Display Style:
Column Style
यलय् शंखधर शाख्वाःया इतिहासबारे चित्रकला प्रदर्शनी
राजेश बज्राचार्य | ने.सं. ११३७ कौलागा अमाइ (१९ अक्टुबर २०१७) यल
नेपाल सम्वत न्हूदँ ११३८या लसताय् बौद्ध युवा कमिटीं राष्ट्रिय विभूति शंखधर साख्वाः सम्बन्धित छन्हूया ऐतिहासिक चित्रकला प्रदर्शनी व भिन्तुना कालबिल ज्याझ्वः याःगु दु ।
यल लाय्कूलिइ दुने केशव नारायण चुकय् न्ह्याःगु थुगु ज्याझ्वःसं यल महानगरपालिकाया कार्यवाहक प्रमुख उपमेयर गीता सत्यालजु मू पाहाँ जुया झायदीगु खः । युवातयेगु थुजोगु ज्याझ्वःपाखें प्रभावित जुया वयेकलं युवापिनिगु सक्रियतापाखें हे नेपाःया मौलिक संस्कृति व सभ्यता ल्यनिगुलिइ बः बियादिल ।
महानगरपालिकापाखें युवातयेगु शीप विकासय् ग्वाहाली यायेत तयार जूगु न्ह्यथंसे वयेकलं धयादि, “युवापिं न्हिन्हिथं विदेश वनेगु व अंग्रेजी भाय्यात जक प्राथमिकता तया थःगु मौलिकता तनावंगु थ्व ईलय् नेपाःया सभ्यता व मौलिक सम्वतया प्रवर्तक शंखधर शाख्वाया इतिहास कनेत याःगु चित्रकला ब्वज्या अतिकं च्वछाये बहः जु । थुज्वगु ज्यापाखें स्थानीय युवापिनिगु मौलिक शीप विकास व स्वरोजगार उप्वकेयेत महानगरपालिका सदैव तत्पर दु ।”
बौद्ध युवा कमिटीया नवनियुक्त नायो सतिस शाक्यया सभापतित्वय् जूगु थुगु ज्याझ्वःसं संस्कृतिकःमी लोकरत्न शाक्यजुं नेवाःतयेसं म्हःपूजाय् छय्लिइगु मन्दया सामाग्री व आध्यात्मिक पक्षबारे ध्वाःथुइकादीगु खः ।
ज्याझ्वःसं बौद्ध युवा कमिटीया पूलाम्हः नायो सुनील महर्जनजुं युवातयेत धर्म, शीपविकास व बौद्धिक विकासय् कमिटीया योगदान न्ह्यब्वसें जनप्रतिनिधि वयेधुंकाः यलया सवालय् राष्ट्रिय युवा नीति कार्यान्वयन व राज्यपाखें ग्वाहाली कायेत प्रशासनिक रुपं सहज जुइगु वातावरण आवश्यक जूगु न्ह्यथनादिल ।
शंखधरया प्रचलित बाखँया आधारय् न्ह्यब्वयातःगु चित्रकला प्रदर्शनीयात काष्ठमण्डप आर्ट स्टूडियोया प्रशिक्षक प्रमिला बज्राचार्य लगायत वयेकया विद्यार्थीपिनिसं ग्वाहाली याःगु खः । छन्हूया नितिं जूगु चित्रकला ब्वज्यानापं म्हःपूजाया सामाग्री, मन्द सहित प्रदर्शनी अवलोकनय् वःपि स्वदेशी व विदेशीपिनित ध्वाथुइकेगु व इच्छुकपिनित मन्द न्ह्योनेच्वना फोटो कायेकेगु व्यवस्था यानातःगु खः । अथेहे, नेपाःमिपिनिगु मौलिक लिपि रञ्जनालिपिया महत्व ध्वाथुइकेकथं ईच्छूकपिनित रञ्जनालिपिं नेपाल सम्वत ११३८ न्हूदँया भिन्तुना च्वये सयेकेगु व्यवस्था नं याःगु खः ।
कमिटीया छ्याञ्जे प्रनिता शाक्यजुं न्ह्याःकादीगु थुगु ज्याझ्वलय् कमिटीया निवर्तमान नायो अनिल महर्जन, ललितपुर उद्योग बाणिज्य संघया पूर्व नायो अजरमान जोशी, राष्ट्रिय युवा महासंघ यल कचा लगायत थीथी युवा व धार्मिक संघसंस्थाया प्रतिनिधिपिनिगु सहभागिता दुगु खः ।
