स्वास्थ्य तथा जनसंख्या मन्त्रालयया कथं थौं दकलय् अप्वो येँ ५६१ म्हेसित कोरोना सक्रमण जूगु दु।

अथेहे कास्कीइ २५२, झापा व चितवनय् १५३÷१५३ म्ह, यलय् १०६ म्ह व मोरङय् ८९ म्ह याना कोरोना संक्रमण पुष्टि जूगु दु। अथेतु सुनसरीइ ७१, ख्वपय् ६६, रुपन्देहीइ ५१, मकवानपुरय् ४६, कैलालीइ ४३, नवलपरासी पुर्वय् ४०, नुवाकोटय् ३६, बाँकेय् ३५, पर्वतय् ३०, सुर्खेतय् २५ म्ह कोरोना संक्रमितपि थपे जूगु दु।

बागलुङय् १९, गोरखाय् १८, काभ्रेपलाञ्चोक व जुम्लाय् १६÷१६ म्ह, इलामय् १५, सिन्धुली, तनहुँ व स्याङजाय् १४÷१४ म्ह, म्याग्दी व दाङय् १२÷१२ म्ह, पाल्पाय् ११ म्ह याना धनकुटाय् १० म्हेसित कोरोना संक्रमण पुष्टि जूगु दु। 

वंगु २४ घण्टाया दुने देयन्यक थप २,४३३ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ९,७०२ म्हेसिगु पीसीआर परीक्षणय् २,०५२ म्ह व  ४,६७२ म्ह याना एन्टिजेन परीक्षणय् ३८१ म्ह याना २४३३ म्हेसित संक्रमण पुष्टि जुगु दु।

अथेहे वंगु २४ घण्टाया दुने १९२९ म्ह संक्रमणमुक्त जुगु दु सा संक्रमणया कारण २६ म्ह सीगु दु।

थ्व नाप आःतक नेपाय् कोराना संक्रमित जूपि ७ लाख ५४ हजार ९१५ म्ह थ्यंगु दु सा १० हजार ६३८ म्ह सी धुकुगु दु।

अथेतु ७ लाख ५ हजार ८९३ म्ह संक्रमणमुक्त जुइ धुकुगु दु।

नेकपा एमाले पार्टी विभाजन याना (एकीकृत समाजवादी) गठन जुगुलि वंपि नेतापिन्त पार्टीपाखे निष्कासन यागु दु।

थौं च्वंगु केन्द्रीय कमिटी बैठकं उमित पार्टीपाखे निष्कासन यायेगु व अभिलेखकपाखे हटे याना निवार्चन आयोगयात जानकारी यायेगु निर्णय यायेगु धका प्रवक्ता प्रदीप ज्ञवालीं जानकारी बिगु दु।

एमाले विभाजित याना माधव कुमार नेपालया नेतृत्वय् नेकपा (एकीकृत समाजवादी) बुधबाः जक निर्वाचन आयोगय् दर्ता जुगु खः। उगु पार्टीइ एमालेया ५५ म्ह केन्द्रीय सदस्यपि वंगु खः।

भारतं नेपालयात अक्सिजन प्लान्ट ग्वाहालि यागु दु।

धरानया बीपी कोइराला स्वास्थ्य विज्ञान प्रतिष्ठानया लागि ग्वाहालि यागु उगु प्लान्ट नेपालया लागि भारतीय राजदूत विनय मोहन क्वात्रा न स्वास्थ्य राज्यमन्त्री उमेश श्रेष्ठयात लल्हागु खः।

कोभिड–१९ महामारी विरुद्धया लडाइ नेपाःयात हातेमालो यायेगु उदेश्यं अक्सिजन प्लान्ट यानागु खः धको दूतावासं जारी यागु विज्ञप्तिइ उल्लेख यागु दु।

छम्ह व्यक्ति ५ एलपीएम (लिटर प्रति मिनेट) क्षमता दुगु उगु अक्सिजन प्लान्ट कूल क्षमता ९६० एलपीएम दु धका धासे थुगु प्लान्टं छकलं २०० म्ह बिरामीपिन्त सेवा प्रदान यायेगु क्षमता दु धका विज्ञप्तिइ उल्लेख यागु दु।

निन्हु लगातार तसकं कुहावःगु शेयर बजाः थौं बिहीवाः थहावंगु दु।

नेप्से थौं १७ दशमलव ५७ अङ्कं थहावना ३ हजार ९४ दशमलव शून्य १ विन्दुइ थ्यंगु दु। थौं जलविद्युत् समूहया शेयर १६९ अङ्क, विकास बैंकया शेयर २४१ अङ्क, फाइनान्सया १२०, माइक्रोफाइनान्सया ३७ व होटल समूहया शेयर साढे ११ अङ्कं थहावंगु दु।

बैंक, व्यापार, बीमा, मेमेगु व लगानी समूहया शेयर धासा घटे जुगु दु। थौं कर्पोरेट व नारायणी विकास बैंक, श्री इन्भेस्टमेन्ट फाइनान्स, अरुण भ्याली हाइड्रो, आँखुखोला जलविद्युत्, घलेम्दी हाइड्रो, खानीखोला हाइड्रो, जीवन विकास लघुवित्त व गुहेश्वरी मर्चेन्ट बैंकया शेयर १० प्रतिशतं थहावना सकारात्मक सर्किट लागु दु।

थौं २३२ कम्पनीया २ करोड १६ लाख कित्ता शेयर १३ अर्ब ४२ करोड रुपैयाँ कारोबार जुगु दु। दकलय् अप्वो अरुण भ्याली हाइड्रोया ९३ करोड ८४ लाख रुपैयाँया शेयर किनबेच जुगु दु।