राष्ट्रपति रामचन्द्र पौडेलं राष्ट्रिय समाचार समिति (राससं) लिपांगू इलय् थःगु सेवाय् विविधिकरण हयेफुगुलिं च्वछानादीगु दु।

राससया ६४ क्वःगु वार्षिकत्सवया लसताय् समितिया पदाधिकारी, पत्रकार, कर्मचारी, सेवाग्राही लिसें शुभेच्छुकपिंत थौं भिंतुना बियादिसें सत्यतथ्य, विश्वसनीय, आधिकारिक व भलसा यायेबहगु सुचं व बुखँ जनतातक थ्यंकेगु ज्याय् राससया दायित्व व भूमिका हिलावनाच्वंगु ईया सन्दर्भय् अझ नं अप्वयावंगु धयादिल। राष्ट्रपति पौडेलं धयादीगु दु, “लिपांगु इलय् थी थी भाय्या बुखँ, थी थी सपूm प्रकाशन, मिडिया संग्रहालयया पलिस्था, तालिम लिसें पूर्वाधार विकास, २४ घौया सेवानापं बुखँया विविधिकरणय् ब्यूगु प्राथमिकता च्वछाय्बहःजू।”

राष्ट्रपतिं राससं छगू दशकसिबें न्ह्यःनिसें स्वदेश व विदेशय् सत्यतथ्य व भलसा यायेबहगु बुखँ पितहयेत म्हितूगु भूमिका महत्वपूर्ण जूगु नं धयादीगु दु । राससं देय् व विदेशया किपा, श्रव्य, श्रव्यदृश्य व नेपाली, अङ्ग्रजीनापनापं थी थी भाय्या बुखँ सामग्री अनलाइन सेवापाखें मदिक्क थः सेवाग्राहीतय्त बियावयाच्वंगु तसकं लसताया खँ जूगु धयादीगु दु।

अभिव्यक्ति स्वतन्त्रताजक मखु स्वतन्त्र, निष्पक्ष व स्वतन्त्र पत्रकारिका लिसें हरेक नागरिकया सुचंया अधिकार बहुलवादया लिधंसाय् लोकतन्त्रय् जक चूलाइगु धयादिसें राष्ट्रपति पौडेलं राजनीतिक ह्यूपाः लिपा देय्या एजेण्डा आर्थिक समृद्धि व विकास जूगु खँ धयादीगु दु। वय्कलं धयादिल, “नेपाःया संविधान व संघीय लोकतान्त्रिक गणतान्त्रिक शासन प्रणालीया अभिष्ट नं थ्व हे खः, राससलिसेंया आमसञ्चार माध्यमं जनताया चाहनाकथं शान्ति, लोकतन्त्रया सुदृढीकरण, दिगो विकास, समावेशी समाज व आर्थिक समृद्धिया निंतिं थःथःगु थासं माःगु भूमिका म्हिती धइगु जिं विश्वास यानागु दु।”

सुचं प्रविधिया न्हून्हूगुकथं छ्यलाबुला व विकासनापं आमसञ्चारया पहुँच क्वय् च्वंगु व सीमान्तकृत समुदायतक मदिक्क थ्यनाच्वंगु खँ न्ह्यथनादिसें राष्ट्रपति पौडेलं राज्यया प्यंगूगु ब्वःया कथं पत्रकारिकता ख्यः व आमसञ्चार माध्यमया भूमिका महत्वपूर्ण जूगु धयादिल।

थौं ७५ क्वःगु ‘राष्ट्रिय प्रजातन्त्र दिवस’ देय्या थी थी थासय् बिस्कं बिस्कं ज्याझ्वः यानाः न्यायेके त्यंगु दु।

प्रजातन्त्र दिवसया लसताय् मू ग्वसाः खलकं सैनिक मञ्च तिंख्यलय् थौं सुथय् न्यायेकूगु ज्याझ्वलय् राष्ट्रपति रामचन्द्र पौडेल झायादीगु खः। ज्याझ्वलय् देशय् प्रजातन्त्र नीस्वनेत जूगु थी थी संघर्षय् थःगु जीवन पानादीपिं ज्ञात अज्ञात सहिदपिंत श्रद्धाञ्जली देछाःगु खः।

