वाःया कारोबारय् न्हापांगु दिं नेप्से परिसूचक निगू ल्याखँ वृद्धि जूगु दु ।

थौ. नेप्से १२.५४ ल्याखं वृद्धि जुया २८२७.९३ विन्दुइ थ्यंगु खः । नेप्सें न्हियान्हिथंया कारोबार रकमय् न्हूगु रेकर्ड दयेका वनाच्वंगु दु । थौं ४ क्वःति २६गू लख ३६द्वः व ३४८ कित्ता सेयर कारोबारय् १७गू अर्ब २गू क्वःति ८४ लखः ३२द्वः २४५ ध्येबा ज्वलिंज्वःया कारोबार जूगु खः ।

थ्वसिबें न्ह्यः वंगु विहीबाः १४ अर्ब ७६ क्वःति ८८ लख बराबरया कारोबार जूगु खः । थौं दर्जनौं कम्पनीपिनिगु शेयरया मू ९गू प्रतिशतसिबें अप्वः थहाँवंगु खः । थौं ज्याति विकास बैंकया शेयर मू १०गू प्रतिशतं थहाँवंगु खः ।

अथेहे नेशनल हाइड्रो पावर कम्पनी लिमिटेडया ४७ क्वःति बराबरया कारोबार जूगु खः ।

थाइल्याण्डया राजपरिवारं कोभिड १९ महामारीया ईलय् नेपाःयात स्वास्थ्य ज्वलं ग्वहालि याःगु दु ।

थाइ नरेश महा बजिरालोङकन प्रा. वजिरक लाओजाओइहा, रानी सुधिदा बज्रसुधाविमलाक्छना व राजकुमारी बज्रकितिबा नरेन्दादीब्याभातिपाखें व्यक्तिगत सिरपा कथं थाई रोयल छ्वया हःगु स्वास्थ्य ज्वलं थौ नेपालय् थ्यंगु दु । स्वास्थ्य ज्वलंलिसें थाइ एयर फोर्सया जहाज त्रिभुवन अन्तर्राष्ट्रिय विमानस्थलय् थौं अवतरण जूगु खः ।

उगु स्वास्थ्य ग्वहालि आइतबाः थाई राजपरिवारया हे खर्चय् रोयल थाई एयर फोर्सया विशेष विमानपाखें यँे थ्यंगु खः । नेपाःया भिक्षु प्रा. देव शाक्य वंशपण्डित प्रा.डा. सुगन्ध महास्थवीर (अनिल शाक्यया पहलय् थाई राजपरिवारं स्वीकार याना ग्वहालि याःगु न्ह्यथंगु दु । भिक्ष सुगन्ध थाइ राजकीय विहार बोभर्नया उप प्रमुख, विश्वविख्यात महामुकुट बौद्ध विश्व विश्वविद्यालयया रेक्टर व थाई बौठ भिक्षु तजिलजि निगूगु देव पदं छायपिनादिम्ह न्हापाम्ह नेपाःमि भिक्षु जुयादि ।

त्रिभुवन विमानस्थलय् थौं छगू ज्यावलय् नेपाःया नितिं थाई राजदूत भोषिता भोरासाफं स्वास्थ्य तथा जनसंख्या मन्त्री हृदयेश त्रिपाठीयात उगु स्वास्थ्य ज्वलं लःल्हागु खः । लुम्बिनी विकास कोषया दुजः छ्याञ्जे सानुराज शाक्यं नेपालय् संयोजन यानादिगु खः ।

थाई नरेशपाखें नेपाःयात ग्वहालि यायेत उजं बिउकथं १०गू लख थान सर्जिकल मास्क, ४द्वः व ५सः थान पीपी गाउन, १०द्वः जोडी लेग कभर, १०द्वः थान सर्जिकल क्याप, ५द्वः थान फेस सिल, २०द्वः थान एन्टिजेन किट, ६सः थान पल्स अक्सिमिटर, द्वःछि व ५सः थान डिजिटल थर्मामिटर, द्वःछी थान बडी ब्याग स्वास्थ्य ज्वलं नेपाःयात चूलाककादिगु खः ।

अथेहे थाई राजकुमारी नरेन्दादीब्याभितपाखें ७द्वः थान पीपी उपलब्ध यानादिगु दु ।

संसद विघटनविरुद्धया रिटय् थौ आइतवाः सुनुवाइ सुरु जुगु दु।

प्रधानन्यायाधीश चोलेन्द्र शमसेर जबरा नेतृत्वया संवैधानिक इजलासं सुनुवाइ सुरु यागु खः।

अधिवक्तापिन्स संवैधानिक इजलासय् न्यायाधीश बमकुमार श्रेष्ठया बारे तःगु न्ह्यसः तयारी यागु दु। न्यायाधीश श्रेष्ठ तत्कालीन नेपाल कम्युनिष्ट पार्टी (नेकपा)या एकता खारेज याना एमाले व माओवादी केन्द्र म्वाकूगु २३ फागुनया फैसलाय् निम्ह न्यायाधीशमध्ये वयकः छम्ह खः।

शुक्रवाः न्हापागु दिं सुनुवाइया इलय् हे अधिवक्ता गोविन्द बन्दीं न्यायाधीश श्रेष्ठया इजलास त्वते माःगु सः पिहावंगु खः।

स्वनिगः दुने वंगु २४ घण्टाय् १ हजार १७१ म्ह कोभिड संक्रमितपि थपे जूगु दु।

थौं येँ जक ८६७ म्हेसित कोरोना सक्रमित जुगु दु ।अथेहे ख्वपय् १०५म्ह व यलय् १९९ म्ह न्हुपि संक्रमित थपे जूगु दु।

थ्व नाप आःतक स्वनिगः दुने सक्रिय संक्रमितपि २७ हजार ८० म्ह दु।

लिपागु २४ घण्टाया दुने ४ हजार ४८७ म्ह कोरोना संक्रमित थपे जुगु दु।

थ्व नाप आःतक नेपालय् सक्रिय संक्रमितपि १ लाख १५ हजार ९ म्ह थ्यंगु दु।

लिपागु २४ घण्टाय् ६ हजार ८० म्ह कोरोनामुक्त जुगु दु धका स्वास्थ्य तथा जनसंख्या मन्त्रालयं धागु दु। अथेहे, कोभिड संक्रमणं वंगु २४ घण्टाय् ११६ म्ह सीगु दु ।

थ्व नाप आःतक नेपालय् कोरोना संक्रमणं सीपि ७ हजार १६३ म्ह थ्यंगु दु।