माइतीघर मण्डलाय् विरोध प्रदर्शनयापि राष्ट्रिय पुनर्निर्माण प्राधिकरणया प्राविधिक कर्मचारीपिन्त ज्वंगु दु।

थःपिन्त सेवापाखे हटे यायेत्यंगु धासे प्रदर्शनयापि इन्जिनयर व सब–इन्जिनियरपिन्त ज्वंगु धका प्रहरीं धागु दु। असारलिपा भुखाचं प्रभावित ३१ जिल्लाया लागि ११० इन्जिनियर व सब–इन्जिनियरपिन्त बिदा यायेगु निर्णय यायेवं तंचाया प्राविधिक कर्मचारीपि थौं विरोध प्रदर्शन यागु खः।

कोरोना महामारीया कारण निषेधाज्ञा लागू जुगु इलय् विरोध प्रदर्शन यागुलि जनस्वास्थ्यविदपिन्स च्यूता कागु खः। हुलमुल व जनस्वास्थ्यया मापदण्ड पालना मयागु धासे कोरोनाया स्वंगूगु लहर वये फइगु धासे विज्ञपिन्स चेतावनी बिगु खः।

शिक्षामन्त्री कृष्णगोपाल श्रेष्ठं मध्यावधि चुनाव न्ह्यः हे जनतां कोभिड–१९ विरुद्धया खोप काये दइ धका धागु दु।

थौं शुक्रवाः स्वास्थ्य तथा जनसंख्या मन्त्रालयया तक जिम्मेवारी कयादीम्ह श्रेष्ठ धयादीगु दु,‘जनतां नो भोट, नो खोप धागु दु्, जिमिसं एस खोप, एस भोट धाय् ।’ खोपया सम्बन्धय् याकन हे चमत्कारिक सफलता प्राप्त जुइ धका धागु दु।

मन्त्री श्रेष्ठ धागु दु, ‘वइगु दँ दुने दक्को नागरिकपिन्स खोप काये दइ । प्रधानमन्त्रीया न थ्व चाहना दु ।’ प्रधानमन्त्री केपी शर्मा ओलीं सन् २०२१ दुने सकल नेपाःपिन्स जनतां कोभिड–१९ विरुद्धया खोप लगे याये दइ धका धागु दु।

कर्मचारीन्ति ब्रिफिङय् मन्त्री श्रेष्ठं संकटय् ल्वाय्त कर्मचारीपिनिगु मुख्य भूमिका दइ धासे ग्वाहालिया लागि इनाप यागु दु। मन्त्री श्रेष्ठं थौं शुक्रवाः श्रम तथा रोजगार मन्त्रालय व वन तथा वातावरण मन्त्रालयया तक जिम्मेवारी कयादीगु खः।

धरानया वीपी विज्ञान प्रतिष्ठानय् स्वम्ह कोरोना मन्तधरानया वीपी कोइराला स्वास्थ्य विज्ञान प्रतिष्ठानय् धरानया वीपी कोइराला स्वास्थ्य विज्ञान प्रतिष्ठानय् उपचार यानाच्वंपि स्वम्ह कोरोना संक्रमितपि सीगु दु।

प्रतिष्ठानं संचालन यागु कोभिड १९ अस्पतालय् उमिगु उपचार जुयाच्वंगु खः। प्रतिष्ठानया सह–प्रवक्ता डा. चुडामणि पोखरेलया कथं सीपि धरान–११ या ७५ दँ दुम्ह मिजंम्ह, धरान–१३ या ४३ दँ दुम्ह मिसाम्ह व धरान ५ या ७९ दँ दुम्ह मिजंम्ह सीगु खः।

सीपि सु न दीर्घ रोगया समस्या मदु धका धागु दु।

प्रतिनिधिसभा विघटनविरुद्ध संवैधानिक इजलासय् जारी सुनुवाइया झ्वलय् थौं शुक्रवाः रिट निवेदक पक्षपाखे बहस जुइगु दु।

