शाङ्घाइ सहयोग सङ्गठन (एससिओ) प्लसया शिखर सम्मेलनया झ्वलय् चीनया थियानजिनय् झाया च्वनादीम्ह प्रधानमन्त्री केपी शर्मा ओली व लाओ जनप्रजातान्त्रिक गणतन्त्रया राष्ट्रपति थोल्ङलोन सुसौलिथ नापलानादीगु दु।

नापलायेगु झ्वलय् निगू देय् दथुया थःथवंय् स्वापूया थीथी पक्षतय् खँल्हाबल्हा जूगु खः।उगु झ्वलय् पूर्वउपप्रधानमन्त्री लिसें प्रतिनिधिसभाया दुजः पूर्णबहादुर खड्का, शिक्षा, विज्ञान लिसें प्रविधि मन्त्री रघुजी पन्त, संस्कृति, पर्यटन लिसें नागरिक उड्डयन मन्त्री बद्रीप्रसाद पाण्डे, पूर्वमन्त्री लिसें प्रधानमन्त्रीया आर्थिक लिसें विकास सल्लाहकार डा युवराज खतिवडा, पूर्वमन्त्री लिसें प्रतिनिधिसभाया दुजः छविलाल विश्वकर्मा, परराष्ट्र सचिव अमृत बहादुर राईलिसेंया नं ब्वति दूगु खः।

चीनया थियानजिन मेइजियान सम्मेलनय केन्द्रय आइतवाःनिसें न्ह्याःगु सम्मेलनय् प्रधानमन्त्री ओलीलिसें ब्वति कयाच्वंगु देय्यापिं राष्ट्र प्रमुख लिसें सरकार प्रमुखपिंसं थौं सम्बोधन यानादीत्यंगु ज्याधलः दु।

यलया प्रमुख जिल्ला अधिकारी सुमन घिमिरें सेवा प्रवाहयात अपूक नापं संस्कृति, सम्पदाया संरक्षणय् सहजीकरण यायेगु थम्हेसिया माःगु ग्वहालि यायेगु धका धयादीगु दु।

जिल्ला प्रशासन कार्यालयय् आईतवाः सञ्चारकःमि नाप खँ ल्हानादीसे अथे धयादीगु खः। प्रमुख जिल्ला अधिकारी घिमिरं धयादीगु दु ‘छिकपिन्स ब्यूगु सुझावयात ध्यानय् तया पुरात्तात्विक थाय्, पूखु, गुठीया जग्गा संरक्षण यायेगुलि ध्यान बिइ।’ धका धया धयादीगु खः।

नेवाः पत्रकार राष्ट्रिय दबूया वरिष्ठ उपाध्यक्ष सुनील महर्जनं प्रशासनं याये माःगु नियमित दायित्वया अतिरिक्त थीथी जात्रा, पर्व, संस्कृति सम्पदा ल्यकेगु निति कुतः यायेमाःगु, सहजीकरण व समन्वयया भूमिका निर्वाह यायेमाःगुलि बःबियादीगु खः। बरिष्ठ उपाध्यक्ष महर्जनं सूचना प्रवाह यायेगु अझ व्यवस्थिति यायेमाःगु, मातृभाषाया पत्रकारिता यानाच्वपि पत्रकार तय्त प्रशासनं ध्यान बिइमाः धका धयादीगु खः।

उगु ज्याझ्वलय् पत्रकार दबू यलया दुजः सनि शाक्य, हर्कबहादुर श्रेष्ठ, नेपालमण्डल टेलिभिजनया रामराजा बज्राचार्य व सम्पदा नेपाल टेलिभिजनया प्रमुख विश्वन्तर शाक्यपिनिगु ब्बति दुगु खः।

थुगुसिइया येँयाःया निंतिं यःसिंयात नगरय् दुत हःगु दु। नेपाल पञ्चाङ्ग निर्णायक विकास समितिं ब्यूगु साइत कथं थौं सुथसिया ९ः५२ ताः इलय् येँयाःया यःसिंयात नगरय् दुत हःगु गुठी संस्थानं धाःगु दु।

भोताहितिं सालायंकाः यःसिंयात हनुमानध्वाकाय् हया नगर प्रवेश याकेगु धाइ। येँयाःया यःसिंयात सालेगु ज्याय् परापुर्वकालनिसें साय्मित सक्रिय जुइगु यानाच्वं कथं थौं नं वहे कथं जूगु संस्थानया येँ शाखा ज्याकुथिया प्रमुख लक्षुणा शर्मां धयादीगु दु।

भाद्र शुक्ल द्वितीयाया बहनी ख्वपया चित्तपोल सामुदायिक वनय् चाःगु सल्लाया सिमायात उकिया कन्हय् कुन्हु सालाहयाः भोटाहितिइ तयातइ। येँयाःया यःसिंया निंतिं सालाहःगु थ्वहे सल्लाया सिमायात थौं भोटाहितिं नगर प्रवेश याकागु धकाः संस्थान केन्द्रीय ज्याकुथिया सहायक इन्जिनीयर भीमप्रसाद अधिकारीं धयादिल।

वहे यःसिंयात आः वइगु भदौ १९ गते बिहीवाः भाद्र शुक्ल द्वादशीया दिनय् सुथसिया १०ः३१ ताः ईया साइतय् लाकाः थनेगु याइ । पँ, खिपः लिसेंया ग्वाहालिइ यःसिं थनेगु (इन्द्रध्वजोत्थान) याइ। इन्द्रया ध्वाँय् व पताकालिसें तान्त्रिक विधिं यःसिं थनेगु याइ।

प्रधानमन्त्री केपी शर्मा ओली व भारतया प्रधानमन्त्री नरेन्द्र मोदी दथुइ अनौपचारिक खँल्हाबल्हा जूगु दु।

चीनया राष्ट्रपति सी चिनफिङ व वय्कःया तिरि मय्जु पेङ लियुआनपाखें शाङ्घाई सहयोग सङ्कठन (एससिओ) प्लसया शिखर सम्मेलनय् ब्वति काःगु देय् तय्गु निंतिं ग्वसाः ग्वगु लसकुस समारोहय् वय्कःपिं दथुइ अनौपचारिक खँल्हाबल्हा जूगु खः।

चीनया थियानजिन मेइजियान सम्मेलन केन्द्रय् ग्वसाः ग्वगु सांस्कृतिक न्ह्यब्वयालिसेंया बेलि भ्वजय् प्रधानमन्त्री ओलीलिसें जूगु अनौपचारिक खँल्हाबल्हाया किपा भारतीय समकक्षी मोदीं थःगु सामाजिक सञ्जाल एक्सय् सार्वजनिक यानादीगु दु।

वय्कलं थियानजिनय् नेपाःया प्रधानमन्त्री ओलीयात नापलाना तसकं लय्ता दु धका धयादीगु दु। नेपाः नाप भारतया स्वापू तसकं बालागु व विशेष जूगु नं भारतीय प्रधानमन्त्री मोदीं एक्सय् न्ह्यथनादीगु दु।