Display Style:
Column Style
सम्पदा पुनःनिर्माणया नितिं ललितपुर विकासको लागि समाजया २३ करोड ७ लख बजेट
राजेश बज्राचार्य | ने. सं. ११३८ कछलागा अस्तमि (नोभेम्वर १२, २०१७ ) यल
यलया थीथी ऐतिहासिक सम्पदा, बौद्ध विहारया पुनःनिर्माणय् सक्रिय ललितपुर विकासकालागि समाजया ११क्वःगु दँ मुँज्या क्वचागु दु । समाजं थःगु ५ करोडया नियमित बजेटयात थुगुसीइ २८ करोड ७ लख बजेट प्रस्तावित याःगु दु ।
भुखाचं क्षतिग्रस्त सम्पदा पुनःनिर्माणया नितिं ललितपुर विकासको लागि समाजपाखें २३ करोड ७ लाखको प्रस्ताव भारतीय राजदूतावासय् पेश याःगु खः ।
१०दँ न्ह्यःनिसें भारतीय राजदूतावासपाखें ग्वाहाली कया यलया ऐतिहासिक सम्पदा, बौद्ध विहारया पुनःनिर्माण ज्याय् सक्रिय जुयाच्वंगु समाजया नायो बुद्धिराज बज्राचार्यजुं थुगु बजेट प्रस्ताव यानादीगु खः । भूखाःचं क्षतिग्रस्त जुया पुननिर्माण मजूनिगु जीर्ण सम्पदा पुनःनिर्माण थुगुसीइ पूवंक न्ह्याकेत समाजया नियमित ५गू करोडया बजेटयात बृद्धि यायेगु तातुनां वयेकलं प्रस्ताव यानादीगु खः ।
दँ मुँज्याय् मू पाहाँकथं झायादीम्ह भारतीय राजदूतावासया महामहिम राजदूत मन्जिभसिङ्ग पुरीजुयात बजेट ग्वाहालीया अनुरोध यासें वयेकलं धयादिल, ‘थुगु ज्याः पूवंकेत जिं ८१दँ मखु ५५दँ दुम्ह ल्यायेम्हया उर्जा ज्वनाच्वना । १०दँ तक भगवानया चिठी मवइगु जुःसा यलया सम्पूर्ण मूर्त अमूर्त सम्पदायात संरक्षित जूइगु थःगु परिकल्पना पूवंकेगु ईच्छाशक्ति ल्यंदनि ।’
प्रस्तावित योजनाय् हिरण्यवर्ण महाविहार, गुईत बही व दीगी, नापीचन्द्र महाविहार, कुमारी छेँ, गोपीचन्द महाविहार, जेष्ठ वर्ण महाविहार लगायत बौद्ध विहार, थीथी फल्चा व देगःया पुनःनिर्माण दुथ्या ।
ज्याझ्वःसं नेपाःया लागि भारतीय राजदूत मन्जिभसिङ्ग पुरीजुं यलया ऐतिहासिक व पुरातात्विक महत्वया मूर्त सम्पदा, बौद्ध विहार, फल्चा, सत्तः जक मखु अमूर्त संस्कृति व ललितकलाया संरक्षण व पुनःनिर्माणया नितिं भारत सरकार फूगु ग्वाहाली यायेत तयार दुगु धयादिल । नेपाःयात सम्पदाया गौरव जक मखुसे आर्थिक सम्बृद्धिपाखें उन्मुख यायेगु सम्भावनापाखे न्ह्याःवने फयेमा धैदिसें वयेकलं भैसीपाटीया अस्पतालयात नेपाःया उत्कृष्ट अस्पताल दयेकेगु ज्या नं समाजपाखें सम्भव जुइफुगु इंगित यानादिल ।