"३८दँया संगतय् जि हरिवंश नं नेवाः"
लहनान्यूज | ने. सं. ११३७ कौलागा अमाइ (१९ अक्टुबर २०१७) यल
ज्यापू समाज यल युवा कवःया ग्वसालय् नकबही त्वालय् जूगु भिन्तुना कालबिल ज्याझ्वःसं लोकह्वाःम्ह कलाकार हरिवंश आचार्यजुं थःत नं नेवाः हे तायेकाच्वनागु धयादिल ।
नेपाःया ख्यालिजुुजुपिं मह जोडीं मंकाः कथं त्वाःदेवाय् मत च्याकाः भिंतुना कालबिल ज्याझ्वःया उलेज्या यानादीगु उगु ज्याझ्वःसं वयेकलं थथे धयादीगु खः । थःगु जीवनया ताःई ख्यालिजुजु मदनकृष्ण श्रेष्ठनापंया मैत्रीपूर्ण सहकार्य मचायेक व मदिक्क न्ह्याःगु न्ह्यथँसें वयेकलं धयादिल, “जीवनया ३८दँ जिं थःगु माँ व अबुनापं तक नं च्वनेमखँ, मदन दाइ नापंया थ्व यात्राय् जि हरिवंश नं नेवाः हे खः ।” ज्याझ्वःया मू पाहाँ मह जोडीं लिसें विशेष व्यक्तित्वपिनिगुपाखें शंखधर साख्वाःया झ्वाताःयात माल्यार्पण लिपा सामूहिककथं समाजया न्हूदँ ११३८ या नगुमा पौः सार्वजनिक यानादीगु खः ।
ज्यापु समाज यलया युवा कवःया कजिः बाबुराजा ज्यापूया सभापतित्वय् न्ह्याःगु थुगु ज्याझ्वलय् नकबहि त्वाःया त्वाःनायो बाबुराजा डंगोलं लसकुस न्वचु बियादीगु खः । ज्याझ्वःसं ललितपुर महानगरपालिकाया कार्यवाहक प्रमुख उपमेयर गीता सत्याल लगायतया बिशिष्ट व्यक्तित्वपिंस जातिय विविधतादुने एकता, नेवाः सभ्यताया महत्व व नेपाल सम्वतया भिन्तुना बियादीगु खः ।
ज्याझ्वःसं ललितपुर क्षेत्र नं २ या सभासद चन्द्र महर्जन, समाजया नायो प्रेम महर्जन, ललितपुर उद्योग वाणिज्य महासंघया नवनिर्वा्चित कृष्णलाल महर्जन, नेपालमण्डल टेलिभिजनया नायः रमेश महर्जन, नेपालभाषा मंकाः खलः यलया नायः ऋषिप्रसाद श्रेष्ठ, बुद्धिजीवि व पूर्वमन्त्री बुद्धिराज बज्राचार्य, नेवाः देय् दबूया नायः नरेश ताम्राकार लिसें आपालं भाषा, साहित्य व संस्कृतिह्यःमिपिनिगु उपस्थिति दूगु खः ।
किपाः सागर महर्जन
ललितपुर उद्योग बाणिज्य संघया सपथ ग्रहण
राजेश बज्राचार्य | ने.सं. ११३७ कौलागा अमाइ ९१९ अक्टुबर २०१७० यल
ललितपुर उद्योग बाणिज्य संघया नवनिर्वाचित नायो व पदाधिकारीपिनिगु सपथ ग्रहण ज्याझ्ःव संघया सभाकक्षय् क्वचाःगु दु ।
पुलापिं नायो लिसें पदाधिकारीपिनिगु दथुइ निवर्तमान नायो सविन श्रेष्ठजुं सपथ ग्रहणलिपा न्हूम्ह नायो कृष्णलाल महर्जनयात लःल्हागु दु । थौंया दिनसं नायोया पदभार वयेकलं कयादीगु दुसाः मू छ्याञ्जेया पदभार नं पूलाम्ह महासचिव भरतलाल जोशीपाखें मनोज बहादुर न्याछ्योंजुं कयादीगु दु ।
