वंगु २४ घण्टाया दुने ६ हजार २९५ म्ह कोरोना संक्रमणमुक्त जुगु दु।

थ्व नाप कोरोना संक्रमणमुक्त जुपि ५ लाख २७ हजार १११ म्ह थ्यंगु दु। स्वास्थ्य तथा जनसंख्या मन्त्रालयया कथं थीथी जिल्लाय् ८ हजार ५०६ पीसीआर परीक्षणय् २ हजार ३८२ म्हेसित कोरोना पुष्टि जुगु दु। अथेहे, ५ हजार ९८८ एन्टिजेन परीक्षणय् १ हजार २ म्हेसित कोरोना संक्रमण खनेदुगु खः।

पीसीआर व एन्टिजेन परीक्षणं ३ हजार ३८४ म्हेसित संक्रमण पुष्टि जुगु दु धका मन्त्रालयं धागु दु। थ्व नाप नेपालय् पीसीआर परीक्षणं कोरोना खनेदुपि ६ लाख ६ हजार ७७८ म्ह थ्यंगु दु। मन्त्रालयं बिगु जानकारी कथं देयन्यक थप ६१ म्ह सीगु दु।

थ्व नाप आःतक नेपालय् कोरोनां सीपि संख्या ८ हजार ३६६ म्ह थ्यंगु दु।

देय्या यक्वः धैथें थासय् मनसुन न्ह्यनाच्वंगु दु ।

थ्वः दँया मनसुन म्हिगः न्हिनय्निसें नेपाः दुहाँवःगु व आः देय्न्यंक वनाच्वंगु मौसमविद्पिनिगु धापू दु । जल तथा मौसम विज्ञान, विभागं थ्वः दँया मनुसन औसतसिबें अप्वः वा वइगु पूर्वानुमान याःगु दु ।

गुकिं याना मनसुनजन्य विपद खुसिबाः, चलःखं १८गू लखः सिबें अप्वःपिन्त लिच्वः लाइगु धाःगु दु । वंगु दँय् औसत ज्वलिंज्व वा वःबलय् प्यसःसिबें अप्वः मनुतय्गु ज्यान वंगु खः धाःसा द्वःछिसिबें अप्वः परिवारपिन्त थुकिं लिच्वः लाकल । विपद व्यवस्थापन प्राधिकरणं थ्वः तथ्यांक विश्लेषण याःबलये थुगुसी मनुसनं १८गू लखः सिबें अप्वः मनुतय्त लिच्वः लाइगु अनुमान याःगु खः ।

प्राधिकरणया कथं खुसिबालं १७गू लखः व चलखं छगू लखः २०द्वः मनुपिन्त लिच्वः लाकिइगु अनुमान याःगु दु । आः देशय् पूर्वी व मध्य भूभागया उत्तर पश्चिम बंगालया खाडी र जःखःलय् न्यून चापीय क्षेत्रया लिच्वः लानाच्वंगु दु ।

पश्चिमी भूभागय् पश्चिमी वायु व स्थानीय वायुया मिश्रित लिच्वः दु । थौं न्हिनय् देययंक सामान्यनिसें पूणर् बदली जुई । देशया यक्वः थासय् नः न्याना हल्का लिसें मध्यम कथं वा वइगु सम्भावना दु ।

विश्व बैंकं नेपाःया उच्च शिक्षाय् गुणस्तर सुधारया लागि ६ करोड डलर ग्वाहालि याइगु जुगु दु।

विश्व बैंकया कार्यकारी निर्देशक बोर्डं उच्च शिक्षाया गुणस्तर सुधार, अनलाइन शिक्षाय् स्तर थकायेगु व विपन्न नाप कमजोर विद्यार्थीपिनिगु लागि शैक्षिक संस्थाय् पहुँच विस्तार यायेत उगु ग्वाहालि यायेगु प्रस्ताव अनुमोदन यागु दु।

उगु ग्वाहालि गुणस्तरीय उच्च शिक्षाय् पहुँच सुधार व विद्यार्थीपिन्त श्रमबजारया माग नाप सीप दुपिन्त ग्वाहालि यायेत माल्दिभ्स, नेपाल व श्रीलंकाया लागि विश्व बैंकं कन्ट्री निर्देशक फरिस हदद–जर्भोसं धागु दु।

बागमती प्रदेश सभाय् पेश जुगु नीति तथा कार्यक्रम पास यायेत एमाले छप्प जुगु दु 

शनिवाः सुथय् नेकपा एमाले बागमती प्रदेश संसदीय दलया बैठकय् मुख्यमन्त्री डोरमणि पौडेल व माधव नेपाल पक्षया नेतृ अष्टलक्ष्मी शाक्यं मंकाः कथं नीति तथा कार्यक्रम पास यायेत पार्टीया प्रदेश सभा सांसदपिन्त निर्देशन बिगु दु।

नेतृ अष्टलक्ष्मी शाक्य निकट प्रदेश सभा सदस्य मुनु सिग्देलं बागमतीया नीति तथा कार्यक्रम पास यायेत बहुमत सदस्य दुगु एमाले छप्प जुगु धका धागु दु ।

नेकपा एमाले बागमती प्रदेशया मुख्यमन्त्री तथा दलया नेता डोरमणि पौडेलया अध्यक्षताय् च्वंगु बैठकय् एमालेया निगुलि हे पक्षया सांसदपिनिगु सहभागी दुगु खः।

वाग्मती प्रदेश सभाया काँग्रेस सांसद नरोत्तम वैद्यं प्रधानमन्त्री विरुद्ध म्हिगः शुक्रवाः बिगु विवादास्पद अभिव्यक्ति लित कागु दु।

थौं शनिवाः प्रदेश सभाया बैठक सुरु जुइवं सभामुखयात ई कया थःम्हेसिया भावावेशय् वया थज्यागु अभिव्यक्ति बिइलात धासे आत्मालोचना यासे उगु अभिव्यक्ति लितकयागु दु धका धागु दु।

शुक्रवाःया बैठकय् सांसद वैद्यं प्रधानमन्त्रीया मनोमानी रोके यायेत नाथुराम गोड्सेया आवश्यकता दुगु व आवश्यकता जूसा थः हे आफू गोड्से जुइत तयार दु धका अभिव्यक्ति बिगु खः। सांसद वैद्यया थुगु अभिव्यक्ति प्यखेरं विरोध जुगुलि काँग्रेसले तक अभिव्यक्ति लित कायेत निर्देशन बिगु खः।

शनिवाः बैठकय् वैद्यं प्रधानमन्त्री केपी शर्मा ओली नाप थःगु छु न रिसइवी मदुगु धासे थः हत्या हिंशाय् विश्वास मयाइम्ह व गान्धीवादी नेता जुगुलि आवेशय् थज्यागु अभिव्यक्ति बियागु धासे उगु अभिव्यक्ति लित कयागु धका धागु दु। थम्हेसिया अभिव्यक्ति बिइ धुका संसदीय मर्यादा पिने वना न्ववानागु महसुस जुगु धका धागु दु।

वयकलं आत्मालोचनासहित अभिव्यक्ति लित कयागु दु धासे उगु अभिव्यक्ति संसदया रेकर्डपाखे हटे यायेत इनाप यागुलि सभामुखं उगु अभिव्यक्ति रेकर्डपाखे हटे यायेत निर्देशन बियागु दु धका धागु दु।