Display Style:
Column Style
गोर्खा सैनिक तुलबहादुरया नामय् बेलायतय् रेल सेवा न्ह्यात
लहनान्यूज | बछलाथ्व पुन्हि ११४१, असार १० बिहीवाः
भिक्टोरिया क्रस त्याकुमि गोरखा सैनिक तुलबहादुर पुनया नामय् बेलायतय् रेल सेवा न्ह्याकूगु दु ।
म्हिगः लण्डनया प्याडिङटन स्टेशनय् ग्रेट वेस्टर्न रेल्वें ग्वसाग्वःगु ज्याझ्वलय् पुनया काय् अर्जुन पुन व म्ह्याय् मेघकुमारी पुनं उगु रेल सेवा उलेज्या यानादिगु खः ।
भिसी पुनया नां च्वयातःगु रेल लण्डन–प्याडिङटन–ब्रिस्टोलय् सेवा न्ह्याकूगु खः । ज्याझ्वलय् अभिनेत्री जोअना लुम्लें गोरखा न्यायिक अभियानय् तुलबहादुर पुनया नां इतिहासय् हे अंकित जुइधुंकूगु व रेल्वेया नां पुनया नामं जूबले पुनयात न्हियान्हिथं लुमंकेगु भलसा प्वंकादिल ।
गोरखा ब्रिगेड एसोसिएसनया नायः डेभिड बिलं पुनया नामं रेल्वे सेवा न्ह्याकेगु निर्णय ऐतिहासिक जूगु व नेपाःयात कोरोनाया खोप उपलब्ध यायेत बेलायती प्रधानमन्त्रीया ध्यानाकर्षण तकं यानादिगु दु ।
ग्रेट वेस्टर्न रेल्वे सेवाया मानव संशाधन निर्देशक रुथ बस्बीं ग्रेट वेस्टर्न रेल्वें समुदायया म्हसिका, स्वामित्व र ग्वहालिया नितिं ताः ईनिसें रेल्वेया नां थीथी मनुतय्गु नामं यानावयाच्वंगु धयादिल
यल महानगरपालिका मातहतया ब्वनेकुथीं नं नेपालभाषा ब्वंकिगु
लहनान्यूज | बछलाथ्व पुन्हि ११४१, असार १० बिहीवाः
यल महानगरपालिकां थ्वहे दँनिसें महानगर मातहत लाःगु फुक्कं सामुदायिक व संस्थागत ब्वनेकुथी नेपालभाषा ब्वंकीगु जूगु दु ।
महानगरपालिकाया बोर्ड बैठकं थ्व सम्बन्धी निर्णय यानाब्यूगु खः । मातृभाषायात अनिवार्य यासें स्थानीय विकाय समावेशी यानाः स्थानीय पाठ्यक्रम÷पाठ्यपुस्तक तयार यानाः कार्यान्वयन यायेगु धकाः धागु दु ।
महानगरपालिका दुनेया सामुदायिक ब्वनेकुथी नेपालभाषा ब्वंकेत थ्वहे आर्थिक दँनिसें शिक्षक जनशक्तिया व्यवस्थापन (प्रशिक्षक तथा सहायक प्रशिक्षक) प्रबन्ध यायेगु धकाः महानगरं धागु दु ।
यल महानगरपालिकाया बोर्डं याःगु थ्व निर्णययात आः नगरसभाया बैठकय् लःल्हाइगु धागु दु । नगर सभां पारित यायेवं यल महानगरपालिका अन्तर्गत लाःगु फुक्कं ब्वनेकुथी स्थानीय विषयया रुपय् नेपालभाषा ब्वंकेगु व्यवस्था जुइ ।
यलय् नेपालभाषा ब्वंकेगु लागिं स्थानीय ज्यापु समाज लिसें थीथी खलः पुचःतय्सं पहल याना वयाच्वंगु खः । यल महानगरपालिकाय् नेपालभाषा ब्वंकेगु व्यवस्था जू थें यल जिल्लाय् लाःगु मेमेगु नगरपालिकाय् नं थःथःगु कथं नेपालभाषा ब्वंकेगु तयारी जुयाच्वंगु खँ सीदुगु दु ।
थ्वसिवे न्ह्यः येँ महानगरपालिकाया शिक्षा विभागं थः मातहत लाःगु फुक्कं स्कुलय् पौ छ्वयाः थुगु दँनिसें स्थानीय विषय कथं ‘येँ देय् म्हसीके’ सफू ब्वंकेत परिपत्र जारी याःगु दु ।
स्थानीय तहलं वइगु आर्थिक दँया नीति, ज्याझ्वः नह्यब्वइगु
बछलाथ्व पुन्हि ११४१, असार १० बिहीवाः
देय्न्यंकंया स्थानीय तहलं वइगु आर्थिक दँया नीति, ज्याझ्वः व बजेट थःथःगु सभाय् थौं न्ह्यब्वइगु जूगु दु ।
गुलिख्य स्थानीय तहलं असार १० गते न्ह्यः हे वइगु दँया नीति, ज्याझ्वः व बजेट सभाय् लःल्हायेधुंकूगु दु । अन्तरसरकारी वित्त व्यवस्थापन ऐन व स्थानीय सरकार सञ्चालन ऐनं फुक्क स्थानीय सरकारं असार १० गतेदुने वइगु दँया नीति, ज्याझ्वः व बजेट लःल्हायेमाःगु कानुनी व्यवस्था याःगु दु ।
