थौं हलियकं बौद्ध धर्मावलम्बीपिनिगु २५६५ क्वःगु बुद्ध जयन्ती खः।

दँय् दँसं वैशाख पुन्हि कुन्हु तःजिक हनिइगु बुद्ध जयन्ती थुगु दँय् कोरोना भाइरस महामारीया कारण थौं छु न विशेष ज्यााझ्वः मदु।

भगवान बुद्धया बुदिं, बुद्धत्व प्राप्त यागु व महापरिनिर्माण जुगु दिं वैशाख पुन्हि जुगुलि थौंया दिं बौद्धमार्गीपिन्स विशेष पर्व कथं काइगु दिं खः।

थौंया दिं बुद्ध बुगु थाय् लुम्बिनी लगायत दक्को बौद्ध स्तुपा नाप थीथी बिहारय् बुद्ध जयन्ती हनेगु याइ। तर कोरोनाया कारण थुगु दँ लुम्बिनी न दीप प्रज्वलन बाहेक मेगु छु न विशेष ज्याझ्वः मदु।

लुम्बिनीमा २५६५ गु दीप प्रज्ज्वलन व परित्राण पाठ याना सामान्य कथं जक माने यायेत्यंगु दु।

स्वनिगः दुने २४ घण्टाय् थौं मंगलवाः २ हजार ६१३ म्हेसित कोभिड संक्रमित थपे जुगु दु।

थौं येँ १ हजार ८६३ म्ह कोरोना सक्रमित थपे जूगु दु।

यलय् ४२७ म्ह व ख्वपय् ३२३ म्ह न्हुपि संक्रमित थपे जूगु दु।

स्वनिगः दुने निषेधाज्ञा छवाःया लागि थप यागु दु ।

संक्रमण जूपि घटे मजुगु धका धासे कडा प्रावधान नाप छवाःया निषेधाज्ञा थपे यगु दु। येँ, यल व ख्वपया स्वम्ह प्रमुख जिल्ला अधिकारीपिनिगु मंकाः कथं च्वंगु बैठकं छवाःया लागि कडा निषेधाज्ञा तयेगु निर्णय यागु दु।

आः थपे यागु निषेधाज्ञाय् सुथय् ९ बजे तक तरकारी, फलफूल, दुरु, ला व ग्याँस पसः चायके दइगु जुगु दु।

तर खाद्यान्न पसः, डिपार्टमेन्टल स्टोर चाहिँ बन्द यायेगु निर्णय जुगु दु धका येँया सहायक प्रमुख जिल्ला अधिकारी उमाकान्त अधिकारीं धागु दु।

वयकःया कथं सरकारी कार्यालय, बैंक, सार्वजनिक संस्थान व इन्टरनेट सेवा प्रदायकया सवारीसाधन सञ्चालनय्  कडा यागु दु ।

वंगु २४ घण्टाया दुने देयन्यक ८ हजार ३८७ म्हेसित कोरोना संक्रमण पुष्टि जूगु दु।

अथेहे नेपालय् आःतक कोरोना संक्रमितपि ५ लाख २८ हजार ८४८ म्ह थ्यंगु दु। अथेतु, थौं ६ हजार ४०४ म्ह कोरोना संक्रमणमुक्त जूगु दु।

थ्व नाप आःतक क ४ लाख ४ हजार ८८७ म्ह कोरोना सक्रमणमुक्त जुइ धुकुगु दु। नेपालय सक्रिय संक्रमितपि १ लाख १७ हजार २६१ म्ह थ्यंगु दु। क्वारेन्टाइनय् ९१४ म्ह च्वना च्वंगु दु।

स्वास्थ्य तथा जनसंख्या मन्त्रालयं बिगु जानकारी कथं देयन्यक थप १६९ म्ह सीगु दु। थ्व नाप आःतक नेपालय् कोरोनां सीपि ६ हजार ७०० म्ह थ्यंगु दु।