येँ महानगरपालिकां थौं सोमवाः व कन्ह्यः मंगलवाः भेरोसेल खोप बिइगु जुगु दु। २५ जेठनिसे न्यान्हु बिइ धागु खोप अभियानय् खोप अभाव जुगुलिं निर्धारित तिथि स्वया निन्हु न्ह्यः हे उगु अभियान स्थगित यागु खः। उगु अभियान कथं हे थौं व कन्ह्यः महानगरपालिकां बिइत्यःगु खः धका धागु दु।

येँ महानगरपालिका शहरी स्वास्थ्य तथा खाद्य पदार्थ नियमनया विभागीय प्रमुख हरिबहादुर कुँवरं जिल्ला स्वास्थ्य कार्यालय काठमाडौं भेरोसेल खोपया न्हापागु मात्रा कायेत छुटे जूपि ६०–६१ दँ दुपि जेष्ठ नगारिकपिन्स खोप कार्यक्रम सञ्चालन यायेत परिपत्र जुगु बमोजिम खोप कार्यक्रम सञ्चालन याये त्यःनागु धका धागु दु।

येँ वीर अस्पताल, शिक्षण अस्पताल, विरेन्द्र सैनिक अस्पताल व निजामती कर्मचारी अस्पतालय् जेठ ३१ व असार १ गते खोप बिइगु कार्यक्रम ज्याझ्वः दु। महानगरं आइतवाः जारी यागु सूचं कथं न्हापागु डोज कायेत छुटे जुपि ६०–६१ दँया जेष्ठ नागरिक व स्वास्थ्यकर्मी, कोभिड–१९ बिरार्मीपि नाप प्रत्यक्ष जाँच, उपचार व हेरचाहय् संलग्न चिकित्सक, नर्सिङ व प्यारामेडिक्स विद्यार्थी स्वास्थ्यकर्मीपिन्त खोप कायेत इनाप यागु खः।

खोप कार्यक्रम थौं सुथय् १० बजेनिसे न्हिनय् ४ बजे तक सञ्चालन जुइ।

येँ महानगरपालिका १७ वडा ज्याकुथिं क्षेत्रपाटीइ संचालन यानाच्वंगु आइसोलेसनयात क्यानडा मिन्डफुल एण्ड किन्ड नेशनं स्वास्थ्य सामाग्री ग्वाहालि यागु दु।

कोराना सक्रमित जुयाच्वपिन्त उगु स्वास्थ्य सामाग्री ग्वाहालि यागु खः।

१७ वडा ज्याकुथिं संचालन यानाच्वंगु उगु आइसोलेसनयात भिच्छु आनन्दं माक्स, सेनिताईजर, जिवनजल व बाफ कायेगु मेसिन लगायत स्वास्थ्य सामाग्री येँ महानगरपालिका १७ वडाध्यक्ष नबिन मानन्धर लल्हाना कयादीगु खः।

सुदूरपश्चिम प्रदेश सरकारं आर्थिक वर्षया नीति तथा कार्यक्रम प्रदेशसभाय् बहुमतं पारित यागु दु।

थौं आइतवाः च्वंगु प्रदेशसभा बैठकं मुख्यमन्त्री त्रिलोचन भट्टं नीति तथा कार्यक्रमय् वःगु न्ह्यसःया लिसः बिइ धुका बहुमतं पारित यागु दु।

नेकपा माओवादी केन्द्र व नेकपा एमालेया माधव पक्षं बहुमत प्रदेशसभा सदस्यपिन्स नीति तथा कार्यक्रमया समर्थनय् सभामुख अर्जुनबहादुर थापां प्रदेशसभापाखे पारित जुगु घोषणा यागु दु।

प्रमुख प्रतिपक्षी दल नेपाली कांग्रेस व जनता समाजवादी पार्टीया प्रदेशसभा सदस्य मौन च्पवंगु खः। वंगु बिहीवाः प्रदेश प्रमुख गंगाप्रसाद यादवं प्रदेशसभामा नीति तथा कार्यक्रम पेश यागु खः।

प्रदेश सरकारं असार १ गते न्हिनय् ४ बजे च्वंनिइगु प्रदेशसभा बैठकं आर्थिक वर्षया बजेट हइगु जुगु दु।

प्रदेश १ सरकारं पेश यागु आर्थिक वर्ष २०७८–७९ या नीति तथा कार्यक्रम प्रदेशसभाय बहुमतं पारित यागु दु।

नीति तथा कार्यक्रम निन्हु तक छलफल लिपा थौं आइतवाः बहुमतं पारित यागु खः। बिहीवाः प्रदेश प्रमुख सोमनाथ अधिकारी प्यासीं नीति तथा कार्यक्रम पेश यागु खः।

शुक्रवाः झीम्ह व शनिवाः२२ म्ह प्रदेशसभा सदस्यपिन्स नीति तथा कार्यक्रमय् टिप्पणी यागु खः। थौं मुख्यमन्त्री शेरधन राई न निन्हुया छलफलय् वःगु न्ह्यसःया लिसः बिगु खः।

वयकःया सम्बोधन लिपा नीति तथा कार्यक्रम बहुमतं पारित यागु खः। नीति तथा कार्यक्रमय् नेकपा माओवादी केन्द्र, नेपाली कांग्रेस व जनता समाजवादी पार्टीपिन्स बिस्क बिस्क संशोधन प्रस्ताव पेश यागु खः।

स्वनिगलय् हाकन छवाःया लागि निषेधाज्ञा थपे यागु दु। जेठ मसान्त तके निषेधाज्ञा याना तःगुलि आः हाकनं थप छवा थपे यायेगु निर्णय यागु दु। कोरोना भाइरसया जोखिम घटे मजुगु निष्कर्ष नाप येँं, ख्वप व यलया प्रमुख जिल्ला अधिकारीपिनिगु मंका बैठकं निषेधाज्ञा थपे यायेगु निर्णय यागु खः।

आः तरकारी व खाद्यान्न पसः सुथय् ११ बजे तक चायके दइसा अनलाइन डोम डेलिभरी सेवा न सञ्चालन याये दइगु जुग

दु। शैक्षिक सत्र सुरु जुइगुलि प्रशासनं सफू पसः चायके दइगु निर्णय यागु दु। थुगु पसः सुथय् ११ बजे तक चायके दइ। सनिलया ४ बजे लिपा हार्डवेयर पसः चायके बिइगु निर्णय यागु दु।

स्वनिगलय् १६ वैशाख निसे लगे याःगु निषेधाज्ञा आःतक न जारी दु।