फोहोर व्यवस्थापनया विषय थौं प्रधानमन्त्री शेरबहादुर देउवा व येँ महानगरया मेयर बिद्यासुदर शाक्य व उपमेयर हरिप्रभा खड्गीपिनिगु दथुइ भेतघाट जुगु दु।

प्रधानमन्त्री निवास वालुवाटारय् भेतघाटया दथुइ मेयर शाक्यं, सडक स्यंगुलि फोहोर उठे यायेत थाकूगु दु धका धयादीगु खः। प्रधानमन्त्री देउवां अन हे सडक विभागया महानिर्देशकयात टेलिफोन सम्पर्क यासे तत्काल सतकयात सुचारु यायेत निर्देशन बिउगु दु। अथेहे शान्ति सुरक्षायात मजवुत दयकेत गृहमन्त्री बालकृष्ण खाँडयात टेलिफोन याना माःगु प्रबन्ध यायेत निर्देशन बिगु दु।

उगु भेटवार्ता लिपा छलफलया विषय प्रतिक्रिया बियादीसे मेयर शाक्यं, फोहोर व्यवस्थापनया तत्काल व दिगो समाधानया विषय खँ जुगु धका जानकारी बिउगु खः। ‘प्रधानमन्त्री देउवानाप जिमिसं बञ्चरे डाँडाय् ल्याण्डफिल साइड याकन हे निर्माण सम्पन्न याना हस्तान्तरण यायेगु वातावरण निर्माण यायेत इनाप यानागु दु,’ शाक्यं धयादीगु दु, ‘जिं भदौ ८ गते हे प्रधानमन्त्रीयात पौंपाखे फोहोर व्यवस्थापनया लागि कुतः यायेत इनाप यानागु खः। उकिइ वयकः नाप भेटघाटया लागि ई फ्वनागु खः। थौं भेटघाटया मिले जुगु खः। खँ सकारात्मक जुगु दु।

महानगर सिसडोलतक वनेगु लँ दयकेत निर्माणया लागि मागु खर्च यायेत तयार दु।’मेयर शाक्यं प्रधानमन्त्री देउवायात पौं छ्वया स्वनिगलय् फोहोरमैलाया दीर्घकालीन समस्या समाधानया लागि निर्माणाधीन बञ्चरे डाँडा स्यानिटरी ल्याण्डफिल साइडया आःतक न निर्माण ज्या सम्पन्न मजुगु व उगु साइट तक वनेगु लँ दयकेगु सम्पन्न याये मफुगुलि स्वनिगलय् फोहोरमैला व्यवस्थापनय् अवरोध जुगु धका उल्लेख यागु दु।

‘थुगु अवस्थाय् बञ्चरे डाँडा ल्याण्डफिल साइड व उगु साइड तक वनेगु लँ याकन दयकां फोहोरमैला व्यवस्थापन सहजताया लागि प्राथमिकता बिया माःगु कारबाही यायेत इनाप यानागु दु।’ 

नेकपा (एकीकृत समाजवादी)या वरिष्ठ नेता झलनाथ खनाल साढे २ महिना लिपा स्वदेश लिहावंगु दु।

वयकः दिल्लीस्थित ओपोलो अस्पतालय् मृगौला प्रत्यारोपण याना थौं सोमबाः स्वदेश लिहावंगु खः।

स्वास्थ्यय् समस्या खनेदुगुलि वयकः वंगु असार २ गते उपचारया लागि दिल्ली प्रस्थान यागु खः। खनालयात लसकुस यायेत अध्यक्ष माधवकुमार नेपाल नाप नेतापि त्रिभुवन विमानस्थलय् वंगु खः।

अध्यक्ष नेपालं वयकःया भिं उसाँय्या कामना यासे आः याकन हे राजनीतिक जीवनय् लिहावयेत कामना यागु दु।

नेकपा (एकीकृत समाजवादी) पार्टीया वरिष्ठ नेता झलनाथ खनालं केपी शर्मा ओलीया नेतृत्व यागु पार्टी ‘दक्षिणपन्थी अवसरवादी’ पार्टी जुगु धका धागु दु।