रिट निवेदक पक्षया शुरुवाती बहस यायेगु थौं लिपागु दिं खः। थौं रिट निवेदकपाखे २९ म्ह कानुन व्यवसायीपिन्स बहसया लागि ३ निसे ३० मिनेट तक ई निर्धारण यागु दु। वरिष्ठ अधिवक्तापि कृष्णप्रसाद भण्डारी व सतिषकृष्ण खरेलं दकलय् अप्वो ३०–३० मिनेट बिगु दु। अथेहे पूर्वमहान्यायाधिवक्ता मुक्ति प्रधानया लागि २५ मिनेट ई निर्धारण यागु दु।

वरिष्ठ अधिवक्ता बाबुराम कुँवर व अधिवक्ता डा. भीमार्जुन आचार्यपिन्त २०–२० मिनेट व अधिवक्ता टीकाराम भट्टराईयात १५ मिनेट ई छुटे यागु दु। आइतवाः निसे सरकारी पक्षया बहस सुरु जुइ। वंगु गत जेठ ७ गते सरकारया सिफारिसय् राष्ट्रपति विद्यादेवी भण्डारीं प्रतिनिधिसभा विघटन याना वइगु कात्तिक २६ व मंसिर ३ गते मध्यावधि निर्वाचन घोषणा यागु खः।

रिट सुनुवाइया लागि प्रधानन्यायाधीश चोलेन्द्रशमशेर जबराया नेतृत्वय्, न्यायाधीशपि दीपककुमार कार्की, मीरा खड्का, ईश्वरप्रसाद खतिवडा व डा.आनन्दमोहन भट्टराई दुगु संवैधानिक इजलास गठन यागु खः।

शिक्षा मन्त्री कृष्णगोपाल श्रेष्ठं थौं शुक्रवाः थप स्वंगू मन्त्रालयया जिम्मेवारी कायेत्यंगु दु।

श्रेष्ठ स्वास्थ्य तथा जनसंख्या मन्त्रालय, श्रम तथा रोजगार मन्त्रालय व वन तथा वातावरण मन्त्रालयया न पदभार ग्रहण यायेत्यंगु दु। स्वास्थ्य मन्त्रालय १२ः३० बजे, श्रम मन्त्रालय २ बजे व वन मन्त्रालय ३ः३० बजे पदभार ग्रहण यायेगु ज्याझ्वः दु धका मन्त्री श्रेष्ठया सचिवालयं धागु दु।

प्रधानमन्त्री केपी शर्मा ओलीं प्रतिनिधिसभा विघटन लिपा यागु मन्त्रिपरिषद विस्तारयात सर्वोच्च अदालतं बदर यागुलि २५ सदस्यीय मन्त्रिपरिषदं आः न्याम्ह जक ल्यंदनिइ। मन्त्रिपरिषद सदस्यपिन्त प्रधानमन्त्री ओलीं बिहीवाः मन्त्रालय बाँडफाँट यागु खः। रक्षा व परराष्ट्र मन्त्रालय प्रधानमन्त्री ओली थःम्हेसिया तःगु दु।

उपप्रधानमन्त्री विष्णु पौडेलयात अर्थ, उद्योग, वाणिज्य तथा आपूर्ति, ऊर्जा, जलस्रोत तथा सिंचाइ व गृह मन्त्रालयया जिम्मेवारी बिगु दु।

बसन्तकुमार नेम्वाङयात कृषि तथा पशुपन्छी विकास, खानेपानी, भौतिक पूर्वाधार, सञ्चार तथा सूचना प्रविधि व सहरी विकास मन्त्रालयया जिम्मेवारी बिगु दु।

कानुन, न्याय तथा संसदीय मामिला मन्त्री लीलानाथ श्रेष्ठयात भूमि व्यवस्था सहकारी तथा गरिबी निवारण, महिला, बालबालिका तथा ज्येष्ठ नागरिक, संस्कृति पर्यटन तथा नागरिक उड्डयन व संघीय मामिला तथा सामान्य प्रशासन मन्त्रालयया न जिम्मेवारी बिगु दु।