Display Style:
Column Style
देयन्यक थप २२९५ म्ह संक्रमण पुष्टि
शोभा श्रेष्ठ | गुंलागा अष्टमी ११४१, भाद्र १४ सोमवाः
वंगु २४ घण्टाया दुने देयन्यक थप २२९५ म्हेसित कोरोना भाइरस संक्रमण पुष्टि जूगु दु।
स्वास्थ्य तथा जनसंख्या मन्त्रालयया कथं ११ हजार ८९२ म्हेसिगु पीसीआर परीक्षणय् १९०२ म्हेसित व ४३४१ म्हेसिगु एन्टिजेन परीक्षणय् ३९३ म्ह याना २२९५ म्हेसित संक्रमण पुष्टि जुगु दु।
अथेहे वंगु २४ घण्टाय् कोरोना भाइरस संक्रमणमुक्त जूपि १८०८ म्ह व १६ म्ह सीगु दु। आःतक नेपालय् कोरोना संक्रमितपि ७ लाख ६१ हजार १२४ म्ह थ्यंगु दु।
थ्व नाप नेपाल सीपि १० हजार ७३० म्ह थ्यंगु दु सा ७ लाख १४ हजार ५२० म्ह संक्रमणमुक्त जुइ धुकुगु दु।
एमालें १० बुँदे सहजीकरण यायेत नेतापि खटेयात
लहानान्युज | गुंलागा अष्टमी ११४१, भाद्र १४ सोमवाः
नेकपा एमाले न १० बुँदे सहमति कार्यान्वयनया लागि सहजीकरण यायेत नेतापि खटे यागु दु।
प्रदेश, जिल्ला व मातहतया कमिटीया नाप जनसंगठनया १० बुँदे कार्यान्वयनया लागि सहजीकरण यायेत नेतापि खटे यागु दु। अन्तर पार्टी निर्देशन (अपानी) कथं प्रदेश १ य् भीम आचार्य, सुवास नेम्बाङ, शेरधन राई, देवराज घिमिरे व टंक आङबुहाङ नाप प्रदेश २ य् सत्य नारायण मण्डल, रघुवीर महासेठ, प्रभु साह, सुमन प्याकुरेल व ज्वाला कुमारी साहयात खटे यागु दु।
अथेहे बाग्मती प्रदेशय् अष्टलक्ष्मी शाक्य, रामबहादुर थापा, काशीनाथ अधिकारी व आनन्द पोखरेल, गण्डकीइ किरण गुरुङ, पृथ्वीसुब्बा गुरुङ, जगत विश्वकर्मा व लीलबहादुर थापा नाप लुम्बिनी प्रदेशय् विष्णु पौडेल, शंकर पोखरेल, टोपबहादुर रायमाझी, दलबहादुर राना व लीला गिरीपिन्त खटे यागु दु।
अथेतु, कर्णालीइ युवराज ज्ञवाली, यमलाल कँडेल, गोरख बोगटी व धर्मराज रेग्मी, सुदूरपश्चिम प्रदेशय् भीम रावल, लेखराज भट्ट व कर्णबहादुर थापा नाप जनसंगठनय् ईश्वर पोखरेल, विष्णु पौडेल, गोकर्ण विष्ट व टोपबहादुर रायमाझीपिन्त खटे यागु दु।
स्वास्थ्य मन्त्रालय अन्तर्गतया उच्च अधिकारीपिनिगु जिम्मेवारी
लहानान्युज | गुंलागा अष्टमी ११४१, भाद्र १४ सोमवाः
हेरफेर स्वास्थ्य तथा जनसंख्या मन्त्रालय अन्तर्गतया उच्च अधिकारीपिनिगु जिम्मेवारी हेरफेर यागु दु।
स्वास्थ्य मन्त्री स्तरीय निर्णय यासे परिवार कल्याण महाशाखा अन्तर्गत खोप शाखा प्रमुख डा. झलक शर्मायात चिइका व्यवस्थापन महाशाखाया सागर दाहालयात हःगु दु।
डा. शर्मायात व्यवस्थापन महाशाखा छ्वगु दु धका मन्त्रालयं धागु दु। अथेहे सार्क क्षयरोग केन्द्रया निर्देशक डा. विवेकलाल कर्णयात परिवार कल्याण महाशाखाया निर्देशकय् सरुवा यागुदु। परिवार कल्याण महाशाखाया निर्देशक डा. तारा पोखरेलयात डा. लालया थासय् छ्वंगु दु।
