शाङ्घाई सहयोग सङ्कठन (एससिओ)या शिखर सम्मेलनया निंतिं चीनया थियानजिनय् झायाच्वनादीम्ह प्रधानमन्त्री केपी शर्मा ओलीं थौं हुवइगामय् च्वंगु वा उत्पादन विशेष क्षेत्र (राइस कोर प्लान्टिङ एरिया)या भ्रमण यानादीगु दु। प्रधानमन्त्री ओलीं हुवइगांया भिलेजय् च्वंगु उगु क्षेत्रय् जेडी ९३९ वाया पुसा उत्पादन लिसें कृषि, पर्यटन व शिक्षायात स्वानाः न्ह्याकूगु नमूना ज्याया बारे जानकारी कयादीगु खः।

अवलोकनया झ्वलय् प्रधानमन्त्री ओलीया नाप न्हापांम्ह मिसा राधिका शाक्य, पूर्वउपप्रधानमन्त्री लिसें प्रतिनिधिसभाया दुजः पूर्णबहादुर खड्का, शिक्षा, विज्ञान लिसें प्रविधिमन्त्री रघुजी पन्त, संस्कृति, पर्यटन लिसें नागरिक उड्डयनमन्त्री बद्रीप्रसाद पाण्डे, पूर्वमन्त्री लिसें प्रधानमन्त्रीया आर्थिक लिसें विकास सल्लाहकार डा युवराज खतिवडा, पूर्वमन्त्री लिसें प्रतिनिधिसभाया दुजः छविलाल विश्वकर्मा, परराष्ट्र मन्त्रालयया सचिव अमृतबहादुर राई, चीनया निंतिं नेपाःया राजदूत डा कृष्णप्रसाद ओली, नेपाःया निंतिं चीनया राजदूत छन सङलिसेंया नं ब्वति दूगु खः।

राष्ट्रपति रामचन्द्र पौडेलं गौरापर्वं नेपाःया मौलिक तजिलजिया संरक्षण व संवद्र्धनय् थप योगदान यासें सकल नेपाःमितय् दथुइ थःथवंय् समझदारी, सद्भाव, दिगो शान्ति लिसें दाजुकिजाया भावना तब्याकेत हःपाः दः वनेमाः धकाः मनंतुनादीगु दु।

गौरापर्व, २०८२ या भिंतुना सन्देश बियादिसें राष्ट्रपति पौडेलं थुजाःगु नखः नं विविधताय् एकता, सामाजिक लिसें सांस्कृतिक ऐक्यबद्धता व सहिष्णुता तब्याकाः यंकाः छेँजः व समाजयात स्वानाः राष्ट्रिय छवाः सुदृढ यायेत ग्वाहालि याइगु धयादीगु दु। वय्कलं गौरापर्वया लसताय् देय् दुने व विदेशय् च्वनाच्वंपिं सकल नेपाःमित दाजुकिजा व तताकेहेँया सुख, शान्ति व समृद्धिया निंतिं भिंतुना देछानादीगु दु।

दँय् दसं भाद्र शुक्ल पञ्चमीनिसें अष्टमीया दिं तक नेपाःया मू यानाः पश्चिमी लागाय् विशेष कथं हनीगु थ्व पर्वं भौगोलिक, धार्मिक, सांस्कृतिक आस्था व थःथवंय् सद्भावयात क्वातुकेत महत्वपूर्ण भूमिका म्हितीगु पर्व धकाः राष्ट्रपति पौडेलं लुमंकादीगु दु। थुगु पर्वय् महाद्यः व पार्वती (गौरा)या पूजा यानाः अपसं च्वनेगु याइ, गुकिया लिच्वः कथं महाद्यः व पार्वती नापनापं कूल द्यः लय्तानाः सुख, शान्ति, तःआयु व समृद्धि दइगु जवविश्वास दयाच्वंगु दु।

थुगु पर्वय् न्याताजि बाय् वसिबें अप्वः कथंया छ्वः, वा, कय्गू, माय् व क्वलः बीबलं दयेकाः तःगु ‘बिरुडा’ देछानाः प्रसादया कथं कयाः मानवीय जीवन, कृषि तजिलजि व छेँजःया समृद्धिया मनंतुनी।“थुगु पर्वया लसताय् स्थानीयत चाकःलि च्वनाः लोक भाषं देउडा, धमारी व चैत लिसेंया माध्यमं थःथःगु दुःख, सुख इनाकाइ।

थ्व पर्वं तापानाच्वंपिं त्यपूत नापलाइगु, थःथवंय् आत्मियता तब्याइगु व कलाभाःतया स्वापू क्वातुइगु विश्वास दूगुलिं थुकियात तसकं झःझः धायेक न्यायेकेगु याना वयाच्वंगु दु”, राष्ट्रपति पौडेलया सन्देशय् धयातःगु दु। झीगु समाजय् दयाच्वंगु थुजाःगु लोक परम्परा लिसें सांस्कृतिक नखःचखलं विविधताय् एकता, सामाजिक लिसें सांस्कृतिक ऐक्यबद्धता व सहिष्णुता तब्याकीगु राष्ट्रपति पौडेलं धयादिल।