औपचारिक रुपं निर्वाचन अधिकृतसमेतया उपस्थितिइ जूगु सपथ ग्रहणलिपा संघया निवर्तमान नायोसूइ सविन श्रेष्ठ, वरिष्ठ न्वकूलिइ भरतलाल जोशी, उद्योग व बाणिज्य उपाध्यक्षय् बालकृष्ण श्रेष्ठ, रुपकुमार शाक्य, संस्थागत उपाध्यक्ष बिरेन्द्रलाल श्रेष्ठ, महासचिवय् भरतलाल न्याछ्यों, दाँभरीइ सचिन राज जोशी कार्यभार कयादीगु दु ।
अथेहे, ज्यासना पुचःया दुजलय् उद्योग पाखे कृष्ण श्रेष्ठ, मिलन शाक्य, सुसन महर्जन, श्रीजेश लाल सिल्पकार, सुनील शाक्य "हान्ताई", रमेश सिं महर्जन व बाणिज्यपाखें उसन बज्राचार्य, भूमि नन्दन कर्माचार्य, रुपेन्द्र राज शाक्य, महिला दुजः लजना श्रेष्ठ, सविनलाल प्रधान, महेश श्रेष्ठ र रुपकलाल महर्जन लिसें वस्तुगतपाखें राजेन्द्र कुमार श्रेष्ठ व एशोसियटपाखें राकेश लाल मुल्मीं सपथ ग्रहण यासें पदभार कयादीगु दु ।
‘नेपालभाषा व यलयात सांँस्कृतिक नगरी दयेकेत सञ्चार क्षेत्रया भूमिका महत्वपूर्ण ’
लहनान्यूज | ने.सं ११३७ कौलागा चःह्रे (१८ अक्टुबर २०१७) यल
नेपालभाषा लगायत यल जिल्लायात सांस्कृतिक व पर्यटकीय नगरी दयेकेत सञ्चार क्षेत्रया भूमिका महत्वपूर्ण जूगु गोदावरी नगरपालिकाका प्रमुख गजेन्द्र महर्जनजुं धयादिइगु दु ।
नेवाः पत्रकार राष्ट्रिय दबू यल कचाःया ग्वसालय् जूगु नेपाल संवत् ११३८ न्हूदँया लसताय् भिन्तुना कालबिल व तुच्चा ज्याझ्वःया मू पाहाँ जुयादिइम्ह प्रमुख महर्जन लगायत वक्तापिंस थथे धयादिइगु खः ।
शंखधर शाख्वाःया किपातय् स्वाःम्हा देछासें न्ह्याःगु थुगु ज्याझ्वःसं गोदावरी नगर प्रमुख महर्जनजुं यल जिल्लाया समग्र विकासय् धार्मिक, सांस्कृतिक व आर्थिक क्षेत्रया विकास दकसिबे उप्वः सम्भावना दूगु क्षेत्र खः धयादिल । जिल्लायात साँस्कृतिक व पर्यटकिय दृष्टिकोणं न्ह्यःज्याके फइ धयादिसें वयेकलं सांस्कृतिक र पर्यटकीय जिल्ला घोषणा यायेमागुलिइ स्थानीय सञ्चारमाध्यम व पत्रकारपिनिगु प्रमुख भूमिका दुगु खँय् बः बियादिल ।
यल महानगरपालिकाया कार्यवाहक प्रमुख गीता सत्यालजुं स्थानीय तहया जनप्रतिनिधिपिंनिगु म्हगःस पूःवंकेत सञ्चार क्षेत्रया भूमिका अझ सशक्त व विकासया सहकार्यपाखे न्ह्यःज्यायेमाःगु खँय् बः बियादिल ।
ज्याझ्वःसं ललितपुर उद्योग वाणिज्य संघया निर्वतमान नायो सविन श्रेष्ठजुं उद्योग वाणिज्य संघया संयोजनय् गठित जूगु यल सांस्कृतिक पर्व सरंक्षण समितिया सक्रियताय् लापोन्मुख मूर्त व अमूर्त सम्पदा न्हंकेमबिइत कुतः जूगु धयादिसें जिल्लाया आर्थिक, सांस्कृतिक विकासया मुद्दायात स्थापित यायेत सञ्चारमाध्यमपाखें नं प्राथमिकता बिइमाःगु धयादिल ।
