राष्ट्रपति रामचन्द्र पौडेलं ‘नेपाली सञ्चार ख्यःयात संविधानय् दूगु अधिकारया पूवंकं छ्यलाबुला व रक्षा यायेगु निंतिं निर्भय कथं सक्रिय जुयाः आमनागरिकयात सत्य सुचं सम्प्रेषित यायेत न्ह्याबलें ताःलायेमा धकाः’ भिंतुना देछानादीगु दु।

विश्व प्रेस स्वतन्त्रता दिवस (मे ३), २०२६ या लसताय् थौं स्वदेश लिसें विदेशय् च्वनादीपिं सकलें पत्रकार, नेपाली तताकेँहे लिसें दाजुकिजापिंत भिंतुना बियादिसें राष्ट्रपति पौडेलं धयादीगु दु, “स्वतन्त्र पत्रकारिताया माध्यमं सत्यया अन्वेषण व तथ्यया सम्प्रेषण यानाः समाजय् सही लिसें सत्य खँ स्थापित यायेत विशेष ध्यान बिइमाः।”

प्रेस स्वतन्त्रता लोकतन्त्रया लिधंसाया थां जूगुलिं लोकतन्त्रया निंतिं जूगु थीथी आन्दोलनय् प्रेसया भूमिका महत्त्वपूर्ण दूगु राष्ट्रपति पौडेलं न्ह्यथनादिल। प्रेस स्वतन्त्रता नागरिकया सुसूचित जुइ धइगु संवैधानिक हक कार्यान्वयन यायेत नापं उतिकं महत्त्वपूर्ण जुइगु व प्रेस गुलि निष्पक्ष, स्वतन्त्र व सबल जुइ, लोकतान्त्तिक व्यवस्था नापं उतिकं सुदृढ जुयाः वनीगु वय्कःया धापू दु। राष्ट्रपति पौडेलया भिंतुना सन्देशय् धयातःगु दु, “प्रेस स्वतन्त्रता सुनिश्चित यासें पत्रकारयात सञ्चार ज्या यायेगु निंतिं सुरक्षित वातावरण दयेमाः, झीगु संविधानं पूवंकं प्रेस लिसें अभिव्यक्ति स्वतन्त्रताया प्रत्याभूत यानातःगु दु।

सुचं सङ्कलननिसें पिथनेगु प्रक्रियातक स्वतन्त्र लिसें मदिक्कं स्वानाः समाचार सम्प्रेषण यानाः सकलें वर्ग लिसें समुदायया सः पिहां वयेमाः।” अप्वया वंगु सामाजिक सञ्जालया छ्यलाबुला लिसें थुकिया माध्यमं पिहां वयेफइगु मिथ्या व भ्रामक सुचंनं नागरिकयात भ्रमय् लाकेफइगु लिसें आः दूगु प्रणालीयात कमजोर दयेकीगु हाथ्या झीगु न्ह्यने दूगु न्ह्यथनादिसें राष्ट्रपति पौडेलं अजाःगु हाथ्याया समाना यासें जनतायात सत्य, तथ्य व विश्वसनीय सुचं पिथनेत थौंया दिनं नेपाली प्रेस जगत्यात थप ऊर्जा व हःपाः बिइमाः धकाः मनतुना दीगु दु।

इम्पेरियल फोटो जर्नालिस्ट अप्रिसिएसन अवार्ड २०२६ अन्तर्गत नेपाःया झीम्ह फोटोपत्रकार सम्मानित जूगु दु।

बङ्गलादेशया राजधानी ढाकाय् जूगु उगु ज्याझ्वलय् मूपाहाँ बङ्गलादेश सरकारया सामाजिक कल्याण राज्यमन्त्री फर्जना शर्मिनं २७ म्ह उत्कृष्ट फोटोपत्रकार तय्त सम्मान याःगु खः।

राष्ट्रिय फोटो पत्रकार समूह नेपालया अध्यक्ष प्रदीपराज वन्तय् जुगु ज्याझ्वलय वरिष्ठ उपाध्यक्ष लेखबहादुर ‘सागर’ श्रेष्ठ, महासचिव घनश्याम श्रेष्ठ, सचिव प्रविन कुलुङ राई, केन्द्रीय सदस्य मुकुन्द कालिकोटे, अनुप प्रधान, हरिस सिंह नगाल, सिन्धुली शाखा अध्यक्ष उद्धव श्रेष्ठ, पोखरा शाखा सचिव प्रेमबहादुर थापा, साधारण सदस्य रामशरण ‘अजय’ महर्जनपिनिगु ब्बति दुगु खः। नेपाल–बङ्गलादेश दथुइ २१ दँया स्वापू दुगु, “ब्यूटीफुल नेपाल” फोटो प्रदर्शनी नाप फोटोपत्रकारिता सम्बन्धी सेमिनारय् न्हापा नेपाः व बङ्गलादेश दथुइ थीथी सञ्चारमाध्यमय् ज्या यानाच्वपि फोटोपत्रकार तय्त बङ्गलादेश फोटो जर्नालिस्ट्स एसोसिएसन व अवार्डं हंगु खः।

नेपाःया राजदूत घनश्याम भण्डारी, ‘दि न्यू नेसन’ या प्रबन्ध सम्पादक अर्शाद होसैन, बङ्गलादेश फेडरल युनियन अफ जर्नालिस्ट्सया महासचिव कादेर गोनी चौधरी, बङ्गलादेश फोटो जर्नालिस्ट्स एसोसिएसनया अध्यक्ष एकेएम मोहसिनपिनिगु ब्बति दुगु खः।

