सरकारं नेपालपाखे प्यंगु देय् लागि नियमित उडान खुला यागु दु।

निगु छिमेकी देय् भारत व चीन नाप कतार व टर्कीइ आ सेड्युल उडान जुइ । उकि मध्ये आः भारतय् वाःया दुने निगु उडान जुइ।

चीन, कतार व टर्की धासा जेठ १८ निसे नियमित उडान खुले जुइगु संस्कृति, पर्यटन नाप नागरिक उड्डयन मन्त्री भानुभक्त ढकालं जानकारी बिगु खः।

खोपया मात्रा पुरा यापि यात्रु होम आइसोलेसन च्वने फइ। मेपि यात्रुपिनिगु हकय् धासा अनिवार्य होटेल क्वारेन्टिन व्यवस्था यागु दु।

कोरोना भाइरसया महामारी नियन्त्रण यायेत घोषित निषेधाज्ञाया दथुइ लिपागु लच्छि निसे नेपालय् आन्तरिक नाप बाहृय निगुलि हे हवाई उडान बन्द जुगु खः।

तर, चार्टर्ड उडान धासा जुयाच्वंगु दु । नेपालय् पर्वतारोहणय् वःपि युरोप व अमेरिकी देशय् नागरिकपिन्त छेँ लिहावनिइपिन्त इस्तानबुल सहज गन्तब्य जुगु खः।

लुँया भाः तोलां थौं प्यसः क्वहावंगु दु धका नेपाल सुनचाँदी व्यवसायी महासंघं धागु दु।

बिहीवाः ९४ हजार दुई सय रुपैयाँ तोलां कारोबार जूगु छापावाल लुँया भाः थौं शुक्रवाः ९३ हजार ८ सय रुपैयाँ कायम जुगु दु धका महासंघं धागु दु।

थौंया लागि तेजावी लुँ तोलां ९३ हजार तीन सय रुपैयाँ तोके यागु दु। बिहीवाः ९३ हजार सात सय रुपैयाँ खरिद बिक्री जुगु खः।

वंगु स्वन्हु निसे वहःया भाः धासा स्थिर जुया तोलाया १३५० रुपैयाँ जुयाच्वंगु दु।

वंगु बिहीवाः चान्ह्यः भेरी अस्पतालय् चिकित्सकपिन्त कुटपिट यागु घटनायात छानबिन यायेत बाँकेया सहायक प्रमुख जिल्ला अधिकारीया नेतृत्वय् समिति गठन यागु खः।

शुक्रवाः च्वंगु सरोकारवाला निकायया बैठकं सहायक प्रजिअ शंकर बहादुर विष्टया अध्यक्षताय् न्ह्यम्ह सदस्यीय समिति गठन यानागु दु धका प्रमुख जिल्ला अधिकारी शिवराम गेलालं जानकारी बिगु दु।

उगु समितिइ चिकित्सक संघ, नर्सिङ संघ, अस्पताल प्रशासन व जिल्ला सरकारी वकिलया कार्यालयया प्रतिनिधि तक तःगु दु।

समितिं थौनिसे हे ज्यायाना व स्वन्हुया दुने घटनाया सत्यतथ्य पत्ता लगे याना प्रतिवेदन बुझे यायेत सहायक प्रजिअ विष्टं जानकारी बिगु दु।

अथेहे समितिइ मेडिकल एसोसिएसनपाखे विनोद कर्ण, अस्पताल व्यवस्थापन समितिइ पाखे कृष्णप्रसाद श्रेष्ठ, नर्सिङ एसोसिएसनपाखे लक्ष्मी ओली नाप जिल्ला सरकारी वकिलया कार्यालयया प्रतिनिधि व अस्पतालया छम्ह चिकित्सक दु। 

प्रतिनिधिसभा विघटन विरुद्धया रिट सुनुवाइया लागि प्रधानन्यायाधीश चोलेन्द्र शमसेर जबराया नेतृत्वय संवैधानिक इजलास गठन जुगु दु।

उगु संवैधानिक इजलासय् न्यायाधीशपि दीपककुमार कार्की, आनन्दमोहन भट्टराई, तेजबहादुर केसी व बमकुमार श्रेष्ठपि खः।

सर्वाेच्च अदालतया प्रवक्ता भद्रकाली पोखरेलया कथं शुक्रवाः निसे हे इजलासय् रिटबारे सुनुवाइ यायेगु तयारी दु।

सरकारया सिफारिसय् वंगु शुक्रवाः राष्ट्रपति विद्यादेवी भण्डारीं यागु संसद विघटन विरुद्धया दक्को मुद्दा संवैधानिक इजलासं स्वयेगु निर्णय बिहीवाः सर्वोच्च अदालतं यागु खः ।

येँ महानगरपालिकां थौनिसे समुदायस्तरय एन्टिजिन टेस्ट याइगु जुगु दु।

कोरोना भाइरस महामारी अप्वोया वंगुलि संक्रमणया अवस्था सिइकेगु निति महानगरपालिकां नगर दुने थीथी थासय् एन्टिजिन परीक्षण यायेत्यंगु खः।

११ जेठनिसे थीथी थासय् परीक्षण केन्द्रय् सार्वजनिक थासय् महानगरं थौनिसे बृहद् रुपं कोरोना परीक्षण यायेत्यंगु खः।

थुगु परिक्षण जेठ १८ गते तक एन्टिजिन परीक्षणं कोभिड बिरामीया प्रत्यक्ष सम्पर्कय् दुपि, फतलाइनय् च्वना ज्या याइपि, कोभिडया लक्षण खनेदुपि तर परीक्षण मयापिन्त उगु जाँच यायेत्यंगु खः।

थौंनिसे न्यान्हुतक थीथी थासय् एन्टिजिन परीक्षण सञ्चालन याइगु जुगु दु।

परिक्षण याइगु थाय् थुकंथ दु