नेपाल प्रेस काउन्सिलया दुजः शुभेच्छाबिन्दुजुं काउन्सिलपाखें मातृभाषा पत्रकारिताया विकासया नितिं स्पष्ट नीति दयेकेगु कुतः जुयाच्वंगु धयादिल । वयेकलं नेपाली पत्रकारिताया ख्यः तब्या यायेत हाल दुगु नीतिया उच्चतम लाभ कयाः मातृभाषाया पत्रकारिता न्ह्यःज्याय् फयेमा धका भिन्तुना बियादिल । वयेकलं मातृभाषाको पत्रकारिता विकासयानितिं स्थानीय तहया निकायपाखें नं बिज्ञापनलिसें सशक्तिकरणय् प्राथमिकता बिइमागुलिइ बः बियादिल ।
नेवाः पत्रकार राष्ट्रिय दबूया केन्द्रीय नायो श्रीकृष्ण महर्जनजुं नेपाली सञ्चार क्षेत्रयात समावेशी याकेत, मातृभाषा पत्रकारिताया विकासया नितिं पत्रकार दबूपाखें न्ह्यानाच्वंगु थीथी ज्याझ्वः व कार्यपाखें अभिव्यक्ति व प्रेस स्वतन्त्रतायात अकुण्ठित यायेफइगु धयादिल ।
नेवाः पत्रकार राष्ट्रिय दबू यल कचाया नायो सुरज व्यञ्जनकारया सभानायोसूइ न्ह्याःगु ज्याझ्वलय पत्रकार दबू यलया दाँभरी नवीन थेच्वमिं लसकुस यानादीगु खः ।
ज्याझ्वलय् नेपालभाषा मंका खलः यलया नायः ऋषिप्रसाद श्रेष्ठ, पत्रकार दबूया केन्द्रिय मूछ्यान्जे सुनिल महर्जन, ज्यापु समाज यलया नायः प्रेम महर्जन, समाजसेवीपाखें मोतिशान्ति शाक्य, नेपाल पत्रकार महासंघ यलया ज्ञानप्रसाद पौडेल, पत्रकार दबू केन्द्रिय नायः श्रीकृष्ण महर्जन लगायत जातिय समाजया प्रतिनिधित्व कथं ज्यापू समाजया नायो प्रेम महर्जनजुं भिन्तुना न्वचु बियादीगु खः ।
नेवाः पत्रकार राष्ट्रिय दबू यल कचाया छ्याञ्जे राजेश बज्राचार्य न्ह्याःकादिइगु थुगु ज्याझ्वलय् ज्याझ्वःलय् महानगरीय प्रहरी परिसर ललितपुरका उपरीक्षक देबबहादुर बोगटी, पत्रकार दबूया केन्द्रीय न्वकु एवं नेपाल पत्रकार महासंघया केन्द्रीय दुजः टिकाराम प्रधान, बरिष्ठ संकिपा पत्रकार व पत्रकार दबूया केन्द्रिय सल्लाहकार विजयरत्न असंबरे, ललितपुर उद्योग बाणिज्य महासंघया नव निर्वाचित नायो कृष्णलाल महर्जन, निवर्तमान नायो अजरमान जोशी छसिंकथं दबुलिइ पाहाँ कथं उपस्थित जुयादीगु खः ।
थुगु भिन्तुना कालबिल ज्याझ्वसं दबूया केन्द्रिय न्वकू व लोकह्वाःम्ह म्येहालामि सुरजबीर बज्राचार्यपाखें भिन्तुना म्ये लिसें नेपालभाषा संगीत ख्यःया युवा कलाकार स्रजेश महर्जन, विराज महर्जनपाखें म्ये हालादिइगु खःसा संचारकःमी एवं कलाकार आराध्यलक्ष्मी खड्गीजुं नृत्य न्ह्यब्वयादिइगु खः । ज्याझ्वसं थीथी संघसंस्थाया प्रतिनिधिपिं, नेपालभाषा ख्यलय् यल जिल्लाय् सक्रिय विशिष्ट व्यक्तित्व निसें उद्यम व्यवसायीसमेतया उपस्थिति दुगु खः ।
हेमराज शाक्य अंकित वहःया पाँय्म्वः पूर्वकुमारीया ल्हातं पिदन
राजेश बज्राचार्य | ने. सं. ११३७ कौलागा दशमी (अक्टुबर १४, २०१७)
बौद्ध विद्वान् एवं लिपि विशेषज्ञ पं. हेमराज शाक्यया किपा अंकित वहःया पाँयम्वः पूर्वकुमारी मतिना शाक्यया ल्हातं पितब्वज्या जूगु दु ।
