नवनियुक्त गभर्नर डा पौडेलपाखें सपथ प्रधानन्यायाधीश प्रकाशमान सिंह राउतं नेपाल राष्ट्र बैंकया नवनियुक्त गभर्नर डा विश्वनाथ पौडेलयात पद लिसें गोपनीयताया शपथ ग्रहण याकादीगु दु।

सर्वाेच्च अदातलय् थौं जूगु समारोहय् प्रधानन्यायाधिश राउतं अर्थविद् डा पौडेलयात शपथ ग्रहण याकादीगु खः। मंगलबाः च्वंगु मन्त्रिपरिषदया बैठकं अर्थविद् डा पौडेलयात गभर्नर पदय् नियुक्त यायेगु निर्णय याःगु खः।

सरकारं गभर्नर ल्ययेगु नितिं उपप्रधानमन्त्री लिसें अर्थमन्त्री विष्णुप्रसाद पौडेलया संयोजकत्वय् स्वम्ह दुजः दूगु समिति नीस्वंगु खः।

अन्तरराष्ट्रिय् बजारय् लुँया भाः थहां वंगुया लिच्वः स्थानिय बजारय् नं लाःगु दु। वंगु स्वन्हुनिसें स्थिर जुयाच्वंगु लुँया भाः थौं तोलाय् न्याद्वः न थहांवंगु दु।

नेपाल सुनचाँडी व्यवसायी महासङ्घया कथं थौं लुँया भाः तोलां छगू लख ८९ द्वः ८०० तका थ्यंगु दु।

अथे हे, वहःया भाः नं तोलां न्यय् तका थहां वंगु दु।वहः तोलां द्वःछि व ९९० तकाया भावय् कारोबार जुयाच्वंगु दु।

नेपाल राष्ट्र बैंकय् १८ म्ह गभर्नरय् प्रा.डा विश्वनाथ पौडेलयात नियुक्त याःगु दु। मंगलवाः थौ बहनि च्वंगु मन्त्रिपरिषद् बैठकं गभर्नरय् प्रा.डा पौडेलयात नियुक्त याःगु खः।

पौडेलनापं कामु गभर्नर निलम ढुंगाना व पूर्वसचिव दिनेश भट्टराईया नां सिफारिस जूगु खः।

मन्त्रिपरिषदया बैठक सुरु जूगु दु।

बैठक प्रधानमन्त्री निवास बालुवाटारय् छु ई न्ह्यः जक न्ह्यागू दु। बैठकय् राष्ट्र बैंकया गभर्नर नियुक्त यायेगु निति जुयाच्वंगु खः।

मन्त्रीपरिषद् बैठक च्वने न्ह्यः अर्थमन्त्री विष्णु पौडेलया नेतृत्वय् सिफारिस समितिं अर्थशास्त्री प्रा.डा. विश्वनाथ पौडेलनाप स्वम्हेसित गभर्नर यायेगु निति सिफारिस याःगु खः।पौडेल न्हापागु ल्याखय् लाम्ह खः।

सिफारिस समितिं पौडेलनापं डेपुटी गभर्नर निलम ढुंगाना व पूर्व सचिव दिनेश भट्टराईया नां गभर्नरया निति सिफारिस जूगु खः।

९० सालया भुखाचं दुनावनाच्वंगु ख्वप नगरपालिका–४ गःहिटीइ च्वंगु लक्ष्मीनरसिंह देगःया पुनःनिर्माण जूगु दु। उगु देगःया नेपाल मजदुर किसान पार्टीया नायः नारायणमान बिजुक्छें थौं उलेज्या यानादिगु खः।

विक्रम संवत् १९९० या तःभुखाचं देगः दुने धुंकाः जस्तां त्वःपुयाः चीधंगु देगः थें यानातःगु खः। ताःहाकःगु अनुसन्धानलिपा प्यागोडाशैलीं स्वंगू तल्लाया देगः निर्माण याःगु खः। विसं २०७६ सालय् देगःया पुनःनिर्माण न्ह्याकूगु खः।उलेज्या ज्याझ्वलय् बिजुक्छें धयादिल, “नरसिंह शक्तिया प्रतीक खः, लक्ष्मीनापंया नरसिंहं सन्तुलनया प्रतीक क्यनी । शक्तिया लिधंसाय् जक त्याकेफइगु खँ सत्य मखु धइगु सन्देश थुकिं बियाच्वंगु दु ।”

ख्वप नगरपालिकाया प्रमुख सुनिल प्रजापतिं मल्लकालीन मौलिक स्वरूपं हे देगःया पुनःनिर्माण जूगु धयादिल । देगः पुनःनिर्माणया निंतिं ख्वप नगरपालिकां ७ क्वति ७७ लख ध्यबा तुइगु अनुमान यानातःगुलिइ उपभोक्ता समितिं ४ क्वति ८३ लख ४ द्वः व ३८ य् पुनःनिर्माण पूवंकूगु वय्कलं कनादिल।

नगरपालिकाया उपप्रमुख रजनी जोशीं इतिहासया गर्भय् दुबिनाच्वंगु लक्ष्मीनरसिंह देगः पुनःनिर्माण जूगुलिं ख्वपय् च्वंपिनिगु हे गौरव थकाःगु धयादिल।पुरातत्व विभागया महानिर्देशक सौभाग्य प्रधानाङ्गं नेपालय् सच्छि दँय् छकः तःभुखाय् ब्वयाच्वंगु तथ्यांक प्रस्तुत यानादिसें सम्पदात ई कथं जीर्णोद्धार व मर्मतसम्भारय् नं ध्यान बिइमाःगु धयादिल।

इतिहासविद् प्राडा पुरुषोत्तमलोचन श्रेष्ठं मौलिक स्वरुप तनेधुंकूगु देगःया पुनःजीवित यायेफूगु तःधंगु उपलब्धि जूगु धयादिल।