स्थानीय तहलं नीति, ज्याझ्वः व बजेटलिसे आर्थिक ऐन व विनियोजित ऐन तकं सभाय् लःल्हानाः असार मसान्तदुने पारित यायेमाःगु कानुनी व्यवस्था दु । संघीय मामिला तथा सामान्य प्रशासन मन्त्रालयं थ्वसिवे न्ह्यः हे फुक्क स्थानीय तहयात वइगु दँया नीति, ज्याझ्वः व बजेट असार १० गतेदुने लःल्हायेत इनाप यायेधुंकूगु दु ।
संघीय सरकारं जेठ १५ गते, प्रदेश सरकारं असार १ गते अले फुक्क स्थानीय सरकारं असार १० गतेदुने वइगु दँया नीति, ज्याझ्वः व बजेट सभाय् लःल्हायेमाः । संघीय व प्रदेश सरकारं थ्वसिवे न्ह्यः वइगु दँया नीति, ज्याझ्वः व बजेट सार्वजनिक याःगु खः ।
स्थानीय तहयात संघीय व प्रदेश सरकारं समानीकरण अनुदान, समपुरक, राजस्व बाँडफाँटपाखें चूलाःगु अनुदान, विशेष व ससर्त अनुदान शीर्षकय् बजेट चूलाकूगु खः । स्थानीय तहलं न वइगु दँया नितिं संघीय व प्रदेश सरकारया नीति व ज्याझ्वः कार्यान्वयन याकाः स्वास्थ्य क्षेत्रयात उच्च प्राथमिकताय् तःगु खः ।
अनलिं बजेट सार्वजनिक यायेगु ज्याधलः दुगु नेपाल नगरपालिका संघ व गाउँपालिका रािष्ट्रय महासंघं धागु दु ।
सरस्वती प्रधानया त्वःतल
बछलाथ्व पुन्हि ११४१, असार १० बिहीवाः
जातीय भेदभाव यानाः दलितयात क्वथा बालं मबिउगु द्वपनय् ज्वनातःम्ह मय्जु सरस्वती प्रधानयात त्वःतूगु दु ।
येँ जिल्ला अदालतं प्रमाण मगाः धासें मुद्दा हे मन्ह्याकुसे वय्कःयात म्हिगः त्वःतूगु खः । प्रहरीं स्वन्हु हिरासतय् तयेधुंकाः वय्कःयात बुधवाः अदालतय् पेश याःगु खःसा जिल्ला अदालतया सरकारी वकिलं प्रमाण हे मगाः धासें मुद्दा हे दर्ता मयासें त्वःतूगु खः ।
प्रहरीं स्वन्हु हिरासतय् तयाः याःगु अनुसन्धानया फाइल सरकारी वकिलयात बुझे याःगु खःसा सरकारी वकिलं प्रमाण मगाः धकाः फाइल प्रहरीयात हे लितबिउगु खः । सञ्चारकर्मी रुपा सुनारं थःत कामी जूगुलिं क्वथा बालं मबिउगु धकाः मय्जु प्रधानविरुद्ध उजुरी तःगु खः ।
प्रधानयात प्रहरीं स्वन्हु हिरासतय् तयाः अनुसन्धानया निंतिं सुनारं रेकर्ड याःगु टेलिफोनया अडियो बिउगु खः, तर सरकारी वकिलं थुकीया फोरेन्सिक जाँच यानाः प्रमाणित मजूनिगुलिं प्रमाण मगाः धकाः धाःगु खः ।
सरकारी वकिल कार्यालयया सहायक जिल्ला न्यायाधिवक्ता चन्द्रप्रसाद संजेलं प्रमाण मगाःगुलिं थप अनुसन्धान यायेत धयागु धकाः धाःगु दुसा थ्व मुद्दा न्ह्याकेगु व खारेज यायेगु धयागु बारे निर्णय धाःसा मजूनिगु खँ वय्कलं धयादीगु दु ।
पेट्रोलियम पदार्थया भाः थहाँवन
लहनान्यूज | बछलाथ्व चर्तुदशी ११४१, असार ९ बुधबाः
नेपाल आयल निगमं हाकन पेट्रोलियम पदार्थया भाः थकाःगु दु । निगमं बुधबाः चान्ह्य १२ ताः ईलंनिसें लागू जुइकथं पेट्रोलियम पदार्थया भाः थकाःगु खः ।
निगमं पेट्रोल, डिजेल, मट्टितेल व हवाई इन्धनय् भाः थकाःगु खः । पेट्रोल, डिजेल व मट्टितेलया भाः प्रति लिटर २ तकाः दरं अप्वःगु खः । २ तकाः थकाना आः पेट्रोल प्रति लिटर १२७ तकाः थ्यंगु दु । अथेहे डिजेल व मट्टिटेल भाः ११० तकाः कायम याःगु दु ।
हवाई इन्धनपाखे अन्तर्राष्ट्रिय उडानय् प्रति किलोलिटर २० तकाः अमेरिकी डलर व आन्तरिक उडानपाखे प्रतिलिटर २ तकाः थकाःगु दु ।
