Display Style:
Column Style
समावेशीताया सन्देशनापं ज्यापू म्यूजियम फियस्ता क्वचाल
लहनान्युज | ने. सं. ११३८ कछलाथ्व चौथि (अक्टुबर २६, २०१७) यल
राष्ट्रपति विद्यादेवी भण्डारीजुपाखें दिप प्रज्वलन यानाः उलेज्या जूगु ज्यापू म्यूजियम फियस्ताया बिहिवाः संस्कृति, पर्यटन तथा नागरिक उड्डयन मन्त्री जितेन्द्र नारायण देवया मू पाहाँसूइ समावेशीताया सन्देशसहित क्वचाःगु दु ।
ज्याझ्वःसं विशेष पाहाँकथं झायादिइम्ह जनकवि दुर्गालाल श्रेष्ठजुं यलया ज्यापू समाजं सांगठनिक विकासलिसें संस्कृति संरक्षणय् नेवाः तजिलजियात अझ समावेशी याना सकलें नेवाःतयेगु व देयया नितिं न्ह्यज्यायेफयेमा धयादिल ।
ज्याझ्वःया मू पाहाँ संस्कृति, पर्यटन तथा नागरिक उड्डयन मन्त्री जितेन्द्र नारायण देवजुं नेपाःया राजनैतिक ह्यूपाःया नितिं पहिचानसहित संघियताया संघर्ष स्मरण यासें यलया आदिवासीपिनिगु भूमिकायात च्वछायादिल । “नेपाःयात बहुधार्मिक बहुजातिय बहुसाँस्कृतिक दे धायेगु धैगु थनया आदिवासीपिनिगु भाषा संस्कृतिया जगेर्ना यायेमा, थुकिं हे पहिचान न्ह्यब्यइगु खः” वयेकलं धैदिल, “ज्यापू समाजपाखें थःगु समुदाय व समग्र यलया साँस्कृतिक पहिचान ल्यंकेत ताःलागु दु, थुकियात अझ समावेशी याना न्ह्यज्यायेफयेमा । देया मेमेगु जनजाति व ल्यूने लानाच्वंपि समुदायपिन्सं प्रेरणाकथं समाजया प्रगतियात नालाः कायेमाः, न्हूदँया व छठ पर्वया भिन्तुना ।”
ज्यापू समाज यलया ग्वसाःलय् यल लायकूलिइ न्ह्योने मन्त्री जितेन्द्र नारायण देव, जनकवि दुर्गालाल श्रेष्ठ, यल महानगरपालिकाया प्रमुख लगायत अधिकृतपिं, जिल्ला प्रशासन अधिकृत, सुरक्षा निकाय प्रतिनिधि व ललितपुर उद्योग बाणिज्य संघया नवनिर्वाचित ज्यासना पुचः लगायत नेवाः ख्यलय् नाँजापिं व्यक्तित्वपिनिगु मुनेज्यालिपा फियस्ताया अवलोकन पदयात्रा नं जूगु खः ।
क्वय्लाछि च्यासलय् जूगु औपचारिक समापन ज्याझ्वःसं ललितपुर उद्योग बाणिज्य संघया ज्यासना पुचःयात परम्परागत खेँ सगँ मन्त्री देव लगायत ज्यापू समाजया पूर्व नायोपिंस सामूहिक कथं बिया सम्मान यानादिइगु खः ।
समाजया छ्याञ्जे मोहन व्यञ्जनकारजुं संचालन यानादीगु थुगु ज्याझ्वलय् सुभाय न्वचु समाजया नायो प्रेम महर्जनजुं बियादीसें यलया उद्योग व्यवसायी व समुदायपिं सकले जाना ज्यापू म्यूजियम जक मखु यलया मूर्त अमूर्त सम्पदायात विकास यायेगुनितिं संयुक्त राष्ट्र संघ दिवसया दिनस फियस्ताया ग्वसाः ग्वःयागु धयादिल । ज्याझ्वःसं ललितपुर उद्योग बाणिज्य संघया ज्यासना पुचःयात सगँ ब्यूगु थुगु ताःतुना पुंवकेगुनितिं सहकार्यया शुरुवात कथं उद्योग व्यवसायीपिं उत्साहित जूगु दु । अथेहे, फियस्ताया सफलतापाखें थनया अमूर्त सम्पदा, संस्कृतियात न्ह्यब्वयेगु अवसर नापं यलय् होमस्टेयात प्रवद्र्धन यायेगु सम्भावना दु धैगु क्यंगु दुसाः यलयात पर्यटन व साँस्कृतिक नगरीया रुपय् स्मार्ट सिटीया नमूना दयेकेफइगु सम्भावना उप्वयेका ब्यूगु खनेदु ।