भिंतुना गुथिं स्वन्ति व न्हूदँया लसताय् दँयदसं वहःया पाँय्म्वः पिथनेगु ज्याःयात निरन्तरताबिसें थुगुसी गुदँलिपा थःगु छेँय् लिहांबिज्याःम्ह पूर्वकुमारी मतिना शाक्ययात न्हापांगु पाय्म्वः देछागु खः । नेपाल सम्वत ११३८ क्यनिगु लसताय् गुथिपाखें थुगुसीनापं झिंस्वक्वःगु पिथना कथं पं. हेमराज शाक्य अंकित पाँयम्वः पिथंगु खः ।
येँया दगू बहालय् छगू विशेष ज्याझ्वःया दथुइ पाँयम्वः पितब्वसें उगु पाँय्म्वः आःयाम्ह न्हूम्ह कुमारीमाजु तृष्णा शाक्ययात देछायेगु जानकारी नं ग्वसाः खल भिंतुना गुथिया नायः गोपालकृष्ण श्रेष्ठं जानकारी बियादिल ।
ज्याझ्वःसं प्रा. प्रेमशान्ति तुलाधरजुं पाँयम्वःलय् अंकित स्व. बौद्ध विद्वान् एवं लिपि विशेषज्ञ पं. हेमराज शाक्यया छेँजःपिनिगु समुपस्थितिइ संक्षिप्त म्हसिका न्ह्यब्वयादिइगु खः ।
ज्याझ्वलय् पं. हेमराज शाक्यया कायभाजु सुरेन्द्र शाक्यजुं थः अबुया गुण लुमंकाः वहःया पाँयम्वः पिकाःगुलिइ वयेक सूखावती भूवनसं लयलय्ताना सकसित सुवाः बियाच्वंगु कल्पना यानादिल । वयेकलं बाल्यकालया स्मृति न्ह्यथँसे थः अबुजु बौद्ध विद्वान व लिपि विशेषज्ञ जक मखसे प्राचीन सिक्काया संग्रहकर्ता नं जूगु धयादिल । थीथी सम्मान मध्ये नं थुगु दिं या सम्मान अतिकं बिस्कंया जूगुलिं ग्वसाः खलःयात सुभाय् देछानादिसें वयेकलं धयादिल, “थःगु मल्लकालिन निसेया पाय्म्वः संग्रह थःत लःल्हानादीगु खना तात्कालिन जुजु महेन्द लय्ताया बाःयात ब्यूगु ७द्वः दाँमं निर्माण शुरु जूगु छेँ हे जिगु बाल्यकाल सुखदायी जुया न्ह्याःगु खः ।”
भिंतुना गुथिया नायः श्रेष्ठया सभानायःसुइ जूगु थुगु ज्याझ्वलय् गुथिया छ्याञ्जे दिपकरत्न तुलाधरजुं वहःया पाँय्म्वःबारे जानकारी बियादिइगु खः ।
विद्यासागर तुलाधरजुं न्ह्याकादीगु ज्याझ्वलय् भिंतुना गुथि मिसा पुचःया छ्याञ्जे रमा तुलाधरं थःगु नुगःखँ तयादीगु खःसा लसकुस न्वचु गोपालकृष्ण श्रेष्ठं व गुथिया निवर्तमान नायः रत्नवीर शाक्यं सुभाय् देछानादीगु खः ।
ने.सं. ११२५ निसें वहःया पाँयम्वः पिथनाच्वंगु भिंतुना गुथिं राष्ट्रिय विभूति एवं नेपाल संवतया प्रवर्तक शंखधर साख्वाः, कविकेशरी चित्तधर हृदय (११२६), पं. निष्ठानन्द बज्राचार्य (११२७), महाकवि सिद्धिदास महाजु (११२८), माष्टर जगतसुन्दर मल्ल (११२९), योगवीरसिंह कसाः (११३०), साहित्य सुता बौद्ध ऋषि महाप्रज्ञा (११३१), भाषाजवाः धर्मा्दित्य धर्माचार्य (११३२), भाषानिभाः प्रेमबहादुर कसाः (११३३), कविरत्न सिद्धिचरण श्रेष्ठ (११३४), सहिद शुक्रराज शास्त्री (११३५) व गौतम बुद्ध (११३६) पिनि किपा अंकित वहःया पाँय्म्वः पिथनेधुंकूगु दु ।
किपाः प्रमोद शाक्य
