राष्ट्रपति रामचन्द्र पौडेलं नखचखलं फुक्क जातजाति दथुइ थवंथः सद्भाव अभिवृद्धि यायेगु लिसें पारिवारिक, सामुदायिक व सामाजिक एकता कायम यानातयेत ग्वाहालि याइगु न्ह्यथनादीग दु।किरात समुदायया नखः उभौलीया झ्वलय् सकलसित सुख, शान्ति व समृद्धिया भिंतुना प्वंकादिसें वय्कलं थुजाःगु सांस्कृतिक नखःचखलं देय्या सांस्कृतिक विविधताया सम्मान व संरक्षणयात कायम यानातइगु धयादिल।

लिसें समानता व सहअस्तित्वया आधारय् थी थी जातजाति व समुदायदथुइ थवंथः सद्भाव व एकतायात सुदृढ यायेत ग्वाहालि जुइगु वय्कःया धापू खः।ऋतु ह्यूपाःया सङ्केत बिइगु नखःकथं व जङ्गली जनावर लिसें पशुपन्छी बेँसीं लेकपाखे बसाइँ सरे जुइगु ई माने यानाः वैशाख शुक्ल पुन्हियात उभौली पर्वकथं हनी ।

वसन्त ऋतुया आगमनलिसें बाली तयेगु ई सुरु जुइगु जूगुलिं प्रकृति व पितृपूजक किरातीतय्सं बालीनाली बांलायेमा, प्राकृतिक प्रकोप व विपत्ति मवयेमा धकाः भूमि, बाली व पितृपूजा याइ।

राष्ट्रपति पौडेलं उभौलीइ तःगु बाली उधौलीइ छेँय् दुतहइगु चलन दूगु न्ह्यथनादिसें थ्व दिंकुन्हु साकेला नृत्य यानाः साःसाःगु नसात्वँसा नयाः थवंथः भिंतुना कालबिल यानाः न्ह्यइपुक थ्व नखः हनेगु परम्परा दूगु धयादिल।

वय्कलं उभौली पर्वं फुक्क नेपाःमितय्के राष्ट्रिय एकताया भावना थनाः सद्भाव, सहिष्णुता व बन्धुत्वया भावनायात क्वातुकेत सकसित नं मद्दिक प्रेरणा बिइमा धइगु कामना यानादिल। 

नेवाः देय् दबूया ग्वसालय् थौ छगु ज्याझ्वः दुथुइ प्रतिनिधि सभा २०८२ य् निर्वाचित जुयादीपिं नेवाः सांसद हना ज्याझ्वः याःगु दु।

प्रतिनिधि सभाय् १८ सांसदपि प्रत्यक्ष नाप समानुपातिकय् त्याःगु खः। छगु ज्याझ्वः दथुइ देय् दबूया संरक्षक मल्ल के सुन्दरं निर्वाचित जुयादीपिन्त हनापौ लःल्हानादीगु खः।

अथेहे च्याक्वःगु तँमुज्या निर्वाचन कमिति च्वना ज्या यानादीपिन्त न सुभाय् पौ देछाय्गु ज्या जुगु खः।

थौ हे देय् दबूया संरक्षक नाप सल्लाहकारपिन्त न मनोनित पौ देय् दबूूया नाय रश्मिला प्रजापति लःल्हानादीगु खः।

मातृभाषाया न्हापाम्ह पत्रकार भाषा जवाः नापं नेपालय् थेरवाद बुद्धधर्म पुनरुत्थानया न्ह्यलुवा धर्मादित्य धर्माचार्यया १२४ क्वःगु जन्मजयन्ती व ११ क्वःगु मातृभाषा पत्रकारिता दिवस हःगु दु।

यलया सप्तपुर महाबिहारय् धर्मादित्य धर्माचार्य सिरपा देछायेगु ज्याझवः न जुगु खः। ज्याझ्वलय् पत्रकार दबू यल जिल्लाया नायः मन्जु बज्राचार्यं बरिष्ठ पत्रकार रमेश काजि स्थापितयात खादां न्यकेकादिगु खःसा पत्रकार दबूया केन्द्रिय नायः नृपेन्द्रलाल श्रेष्ठं दोसल्ला न्यकादीगु खःसा मू पाहाँ नेपालभाषा एकेडेमीया भाइस चान्सलर डा.पुष्पराज राजकर्णिकार हनापौ लःल्हानादीगु खः।

