Display Style:
Column Style
यलया उद्योग वाणिज्य संघया ३८क्वःगू दँ मुज्यालिपा चुनाव जुइगु
लहनान्यूज | ने.सं .११३७, कौलागा षष्ठी, (११ अक्टूबर, २०१७), यल ।
यलया थीथी लजगाःया व्यवसायीपिनिगु छत्र संगठन ललितपुर उद्योग बाणिज्य संघया ३८क्वःगु दँ मुज्या शुक्रवाः यलया अशोक पार्टी पालेसय् जुइगु दु ।
नेपाल सरकारया उद्योग मन्त्री सुनिल बहादुर थापाया मू पाहाँसूइ जुइगु दँ मुज्याय् थुगुसीइ राष्ट्रियस्तरया उत्पादकत्व अवार्ड वितरण याइगु जूगु दु ।
ज्याझ्वःसं सामाजिक उत्तरदायित्व अन्तर्गत ११गू विद्यालय १२ मस्तयेत छात्रवृति, संस्थापक अध्यक्ष स्वर्गीय बेखानाथ श्रेष्ठया स्मृति छात्रवृति, श्रष्टा सम्मान, जेष्ठ नागरिक सदस्य सम्मान लिसें थीथी व्यवसायिक क्षेत्रया उत्कृष्ट सदस्य व कर्मचारीपिनित पुरस्किृत याइगु संघया वरिष्ठ न्वकू रविन्द्रराज ताम्रकारजु जानकारी बियादिइगु दु ।
दँ मूँज्या लिपा बन्द सत्रय् वार्षिक प्रगति प्रतिवेदन नापं भावी कार्यक्रम उपर छलफल याना पारित यायेगु निसें आर्थिक प्रतिवेदन उपर छलफल नापं विधान संशोधनया सन्दर्भय् तक सहलह जुइगु महासचिव भरतलाल जोशीजुं जानकारी बियादिइगु दु ।
वि.सं. २०२३ सालय् पलिस्था जूगु ललितपुर उद्योग बाणिज्य संघया थुगुसी स्वर्णजयन्तिया दँ कथं नं थीथी ज्याझ्वःत न्ह्यानाच्वंगु दु । दँ मूज्याय् न्हूगु नेतृत्व ल्ययेगु सवालय् थुगुसी असोज २८ गते स्टाफ कलेज जावलाख्यःलय् चुनाव जुइगु निश्चित जूगु दु ।
न्हूगु नेतृत्वयालागि निगू प्यानल व स्वतन्त्र उपाध्यक्षसहितया प्रतिस्पर्धा
थौकन्हे यलया व्यवसायीपिं दथुइ ललितपुर उद्योग वाणिज्य संघया नेतृत्वया खँय् व्यापक चर्चा जुयाच्वंगु दु ।
संघय् प्यानलसहित नायो सविन श्रेष्ठजुं हाकनं नेतृत्वया दावी यानादिइगु दु । मेखेर, क्लासिक इम्पोरियम प्रा.लि.या अध्यक्ष एवं संघया भूतपूर्व महासचिव कृष्णलाल महर्जनजु नं हाकनं नायो पदय् चुनावी प्रतिस्पर्धाय् दनादिइगु दु । अथेहे, निगू प्यानलबाहेक वरिष्ठ न्वकूया पदय् वर्तमान ज्यासना पुचःया महासचिव भरतलाल जोशीजुं स्वतन्त्र उम्मेदवारी बियादिइगु दु ।
स्वर्णजयन्तिया दँ कथं न्ह्यानाच्वंगु इलय् सर्वसम्मत कथंया नेतृत्व स्थापित जूइगु आशा यानाच्वंच्वंपिं पूलापिं नायोलिसें व्यवसायी जगतय् थुगु परिस्थितियात अभिरुची पूर्वक काःगु खनेदु । वरिष्ठ न्वकू पदय् स्वतन्त्र उम्मेदवारीसहितया निगू प्यानलया धेधेँ बल्लायात छखेर पदिय राजनीति हावी जूगुकथं कैच्वंगु खनेदुसा मेखेर लोकतन्त्रया अभ्यासपाखें संस्थागत विकास यायेगु व छःगु हे कार्यकालय् ज्याः पूवंकेगु अभ्यासकथं नं स्वैच्वंगु खनेदु ।
ज्यापु समाजपाखें निर्वाचित जनप्रतिनिधिपिन्त लसकुस
नृपेन्द्रलाल श्रेष्ठ | दिल्लाथ्व चतुर्दशी ११३७ (जुलाई ८ २०१७)
ज्यापु समाजपाखें स्थानीय तहया चुनावय् निर्वाचित जुयादीपिं महानगर प्रमुख, उप–प्रमुख, वडाध्यक्षलिसें वडा दुजःपिन्त लसकुस याःगु दु । उगु ज्याझ्वःया दथुइ ज्यापु प्रज्ञाभवन संग्रहालयया अवलोकनया नापनापं सांस्कृतिक ज्याझ्वः जुल ।
उगु ज्याझ्वलय् यल महानगरपालिकाया प्रमुख चिरिबाबु महर्जनं उखेंथुखेंया ग्वाहालिं ज्यापु प्रज्ञाभवन दय्केगु ज्या क्वचाःगु खँ न्ह्यथनादिसें बृद्धाश्रमया नितिं भारतीय राजदूतपाखें न्यागू करोडया ग्वाहालि वइगु नं जानकारी बियादिल । थ्वहे झ्वलय् उप–प्रमुख गीता सत्यालं ज्यापु समाजया नितिं छुं नं ग्वाहालि याय्त यल महानगरपालिका लिचिली मखु धयादिल ।
