मानुषी लघुवित्तया आईपीओ बाडफाड मानुषी लघुवित्तया धितोपत्र प्रारम्भिक सार्वजनिक निष्कासन (आईपीओ) बाडफाड यागु दु।

बिक्री प्रबन्धक नेपाल एसवीआई मर्चेन्ट बैंकिङ एनण्ड फाइनान्सं थौं सोमबाः लघुवित्तया आईपीओ बाडफाड यागु दु। लघुवित्तं थ्व हे साउन २७ गतेनिसे ३१ गते तक यागु सार्वजनिक निष्कासनय्  २३ लाख ६१ हजार ८२७ आवेदकपाखे २ करोड ९६ लाख ५५ हजार ४६० कित्ता सेयरया लागि आवेदन बिगु खः ।

उकि मध्ये ७ हजार ४३ म्ह आवेदन रद्द जूगु दु सा २३ लाख ५४ हजार ७८४ म्हेसिगु आवेदकपाखे माग जुगुलि २ करोड ९५ लाख ७४ हजार ७५० कित्ताया आवेदन सदर जुगु खः। सदर आवेदक मध्ये कम्पनीं सर्वसाधारणया लागि निष्कासन यागु ३ लाख ६८ हजार ५९३ कित्ता सेयर धितोपत्र निष्कासन व बाडफाड नियमावली कथं गोलाप्रथापाखे १० कित्ता दरं बाडफाड यागुलि ३६ हजार ८५९ म्हेसित १० कित्ता सेयर लागु दु।

उकि मध्ये स्वम्हेसिया थप १ कित्ता याना ११ कित्ता सेयर लागु दु। अथेहे योग्य आवेदक मध्ये २३ लाख २४ हजार स्वया अप्वो आवेदकपिनिगु ल्हा खाली जुगु दु।

लुँ तोलां निसः थहावंगु दु। लुँ तोलां निसः थहावना थौं ९१ हजार १ सय रुपैयाँ तोके जुगु दु धका नेपाल सुन चाँदी व्यवसायी महासङ्घं धागु दु।

अथेहे थौं वहः तोलां झीतक थहावंगु दु। थौं झीतका थहावना ११ सय ९० रुपैयाँ थ्यंगु दु धका महासङ्घं धागु दु।

नेकपा एमाले लुम्बिनी प्रदेश संसदीय दलं प्रदेशसभा सदस्य नाप विना विभागीय मन्त्री अजय शाही व सांसद विमला खत्रीयात पदपाखे हटे मयातले सदन न्ह्याके बिमखु धका धागु दु।

प्रदेशसभाया सभामुख पूर्णबहादुर घर्तीमगरयात सोमबाः पौं बुझेयासे प्रमुख सचेतक भूमिश्वर ढकालं सभामुखं पटक–पटक पद अनुकुलया आचरण मयासे प्रदेशसभाया गरिमाय् आँच वइगु कथं ज्यायागुलि संविधानया धारा १८२ या उपधारा ६ या खण्ड (ग) नाप प्रदेश सभा नियमावली, २०७४ या नियम १८० बमोजिम आचरण मयागुलि व सदस्य हटे मयागु धका धासे सदन न्ह्याके बिइमखु धका धागु दु।

प्रदेशसभा सचिवालयं प्रदेशसभा नियमावली १८७ नाप सम्बन्धित अनुसूची ६ कथं शाहीं स्वतन्त्र व वलीं माओवादी केन्द्रय् आवद्ध दुगु  विवरण बुझे यागु खः। नेकपा एमाले शाही व खत्रीयात सांसद पदपाखे मुक्त यायेगु माग यासे प्रदेशसभाया बैठक अवरुद्ध याना वयाच्वंगु खः।

भारतीय जनता पार्टी (भाजपा)या विदेश विभाग प्रमुख विजय चौथाइवा येँ वःगु दु।

विभाग प्रमुख चौथाइवा प्रधानमन्त्री शेरबहादुर देउवा नाप भेटघाट यागु दु। प्रधानमन्त्री निवास बालुवाटारय् जुगु भेट चौथाइवा न प्रधानमन्त्री नियुक्त जुयादीगुलि देउवायात भिंतुना बिगु खः।

