संसद विघटन यागु विरोधय् नेपाल विद्यार्थी संघं राष्ट्रपति कार्यालय शीतलनिवास पिने प्रदर्शन यागु दु।

मन्त्रिपरिषदया सिफारिसय् राष्ट्रपति विद्यादेवी भण्डारीें संसद विघटन सदर याना निर्वाचन मिति घोषणा यागुलि नेपाल विद्यार्थी संघं शीतल निवासि पिने सतकय् प्रदर्शन यागु खः ।

प्रदर्शनय् प्रहरीं हस्तक्षेप याना प्रदर्शनकारीपिन्त ज्वंगु खः ।

कोरोना भाइरसया महामारीया निगुगु लहर व्यापक जुया च्वंगु इलय् अस्पतालय् बेड, अक्सिजन, आइसीयु, भेन्टिलेटरया अभाव जुया च्वंगुपाखे थीथी क्षेत्रया विज्ञतयसं चिन्ता प्वंकूगु दु।

नेवाः पत्रकार राष्ट्रिय दबु सचेतना पुचःया ग्वसालय् शनिबार फेसबुक लाइभ ज्याझ्वःया ५० ब्वः थ्यंगु लसताय् जुगु अन्तक्र्रिया ज्याझ्वलय् पुर्वसांसद जीवनराम श्रेष्ठं कोरोना महामारीं स्वास्थ्य क्षेत्रय् नेपालया   अवस्था यक्वः कमजोर धकाः धयादीगु दु। अथेहे त्रिवि शिक्षण अस्पतालया जनरल प्राक्टिस व इमर्जेन्सी मेडिसिन विभागया प्रमुख डा.प्रो. योगेन्द्रमान शाक्यं उगु अन्तक्र्रिया ज्याझ्वलय् थः कार्यरत् देशभरया अस्पतालय् बेड, आइसीयु व भेन्टिलेटर अपुग जुगु स्थितिया जानकारी बियादिगु खः।

वयकलं कोरोना इलय् थःत मागु इलय् बेड माले थाकुगु अनुभव याना, झन सर्वसावधारण तय्गु हालत गथे जुइ अनुमान याय्फु तर अथे खःसां ग्याना मखु सतर्कजुया थ्वः महामारीया सामना यायेमा धका सल्लाह बियादिगु खः। समाजसेवी व सकारात्मक सोचया अभियन्ता कर्ण शाक्यं सरकार ब्यूगु प्रोटोकलत पालना यायेगु व सतर्क जुईगु थ्वः ईया आवश्यता खः । वयकलं कोरोना रोगंसिबें मानसिक रोगं अप्वः प्रभावित जुयाच्वंगु दु धयादिल ।

अथेहे सिविन नेपालया निर्देशक सुम्निमा तुलाधरं कोरोनाया निगुगु लहर ग्यानापुगु हिसाबं न्ह्या वया च्वंगु दु धासेँ पब्लिक हेल्थ सिस्टम कमजोर जुगुलिं सर्वसाधारण तयसं दुःख सिया च्वंगु खँ तयादिल । वयकलं कोरोना इलय् सकलें छेँ दुने च्वना च्वंबलय् घरेलु हिंसा व मस्तयत जुइगु दुर्व्यवहार अप्वः जुया च्वंगु पक्षयात इङ्गति नं याना दिल ।

वरिष्ठ सिनेपत्रकार व पत्रकार दबुया सल्लाहकार विजयरत्न तुलाधर असंबरें लकडाउनं कलाक्षेत्रया सिर्जना कुण्ठित जुया च्वन तर थुकियात हाथ्या कथं कया वैकल्पिक माध्यमपाखेँ कलाकारिताया प्रवर्द्धन यायेगु अवसर नं दु धयादिल । वयकलं  नेवाः संकिपा ख्यःदिना च्वंगु अवस्था खःसां नेवाःं संगीत ख्यः डिजटल माध्यमं विकास जुया च्वंगु दु अले  थजागु ह्युपा आवश्यक नं खः ।

थ्वः माध्यमं तत्काल लबः मब्यूसां भविष्यय् आर्थिक रुपं निर्भर जुइगु प्लेटफर्म जुइधका  धयादिल । पत्रकार दबु सचेतना कमिटीया ५० ब्वः थ्यंगु लसताय् जुगु लसता हना अन्तर्क्रिरया ज्याझ्वः नेवाःपत्रकार राष्ट्रिय दबूया नायः सुरजबीर बज्राचार्य नं ज्याझ्व न्ह्याकामीया जिम्मवारी काया दिगु खः ।

