नेकपा एकीकृत समाजवादीं वाग्मती प्रदेशया मुख्यमन्त्री दाबी याःगु दु। नेकपा एमालेया १२ म्ह सांसदपिन्स एकीकृत समाजवादी ल्ययेगु दु सा मुख्यमन्त्री अष्टलक्ष्मी शाक्य अल्पमतय् लागु दु।

१०९ म्ह सदस्यीय प्रदेशसभाय् एमालेया ५६म्ह सांसदपि दु। एकल बहुमत जुगुलि २ भदाय् डोरमणि पौडेलं राजीनामा बिया शाक्ययात मुख्यमन्त्री दयकूगु खः। तर उगु हे दिं एमाले तछ्याना नेकपा समाजवादी एकीकृत बने जुगु खः।

राजनीतिक दलसम्बन्धी अध्यादेश कथं प्रदेश व स्थानीय तहया जनप्रतिनिधिपिन्त दल ल्ययेत निर्वाचन आयोगं २२ गते बहनि ५ बजे तक ई बिउगु खः।

मंगलबाः एमालेया १२ म्ह सांसदपिन्स निर्वाचन आयोगय् प्रदेश कार्यालय वना एकीकृत समाजवादी ल्यंगु जानकारी बिगु खः। मुख्यमन्त्रीया उम्मेदवार सु जुइ धका तःगु न्ह्यसलय् सांसद राजेन्द्र पाण्डे धागु दु, ‘पार्टी नं जितः न्ह्यः हःगु दु। सत्तारुढ गठबन्धनय् जिं सकसिगु सहमतिया उम्मेदवार खः।’

मन्त्रिपरिषदयात पूर्णता बिइगु विषयय् गठबन्धन दुने आबद्ध दल दथुइ जुगु छलफल विना निष्कर्ष क्वचागु दु।

थौं सुथय् च्वंगु बैठकय् मन्त्रिपरिषद् विस्तार व दलपिन्स कायेगु मन्त्रालयबारे टुग्ये यायेत छलफल जुगुलि निर्णय मजूगु धका प्रधानमन्त्री शेरबहादुर देउवाया सचिवालयं धागु दु।

मन्त्रिपरिषदयात पूर्णता बिइगु विषय गठबन्धनय् दुथ्यागु दल दथुइ मेगु हाकन छलफल जुइगु सम्भावना दु।थौं बहनि तक क्वछित धासा कन्ह्य दुने मन्त्रिपरिषद् यात पूर्णता बिइगु देउवाया तयारी दु।

माधव नेपाल समूहं न्हुगु दल दर्ता जुइवं मन्त्रिपरिषदयात पूर्णता बिइगु तयारी जूसा सहमति याये मफया लिवागु खः।

थौं लुँया भाः तोलां प्यसः कुहावंगु दु।

थौं तोलां प्यसः कुहावया ९१ हजार २ सय रुपैयाँ तोके जुगु दु धका नेपाल सुनचाँदी व्यवसायी महासङ्घं धागु दु।

अथेहे वहः न थौं न्यातका कुहावंगु दु । वहः तोलां थौं न्यातका कुहावया १२ सय ५ रुपैयाँ  कारोबार जुगु दु धका महासङ्घं धागु दु।

सत्तारूढ गठबन्धनय् दुथ्यागु दलया नेतापि दथुइ बैठक थौं न जारी जुयाच्वंगु दु।

बालुवाटारय् प्रधानमन्त्रीया सरकारी निवासय् उगु बैठक सुरु जुगु खः। बैठकय् मन्त्रिपरिषदयात पूर्णता, मन्त्रालय भागबन्डा लगायत विषय छलफल जुगु खः।

थौं मन्त्रालये भागबन्डा टुंग्ये यायेगु सत्तारूढ दलपिनिगु तयारी दु। थ्व स्वया न्ह्यः म्हिगः सोमबाः  सुथय् च्वंगु बालुवाटारय् सत्तारूढ दलया शीर्ष नेतापिनिगु बैठक मन्त्रिपरिषदयात याकन हे पूर्णता बिइगु सहमति जुइ धका धागु दु।

नेपाली कांग्रेसया सभापति शेरबहादुर देउवा प्रधानमन्त्री जुगु थौं ४० दिं जूसा मन्त्रिपरिषदयात पूर्णता बिइ फुगु मदुनि।