समापनय् आमन्त्रित सकसित नेवाः भ्वय्या व्यवस्था नापं तछलाथ्व पञ्चमी मंगलवाःनिसें न्ह्याःगु ज्यापू म्यूजियम फियस्ता सप्तमी बिहिवाः क्वःचागु खः ।
बंगाली चित्रकारपिं नेपालय्
लहनान्युज | कछलाथ्व पंचमी ११३८ (अक्टुवर २५ २०१७)
नेपाल बंगलादेश आर्ट एण्ड कल्चर एक्स्चेञ्जया उलेज्या यलया पाटन संग्राहलयय् छगु ज्याझ्वः दथुइ ललितपुर महानगरपालिकाया मेयर चिरिवाबु महर्जनं यानादीगु दु ।
नेपालया योङ् पिकासो तथा बंगलादेश फ्लेम ओपन आर्टया मंकाः ग्वसालय् नेपाल पाखें १३ म्ह व बंगलादेशया १७ म्ह चित्रकारपिन्सं ब्बति काःगु खः । झींन्याःन्हु जुइगु थुगु ज्याझ्वलय् पाटन म्युजियमय् अन्र्तराष्ट्रिय चित्रकला प्रदर्शनी न जुगु खः । स्वःन्हु यंक जुइगु उग् ज्याझ्वलय् ३० म्ह चित्रकारया ११० चित्रं दुथ्यागु दु ।
उलेज्याय् थःगु नुगः खँ तयादीसे मूपाहाँ ललितपुर महानगरपालिकाया मेयर चिरिवाबु महर्जनं नेपाल व बंगलादेश ३०० किलोमिटर जकः तापागु खँ धयादीसे थुगु ज्याझ्वलं निगु देशं क्वाःतुक्क जोडे याइ धकाः धयादीगु दु ।
अथेहे उगु ज्याझ्वलय् नेपाल उद्योग बाणिज्य संघ ललितपुरया पूर्व अध्यक्ष, अजरमान जोशी, प्राध्यापक नसिम अहमद नाद्भी, शिक्षाप्रेमी वि.एस क्षेत्री व कलाविद् शाक्य सुरेन नं थःथःगु नुगः खँ तयादीगु खः ।
बंगलादेशया नांजापि चित्रकारपि शान्त मारिया युनिभर्सिटीया प्राध्यापक नसिम अहमद नाद्भी, नर्थ साउथ युनिभर्सिटी असिटेन्ट प्रोफेसर फवाज रव, असिटेन्ट प्रोफेसर देवान मिजान, युनिभर्सिटी अफ ढाँकाकी असिटेन्ट प्रोसेसर भद्रेसु रिता, युनिभर्सिटी अफ चिटगाउका असिटेन्ट प्रोफेसर रहुल करिम रुमी, मोहम्मद रसिद कमल रसेल, रानिया आलम, मोहम्मद आरिफुज्जमान, कामरुन नेहर, मिनाहज उल इस्लाम, मुस्तरी फामिदा आफ्रिन, नाफिसा अनन्या, रितुपूर्न धार, सन्दिप कुमेर देव नाथ, सिति फातिमा, तन्जिमा तावासुम इशा र आरिफुर रहमान तोपुपि नं नेपाल भ्रमणय् वःगु खः ।
थुगु ज्याझ्वलय् नेपाली चित्रकारपिं प्राज्ञ रमेश श्रेष्ठ, प्राज्ञ ज्योती प्रकाश वि.क., सुदन श्रेष्ठ, देवेन्द्र गुरुङ, गोपाल दराइ, मनोज तामाङ्ग, आकाश गुरुङ्ग, थाहमान सिंह सुनार, मदन श्रेष्ठ, विपना महर्जन, सितु मास्के, किशोर नकर्मी व अजय देशार दुथाःगु खः ।
झींन्यान्हुया ज्याझ्वलय् यलया बज्रबाराही व कुमारीपाटी, येँया सुन्दरीजल, व कास्कीशया धम्पुसया आर्ट वर्कसप जुइगु खँ धकाः खलः संस्था योङ्ग पिकासाया निर्देशक अजय देशारं लहनान्युजयात जानकारी बियादीगु दु ।
