वंगु २४ घण्टाया दुने देयन्यक १,०८९ म्हेसित कोरोना भाइरस संक्रमण पुष्टि जूगु दु।

५ हजार १ सय ७० म्हेसिगु पीसीआर परीक्षण याउगुलि ९७६ म्ह व २ हजार ८०१ म्हेसिगु एन्टिजेन परीक्ष याउगु १ सय १३ याना १ हजार ८९ म्हेसित कोरोना भाइरसया संक्रमण खने दुगु धका स्वास्थ्य तथा जनसंख्या मन्त्रालयं धाउगु दु।

अथेहे वंगु २४ घण्टाय् कोरोना संक्रमणं २० म्ह सीउगु दु सा १ हजार ५३४ म्ह कोरोनामुक्त जुगु दु। थौं आइतबाः  थपे जूपि ना नेपालय् कोरोना संक्रमित जूपि ७ लाख ६९ हजार २७१ म्ह थ्यंगु दु।

अथेहे नेपालय् सीपि १० हजार ८३८म्ह थ्यंगु दु सा ७ लाख २७ हजार १८५ म्ह संक्रमणमुक्त जुइ धुकुगु दु।

यलय् ऐतिहासिक भिमसेन जात्राया लागि यल महानगरपालिका– १६ वडा कार्यालयं ५ लाख लल्हागु दु।

वडाअध्यक्ष निर्मलरत्न शाक्यं मंगल टोल सुधार संघया अध्यक्ष किरणमान प्रधानयात उगु चेक हस्तान्तरण याउगु खः।

अर्मूत संस्कृति संरक्षणया लागि सम्बद्ध गुठीयार, सरोकारवालानाप समन्वय याना अक्षयकोषया लागि उगु रकम बियादीसे वडाअध्यक्ष शाक्यं धयादीगु दु‘ थुकिइ संस्कृति संरक्षणया निम्ति क्रियाशील सरोकारवाला पक्षपि उत्साहित जुइगु भलसा काउगु दु।’

उगु ज्याझ्वलय् समितिया अध्यक्ष प्रधानं दँय् दँसं भाद्र कृष्ण अष्टमीया दिं जुइगु यलया मंगलबजारय् जुइगु उगु मेला व वया कसं कुन्हु दशमीइ चान्ह्यः द्धलद्धः मनू तयेगु सहभागिताया जुगु भिमसेन जात्राय् स्वयंसेवक परिचालनया लागि उगु ध्यवाया ब्याजं खर्च यायेगु जानकारी बिउगु खः।

संस्कृति संरक्षणय् वडां याना वयाच्वंगु ज्याया प्रशंसा यानादीसे अध्यक्ष प्रधानं थुगु ज्या सकसिगु लागि उदाहरणीय जुइगु बिचाः चयादीगु खः।

किपू नगरपालिकाय् ‘मास्कविना प्रवेश निषेध’ अभियान सुरु याउगु दु।

कोरोना भाइरसं बचे जूइगु लागि मास्क अनिवार्य तयमाःगु धासे किपू महानगरपालिकां दक्को नागरिकपिन्त मास्क अनिवार्य तयेमाःगु जनचेतना हयेगु उद्देश्यं थुगु अभियान सुरु यानागु धका धागु दु।

थौं आइतबाः सुथय् किपूलिइ मास्क अभियानयासे मेयर रमेश महर्जनं दक्को नागरिकपिन्त कोरोनाया संकटपाखे बचे यायेत अनिवार्य रुपं मास्क तयेगु निति जनचेतना हयेगु अभियान सञ्चालनय् हइगु धका स्पष्ट यानादीगु दु।

किपू नगरपालिकां मनू तयेगु हुलमुल जुक्ष् थाय् अनिवार्य रुपं मास्क तये माःगुलि थुगु अभियान संचालनय् हयागु धका स्पष्ट यानादीगु खः।

थुकिया लागि मास्क उपलब्ध यायेत ‘मास्क बैंक’ या स्थापना यानागु दु धका धयादीगु खः।  फूपिन्स बिइगु व मफूपिन्त निःशुल्क रुप बिइगु निति बैंकया स्थापना यानागु धका मेयर महर्जनं जानकारी बियादीगु दु।

शेयर बजाः थौं १ सय अंक भन्दा स्वया अप्वो घटे जूगु दु। बजाः सुरु निसे घटे जुगु नेप्से बन्द जुगु इलय तक कुहावःगु दु।

नेप्से थौं १ सय ८ दशमलव २६ अंकं घटे जूया २ हजार ८ सय १८ दशमलव ७२ विन्दुइ कुहावःगु दु। २ सय २३ गु कम्पनीया शेयर कारोबार जुगुलि २ सय ९ गु कम्पनीया शेयर घटे जूगु दु।

१६ गु कम्पनीया शेयर १० प्रतिशतं हे घटे जुगु दु। २ करोड ३० लाख कित्ता शेयर ११ अर्ब २४ करोड रुपैयाँ कारोबार जुगु दु।

दकलय् अप्वो अरुण भ्याली हाइड्रो कम्पनीया ७० करोड ३३ लाख रुपैयाँ शेयर किनबेच जुगु दु।

थौं लुँया भाः तोलां ६ सय रुपैयाँ थहावंगु दु।

थौं लुँ तोलां ६ सय रुपैयाँ थहावना ९१ हजार ५ सय रुपैयाँ तोके याउगु दु धका नेपाल सुनचाँदी व्यवसायी महासङ्घं धाउगु दु।

अथेहे वहः न थौं तोलां ३५ रुपैयाँ थहावंगु दु। थौं तोलां ३५ रुपैयाँ थहावना १२ सय ३० रुपैयाँ कारोबार जुगु दु धका महासङ्घं धाउगु दु।