व्यवस्था व दायित्वप्रति सरकार जिम्मेवार व जवाफदेही जुइगु कँसें देय्यात समृद्ध दयेकेत सरकार जुयाच्वंगु दु धकाः धयादिल।

उगु झ्वलय् कोषअन्तर्गत अप्वः योगदानकर्ता व सेवा प्रदायक व्यक्ति व संस्थातय्त प्रधानमन्त्रीं सिरपाः लःल्हानादिल।