प्रजातन्त्र दिवस समारोहयात प्रधानमन्त्री केपी शर्मा ओलीं संबोधन यानादीगु दु। सरकारं प्रजातन्त्र दिवसया लसताय् थौं सार्वजनिक बिदा बियातःगु दु। नेपाःया इतिहासय् जहानियाँ राणा शासनया अन्त्य यानाः प्रजातन्त्र वःगु गौरवशाली व ल्वमंके मफइगु दिं कथं २००७ फागुन ७ गतेयात कायेगु याः। प्रजातन्त्र दिवसया लसताय् राष्ट्रपति रामचन्द्र पौडेलं भिंतुना सन्देश पिथनादिसें देय्या सार्वभौमसत्ता जनतायाके दयेमाः धइगु मान्यतायात संघर्ष व सहिदया बलिदानं नीस्वंगु धकाः लुमंकाबियादीगु दु। (रासस)

नेपालय् अमेरिकाया ग्वहालि याइगु संस्था ‘मिलेनियम च्यालेन्ज कर्पोरेसन’ (एमसीसी) अन्तर्गतया परियोजना स्थगित जूगु दु।

नेपाल सरकारयात थुकिया बारे फागुन २ गते इमेल छ्वया अर्थ मन्त्रालययात जानकारी ब्यूगु खः। उकिइ अमेरिकी सहायता संस्था मिलेनियम च्यालेन्ज कर्पोरेशन (एमसीसी) पाखे नेपालय् सञ्चालित मिलेनियम च्यालेन्ज एकाउन्ट (एमसीए) नेपाःया ज्याझ्वः स्थगन जुगु जानकारी ब्यूगु खः।

अर्थ मन्त्रालयं विज्ञप्ती पिकया स्वलाया निति एमसीए नेपालय् ज्याझ्वः स्थगित जूगु औपचारिक जानकारी ब्यूगु दु।

थौ ७५ प्रजातन्त्र दिवस । देयन्यक थीथी ज्याझ्वः याना प्रजातन्त्र दिवस हनेत्यःगु दु। सरकारी व देयन्यक स्वेच्छिक कथं थीथी ज्याझ्वः याना हनेत्यःगु खः।

विसं. २००७ सालय् क्रान्ति सफल जुगु १०४ दँ ताहाकःगु  निरंकुश राणाशासन अन्त्य याना प्रजातन्त्र स्थापना जुगु लुमन्ती दँय् दँसं फागुन ७ गते प्रजातन्त्र दिवस हनावया च्वंगु खः।

सञ्चार लिसे सूचना प्रविधिमन्त्री नापं नेपाल सरकारया प्रवक्ता पृथ्वीसुब्बा गुरुङं सरकारं हःगु अध्यादेश निगुलि हे सदनपाखे पारित जुइ धका धाःगु दु। वयकलं दक्को राजनीतिक दलया सहमतिइ अध्यादेश पारित जुइ धका धयादीगु दु।

मंगलवाः लमजुङ सदरमुकाम बेसीसहरय् न्हापागु कासा नाप सांस्कृतिक महोत्सवया उलेज्या यानादीसे सरकारं हःगु अध्यादेश ६० दिं दुने निगुलि हे सदनपाखे पारित जुइ कथं न्ह्यावनिइ धका धयादीगु खः। मन्त्री गुरुङं धयादीगु दु, “वर्तमान सरकारं हःगु अध्यादेश लोक कल्याणकारी जुगुलि पारित जुइ।

न्हापानिसे पुलागु कानुन आः न्ह्याना च्वंगु ई कथं न्ह्याकेत थाकुगुलि न्हुगु कानुनया निति अध्यादेश हयागु खः। सूचना प्रविधि, शिक्षा, सुशासन व सहकारी ख्यलय् सुधार यायेत माःगु खने दु। थ्व अध्यादेशं उगु समस्यायात चिइका जनभावना कर्थ ज्या यायेफइ व देशय् समृद्धि वइ।” धका धयादीगु खः।