बागमती सभ्यताया ईतिहासया संरक्षणय् धिसिलाःगु पलाः ज्यापू म्यूजियम
राजेश बज्राचार्य | ने.सं. ११३८ कछलाथ्व पंचमी (अक्टुवर २४, २०१७) यल
राष्ट्रपति विद्यादेवी भण्डारीजुपाखें दिप प्रज्वलन यानाः उलेज्या जूगु ज्यापू म्यूजियम फियस्तायात बागमती सभ्यताया ईतिहासया संरक्षणय् धिसिलाःगु पलाःकथंं स्थापित यायेमागुलिइ शताब्दी पुरुष सत्यमोहन जोशीजुं बः बियादीगु दु ।
ज्यापू समाज यलया ग्वसाःलय् यलया क्वय्लाछि च्यासलय् जूगु औपचारिक उलेज्या ज्याझ्वःसं विशेष पाहाँकथं झायादिइम्ह शताब्दी पुरुष सत्यमोहन जोशीजंू अथे धैदीगु खः । वयेकलंं हलिन्यंकया सभ्यताया दसू न्ह्यथंसें नेपाःया स्वनिगःया आदिवासीपिनिगु बागमती सभ्यता विकासय् भूमिका ध्वाथुइका थौंकन्हेंया परिस्थितिइ ज्यापू म्यूजियमया पलिस्था इतिहासय् तधंगु महत्व दुगु धयादिल । थुज्वगु आदिवासी म्यूजियमयात राज्य व व्यवसायिक पर्यटन क्षेत्रपाखे माःगुकथया ग्वाहाली यायेमा धैगु वयेकया धापू खः ।
संयुक्त राष्ट्रसंघ दिवसया अवसरय् आयोजित ज्यापू म्यूजियम फियस्ताया मू पाहाँ राष्ट्रपति विद्यादेवी भण्डारीजुं शताब्दी पुरुष संस्कृतिविद् डा. सत्यमोहन जोशीयात वय्कःया हे अर्ध कदया मूर्ति लःल्हानाः सम्मान नं यानादीगु खः ।
मू पाहाँ राष्ट्रपति विद्यादेवी भण्डारीजुं ज्यापू समाजया गतिविधियात च्वछासें हलिमय् स्वनिगःमध्ये यलया मूर्त जक मखु अमूर्त सम्पदाया विशेष आकर्षण दुगुलिइ थुगु ज्याझ्वःपाखें अझ विकसित जुइमा धकाः भिन्तुना बियादिल ।
ज्याझ्वलय् राष्ट्रपति भण्डारीयात ज्यापु समाज यलपाखें कृतज्ञता पौ लिसें मतिनाया चिं समाजया नायो पे्रम महर्जनजुं लःल्हानादीगु खः । ज्याझ्वः लिपा राष्ट्रपति भण्डारीं ज्यापु म्यूजियम फियस्ता २०१७या शिलापत्र उलेज्या नापं ज्यापु प्रज्ञाभवनस्थित म्यूजियमय् न्ह्यब्वयातःगु नेवाः परम्परागत सांस्कृतिक ब्वज्याया रुचीपूर्वक अवलोकन नं यानादीगु खः ।
ज्याझ्वःया विशेष पाहाँ रक्षामन्त्री भिमसेनदास प्रधानजुं संस्कृतिया जगेर्ना यायेत ज्यापु लगायतया समुदायया भूमिका चर्चा यासें संग्रहालयपाखें ज्वःमदूगु योगदान बिइगुलिइ बिश्वस्त जूगु नुगःखँ प्वंकादीगु खः ।
ज्याझ्वलय् यल महानगरपालिकाया मेयर चिरीबाबु महर्जनजुं समाजया तातुनांकथं यलय् पर्यटन विकासया नितिं महानगरपालिकाया एकद्वार प्रणाली अन्तर्गत म्यूजियमयात दुथ्याका पर्यटन शुल्कया १५गू प्रतिशत मध्ये २ प्रतिशत बिइगु घोषणा यानादीगु खः ।
