वंगु २४ घण्टाय् थप २,३२८ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं देयन्यक ५,८३७ म्हेसिगु पीसीआर परीक्षणय् १५२७ म्ह व ४२९६ म्हेसिगु एन्टिजेन परीक्षणय् ८०१ म्ह याना २,३२८ म्हेसित संक्रमण पुष्टि जुगु दु। व.गु २४ घण्टाय् ३,०६६ म्ह कोरोना संक्रमणमुक्त जुगु दु ।

अथेहे १९ म्ह सक्रमणं सीगु दु। आःतक कोरोना भाइरसया सक्रिय संक्रमितपि २७ हजार ७१६ म्ह दु।

उकि मध्ये २४ हजार ६७५ म्ह होम आइसोलेसनय् व ३०४१ म्ह होम आइसोलेसनय् च्वना च्वंगु दु।

पृथ्वी राजमार्ग अन्तर्गत धादिङया बेनीघाट रोराङ गाउँपालिका वडा नम्बर १० जवाङ खुसिइ वगु चलखं न्यागः सवारी साधन ल्हाना निम्ह मनू सीगु दु।

अथेहे मेपि खुम्ह घाइते जुगु दु। ना ८ ख ४५४० नम्बरया ट्रकय् च्वपि चितवनया राप्ती नगरपालिका ६ च्वम्ह अन्दाजी १८ दँ दुम्ह बिरबल प्रजा व ना ७ ख ३२० नम्बरया कन्टेनरय् भारतया ४३ दँ दसम्ह सोनी देवी सीगु खः।

हिरो बा १२ च ७१५६ नम्बरया म्याजिक भ्यान, ना ७ ख ३२० नम्बरया कन्टेनर, बा १ ग २८३१ नम्बरया ट्रक, ना ८ ख ४५४० नम्बरया ट्रक व पीएन २८ एए ०१२० नम्बरया ट्रक ल्हागु दु धका जिल्ला प्रहरी कार्यालय धादिङं धागु दु।

घटनास्थलय् उद्धारया लागि इलाका प्रहरी कार्यालय गजुरी व इलाका प्रहरी कार्यालय बेनीघाटपाखे डिएसपीया कमाण्डय् प्रहरी परिचालन यागु खः। स्थानीय सरकार व सतक विभागया टोलीपिन्स खोज व उद्धारय् खटे जुगु दु धका प्रहरीं धागु दु ।

चलः वया नारायणगढ–मुग्लिन सतकखण्ड हाकनं अवरुद्ध जुगु दु।

भरतपुर महानगरपालिका–२९ सेती दोभानय् चलः वया नारायणगढ–मुग्लिन सतकखण्ड अवरुद्ध जुगु दु धका जिल्ला प्रहरी कार्यालय चितवनया प्रहरी उपरीक्षक (एसपी) ओम अधिकारीं जानकारी बिगु दु।

रत्नपार्कय् आकाशे ताँय् कांग्रेस लिकलागु नेपाल विद्यार्थी संघं च्वयातंगु अभद्र नारा येँ महानगरपालिकां हूयाबिगु दु।

‘२०५८ सालनिसे  जिमिसं येँ महानगरपालिका दुने अंगलय् च्वयेगु, पोष्टर–पम्प्लेट टिकेगु ज्याय् प्रतिबन्ध तयागु दु,’ येँ महानगरपालिकाया नगर प्रहरी प्रमुख धनपती सापकोटां धयादीगु दु, ‘उगु इलय् निसे येँ महानगरपालिकां कयागु थुगु नीतियात कार्यान्वयन यानावया च्वनागु दु।

उगु कथ हे अभन्द्र नारा हूयागु खः।’ कोभिड–१९ महामारीइ यलय् अग्रपंक्ति खटे जुपिनिगु सम्मानय् दयका तःगु चित्र येँ महानगरपालिकां हूयाबिगु विरोधय् नेविसंघं अन अंगलय् अभन्द्र नारा च्वया विरोध यागु खः। ‘२०७० सालय् वया जिमिसं ‘होडिङ बोर्ड फ्रि येँ’ घोषणा यानागु खः,’ सापकाटो न धयादीगु खः, ‘उकिइ व हे जिमिसं सहरी सौदर्यय् प्रतिकुल असर याइगु ज्याय् प्रतिबन्ध याना वयाच्वंनागु खः।

उकिइ सचेत दु व कार्यान्वयन न यानाच्वंगु दु।’ नेविसंघं ‘विद्यासुन्दर शाक्य मुर्दावाद व काठमाडौं  महानगरपालिका मुर्दावाद’ धइगु अभद्र नारा च्वंगु खः।

नेपाल पत्रकार मञ्चं पत्रकारपिनिगु संघसंस्थायात कोविड १९ या संक्रमण यलय् मागु स्वास्थ्य सुरक्षा सामाग्री वितरण यागु दु।

नेपाल पत्रकार महासंघ जिल्ला शाखा भक्तपुर व दक्षिण एशियाली खेलकुद पत्रकार संघयात व म्हिगः कार्टुनिष्ट क्लवयात पीपीई, मास्क, सेनिटाइजर लगायतका सामान लल्हागु खः।

थेहे पत्रकारपिन्त व्यक्तिगत रुपं थज्यागु सामाग्री वितरण यानावया च्वंगु खः। भक्तपुर शाखाया अध्यक्ष जगत प्रजापतिं मञ्चं लल्हागु थुगु सामग्रीं शाखाया सदस्यपिन्त बिइ मागु जिम्मेवारीइ ग्वाहालि जुगु दु धका धागु दु। अथेहे खेलकुद पत्रकार संघया महासचिव राधेश्याम दाहालं मञ्चं ग्वाहालि यागु थुगु सामाग्रीे संस्थागत साझेदारितापाखे थपिन्त यक्को ग्वाहालि जुगु दु धका धागु दु।

महामारीया इलय् पत्रकारपिन्त आर्थिक, सामाजिक व भौतिक समस्या व्यवस्थापनय् ग्वाहालि जुगु धका मञ्चया अध्यक्ष युवराज विद्रोहीं धागु दु। मञ्चया उपाध्यक्ष नाप कोविड समन्वय समितिया संयोजक चन्द्रमणि भट्टराई न थज्यागु ज्यां एशोसियट सदस्य संस्था दथुइ साझेदारिता अप्वोया वनिइ धका धागु दु। भक्तपुर शाखायात सामाग्री वितरण याये वलय् मञ्चया महासचिव विमल थापा, कार्यसमिति सदस्य जेन श्रेष्ठ, नेपाल पत्रकार महासंघ एशोसियट प्रदेशया महासचिव रोयल आचार्य नाप पदाधिकारीपि न उपस्थिति दुगु खः।

महासंघ भक्तपुर जिल्ला शाखाया पूर्व अध्यक्षपि रमेश खड्का, अमर भुजु, विकल श्रेष्ठ, सचिव संजीप घिमिरे, कार्टुनिष्ट क्लवया अध्यक्ष बासु क्षितिज, सदस्यपि देवेन्द्र थुम्केली, रवि मिश्रु नाप पदाधिकारी नाप अथेहे दक्षिण एशियाली खेलकुद संघया महासचिव राधेश्याम दाहालया उपस्थिति दुगु खः।