थगुने हलिंयात आक्रान्त यागु कोरोना भाइरसया संक्रमण तब्यानां वंगुलिं पत्रकार दबूपाखेँ थ्वः महामारीबारे सर्वसाधारणतय्त सूचं बिइगु लिसेँ, सचेत यायेत प्रजित शाक्यया संयोजकत्वय् सचेतना कवः गठन जुगु खः । थ्वः कमिटीया दुजःलय् रचना श्रेष्ठ, मीना बज्राचार्य, तेजनाराण महर्जन, अनूप प्रधान व हसना लवजू दु ।

वीरगञ्जया हाडजोर्नी रोगया चिकित्सक कोरोना संक्रमणं मन्त। वीरगञ्ज महानगरपालिका– ३ छपकैयाया २९ दँ दुम्ह चिकित्सक डा. मुराद हुसेन मेडिसिटी अस्पतालय् मदुगु खः।

वीरगञ्ज हेल्थ केयर लगायत थीथी अस्पताल नाप स्वास्थ्य संस्थाय् ज्या याना च्वम्ह वयकः कोरोना संक्रमणं थौं मदुुगु खः धका अस्पतालं धागु दु।

डा. हुसेनं लच्छि न्ह्यः जक शेख मुजीब मेडिकल युनिर्भसिटी बंगलादेशपाखे पढाइ पूरा यागु खः । कोरोना संक्रमितपिन्त उपचार तक खटे जुम्ह डाक्टर हुसैननाप वीरगञ्ज हेल्थ केयरया न्याम्ह चिकित्सकपिन्त कोरोना संक्रमण पुष्टी जुगु खः।

वीरगञ्ज हेल्थ केयरया सञ्चालक डा. अबुल हैस अन्सारीया कथं डा. हुसैन छवाः तक वीरगञ्जय् तया उपचार याना वयाच्वंगु खः । तर स्वास्थ्यय् सुधार मजुइवं १० दिं न्ह्यः हेलिकप्टरपाखे येँ हःगु खः।

सर्वोच्च अदालतय् रिट दायर यायेत तयारी याना च्वंगु विपक्षी गठबन्धनं विघटित संसदया सदस्यपिनिगु हस्ताक्षर संकलन सुरु याना च्वंगु दु।

नेपाली कांग्रेसया सभापति शेरबहादुर देउवायात प्रधानमन्त्री दाबीइ हस्ताक्षर यायेत निवर्तमान सांसदपिन्त हस्ताक्षरया लागि सिंहदरबार सःतूगु ख।

दक्कोे हस्ताक्षर संकलन याना संसद विघटनविरुद्ध सर्वोच्च अदालतय् रिट तयेगु विपक्षी गठबन्धनपिनिगु तयारी दु।

संसद विघटनविरुद्ध रिट तयेगु निति विपक्षी गठबन्धनया नेतापिन्स थौं सर्वोच्च अदालत वनेगु तयारी यागु दु ।

उकिया तयारी लागि दलपिन्स थःपिनिगु सांसदपिन्त नागरिकता ज्वना संसद भवनय् भेला जुइत निर्देशन बिगु दु । थौं तयारी जूसा थौं मखुसा कन्ह्य सर्वोच्च वनेगु उमिगु तयारी दु।

नेकपा माओवादी केन्द्रया प्रमुख सचेतक देव गुरुङं कानुनी उपचारया लागि सर्वोच्च अदालत वनेगु तयारी दु धका धागु दु। ‘तयारी पूरा जुइ साथ कि जिपि सर्वोच्च वनेगु’, धका गुरुङं धागु दु।

म्हिगः शनिवाः नेपाली कांग्रेसया सभापति शेरबहादुर देउवा, नेकपा माओवादी केन्द्रया अध्यक्ष प्रचण्ड, एमालेका वरिष्ठ नेता माधव कुमार नेपाल, जसपा अध्यक्ष उपेन्द्र यादव व राष्ट्रिय जनमोचाया उपाध्यक्ष दुर्गा पौडेलं मंकाः कथं बैठक ंसंसद विघटन कानूनी व राजनीतिक लडाइँ ल्वायेगु धका निर्णय यागु खः।