नेपाः भारत दथुया शताब्दीयौंं पुलाँगु धार्मिक, सांस्कृतिक सम्बन्धयात सम्मान यासें थनया सम्पदा संरक्षण व विकासनापं आत्मिय सम्बन्धया निरन्तरता नितिं भारत सरकार सदा सकारात्मक दूगु राजदूत पुरीं उल्लेख यानादिल । वयेकलं भारतीय राजदूतावासपाखें समाजनापं सहकार्य याना न्ह्याःगु सम्पदा पुनःनिर्माणयात निरन्तरता बिइगुलिइ बः बियादिल ।
समाजया नायो बुद्धिराज बज्राचार्यजुं सम्राट अशोक व चारुमतीया इतिहास स्मरणयासें यलया प्यखेरं ४गू मुख्य स्तुपा स्थापना याःगु ईलंनिसें ललितपुर नगर व भारतया आपसी सहयोगया सम्बन्ध दुगुलिइ बः बियादिल ।
पूर्व संस्कृति मन्त्री जुयादिधुंकुम्ह नायो बज्राचार्यजुं सरकार व स्थानीय तहपाखें भूखाचं पीडितपिनिगु पुनःस्थापना व क्षतिग्रस्त सम्पदाया पुनःनिर्माणय् मागुकथं ध्यान तयेमफूगु न्ह्यथनादिल । वयेकलं जनप्रतिनिधिपिंसे थनया संस्कृति, सम्पदा स्वःवइपिं पर्यटकत महानगरपालिकाया मुख्य आम्दानी जूलं नं थुकिया संरक्षणय् माकथं न्ह्यःज्यागु खनेमदूगुलिइ चिन्ता प्वंकादिल ।
समाजपाखें भारतीय राजदूतावासया ग्वाहाली व भौतिक योजना मन्त्रालय, शहरी विकास मन्त्रालय नापं ललितपुर महानगरपालिकाया प्राविधिक ग्वाहालि कया आठ करोड लागत दुतिना पुरातात्विक महत्वया १६ गू सम्पदा पुनःनिर्माण कार्य सम्पन्न यायेधुंकुगु दु । न्हापाँगु चरणय् शंखमुलया घाट पुनःनिर्माण, दौबहाःया कलात्मक ध्वाखा निर्माण, यलमुली त्वाः या चपाः छेँ पुनःनिर्माण, इन्द्रायणी पार्क दुनेया फल्चा निर्माण, मच्छिन्द्रबहाःया कलात्मक ध्वाखा, फल्चा व दुनेया बगैँचा निर्माण, लोकाकिर्ति महाविहार मर्मत व नापीचन्द्र महाविहारया पुनःनिर्माण जुगु दु ।
निगूगु चरणय् नागबहाः टोल सुधार समितिया छ,ेँ भिन्द्योलाछी चपाः छें, लुखुसी फल्चा व कुलदेवताया आगँ छेँ, श्रीवच्छ महाविहार आजु निवास निर्माण, मयूरवर्ण महाविहार दीगी छेँ, बुंगमतीया गंगा पोखरी व श्रीमहायान बौद्ध धर्म समाज गुम्बा खोकनाया पुनःनिर्माण ज्या जुयाच्वंगु दु ।
समाजं स्वंगूगु चरणया योजनायात ५गू करोडया लागतय् लोटस रिर्सच सेन्टरया कलेज भवन, विश्वकर्मा मन्दिर व जिवित देवी कुमारी निवासया पुनःनिर्माण यायेगु योजना पेश याःगु दु ।
समाजया दँ मँुज्यासं सल्लाहकार परिषद्या अध्यक्ष रामलाल श्रेष्ठ, अम्बिका श्रेष्ठ, मानार्थ दुजःपिं एनआरएनया संस्थापक अध्यक्ष उपेन्द्र महतो व पुरातत्व विभागया महानिर्देशक भेषनारायण दाहालजुं नुगः खँ तयादिगु खःसा ज्याझ्वःसं थीथी क्षेत्रया प्रतिष्ठित व्यक्तित्वपिं, सभासद चन्द्र महर्जन, सिद्धिलाल सिं, पूर्व प्रधानसेनापति रुकमांगत कटवाल लगायत थीथी समाजया प्रतिनिधिपिनिगु उपस्थिति दुगु खः ।