भारतया न्हुगु दिल्लीस्थित एपोलो अस्पतालय् उपचार याना लिहावयेगु झ्वलय् खनालं ओली न एमालेयात दक्षिणपन्थी भासय् घ्वाना यकूगुलि न्हुगु पार्टी निर्माण यायेमाःगु खः धका धागु दु।

“केपी ओलीें पार्टी दक्षिणपन्थी अवसरवादी पार्टी खः,” खनालं धागु दु, “नेकपा एमाले जिमिगु हि चःतिं निर्माण यानागु पार्टी खः । तर, केपी ओलीं एमालेयात दक्षिणपन्थी भासय् घ्वाना यकूगु दु धागु दु।

उकिइ छगु क्रान्तिकारी पार्टी मागु दु।” वयकलं धागु दु निजी स्वार्थ मदुपि क्रान्तिकारीपिन्स विद्रोहया ल्या गुलि दु उकिया महत्व जुइ मखु धका धागु दु। “झापा विद्रोह चिधःगु ल्याखं सुरु यानागु खः।

उकियात स्यायत स्वंगुलि देयन्यक मिँ त्यात,” खनालं धागु दु, “आः न गुलि ल्याः दु, थ्व महत्वया विषय मखु। क्रान्ति इमान्दारी व प्रष्टताया साथ सुरु यातकि सफल जुइ।”

नामसंगीति पर्व निरन्तरताया लागि यल महानगरपालिका–१६ नं नेपाल परम्परागत बौद्ध धर्मसंघयात ५ लाख रुपैयाँ लल्हागु दु।

यलया नकबहीलस्थित फलचाय् नामसंगीति पाठ नाप वडाअध्यक्ष निर्मलरत्न शाक्य, वडा सदस्यपि पञ्चबज्र बज्राचार्य, सुप्रभा शाक्य व विजय महर्जनं संघया महासचिव दिनेश शाक्य नाप संघया पदाधिकारीपिन्त मंकाः कथं ५ लाखया चेक लल्हागु दु।

विशेष दिं व गुँलाया इलय् लच्छि तक त्वाः त्वालय् नामसंगीति पाठ याइगु परम्परा दु। बौद्ध अध्येयतापि कथं थुगु परम्परा नेपालय् ११ क्वःगु शताब्दीनिसे न्ह्यागु खः। उगु ज्याझ्वलय् वडाअध्यक्ष शाक्यं स्वनिगलय् नेवाः बौद्ध समाजया प्रचलित आर्य मञ्जुश्री नामसंगीति पाठ छगु अर्मूत संस्कृतिया रुप दुगु उल्लेख यासे थुकिया संरक्षणया लागि वडापाखे ग्वाहालि यानागु खः धका धयादीगु खः।

संस्कृति, सम्पदा संरक्षणयात वडां प्राथमिकताय् तया ज्यायाना वयाच्वनागु दु धका धयादीसे वडाअध्यक्ष शाक्यं धयादीगु दु ‘गुठी, संघसंस्था, स्थानीय जनतां सच्छि दँ निसे थुकियागु संरक्षण याना वयाच्वंगु दु। वयकःपिन्त प्रोत्साहित यायेमाःगु दायित्व महशुस यासे वडां ग्वहालि यानागु खः।’

स्वास्थ्य तथा जनसंख्या मन्त्रालयया कथं थौं दकलय् अप्वो येँ ६६५ म्हेसित कोरोना सक्रमण पुष्टि जुगु दु।

अथेहे, यलय् १३८, झापाय ११७, कास्कीइ १०७, ख्वपय् १०३ व सुनसरीइ १०० म्हेसित कोरोना संक्रमण पुष्टि जूगु दु।

अथेहे, मोरङय् ९०, चितवनय् ५६, नुवाकोटय् ३९, मकवानपुरय् ३७, कालिकोटय् ३२, धादिङइ २८, काभ्रेपलाञ्चोक, दोलखा व बाँकेय् २४÷२४ म्ह, नवलपरासी पूर्व व दाङय् १९÷१९ म्ह, उदयपुर, रामेछाप व जुम्लाय् १७÷१७ म्ह, सिन्धुपाल्चोकय् १५, गोरखा व तनहुँइ १२÷१२ म्हेसित कोरोना सक्रमण पुष्टि जुगु दु धका स्वास्थ्य तथा जनसंख्या मन्त्रालयं धागु दु।