ज्याझ्वःसं ललितपुर जिल्लाया गोदावरी नगरपालिका, महालक्ष्मी नगरपालिकाया मेयर, उपमेयर, कार्यकारी अधिकृतपिं, महानगरपालिकाया वडाध्यक्षपिनिगु उपस्थिति नापं यलया विशिष्ट व्यक्तिपिं पूर्वमन्त्री बुद्धिराज बज्राचार्य लगायत थीथी खलःपुचःलिसें उद्योग वाणिज्य संघया पदाधिकारीपिं, ज्यापु समाजया पदाधिकारीपिं व दुजःपिं पिनिगु आलेख्य उपस्थिति दूगु खः ।
समाजया छ्याञ्जे मोहन व्यञ्जनकारजुं संचालन यानादीगु थुगु ज्याझ्वलय् लसकुस न्वचू ज्यापु म्यूजियम फिस्ता २०१७ या कजि एवं वरिष्ठ न्वकू सन्तमान महर्जनजुं बियादीगु खःसा सुभाय न्वचु समाजया नायो प्रेम महर्जनजुं बियादीगु खः ।
फियस्ताया कजि सन्तमान महर्जनजुं यलय् दूगु संस्कृति व सभ्यतायात जीवन्त संग्रहालयया स्वरुप बिइगु व दीर्घकालिन कथं आन्तरिक व विदेशी पर्यटकपिनिगु दथुइ ज्यापू म्यूजियम अवलोकननितिं आकर्षित यायेत ३न्हूया ज्यापू म्यूजियम फियस्ताया ग्वसाः ग्वयागु जानकारी बियादीगु दु । फियस्ता कछलाथ्व पञ्चमी मंगलवाःनिसें सप्तमी बिहिवाःतक न्ह्याइ ।
यलया ३७७ दँ पुलाँगु मल्लकालीन कात्तिः प्याखँ कन्हेनिसें न्ह्याइगु - कछलाथ्व त्रयोदशी बिहिवाः नृसिंह अवतार
राजेश बज्राचार्य | ने. सं. ११३८ कछलाथ्व चौथि (अक्टुबर २३, २०१७) यल
यलया स्वसः व ७७दँ पुँलागु मल्लकालिन कात्तिः प्याखँ कछलाथ्व पञ्चमी कन्हे मंगलवाःनिसें न्ह्याइगु जूगु दु ।
प्याखँ शुरुयाये न्ह्यः थौं सोमवा सम्बन्धित गुरु, कलाकार, वाद्यकलाकापिं नापं यल महानगरपालिकाया प्रमुख चिरीबाबु महर्जन, उपप्रमुख गीता सत्याल व यलया प्रहरी वरिष्ठ उपरिक्षक गणेश बहादुर ऐर लगायतया प्रतिष्ठित व सरोकारवालापिनिगिु उपस्थितिइ कार्तिक नाच संरक्षण समितिं नासःद्यः पूजा याना प्रसाद इनेगु ज्याः क्वचायेकूगु दु ।
कन्हे मंगलवाः वहनीनिसें यल लायकूया कात्तिः दबूलिइ सनिलयया ७ ताःइय् सुदामा प्याखँया न्ह्यब्वसें १२न्हू यंकया कात्तिः प्याखँ शुरु जुइत्यंगु समितिया न्वकू संजय शर्मा राजोपाध्यायजुं जानकारी बियादीगु दु ।
हलिमय् सम्भावित कथं दक्वसिवें ताःहाकःगु नाट्य परम्पराकथं नालातःगु थुगु कात्तिः प्याखँ १२ न्हूयंक न्ह्याकेयानितिं थाकूगु अवस्था दु धयादिसें संरक्षण समितिया नायो एवं कलाकार किरण चित्रकारजुं सम्बन्धित निकायया ध्यानाकर्षण जूसा अझनं लच्छियंक प्याखँयात व्यवस्थित यायेफैगु लहनायात जानकारी बियादिल । थौंकन्हेया व्यवस्था अनुरुप राज्य व यल महानगरपालिकाया आंशिक आर्थिक सहयोगपाखें जक थुगु परम्परागत मान्यताया प्याखँ व्यवस्थापन यायेत थाकूगु वयेकया धापू खः ।
सिद्धिनरसिंह मल्लया पालय् कृष्णलीलायात आधार दयेका ७न्हू तकया उत्कृष्ट अपेरा (साँस्कृतिक प्याखँ) कात्तिः प्याखँया पलिस्था जूगु व कायम्ह जुुजु श्रीनिवास मल्लपाखें तत्कालिन अवस्थाया लोकनाटक नं तनाः १५न्हू जूवंगुबारे समितिया न्वकूः संजया शर्मा राजोपाध्यायजुं कनादीगु दु ।