किपा ः राजेन्द्र शाक्य
एफ एमपाखें हलिमय् नेवाः प्रतिभा न्ह्यब्वयेगु अभियान न्ह्यातः
लहनान्यूज | ने. सं. ११३८ कछलागा सप्तमि (नोभेम्वर १०, २०१७), किपू
नेवाःतय्गु वस्ती वस्तीइ वना स्थानीयवासीया प्रतिभा न्ह्यब्वयेगु आज्जु ज्वना नेवाः एफ.एम. १०६ फुति ६ पाखें अभियानया सुभारम्भ जूगु दु ।
शनिवाः ने.सं. ११३८ कछलागा अष्टमी (कार्तिक २५ गते) न्हिनय् ११ बजेनिसें न्हिनसिया २ ता ईतक नेवाः एफ. एमया संयोजनय् जूइगु थुगु अभियानया प्रत्यक्ष प्रशारण हलिं न्यंकं च्वनाच्वंपिं नेपाःमिपिन्सं इन्टरनेटया माध्यमं newafm.com.np पाखें न्यने फइगु जूगु दु ।
अभियानया सुभारम्भ स्वनिगलय् दक्ले न्हापां वस्ती जूगु किपूस्थित थक्वाःया झ्यालं फल्चा लागाय् हलिं नेवाः गुथि थक्वाः कचा, हलिं नेवाः गुथि सोनितपुर कचा, हलिं नेवाः गुथि थानकोट कचा व श्री आदिनारायण भजन मण्डल थक्वाःया ग्वसालय् जूइत्यंगु खः । न्हापाँगु प्रत्यक्ष प्रसारणय् थक्वाःया साहित्यकारपिंपाखें साहित्य पाठ, कलाकरपिंपाखें सांस्कृतिक प्रस्तूति व स्थानीयविज्ञपाखें थक्वःया ऐतिहासिक पक्षनिसें अनया समस्या न्ह्यब्वयेगु ज्याः जुइगु जूगु दु ।
अभियानयात लय् लय् पतिकं लिपांगु शनिवाः नेवाः वस्ती वस्तीइ वना निरन्तरता बिइगु नेवाः एफ.एम. १०६ फुति ६ पाखें जानकारी ब्यूगु दु ।
२०दँ लिपा यलया सुन्दरीचोक सर्वसाधारणयानितिं खुल्ला
राजेश बज्राचार्य | ने. सं. ११३८ कछलाथ्व नवमी (अक्टुबर २९, २०१७), यल
यलया लायकूस्थित सुन्दरीचोक २०दँ लिपा सर्वसाधारणया नितिं खुल्ला जूगु दु ।
आइतवाः कछलाथ्व नवमीकुन्हु (कार्तिक १२ गते) पाटन संग्रहालयया २०क्वःगु वार्षिकोत्सवया लसताय् नेपाल सरकार, संस्कृति पर्यटन तथा नागरिक उड्डयन मन्त्रालय अन्तर्गतया पाटन संग्रहालय विकास समितिया ग्वसाःलय् ‘जर्नल अफ पाटन म्यूजियम अंक १’ या विमोचनलिसें सुन्दरी चोकया प्रदर्शनी कक्षया उलेज्या जूगु खः ।
