जनता समाजवादी पार्टी (जसपा)या अध्यक्ष उपेन्द्र यादवं थःत मधेशया नेता धाइम्ह महन्थ ठाकुर प्रतिगमनया मतियार जुगु द्धपः बिगु दु।

महन्थ ठाकुर समूह संसद विघटन याम्ह केपी शर्मा ओलीया मतियार जुगु धक द्धपः बिगु खः। जसपां आइतबाः भैरहवाय् जूगु प्रदेशस्तरीय अभिमुखीकरण ज्याझ्वलय् न्ववायेगु झ्वलय् यादवं निकः तक संसद विघटन यागु ओलीं छम्हेसित हे निकः मृत्युदण्डया सजाय बिउगु धका टिप्पणी यागु खः।

‘त्रुटिपूर्ण व विभेदकारी संविधान संशोधन यायेमाः। सात प्रदेशया संरचना हिलेमाः,’ वयकलं धागु दु। राज्य पुनर्संरचना सच्ये यायेगु आवश्यक दु धासे यादवं धागु दु, तराई व पहाडया जिल्लायात मिसे याना प्रदेश दयकूलि हे समस्या जूगु धका धागु दु।

दक्को भाषाया सम्मान यासे विभेद व असमानताया अन्त्य यायेमाःगु आवश्यकता दु धासे वयकलं धागु दु, ‘पहाडया पासापिन्स मधेसया पासापिनिगु भाषण थुइके थाकू, थ्वे राज्य पुनर्संरचना गलत जुया जुगु खः।

स्वास्थ्य तथा जनसंख्या मन्त्रालयया कथं थौं दकलय् अप्वो येँ ३१२ म्हेसित कोरोना सक्रमण जुगु दु।

अथेहे, कास्कीइ १७५, यलय् ११४, मोरङय् ११० व सुनसरीइ ६१ म्हेसित कोरोना संक्रमण पुष्टि जुगु दु।

अथेतु, काभ्रेपलाञ्चोकय् ५३, ख्वपय् ५२, झापाय् ४८, सिन्धुपाल्चोकय् २८, बागलुङय् २४, रुपन्देहीइ २३ म्हेसित कोरोना संक्रमण खनेदुगु दु धका धागु दु।

पाँचथरय् १८, पर्वत व म्याग्दीइ १७÷१७ म्ह, लमजुङय् १६, स्याङजाय् १४ व सुर्खेतय् १३ म्हेसित कोरोना संक्रमित पुष्टि जूगु दु धका स्वास्थ्य तथा जनसंख्या मन्त्रालयं धागु दु।

वंगु २४ घण्टाया दुने देयन्यक १३८८ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ७२५९ म्हेसिगु पीसीआर परीक्षणय् १२१४ म्ह व ३०३८ म्हेसिगु एन्टिजेन परीक्षणय् १७४ म्ह याना १३८८ म्हेसित संक्रमण पुष्टि जूगु दु।

अथेहे २४ घण्टाया दुने २२६० म्ह संक्रमणमुक्त जूगु दु सा संक्रमणया कारण २४ म्ह सीउगु दु। थ्व नाप आःतक नेपालय् कोरोना संक्रमितपि ७ लाख ५९ हजार २२२ म्ह थ्यंगु दु सा सीपि १० हजार ७१४ म्ह थ्यंगु दु।

आःतक ७ लाख १२ हजार ७१२ म्ह संक्रमणमुक्त जुइ धुकुगु दु।

थुगु वाःया न्हापागु दिं शेयर बजाः कुहावंगु दु।

नेप्से थौं आइतवाः ४८ दशमलव ८४ अङ्क घटे जुया ३ हजार ४५ दशमलव २० विन्दुइ कुहावंगु दु। थौं फाइनान्सबाहेक मेगु फुक्क फुक्क समूहया शेयर घटे जुगु दु।

बैंकिङ समूहया शेयर ३० अङ्कं घटे जुगु दु। अथेहे विकास बैंक समूहया ५३, व्यापारया ६२, होटलया ३१ व माइक्रोफाइनान्स समूहया शेयर १ सय १५ अङ्कं घटे जूगु दु। अथेहे जलविद्युत् समूहया शेयर ८९ अङ्कं, जीवन बीमा समूहं ३ सय चार अङ्कं, निर्जीवन बीमा २ सय ५३, उत्पादनया ३८, मेमेगु ३६ व लगानी समूहया शेयर २ अङ्कं  घटे जुगु खः।

थौं रुरु जलविद्युत् कम्पनीया शेयर १० प्रतिशं घटे जुया नकारात्मक सर्किटय् वंगु दु। समग्र बजार घटे जूसा नारायणी विकास बैंक व खानीखोला जलविद्युत् कम्पनी शेयर धासा १० प्रतिशतं थहावंगु दु। थौं २ सय २७ कम्पनीया २ करोेड ४८ लाख कित्ता शेयर १५ अर्ब ६५ करोड रुपैयाँया कारोबार जुगु खः।

दकलय् अप्वो अरुण भ्याली हाइड्रोया १ अर्ब ३१ करोड रुपैयाँया शेयर किनबेच जुगु दु।

निर्वाचन आयोगं नेकपा एमाले व जनता समाजवादी पार्टी (जसपा) पाखे निर्वाचित प्रदेशसभा सदस्य व स्थानीय जनप्रतिनिधिपिन्स थ्व हे वइगु भदौ २२ गते तक दुने दल ल्ययेगु ई बिगु दु।

सरकारं संघीय संसद वा केन्द्रीय समितिया २० प्रतिशत थ्यका दल विभाजन याये फइगु अध्यादेश हगुलि एमाले तछ्याना नेकपा एकीकृत समाजवादी व जसपा छुटे जुय लोकतान्त्रिक समाजवादी पार्टी बने जुगु खः।

निगुलि दलं ९ भदौय् मान्यता कागु खः। अध्यादेशय् प्रदेश व स्थानीय तहया जनप्रतिनिधि पिन्स २१ दिं दुने दल ल्ययेगु व्यवस्था दु। आयोगं आइतबाः च्वंगु बैठकें २२ गते तक दल ल्यये खइगु निर्णय यागु खः।

आः एमालेपाखे निर्वाचित जूपि प्रदेशसभा सदस्य व स्थानीय जनप्रतिनिधिपिन्स नेकपा एकीकृत समाजवादीइ प्रवेश यायेगु खःसा २२ गते दुने सनाखत यायोमाः।

अथेहे जसपापाखे प्रदेशसभा सदस्य व स्थानीय जनप्रतिनिधिपिन्स लोसपा प्रवेश याये चाहे जूसा सनाखत यायेमाः।