“श्रीनिवास मल्लया काय् योगनरेन्द्र मल्लजुं शास्त्रीय प्याँखसमेत स्थापनायासें लच्छियंक प्याखँ क्यनेगु परम्पराया शुरुवात जूगु खनेदु,” वयेकलं धयादील । वयेकया धापूकथं न्हापा मनोरञ्जनया साधन मदूगु हुनिं उत्कृष्ट धार्मिक प्याखँयात प्रशर्दन यायेगु, न ताःन्व न तसकं चिकूइगु थुबलेया मौसमयात व्यवहारिक प्रयोगमार्फत कलाकारिताया ृउच्च कदर जूइगु स्वभाविक खः । “तर, शहरीकरणया मारय् थौकन्हेंया परिस्थिति अनुसार स्थानीय निकायपाखें उचित ग्वाहाली मदयेकं थुगु परम्परायात ल्यंकाःतयेगु थाकुया वैच्वंगु दु ।” वयेकलं धयादील ।
“पूलाँगु राग गायन, थुकिइ सम्बन्धित बाजागाजा व वाद्यवादन प्रस्तुतिइ सिद्ध जुइतः संगीतया समाधि अभ्यास तकय् लिकुनाच्वंगु इतिहासया विशेष महत्व दु । थुकियात खनेदेयका ध्यान सालेगुलि प्रस्फूतित जूइगु नृत्यकला ल्यंकेगु धैगु हे झीगु भाषा संस्कृति नापं इतिहासया संरक्षणय निरन्तरता दैगु खः ।” नासँ पूजाया प्रसाद ग्रहण यायेत थ्यंकादीम्ह साँस्कृतिक बाजागाजा संरक्षणय् यलया सक्रिय समाजसेवी मोतिलाल शिल्पकारजुं धयादील । वयेकया धारणाकथं सम्पत्ति हस्तान्तरणसिबें ऐतिहासिक महत्व ध्वाथुइकेगु व थुज्वगु अमूर्त सम्पदा न्हूगु पुस्तायात हस्तान्तरण यायेगु झीः सकसिगु दायित्व हे खः ।
१२न्हूयंकया कात्तिः प्याखँनय् कृष्णलीला, धार्मिक शास्त्रीय प्याखँ नापं लोकनाटक प्रदर्शन जूइ । ज्याझ्वलय् कात्तिक ८ गते बाथः प्याखं (नाटक), ७न्हूया सनिलय् तक उषाहरण लिला प्याखँ, ८न्हूं कुन्हु कात्तिक १४ गते जलशयन अन्तर्गत् मधु–कटैव वध, नवौं दिंकुन्हु (कात्तिक १५ गते) बराह अवतार अन्तर्गत हिरण्याक्ष वध, दशौं दिंकुन्हु (कात्तिक १६ गते) नृसिंह अवतार अन्तर्गत् हिरण्यकश्यपु वध, ११औं दिंकुन्हु (कात्तिक १७ गते) वस्त्रहरण लीला व लिपांगु दिं (कात्तिक १८ गते) दधि लिला क्यनिइगु जानकारी ग्वसाः खलकं सार्वजनिक याःगु दु ।
"नेपाल सम्वत सकल नेपाःमिया मौलिक सम्वत खः" - उपप्रमुख गीता सत्याल
राजेश बज्राचार्य | ने.सं. ११३७ कौलागा अमाइ (१९ अक्टुबर २०१७) यल
नेपाल सम्वत ११३८ या लसताय् न्ह्याःगु सीमतःया ज्याझ्वःया मू पाहाँ ललितपुर महानगरपालिकाया कार्यवाहक प्रमुख गीता सत्यालजुं नेपाल सम्वत मौलिक व नेवाः तय्गु जक मखुसे सकल नेपाःमिया मौलिक सम्वत खः धयादीगु दु ।