येँ महानगरपालिका–१९ कङ्केश्वरीइ १५ फिट ताःहाकःगु सिंहशय्यासन प्रस्तर बुद्धमूर्ति स्थापना याःगु दु।

२५७० क्वःगु बुद्ध जयन्तीया झ्वलय् येँमपा–१९ या वडाअध्यक्ष राजेशकुमार श्रेष्ठं उगु मूर्ति सार्वजनिक याःगु खः। मूर्तियात थ्यंमथ्यं प्यगू फिट तजाःगु आसनय् तयातःगु खः धाःसा थुकिया निर्माण लागत थ्यंमथ्यं २८ लख जूगु वडाअध्यक्ष श्रेष्ठं जानकारी बियादिल।

“थ्व थाय्यात बुद्ध पार्क नां तःगु दु। पार्कयात मस्त, युवा व ज्येष्ठ नागरिकमैत्री यानायंकेगु योजना दु। लिपा थुकिया व्यवस्थापन यायेगु दायित्व स्थानीयतय्त बिइगु जुइ। वडां अभिभावक जुयाः पार्कया संरक्षण याइ”, वय्कलं धयादिल, “निर्माण यायेगु स्वयां संरक्षण व व्यवस्थापन यायेत थाकु।

उकिं पार्क उपयोगय् सकसिनं अपनत्व व दायित्व कायेमाःगु आवश्यक जू।” मूर्ति सार्वजनिक यायेन्ह्यः स्थानीयतय्सं वडा दुनेया थी थी थासय् अस्थिधातु यात्रा याःगु खः। अनंलिपा नमूना विहारय् वयाः बुद्धया पुजाआराधना याःगु खः।

बनेपाय् चण्डेश्वरी जात्रा शुरु जूगु दु। दँय् दँसं चण्डेश्वरी जात्रा स्वाया पुन्हिनिसे स्वन्हु तक हनेगु याइ।

जात्राया न्हापागु दिं सुथं न्हापां चिलाख च्याका न्ह्याइ।

राष्ट्रपति रामचन्द्र पौडेलं देशय् समाजवादउन्मुख अर्थतन्त्र निर्माण यायेत परिकल्पना यानातःगु संवैधानिक प्रबन्धं मूर्तरूप कयावनीगु विश्वास प्वंकादीगु दु

विश्व मजदुर दिवस (मे १,२०२६)या झ्वलय् थौं स्वदेश लिसें विदेशय् च्वंपिं फुक्क नेपाली श्रमजीवी तताकेहेँ व दाजुकिजापिंत सुख, शान्ति व समृद्धिया हार्दिक भिंतुना प्वंकादिसें उगु विश्वास यानादिल। वय्कलं श्रम अधिकार सुनिश्चितताया कामना नं यानादिल। वय्कलं धयादिल, “देय्या आर्थिक समृद्धिया निंतिं उद्यमशीलताया विकासपाखें स्वदेशी उत्पादन वृद्धि यानाः स्वदेशी उत्पादनया छ्यलाबुलाय् बः बियादिसें स्वावलम्बी व आत्मनिर्भर अर्थतन्त्र निर्माण यायेमाःगु आवश्यक जू, उद्यमशीलताया विकास यायेत पुँजी लगानी यायेगु उद्यमी व श्रम लिसें सीप लगानी याइपिं श्रमिकत निम्हेसिगु योगदान उत्तिकं हे महत्त्वपूर्ण जुइगु जूगुलिं मर्यादित श्रमया वातावरण निर्माण यानाः उत्पादन व उत्पादकत्व अभिवृद्धि यायेमाः धइगु जिं थुइका।”

श्रमिकतय्गु पेसागत मर्यादा व सम्मान अभिवृद्धि यायेत इमिगु हक, अधिकार स्थापित जूगु दिंकथं दँय्दसं मे १ य् थ्व दिवस हनेगु याइ । थ्व दिवसं विश्वन्यंकंया फुक्क श्रमजीवीतय्त थःपिनिगु हक, हित, अधिकार लिसें स्वतन्त्रताया रक्षार्थ एकताया सूत्रय् चिनातयेत ग्वाहालि जुइगु राष्ट्रपति पौडेलया धापू खः।

नेपाःया संविधानं फुक्क नागरिकतय्गु निंतिं रोजगारीया हक लिसें श्रमया हक सुनिश्चित यानाः फुक्क श्रमिकतय्त पाय्छिगु पारिश्रमिक, सुविधा लिसें योगदानय् आधारित सामाजिक सुरक्षाया हकयात नं हःपाः ब्यूगु न्ह्यथनादिसें वय्कलं समान ज्याया निंतिं लङ्ंगिक आधारय् पारिश्रमिक लिसें सामाजिक सुरक्षाय् छुं नं भेदभाव मयाइगु व्यवस्था समानताया हकं याःगु धयादिल। सन्देशय् धयातःगु खः, “विश्व मजदुर दिवसं श्रमया सम्मान, स्वरोजगार, पाय्छिगु पारिश्रमिक लिसें समाजिक सुरक्षा सुनिश्चित यायेगुपाखे न्ह्यज्यायेत सकलसित प्रेरणा बिइमा धइगु कामना यानाच्वना।”