२० दँया इतिहासय् निगूगु सफूकथं प्रकाशित ‘जर्नल अफ पाटन म्यूजियम अंक १’या लोकार्पण शताब्दी पुरुष सत्यमोहन जोशीजुं यानादीसें वयेकलं नेपाःया हे न्हापाँगु आत्मनिर्भर म्यूजियम कथं स्थापित संग्रहालयया महत्वबारे ध्वाथुइकादीगु खः । अथेहे, पुरातत्व विभागया महानिर्देशक भेष नारायण दाहाल, संस्थापक निर्देशक संगीता थापा व सदस्य सचिव सुरेष लाखेजुं थःगु नुगः खँ तयादीगु खः ।
ज्याझ्वःलिपा केभिपिटी नेपाया निर्देशक रोहित रंजितकारजुं पाटन संग्रहालय विकास समितिया मू दूजः एवं नेपाल सरकार, संस्कृति पर्यटन तथा नागरिक उड्डयन मन्त्रालयया सचिव महेश्वर न्यौपाने, पुरातत्व विभागया महानिर्देशक भेष नारायण दाहाल, संस्थापक निर्देशक संगीता थापा, अमूर्त संस्कृति विज्ञ मोहन व्यञ्जनकार लगायतया विशेष व्यक्तित्वपिनिगु समुपस्थितिइ सुन्दरी चोकय् व्यवस्थित संग्रहालयया न्हापांखुसी अवलोकन याकादीगु दु ।
सन १९९७ तत्कालिन जुजु वीरेन्द्र शाहपाखें पाटन संग्रहालयया उलेज्या जूगु खःसा संग्रहालययात थुगुसीइ सुन्दरी चोक अवस्थित दरवारय् ऐतिहासिक सम्पदाया सामग्री व्यवस्थितयाना म्यूजियम क्षेत्रया बृद्धि याःगु खः ।
आवंनिसें विदेशी, सार्क व आन्तरिक पयटकयानितिं खुल्ला जुइगु संग्रहालयया तुसाहिटी नापं पश्चिमपाखे अवस्थित हस्तदन्त (किसिया दन्तं) सुसज्जित १८औ शताब्दीया कलात्मक झ्याःया प्रदर्शन विशेष आकर्षण जूइगु संग्रहालयया निमित्त कार्यकारी निर्देशक सुरेष लाखेंजुं विश्वास प्वंकादील । ‘राजा सिद्धि नर्सिङ्ग मल्लया कालय् निर्मित थुगु झ्याःया बिशेषतायात सन २०१३य् भियनाया यूनिभर्सिटी अफ अप्लाइड आर्टसया पुननिर्माण विशेषज्ञ टोलीया कुतलं सरसफाई यासें हस्तदन्तया १० प्रतिशत अंशयात सुरक्षित जुवंगु खनेदु ।’ वयेकलं जानकारी बियादील ।
एकद्वार प्रणाली अन्तर्गत हाल विदेशी, सार्क राष्ट्र व आन्तरिक पर्यटकपिन्स पुलावयाच्वंगु कथहं प्रतिव्यक्ति द्वछि, निसःत्या व ३० तकाः ध्यबां हे थुगु ३० तकाः ध्यबां हे थुगु थाय्या अवलोकन यायेफैगु जूगु दु ।
२०७३/०७४ या तथ्यांंक अनुसार कूल १,७६,९०६ अवलोकन यानादीगु मध्ये नेपाःया कूल २४,२१९ विद्यार्थीपिन्स १५तकाः जक पुला आइडी कार्डया सुविधा कैच्वंगु खनेदु । विदेशीबाहेक उलिहे ध्यबाः पुला आवंलि थुगु थायया अध्ययन नं यायेफैगु अवस्था धैगु विद्यालय स्तरय् न्हूगु पुस्तायात सम्पदा संरक्षणया महत्वपूर्ण ज्ञान हस्तान्तरणय् सुखद पक्ष जूइगु खनेदु ।
बन्धुत्वया नमूना — चोभार सतःया उलेज्या
लहनान्युज | ने. सं. ११३८ कछलाथ्व अप्तमि (अक्टुबर २८, २०१७) येँ
