प्रधानमन्त्री शेरबहादुर देउवा, नेकपा (माओवादी केन्द्र)या अध्यक्ष पुष्पकमल दाहाल ‘प्रचण्ड’ व नेकपा (एकीकृत समाजवादी) या अध्यक्ष माधवकुमार नेपाल दथुइ भेटवार्ता जूगु दु।

छलफलया लागि प्रचण्ड बालुवाटार वंगु दु। छलफल मन्त्रिपरिषद् विस्तारया केन्द्रित जुइ धका धागु दु। शनिबा न देउवा व प्रचण्ड दथुइ भेटवार्ता जुगु दु।

उगु भेटय् मन्त्रिपरिषद् विस्तारयात याकन हे पूर्णता बिइगु विषय छलफल जुगु दु धका प्रचण्डया सचिवालयं जानकारी बिगु दु। सत्तारूढ गठबन्धन दथुइ छु छु मन्त्रालय कायेगु धका भागबन्डा मिले मजुनि धका धागु दु।

ज्ञानोदय माध्यमिक बिद्यालय कक्षा कोठा सभाहल छगु ज्याझ्वः दथुइ बागमती प्रदेशया सांसद राजेश शाक्यं उलेज्या यानादीगु दु।

सांसद बिकास बजेटपाखे ४९लाखं ज्ञानोदय स्कुल सभा हल बिउगु खः। तर खर्च धासा उगु भवनया लागि करिव ४३ लाख खर्च जुगु खःसा उकिइ ५ प्रतिशत जनसभागिता ग्वाहालि यागु खः।

उगु ज्याझ्वलय ग्वाहालियापिन्त सांसद राजेश शाक्य व येँ महानगर १३ वडा अध्यक्ष धुर्ब नारायण मानन्धरं हनादीगु खः।

किपू नगरपालिका वडा नं. १० य् मिसा पुचःयात थीथी सामग्री हस्तान्तरण यागु दु।

ज्याझ्वलय् मूपाहाँ किपूया मेयर रमेश महर्जनं वडा नं. १० य् श्रृजनशील महिला समूह व कीर्तिपुर महिला जागरण समूहयात आयमूलक जुइगु सामग्री हस्तान्तरण यागु खः। उगु सामग्री हस्तान्तरण यागुलि श्रृजनशील महिला समूहयात नेवाः पोशाक लल्हागु खः।

मिजं तयेस पुनेइगु नेवाः पोशाक (तःपालँ सेट) अथेहे मिसापिन्स फिइगु नेवाः पोशाक (हाकु पतासी, जांगा सुरुवा व तिसाः सेट) न खः। उगस नेवाः पोशाक स्थानीय चिलंच्व बाहाः वइपि आन्तरीक व बाह्य पर्यटकपिन्स यःया फोटो काइगु व उकि बापत छ भचा शुल्क कया महिला समूहया आय आर्जन याये फइगु।

अथेहे कीर्तिपुर महिला जागरण समूहयात पिको यायेगु, लक तयेगु व सानिटरी प्याड दयकेगु मेशिनरी सामाग्री न लल्हागु दु। उगु सामाग्री अनयापि महिला समूहयात आय आर्जन बालाइगस भलसा कागु दु।

किपू नगरपालिका वडा नं. १ य् झोल सावः व ह्याण्ड वास दयकेगु तालिम क्वतागु दु।

वडाया गलेश्वर महाद्यः सामुदायिक भवनय् निन्हु तक जूगु तालिमय् सहभागी ४० म्ह मिसापिन्स ब्बति कागु खः। उगु ज्याझ्वःया मूपाहाँ किपू नगरपालिकाया मेयर रमेश महर्जनं ब्बतिकापिन्त दसिपौ लल्हागु खः।

उगु ज्याझ्वलय उप–मेयर सरस्वती खड्का, वडा नं. २ या अध्यक्ष रमेशमान डंगोलपिनिगु न उपस्थिति दुगु खः। निन्हु यकं जुगु उगु तालिमय् प्रमिला महर्जन व ज्ञानदेवी महर्जनं प्रशिक्षण बिगु खः।