रोटराक्ट क्लब अफ ललितपुरया ग्वसालय् यलय् नेपाल सम्वत ११२५ निसें मदिक्क न्ह्याकाच्वंगु सीमतःयासं वयेकलं "नेपाःया ईतिहासय् आयातित सम्वतसिवें नेपाल सम्वत सकल नेपाःमिया मौलिक सम्वत खः" धयादीगु खः । यलया युवातयेगु सक्रियतां न्ह्यानाच्वंगु सीमतःयाः यागु प्रशंसायासें वयेकलं धयादिल, “न्हियान्हिथं अवसरया नामय् विदेश वनीपिं युवातयेगु चिन्ताजनक संख्या स्वयेबले सीमतःया व थीथी साँस्कृतिक ज्याझ्वःसं सक्रिय युवातयेत जिमिगु सम्मान दु । थ्वहे युवापिनिसं जक झीगु मौलिक परम्परानापं देयया विकास यायेफै ।”
ज्याझ्वःया लसकुस न्वचुलिपा नेपालभाषा मंकाः खलः यलया नायो श्रृmषिप्रसाद श्रेष्ठ, ग्वसाःखलःया मू क्लब रोटरी क्लब अफ ललितपुराया नायो बिद्याराज जोशीजुं नेपाल सम्वतयात राज्यंस्तरं हे नाला व्यवहारिक छ्यलाःबुलाय् हयेमाःगुलिइ बः बियादिल । वयेकपिंन्स युवातयेगु कुतःलं न्ह्याःगु सीमतःया ज्याझ्वःया निरन्तरताया प्रशंसालिसें न्हूदँया साँस्कृतिक नसंचाः उलेज्याय् ब्वति कायेत सकलसित इनाप यानादिल ।
ग्वसाःखलः रोटराक्ट क्लबपाखें दँयदँसं छम्ह व्यक्ति व छगु संस्थायात हनाःवयाच्वंगुलिइ थुगुसी पप संगीतया नाःजाम्ह म्येःहालामि दिपक बज्राचार्ययात आधुनिक संगीत ख्यलय् साँस्कृतिक बाजागाजाया प्रवद्र्धन व नेपाल परम्परागत हस्तकला प्रशिक्षण केन्द्रया निर्देशक प्रचण्ड शाक्ययात युवातयेत हस्तकला प्रशिक्षणयानितिं हनापौ देछागु खः ।
ग्वसाः खलःया नायो लिसें सीमतःयाः मूकजि रशिक शाक्यजुया सभापतित्वय् न्ह्याःगु सीमतःया ज्याझ्वःसं रोटरी क्लब ३२९२या पुलाँम्ह डिष्ट्रिक्ट गभर्नर दिलेन्द्र राज श्रेष्ठ निसें रोटेरियन व रोटराक्टपिं नापं वडा १६ या वडाध्यक्ष निर्मलरत्न शाक्य लगायतया ब्वति दूगु खः ।
नेपालभाषा मंकाः खलः यलया आव्हानय् त्वाःत्वालं ग्वसाः ग्वया न्ह्यानाच्वंगु सीमतःया ११२५ सं रुट तब्याकेगु सवालय् बहस जुसेलिं न्ह्याकेमफइगु इलय् रोटराक्ट क्लब अफ ललितपुर, यल व पाटनया मंकाः ग्वसालं सत्यमोहन जोशी लगायतया सल्लाहकारवर्गया इनाप कथं हे सापारु रुटय् न्ह्याकूगु खः ।
थीथी युवा संस्थापाखें साँस्कृतिक प्रतिभा न्ह्यब्वय्धुंकालि मू पाहाँ सत्यालपाखें सुकुन्दा व पाटन सामुदायिक पुनस्र्थापना केन्द्रया मस्तयेसं दयेकूगु १०० केजीया मैन मतया च्याःका सीमतःया न्ह्याकूगु खः । थपाहिटी ल्यायेम्ह पुचःया विशेष लाखे प्याखँ, धिमे बाजांनापं आपालं युवातयेगु सक्रिय ब्वतिः दूगु थुगु थुगुसीया १४क्वःगु सीमतःया ज्याझ्वः लायकूया मंगःबजाः, सुन्धारा, टंगः, इखालखु, पूर्णचण्डी, गाबहाः, पिम्वहाः, बालिफः, धलायचा, क्वन्ति, क्वालखु जुया हाकनं मंगःबजाःया कोतय् हे क्वचाःगु खः । वहे थासय् रुस्लान थ्री स्टार क्लबया ग्वसालय् नं न्हूदँया लसकुस यायेकथं मदनकृष्ण श्रेष्ठ लगायत थीथी कलाकारपिनिगु विशेष ज्याझ्वः नं न्ह्याकूगु खः ।
