वंगु २४ घण्टाया दुने थप २२९७ म्ह कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ६ हजार ५८३ म्हेसित यागु पीसीआर परीक्षणय १,५८४ म्ह व ४ हजार ३२१ म्हेसित एन्टिजेन परीक्षणय् ७१३ म्ह याना २२९७ म्हेसित संक्रमण पुष्टि जुगु खः।

अथेहे वंगु २४ घण्टाया दुने कोरोना भाइरस संक्रमणं ४६ म्ह सीगु दु । अथेतु, ३ हजार १३० म्ह संक्रमणमुक्त जुगु दु। आःतक सक्रिय संक्रमितपि ५३ हजार ९४० म्ह दु।

नेपालभाषा मंकाः खलः यलया निवर्तमान अधक्ष्य किरण शाक्य गुथि संस्थानया प्रशासक पदय् नियुक्त जुयादीगु दु ।

शाक्य नेपाल सरकारया भूमि व्यवस्था, सहकारी व गरिबी निवारण मन्त्रालय अन्तर्गतया गुथि संस्थानया प्रशासक पदय् नियुक्त जुगु खः ।

वयकलं थौं हे पदबहालि यानादीगु खः।

 वाःया न्हापागु दिं तसकं क्वहावंगु सेयर कारोबार कारोबार मापक नेप्से परिसूचक थौं न क्वहावंगु दु।

७१ दशमलव ०६ अंकं घटे जुया २ हजार ८ सय ३४ दशमलव ४० अंकय् थ्यंगु दु। ‘क’ वर्गया कारोबार मापन याइगु सेन्सेटिभ इन्डेक्स ८ दशमलव ३७ अंक घटे जुया ५२० दशमलव १८ अंक झरे जुगु खः।

कारोबार रकम धासा करिब १२ अर्ब थ्यंगु खः। १ लाख ३० हजार ३९७ कारोबारपाखे २२७ कम्पनीया २ करोड ३० लाख ११ हजार ८२० कित्ता सेयर किनबेच जुगु खः। उकिया कारोबार रकम ११ अर्ब ८४ करोड ५४ लाख ५४ हजार ६ सय ४ रुपैयाँ थ्यंगु खः।

थौं यक्को गुमे यागु फाइनान्स कम्पनी व निगुगु जलविद्युत् कम्पनी खने दु। विकास बैंक समूह ४ दशमलव ६ प्रतिशतं गिरावट वंगुलि दकलय् अप्वो नारायणी डेभलपमेन्ट बैंक खने दु। कारोबारय् ७१ अंकं क्वहावंगुलि नारायणीया सेयर मूल्य करिब १० प्रतिशतं थहावंगु दु।

थुगु बैंक समस्याग्रस्त सूचीइ लागु खःसा राष्ट्र बैंकं फुकुवा यागु बैंक खः। समस्याग्रस्तपाखे फुकुवा जुइवं थुगु बैंकं १ बराबर २ अनुपातया हकप्रद सेयर जारी यायेगु तयारी यागु खः। तर राष्ट्र बैंकं १ बराबर १ अनुपातया जक हकप्रद जारी यायेत स्वीकृति बिगु खः। बैंकं १ बराबर १ अनुपातया हकप्रद जारी यायेत धितोपत्र बोर्डया अनुमति माग यासे निवेदन बिगु खः। हकप्रदया कारण न थुगु बैंकया सेयर भाः थहावंगु खः।

जातीय विभेद याःगु द्वपं बियाः येँया छम्ह छेँ थुवाः स्थानीय नेवाःयात ज्वनाः कुना बिउगु खँयात कयाः नेवाः समुदाय आक्रोशित जूगु दु ।

सञ्चार माध्यमय् ज्या याइम्ह छम्ह रुपा सुनारयात थःत कामीया म्ह्याय् जूगु कारणं क्वथा बालं मबिउ धइगु द्वपं बियाः छेँ थुवा सरस्वती प्रधान विरुद्ध उजुरी तःगु खः। उगु उजुरीया छानबिन यायेगु लागिं धकाः प्रहरीं प्रधानयात ज्वनाः कुना बिःगु खः ।

थुगु घटनायात कयाः सामाजिक सञ्जालय् नं व्यापक रूपं वहस शुरु जूगु दु । सुयातं क्वथा बालं बीगु वा मबीगु धइगु घरपतिया थःगु अधिकार खः। क्वथा बालं मबिउगु हे कारणं सुं छेँ थुवाः न कारवाही यायेगु धइगु वयागु मानव अधिकार हनन् जुगु धका सः तया हःगु दु ।

प्रधानयात ज्वःगुलि स्वनिगःया नेवाः समुदाय आक्रोशित जूगु खः । 

नेपालय् कोरोना भाइरसया न्हुगु भेरियन्टया परिवर्तित रूप पुष्टि जुगु दु।

स्वास्थ्य मन्त्रालयं आः खनेदुगु न्हुगु प्रजातीया भाइरस अप्वो संक्रामक व दक्को दँ दुपि समूहया मनूतयेत असर याइगुलि थप सचेतता अपने यायेत इनाप यागु दु।

वंगु वैशाख २७ निसे जेठ २० तक देया थीथी थासय् थीथी दँ दुपि मनू तयेगु समूहया मनूपाखे संकलन याना राष्ट्रिय जनस्वास्थ्य प्रयोगशालापाखे भारतय् छ्वःगु नमूना मध्ये ४७ गु नमूनाय् डेल्टा भेरियन्टया बी.१.६१७.२, छगु नमूनाय् अल्फा भेरियन्ट मन्त्रालयं विज्ञप्ति पिकया धागु दु।

डेल्टा भेरीयन्ट पुष्टी जूपि ४७ नमूनामध्ये ९ गु थप उत्परिवर्तन एवाई. १ धाइगु के १४१७ एन म्युटेसन खनेदुगु धका मन्त्रालयया सहप्रवक्ता समिरकुमार अधिकारीया हस्ताक्षर याना जारी यागु विज्ञप्तिइ उल्लेख दु । आःतक थुगु प्रजाती नेपाल नाप संसारया १० गु स्वया अप्वो राष्टय् पुष्टि जुगु दु धका मन्त्रालयं धागु दु।