नुगँ खँ तयेगु झ्वलय् मूपाहाँ डा राजकर्णिकारं धर्मादित्य धर्माचार्य बहुआयामिक ब्यक्तित्व खः धका धयादीसे वयकलं पत्रकारिता, साहित्य, नेपाल संवत नाप बुद्ध धर्म तःजिक हनेत समारोह समिति दय्का बुद्ध धर्म प्रचार याःगु ज्या न लुमकादिल। पत्रकार दबूया केन्द्रिय नायः नृपेन्द्रलाल श्रेष्ठं धर्मादित्य धर्माचार्यं मातृभाषा पत्रकारिता ख्यःया न्ह्याकु लुमकादिसे अन्तराष्ट्रिय ख्यलय् तक प्रचार प्रसार जुगु दु धका धयादीगु ख।

पत्रकार दबू यल शाखाया नायः मन्जु बज्राचार्यया सभाध्यक्षताय् जुगु उगु ज्याझ्वलय् केन्द्रिय सल्लाहकार किरण शाक्य, निवर्तमान नायः सुरजबीर बज्राचार्य, यल नेपालभाषा मंकाः खलःया नायः महेन्द्र महर्जन, पत्रकार दबू यल शाखाया सल्लाहकार सुरेश प्रधान नाप धर्मादित्य धर्माचार्यया छेँय् सृजना नेवाःया न उपस्थिति दुगु खः।

नेवाः पत्रकार राष्ट्रिय दबू व मा भाय् पुचः यलया ग्वसालय् लसताय् यल महानगरपालिका न्ह्यःने च्वंगु झना क्यबय् च्वंगु झ्वाताय् माल्यार्पण सुथय् यायेगु ज्या जुगु खः।

येँया भुइजःसिया बुढानीलकण्ठ नगरपालिका, सांस्कृतिक प्रतिष्ठान ऐन, २०८० या दफा १२ या उपदफा १ कथं नीस्वंगु समितिया सिफारिसया आधारय् नेवाः न्ह्यलुवाः बरिष्ठ पत्रकार साहित्यकार मल्ल के सुन्दर ऐनया दफा ७ या उपदफा २ कथं बुढानीलकण्ठ नगरपालिका सांस्कृतिक प्रतिष्ठानया कुलपति/अध्यक्ष पदय् मनोनित जूगु दु।

नगरपालिकाया तिथि २०८२/१२/२७ या ८३ क्वःगु नगर कार्यपालिका बैठकया निर्णय कथं थ्व पदया पदावधि ऐनया दफा ७ उपदफा ४ कथं प्यदँया जुइ धकाः धयातःगु दु।

उगु बुढानिलकण्ठ नगरपालिकाया प्रमुख प्रशासकीय अधिकृत अजय बर्तौलां थ्व नियुक्तया जानकारी बियादिसें वयकःपाखें प्रतिष्ठानया उद्देश्य पूवंकेत प्रचलित ऐन, कानून व कार्यविधिया दुने च्वना कला, संस्कृति व परम्पराया संरक्षण, प्रवद्र्धन व विकास निर्माणया ज्याय् महत्वं जाःगु योगदान यानादी धकाः विश्वास प्वंकादीगु दु।

राष्ट्रिय स्वतन्त्र पार्टी (रास्वपा) संसदीय दलया बैठक च्वना च्वंगु दु। बैठकय् पार्टी संसदीय दलया नेता बालेन्द्र (बालेन) शाह न धाःसा ब्बति काःगु मदु।

थ्व स्वया न्ह्यः च्वंगु दलया बैठकय् न बालेनं ब्बति काःगु मदु। थौंया बैठकय् पार्टी सभापति रवि लामिछाने न ब्बति काःगु दु। रास्वपां संसदीय दलया थौं च्वंगु बैठकयात अनौपचारिक धाःगु दु।