च्या न्ह्यःनिसें येँया वंघलय् (ईन्द्रचोक) कतिपुन्हि व पाहाच¥हेया इलय् यसिँ थनेत माःगु सिं (सल्ला) व्यवस्था यानादिइपिं आदिनाथ सामुदायिक वन उपभोक्ता समूह व श्री आकाश भैरवनाथ ईन्द्रचोकया बन्धुत्वया दसू किपू नगरपालिकाया चोभारय् छगू सतःया उलेज्याकथं स्थापित जूगु दु ।
श्री आकाश भैरवनाथ इन्द्रचोक व आदिनाथ सामुदायिक वन उपभोक्ता समूह, चोभार पाटी पौवा निर्माण समितिया मंकाः कुतलं निर्माण सम्पन्न जूगु थुगु सतःया उलेज्या थौं चोभारया स्थानीयवासी एवं युवा तथा खेलकूद मन्त्री माननीय राजेन्द्र कुमार केसीजुं यानादीगु खः ।
ज्याझ्वलय् थुगु बन्धुत्वया सतः उलेज्यासं येँ महानगरपालिकाया प्रमुख बिद्या सुन्दर शाक्य व किपू नगरपालिकाया प्रमुख रमेश महर्जनजु नं विशेष पाहाँ कथं झायादीगु खः ।
सतः निर्माण समिति एवं श्री आकाश भैरवनाथ इन्द्रचोक (वंघ)या नायो शरद कुमार डंगोलया सभानायोसूइ न्ह्याःगु ज्याझ्वलय् मन्त्री थापाजुं त्वाःदेवाय् मत च्याकाः उलेज्या यानादीगु खः । ज्याझ्वलय् दाता सुनाकोठीया मदूम्ह गिरेन्द्रलाल सुवाल (कृष्ण)या वयेकया म्ह्याय् सुनन्दा सिंह डंगोलया ग्वाहालीं निर्मित श्री आकाश भैरवया मूर्ति व शिलालेखया उलेज्या नं मन्त्री थापाजुं यानादीगु खःसा मंकाः निर्माण समिति व दातापिनिगु नाँ धलया शिलालेख उलेज्या किपू नगरपालिकाया प्रमुख रमेश महर्जनजुं यानादीगु खः ।
थीथी संघसंस्थाया २,५७,६७३ तका, शिलालेखय् उल्लेखित भक्तजनपिंपाखें ८१०६८५।२५ तका बाहेक ९१०५ तका, बैंक ब्याज व शिालपत्रया नितिं ४८द्व नापं याना कूल ११,३२,५९६।०५ तका संकलित जूगु मध्ये कूल खर्च १०,२७,६२३ तका खर्चय् सतः निर्माण जूगु व १०४९७०।४६ ल्यंदनिगु जानकारी दाँभरी श्यामबहादुर सिं जानकारी बियादील ।
ज्याझ्वलय् निर्माण समितिया प्रकाशनय् मोक्ष बहादुर अमात्यया प्रधान सम्पादन व रत्नकाजी मनया सम्पादनय् पिदंगु विशेष स्मारिका नं बिमोचन जूगु खः । थुगु सतःया स्थापनापाखें बन्धुत्वया सन्देश व थुगु लागाया पर्यटकीय महत्व बृद्धि जुया आन्तरिक व बिदेशी पर्यटकपिं आकर्षित जूइगु खँय् वक्तापिनिसं बः बियादीगु दु ।
विशिष्ट सम्मानसहित नेवाः संकिपा नःख क्वचाल
लहनान्युज | ने. सं. ११३८ कछलाथ्व अप्तमि (अक्टुबर २८, २०१७) येँ
नेपाःया न्हापांगु “आमा” संकिपाय् मां जुयाः म्हितादीम्ह अभिनेत्री चैत्यदेवी सिंह व ख्यालिजुजु मदनकृष्ण श्रेष्ठयात बुंगद्यो रथया प्रतिक व विशिष्ट सम्मानपौ लःल्हाना नेवाः संकिपा नःख क्वचायेकुगु दु ।
