थौं मंगलवाः स्वनिगःया जिल्ला प्रमुख जिल्ला अधिकारीपिनिगु बैठक च्वनेत्यंगु दु ।

पूर्वनिर्धारित निषेधाज्ञाया निन्हु न्ह्यः हे निषेधाज्ञा थप यायेगु विषय सहलह यायेगु नितिं उगु बैठक च्वनिइगु तयारी दु धका काठमाडौया प्रमुख जिल्ला अधिकारी कालीप्रसाद पराजुलीं धागु दु ।

आः थप याइगु निषेधाज्ञाय् सरकारं जारी यागुु कोभिड १९ संकट व्यवस्थापन अध्यादेशय् यागु व्यवस्थायात प्रभावकारी रुपं कार्यान्वयन यायेगु विषयय् थौंया बैठक निर्णय जुइफु धका धागु दु । न्हुगु अध्यादेशय्  उल्लेख दुगु व्यवस्थायात प्रभावकारी कार्यान्वयन यायेगु निति छवाः महामारीया चेनब्रेक जुइफु धका धागु दु।

न्हुगु अध्यादेशं निषेधाज्ञा पालना मयातकि नगद जरिवाना व कैद तकया व्यवस्था यागु दु । न्हुगु अध्यादेशया उल्लंघन याइपिन्त खुला तक कैद व स्वंगु लाख तक जरिवानाया व्यवस्था दु। अथेहे उगु अध्यादेश कथं मास्क मतस्ये सार्वजनिक थासय् जुइपिन्त सच्छि जरिवाना, अनुमति विना सवारी चले याइपि निगु पांगे्रया हक छकःया लागिु निसः व प्यंगु पांग्रया हक न्यासः जरिवाना यायेगु व्यवस्था उल्लेख दु धका जानकारी बिगु दु।

थ्व स्वया न्ह्यः पास मकासे सञ्चालन यागु सवारीयात होल्डिङ सेन्टरय् तया कारबाही यागु खः। 

स्वनिगः दुने लिपागु २४ घण्टाय् कोरोना सक्रमितपि म्हो जुगु दु ।

थौं स्वनिगः दुने २ हजार ७८५ म्हेसित कोरोना संक्रमित पुष्टि जुगु दु ।

थौं येँ जक १ हजार ८०६ म्हेसित कोरोना सक्रमण जुगु दु ।

अथेहे यलय् ६८१ म्हेसित व ख्वपय् २९८ म्हेसित संक्रमण जुगु दु ।

कोभिड–१९ भाइरसया कारण नेपाल प्रहरीका प्रहरी नायब उपरीक्षक (डीएसपी) समीरचन्द्र खरेल मन्त।

प्रहरी अस्पताल, महाराजगञ्जय् उपचारया झ्वलय् खरेल थौं सोमवाः मदुगु  धका प्रहरी प्रधान कार्यालय, नक्सालं धागु दु।

संयुक्त राष्ट्र संघया शान्ति मिसनय् वना लिहा वया प्रहरी प्रधान कार्यालय, नक्सालय् ज्या याना च्वम्ह खः।

वंगु १३ महिनाय् ५७७ भेन्टिलेटर व ४०० इन्टेन्सिभ केयर युनिट (आईसीयू) बेड थपे जुगु दु धका स्वास्थ्य तथा जनसंख्या मन्त्रालयं धागु दु।

थ्व नाप देयन्यक अस्पतालया भेन्टिलेटरया ल्याः ९०४ गु थ्यंनेवं आईसीयू बेडया ल्याः ३ हजार थ्यनिइ। सोमवाः ग्वसाः ग्वंगु पत्रकार सम्मेलनय् स्वास्थ्यमन्त्री हृदयेश त्रिपाठीं १८० भेन्टिलेटर व ६३० बेड आईसीयू थपे यायेगु प्रक्रिया सुरु जुगु धका धागु दु। आईसीयू व भेन्टिलेटरय् तया उपचार याये मापि संक्रमितपि ल्याः न्हिया न्हिथं अप्वोया च्वंगुलि भेन्टिलेटर व आईसीयू बेड थप यायेगु प्रक्रिया न्ह्याकगु धका धयादीगु खः ।

हाई डिपेन्डेन्सी युनिट (एचडीयू) बेड ल्याः सरकारी अस्पतालय् २ हजार ७५ व निजीइ ७७८ थपे याना सञ्चालनय् हया व १ हजार ४०० एचडीयू बेड थप यायेगु प्रक्रिया न्ह्याकेगु धका धागु दु । कोभिड–१९ या बिरामीपि उपचारया लागि देयन्यकं सरकारी व निजी याना १५७ अस्पताल सूचीकृत याना सञ्चालन जुया च्वंगु दु धका वयलक धागु दु, उकि मध्ये निजी क्षेत्रय् ४५ अस्पताल नाप सम्झौता याना कोभिड–१९ या बिरामीपिन्त निःशुल्क उपचार यायेगु व्यवस्था मिले यागु दु।

अस्पतालय् ३२ गु अक्सिजन प्लान्ट सञ्चालनय् दुगु व १९ गु प्लान्ट थप यायेगु झ्वलय् दु धका धागु दु। स्वंगु लिक्विइड अक्जिसन ट्यांक दुगुलि आः १७ गु थ्यकिइगु प्रक्रिया न्ह्यने वंगु दु धका मन्त्री त्रिपाठीं धागु दु।