वय्कलं गौरापर्वया महत्वया विषयय् ध्वाथुइकादिसें धयादीगु दु, “थुजाःगु नखःचखलं छेँजः व समाजयात स्वानाः यंकाः राष्ट्रिय छवाःयात सु्दृढ यायेत, तजिलजिया संरक्षण लिसें आध्यात्मिक आस्था व मानवीय जीवनया सुख, शान्तिया निंतिं ग्वाहालि याना वयाच्वंगु दु धकाः जिं तायेकाच्वना।”

थौं सङ्घीय संसद्या निगू समितिया बैठक च्वनेत्यंगु दु। क्वःछिनातःगु ज्या धलः कथं थौं कृषि, सहकारी लिसें प्राकृतिक स्रोत समिति व विधायन व्यवस्थापन समितिया बैठक च्वनेत्यंगु दु।

कृषि सहकारी लिसें प्राकृतिक स्रोत समितिया बैठकय् जलविद्युत् आयोजनाया वातावरणीय प्रभाव मूल्याङ्कन प्रतिवेदनया वातावरणीय व्यवस्थापन योजना परिमाजन यायेगु विषयय् खनेदूगु समस्याया सम्बन्धय् वन लिसें वातावरण मन्त्रालयनाप सहलह याइगु ज्या धलः दु।

अथे हे, विधायन व्यवस्थापन समितिया बैठकय् ‘सङ्घीय निजामती सेवा विधेयक, २०८०’ लय् दफावार सहलह याइगु ज्या धलः क्वःछिनातःगु दु।

श्रीघः बहाः धका म्हसिका वयाच्वंगु श्रीशान्तिघट बज्रधातु महाविहार संरक्षण समितिया शनिवाः जूगु तःमुन्ज्यां शुभकाजी शाक्ययात हे हाकनं छक्वः नायः कथं ल्यःगु दु।

मदन शाक्यया कजिसुइ निस्वंगु निवार्चन समितिया कुतलय् जूगु ल्यः ज्याय् सर्वसम्मत कथं न्हूगु ज्यासना पुचःया ल्यःज्या जूगु खः। उगु ल्यः ज्यां कमल शाक्ययात उपाध्यक्ष पुरण शाक्ययात सचिव, अनिल शाक्य सहसचिव, रविन्द्र शाक्य कोषाध्यक्ष, सुरेश शाक्य सहकोषाध्यक्ष कथं ल्यःगु खः।

अथेहे दुजलय् सुरेशकाजी शाक्य, रसना शाक्य, अष्ट रत्न शाक्ययात नं सर्वसम्मत कथं ल्यःगु खः। अथेहेतुं नायःपाखें मनोनित कथं प्रतिभा शाक्य व राजेश शाक्य यात ज्यासना पुचःया दुजः कथं ल्यःगु खः। ल्यःज्या जुइ न्ह्यः समितिया गुक्वःगु दँमुन्ज्या नं जुल।

समितिया नायः शुभकाजी शाक्यया सभानायसुइ जूगु उगु ज्याझ्वलय् समितिया उपाध्यक्ष कमल शाक्यं लसकुस न्वचु तयादिलसा  सचिव पुरन शाक्यं वार्षिक प्रतिवेदन व कोषाध्यक्ष रविन्द्र शाक्यं आर्थिक प्रतिवेदन न्ह्यब्वया दिल। उगु ज्याझ्वलय् श्रीघःया शाक्य परिवारया एसइइ ताःलापिं मस्त अनुभा शाक्य,, अमन शाक्य व दिक्षिता शाक्ययात भिन्तुना देछासे हंगु खः।

प्रधानमन्त्री केपी शर्मा ओलीं चीनया राष्ट्रपति सी चिनफिङयात नेपाःयात शाङ्घाई सहयोग संगठन (एससीओ) दुजः दयकेत ग्वाहालि यायेत प्रस्ताव तःगु दु।

शनिवाः बेइजिङय् राष्ट्रपति .ीनाप निगु पक्षीय नापलायेगु झ्वलय् अथे प्रस्ताव तयादीगु खः। शाङ्घाई सहयोग संगठनया शिखर सम्मेलनय् ब्बति कायेगु झ्वलय् प्रधानमन्त्री ओलीं बेइजिङय् निगु पक्षीय नापलायेगु झ्वलय् अथे धयादीगु खः।प्रधानमन्त्री ओलीया उगु प्रस्तावयात राप्ट्रपति सी न सकारात्मक धारणा तःगु दु।

‘चीन नेपाः नाप संयुक्त राष्ट्रसंघ व शाङ्घाई सहयोग संगठन लगायतया बहुपक्षीय मञ्चय् सहकार्य यायेत तयार दु,’ राष्ट्रपति सीया धापू यासे बेइजिङस्थित नेपाली राजदूतावासं जारी याःगु विज्ञप्तिइ धाःगु दु।

राष्ट्रपति सी न नेपाःयात समृद्धि यात्राय् ग्वहालि यायेगु निति थःगु देय् न्ह्याब्बलय् तयार दु धका धाःगु दु। वयकलं नेपाःया विकास यायेगु कुतलय् समर्थन यायेगु प्रतिबद्धता प्वकादील।