नेवाः संकिपा समाजया ग्वसालय् वंगु शुक्रवानिसें न्ह्याःगु संकिपा नःखया समापन ज्याझ्वःसं थुगु नेवाः संकिपा समाज सम्मान ११३७ मू पाहाँ जनगायक भृगुराम श्रेष्ठ व नेपाःया गोल्डन भ्वाइसः प्रेमध्वज प्रधानजुया ल्हाःतिइ लःल्हागु खः ।
सम्मानित जुयादिम्ह अभिनेत्री चैत्यदेवी सिंहजु संकिपा ख्यलय् थःगु संघर्षया खँ लुमंकुसें नेवाः संकिपाया राज्यपाखें उचित सम्मान जुइमा धका न्हूदँया भिन्तुना बियादिल । अथेहे सम्मानित ख्यालिजुजु मदनकृष्ण श्रेष्ठजुंसंगीत ख्यःया अग्रज भृगुराम श्रेष्ठ व प्रेमध्वज प्रधानया प्रेरणां नेवाः ख्यःपाखे थःगु उदय जूगु लुमंकुसें मुनाः सःया सम्मान धुंका थुगु सम्मानया बिस्कं महत्व दूगु तायेकादिल ।
समापन ज्याझ्वःसं स्वकूमिंपिंपाखें ल्यंगुकथं निन्हुया संकिपा मध्ये “तापालय्” संकिपांयात “पब्लिक च्वइस् अवार्ड ”या सिरपा मू पाहाँ श्रेष्ठ व प्रधानजु मंकाःकथं लःल्हानादीगु खः । निक्वगु संकिपा नःखसं ’‘तापलय्’, ‘तिनतिकः महाबिकः’, ‘चन्द्रमान’, ‘लिधंसा’, ‘कल्ली’, ‘थम्हं म्हूगु गाः’ व ‘पःखाः’ नापं याना च्यागू संकिपांया ब्वति दुगु खः । थुपि ८गू संकिपामधये “पःखाः” धाःसाः धेंधेंबल्लाखय् दुमथ्याकूगु संकिपा खः ।
विशेष पाहाँ कथं झायादीम्ह आदिवासी जनजाति चलचित्र महासंघया नायः अमृत सुनवारजुं आदिवासी संकिपाया विषयवस्तु साँस्कृतिक रुपं महत्वपूर्ण जुसां चलचित्र विकास बोर्डया सेन्सरशिप तधंगु समस्या जुयाच्वंगु धैदिल । वयेकलं आदिवासी संकिपाया तथ्यांकयात राज्यपाखें अनुमोदित याकेगुपाखे छप्पं जुया न्ह्यज्यायेगु नापं राज्यं उचित मान्यतासहित व्यवसायिक प्रदर्शनया बातावरण दयेकेत थुगु नःखया महत्व दुगु खँ न्ह्यथनादिल ।
बिजं ज्याझ्वः नेवाः फिल्म सोसाइटीया मू छ्यान्जे विराजकाजी राजोपाध्यायं न्ह्याकादीगु खःसा ज्याझ्वलय् प्याखँ हुलामि भोगेन्द्र मानन्धरं लसकुस प्याखँ कथं काल भैरवया चचा प्याखँ न्ह्यब्वयादीगु खः । ज्याझ्वलय् मूपाहाँ व विशेष पाहाँपिन्सं संकिपा नखः व हनायात कया नुगःखँ प्वंकादिलसा सोसाइटीया दाँभरीं बिजेन्द्र बज्राचार्यं सुभाय् न्वचु व ज्याझ्वःया सभानायः सोसाइटीया नायः लुजः सिंहं सोसाइटीं न्ह्याकेत्यंगु पलाःयाबारे जानकारी बियादीगु खः ।
किपाः राजेश बज्राचार्य