अथेहे क्षयरोग नियन्त्रण केन्द्रया निर्देशक डा.अनुज भट्टचनयात कर्णाली प्रदेश निर्देशनालय छ्वया वयागु थासय् डा. प्रकाश शाहयात हःगु दु। भरतपुर अस्पतालया मेडिकल सुपरिटेण्डेन्टय् डा. कृष्ण पौडेलयात नियुक्त यागु दु। उगु अस्पतालया मेसु डा. रोशन न्यौपानेयात गजेन्द्र नारायण स्वास्थ्य विज्ञान प्रतिष्ठान अस्पतालय् सरुवा यागु दु धका स्वास्थ्य सचिव डा. रोशन पोखरेलं जानकारी बिगु दु।
खुसिबाः व चलखय् लानाः गुम्ह सीत
गुंलागा अष्टमी ११४१, भाद्र १४ सोमवाः
भदौया वाया हुनिं लिपांगु स्वन्हुइ खुसिबाः व चलखय् लानाः गुम्ह सीगु दु ।
मनसुनी विपतं देय्न्यंक करिब प्यद्वःत्या छेँ डुवानय् लाःगु व ९०द्वः स्वयां अप्वः जनसंख्या प्रभावित जूगु प्रारम्भिक अनुमान दुगु राष्ट्रिय विपत् जोखिम न्यूनीकरण तथा व्यवस्थापन प्राधिकरणं न्ह्यथंगु दु ।
अथे हे, प्यम्ह वेपत्ता व न्याम्ह घाःपाः जूगु दु । खुसिबाः चलः व डुबानं ४२ खा छेँ पूवंक क्षति जुइगुया लिसें ७सः व ५६म्हेसित सुरक्षित थासय् ल्ह्यःगु दु । प्राधिकरणयाकथं देय्या पहाडी व तराई क्षेत्रय दर्जन स्वयां अप्वः सडक अवरुद्ध जूगु दु ।
सडक विभागं अवरुद्ध सडक चायेकेत २सः व ५गः हेभी इक्विपमेन्ट परिचालन यानागु जानकारी ब्यूगु दु । तराईया थीथी जिल्ला डुबानय् लाःगु दु । थ्व हे दथुइ, सप्तकोशी खुसिइ म्हिगः थुगुसीया हे उच्च वहाव मापन जूगु दु ।
कोशी ब्यारेज कन्ट्रोल रुमं ब्यूगु जानकारी कथं लिपांगु मापनय् सप्तकोशीइ २ लख ५७द्वः ७सः व ९० क्यूसेक प्रतिसेकेण्ड वहाव थ्यंगु दु । लःया बाः अप्वयेधुंकाः ब्यारेजया ३५ लुखा चायेकूगु दु ।
वंगु साउन ३२ गते कोशीइ थुगुसीया हे दक्कले अप्वः २ लख ५६द्वः व २० क्यूसेक प्रतिसेकेण्ड बाः मापन जूगु खः । लिपांगु मापनं थुगु रेकर्डयात नं ल्यूने लाकाब्यूगु दु ।
पूर्वया अप्वःथे भेगय् वा वयाच्वंगुलिं कोशीया लःया स्तर अझ थहां वनेफुगु अनुमान याःगु दु ।
सत्ता गठबन्धन नेतापिनिगु बैठक सुरु
लहानान्युज | गुंलागा अष्टमी ११४१, भाद्र १४ सोमवाः
सत्ता गठबन्धन दलया नेतापि छलफलय् जुटे जुगु दु। प्रधानमन्त्रीया सरकारी निवास बालुवाटारय् सत्तारूढ दलया नेतापिनिगु बैठक च्वनाच्वंगु दु।
थौंया बैठकय् मन्त्रिपरिषद् विस्तार, मन्त्रालयया भागबन्डा लगायत विषय छलफल जुयाच्वंगु दु धका धागु दु। नेपाली कांग्रेसया सभापति शेरबहादुर देउवा प्रधानमन्त्री जुगु लँत्यां जुइगु धुकुगु दुसा मन्त्रिपरिषदयात पूर्णता बिए फुगु मदुनि।
बैठकय् प्रधानमन्त्री देउवा नाप कांग्रेस, नेकपा (माओवादी केन्द्र), जसपा, नेकपा (एकीकृत समाजवादी)या शीर्ष नेतापिनिगु उपस्थित दुगु खः।