देउवा नाप भाजपा व नेपाली कांग्रेसया सम्बन्ध विस्तारबारे तक छलफल जुगु दु धका चौथाइवा न ट्वीटयासे जानकारी बिगु खः। चौथाइवा कांग्रेस नेता नाप पूर्व परराष्ट्रमन्त्री प्रकाशशरण महतनाप न भेटघाट यागु खः।

अथेहे छु दिं येँ च्वना मेमेपि राजनीतिक दलया शीर्ष नेतापि न भेटघाट यायेगु ज्याझ्वः दु।

येँ महानगरया मेयर विद्यासुन्दर शाक्य व उपमेयर हरिप्रभा खड्गी श्रेष्ठ विद्यालय शिक्षा प्रवर्तकया रुपं सम्मानित जुगु दु। सामुदायिक विद्यालयया प्रधानाध्यापकपिन्स संस्था ‘विद्यालय व्यवस्थापन समाज’ नं वयकःपिन्त सम्मान यागु खः।

उगु सम्मान पत्रय् स्थानीय भाषाया रुपं नेपाल भाषाया अध्यापन अनिवार्य यायेत प्रवर्तकया रुपं अभिनन्दन यानागु धका उल्लेख यागु खः। अथेहे महानगरं विद्यालय भौतिक, वातावरणीय व शैक्षिक सुधारया लागि यागु ज्याया उल्लेख यागु खः।

सम्मान ग्रहण याये धुका न्ववानादीसे प्रमुख शाक्यं, स्वास्थ्य व शिक्षा क्षेत्रया विकासया लागि महानगरं लगानी अप्वोकागु उल्लेख यानादीगु खः। थ्व खर्च मखु, लगानी खः । निश्चित ईलिपा थुकिया प्रतिफल वइ धका मेयर शाक्य धयादीगु खः। ‘आ यानागु ज्या अप्वोका यकेमाः। आशा रोके जुवकि विकास न रोके जुइ। मेयर शाक्यं धयादीगु दु, ‘मेपिनिगु आलोचना याना ई खर्च यायेगु स्वया थःगु स्तर सुधार यायेगुलि ई खर्च यायेमाः।

जितः आशा दु येँ महानगरया सामुदायिक विद्यालयया स्तर सुधार जुया संस्थागत विद्यालयनाप तुलना याये मखु व स्वया थहावने माः।’ स्थानीय पाठ््यक्रमया रुपं नेपाल भाषाया अध्यापन शुरुवातया सन्दर्भय् मेयर शाक्यं, थुगु निर्णय येँ  महानगरया दक्को जनप्रतिनिधिपिनिगु सामुहिक व सर्वसम्मत निर्णय जुगुलि थुगु विषययात पक्ष वा विपक्षया कोणपाखे स्वयेमज्यु धका धयादीगु खः।

अथेहे सम्मान लिपा न्ववानादीसे उपमेयर हरि खड्गी श्रेष्ठं, येँया पहिचान नेपाल भाषानाप स्वागुलि नेपाल भाषा अभिभावकं थःगु मस्तपि नाप नेपालभाषा स्यनेमाः धका धयादीगु खः। ‘महानगरं स्थानीय पाठ््यक्रमया रुपं नेपाल भाषा अध्यापन याके धुकगु दु आः थ्व दिइमखु । वरु विस्तार न्ह्यावनिइ।’ धका वयकलं धयादीगु खः।

उगु ज्याझ्वलय समाजया अध्यक्ष नाप प्रभात माध्यमिक विद्यालयया प्रधानाध्यापक राजेश्वर श्रेष्ठ, ज्ञानोदय मा. वि. या प्रधानाध्यापक नातिकाजी महर्जन, विश्व निकेतम मा. वि. या प्रमुख हेरम्बराज कँडेल, भक्त विद्याश्रम मा. वि. या प्रधानाध्यापक सुदर्शन कट्टेल, सरस्वती निकेतन मा. वि. या प्रधानाध्यापक रविना महर्जनपिन्स महानगरं विद्यालय शिक्षाया लागि यागु लगानीपाखे थपन्सि शैक्षिक सुधारया लागि संरक्षण प्रदान जुगु  महसुस यानागु दु धका धयादीगु खः।