ज्याझ्वलय् किपू नगरपालिकाया प्रमुख रमेश महर्जन, गोदावरी नगरपालिका, महालक्ष्मी नगरपालिकाया प्रमुखलिसें यलया प्रमुख जिल्ला अधिकारी राजकुमार श्रेष्ठ नं थःथःगु नुगःखँ तयादीगु खः ।समाजया नायः प्रेम महर्जनं ज्यापु प्रज्ञाभवन दय्केगु झ्वलय् योगदान बियादीपिनिगु जानकारी बियादीगु खः । ज्याझ्वलय् महानगरपालिकया २९गू वडाया वडाध्यक्षलिसें नगर प्रहरी निरीक्षक ठूले राई, सांसद चन्द्र महर्जनपिं लिसें आपालं ब्यक्तित्वपिनिगु उपस्थिति दुगु खः ।
ज्याझ्वः समाजया नायः प्रेम महर्जनया सभाध्यक्षताय् जूगु खः ।
‘चिनियाँ समाबेशी शान्तिपूर्ण संस्कृति’ बिचार गोष्ठी क्वचाल
नृपेन्द्रलाल श्रेष्ठ | तछला थ्थः दुतिया ११३७ (मे २७ २०१७)
“चिनिया समाबेशी शान्तिपूर्ण संस्कृति” बिषयस बिचार गोष्ठी क्वचाःगु दु ।
अरनिको समाजया ग्वसालय् जूगु ज्याझ्वलय् चिन् चियानफानं चिनियाँ सभ्यताय् समावेशी संस्कृति अवधारणायात कयाः प्रबचन बियादीगु खः ।
मू बक्ता चियानफानं चिनियाँ जीवनशेली न्हियान्हिथं रहनसहन, नसा, त्वँसा आदि दुने समाबेशी संस्कृतिइ जः व्हलादीगु खः ।
चिनियाँ जिवनशैलि, मनूया उसाँय, लकस व समाबेशीताय् आधारित जुयाः बिकास यानातःगु धइगु खँय् बः बियादीगु खः ।
शान्ति निकुञ्ज पूर्व विद्यार्थी संघ न्हूगु ज्यासना पुचःया भिन्तुना ज्याझ्वः
लहनान्युज | बछलागा अष्टमी ११४६, बैसाख २७ आईतवाः
शान्ति निकुञ्ज पूर्व विद्यार्थी संघ न्हुँ दँ व न्हूगु ज्यासना पुचःयात भिन्तुना बीगु ज्याझ्वः शनिवाः जूगु दु।
अनिता मानन्धरया अध्यक्षताय् जूगु ज्याझ्वलय् पाहाँकथं पूर्व विद्यार्थीपिं एस एल सी सेकेण्ड बायच वि.सं.२००८ सालया शिव बहादुर नेपाली, पाहाँकथं डा. मदन मानन्धर, जुजुभाई तुलाधर, श्रद्धाचारी गुरुमांपिं झायादीगु खः।
बि.सं. २००२ सालय् क्रान्तियाना निस्वंगु शान्ति निकुञ्जया विद्यार्थीपिं अब्बल जू धैगु दसू कथं २०२० सालया एसएलसी बोर्ड फस्ट हयेत ताःलाम्ह दिपक बज्राचार्ययात लुमंकूगु दु।अथेहे पूर्व बिद्यार्थीपिनिगु दथुइ सल्लाह व सुझाव कालबिल जुलधाःसा चय्छदँ पुलांगु स्कूलयात अझ बांलाक्क न्ह्याके फइगु खय् डा. मदन मानन्धरं बह बियादिल।
प्राविधिक युगय् प्रविधियात छ्यला विद्यार्थी पुचःनं यानाच्वंगु, यायेगु व यायेतेंगु ज्याया बारे खँलाबला ब्यातधाःसा स्कूलया क्वालिटी अझ बांलाईगु खँ पाहाँकथं झायादीपिं पूर्व विद्यार्थीपिसं धयादीगु दु। पूर्व विद्यार्थी पुचःयात मदिक्क न्ह्याकेत तःधंगु योगदान बियादीम्ह पुलांम्ह अध्यक्ष धावक बैकुण्ठ मानन्धरयात लुमंकुसें बैकुण्ठ मानन्धर दौड प्रतियोगितायातनं निरन्तरता बीकेगु खँ न्हूगु ज्यासना पुचःया अध्यक्ष अनिता मानन्धरं कनादिल।
थुगुहे ज्याझ्वलय् न्हूगु ज्यासना पुचःया नायः अनिता मानन्धर, न्वकू, नरेश कुमार मल्ल, मू छ्यांजे शंकर महर्जन, दाँभरिं रेणु शाही, दुजःपिं गौरी श्रेष्ठ, कदम शोभा कंशाकार, दिपंकर मुनि ताम्राकार, त्रिरत्न मानन्धर, निदेश शाही, राधेश्याम महर्जन, अमिर मैया रञ्जितपिंत मूपाहाँ शिव बहादुर नेपाली व निबर्तमान अध्यक्ष बिबेन्द्र भक्त प्रधानांग दसिपौ लल्हाना बैधानिकता बियादीगु खः ।
दार्चुलाय् भुखाय् ब्वल
लहनान्युज | बछलागा अष्टमी ११४६, बैसाख २७ आईतवाः
दार्चुलाया तपोवन जःखः केन्द्रबिन्दु जुयाः भुखाय् ब्वःगु दु।
राष्ट्रिय भूकम्प मापन लिसें अनुसन्धान केन्द्रया कथं थौं सुथसिया ११ः५५ ताः इलय् ४.१ म्याग्निच्युडया भुखाय् ब्वःगु दु धका धाःगु दु।
भुखाचंया धक्का स्थानीय कथं वाःचायेकूगु खः।
