येँँ महानगरया वडा २९ डिल्लीबजारय् विजय स्मारक विद्यालय कम्प्युटर ल्यावया छगु ज्याझ््व दथुइ येँ महानगरया मेयर विद्यासुन्दर शाक्यं उलेज्या यानादीगु दु।

राष्ट्रपति शैक्षिक सुधार कार्यक्रम अन्तर्गत वंगु १९ लाख ५० हजार रुपैयाँ आन्तरिक स्रोतपाखे करीब ९३ हजार रुपैयाँ थप याना कम्प्युटर व फर्निचर खरिद याना ल्याव स्थापना यागु दु। ल्याब उलेज्या यानादीसे येँ महानगरया मेयर शाक्यं, गुणस्तरीय शिक्षा व स्वास्थ्य सेवाय् महानगरं लगानी यानागु दु धका धयादीगु दु।

जिमिसं जनअपेक्षा कथं सेवा बिया च्वनागु दु। जिमिसं सञ्चालन याना च्वनागु ज्याझ्वलय् ब्बति कयादीसँ। मेयर शाक्यं धयादीगु दु, ‘पिने च्वना आलोचना याना मखु, सेवा काये धुका अनयागु कमजोरी जुगु विषय सुझाव बिया सरकारी सेवा गुणस्तर सुधार याये फइ। थुकियात दोष बिया मखु, नागरिकं उत्तरदायित्व पूरा याना सुधारय् सहभागी जुइमाः’ उपचारया लागि निजी स्वास्थ्य संस्थाय् वना उपचार थिकेजुल धका धायेगु स्वया राज्यं सञ्चालन यानागु थासय् सेवा कया मगालि थपे यायेत ग्वाहालि यायेमाः।

विजय स्मारक स्कूलय् विज्ञान प्रयोगशाला व पुस्तकालय दयेकेत महानगरं ग्वाहालि यायेगु जुइ धका मेयर शाक्यं धयादीगु दु। पद्मकन्या विद्याश्रम स्रोत केन्द्रया स्रोत व्यक्ति खगराज जोशीया कथं थुगु स्रोत केन्द्रमातहतय् गूगु विद्यालयमध्ये च्यागु राष्ट्रपति शैक्षिक सुधार कार्यक्रम अन्तर्गत अनुदान प्राप्त यागु खः

जिमिसें ३० कम्प्युटरपाखे ल्याव स्थापना यानागु दु। थुकिइ खुगःा थप यानागु दु। विद्यालयया प्रधानाध्यापक डिल्लीप्रसाद शर्मा धयादीगु दु, थुकिइ इन्टरनेट सुविधा जोडे याना सूचना प्रविधि ल्याबया रुपं विकास यायेगु योजना दु । शर्माया कथं न्यागः निसे झीगः तक कम्प्युटर तया विद्युतीय लाइव्रेरी स्थापना याये। थुया लिपा सूचना प्रविधिइ जिपि छगु चरण च्वय् थ्यनिइ।

नेवाः पत्रकार राष्ट्रिय दबू येँ जिल्लां बागमती प्रदेशया न्हूम्ह नियुक्त मुख्यमन्त्री अष्टलक्ष्मी शाक्ययात सफल कार्यकालया भिंतुना ब्यूगु दु ।

देय्या न्हापांम्ह मिसा मुख्यमन्त्री शाक्ययात पत्रकार दबू येँ जिल्लाया पदाधिकारीलिसें दुजःपिन्सं नापलानाः बधाईलिसें भिंतुना ब्यूगु खः । व झ्वलय् दबू येँ जिल्लाया नायः अर्विन्द्रमान सिहं मुख्यमन्त्री शाक्ययात हनापौ नं लःल्हानादिल ।

दबुलिं मुख्यमन्त्री शाक्ययात नेवाःतय्गु जनसंख्या आपाः दुगु बागमती प्रदेशय् संचार क्षेत्रय् नं नेवाः पत्रकारत उत्तिकं सक्रिय दुगु जानकारी ब्यूगु खः । लिसें दबुलिं नेवाः पत्रकारतय् थप विकासया लागिं प्रदेशस्तीय नेवाः प्रेस काउन्सिल गठन याय्माःगु माग तकं तःगु दु । दबुलिं बागमती प्रदेशय् नेपाल भाषायात नं सम्पर्क भाषाया रुपं मान्यता बीमाःगु माग नं तःगु दु ।

दबू येँ जिल्लां ब्यूगु हनापौ लःल्हानाकासं मुख्यमन्त्री शाक्यं संचार क्षेत्रया थाय् महत्वपूर्ण खःगु धासें मातृभाषा पत्रकारिता विकासया लागिं प्रदेश सरकारं बः बीगु प्रतिवद्धता प्वंकादिल । दबुलिं तःगु माग व सुझावबारे अध्ययन यानाः निर्णय यायेगु शाक्यं धयादिल।

स्वास्थ्य तथा जनसंख्या मन्त्रालयया कथं थौं येँ जक ३९५ म्हेसित कोरोना सक्रमण जुगु दु

अथेहे कास्कीइ ३०१, चितवनय् २१७, झापाय् १५२, यलय् ११० म्ह व मोरङय् १०५ म्हेसित कोरोना संक्रमण पुष्टि जुगु दु।

अथेहे सुनसरीइ ७६, ख्वपय् ६१, गोरखाय् ४०, रुपन्देहीइ ३३, तनहुँइ २९ व जुम्लाय् १८, स्याङजाय् १५, नवलपरासीइ १४ व इलामय् १० म्हेसित कोरोना संक्रमण जुगु दु।

वंगु २४ घण्टाया दुने देयन्यक १,९२० म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ९,४४३ म्हेसिगु पीसीआर परीक्षणय् १,७०२ म्ह व ३,०७३ म्हेसिगु एन्टिजेन परीक्षणय् २१८ म्ह याना १,९२० म्हेसित कोरोना भाइरस संक्रमण पुष्टि जूगुु दु।

वंगु २४ घण्टाया दुने २,२४८ कोरोना संक्रमणमुक्त जुगु दु सा २४म्ह सीगु दु।

यल महानगरपालिका–बागडोलय्  १ रोपनी १३ आना क्षेत्रफलय् ज्यापु समाजया ज्येष्ठ नागरिक आनन्द निकेतन (वृद्धाश्रम ) भवनया छगु ज्याझ्वः दथुइ प्रधानमन्त्री शेरबहादुर देउवां उलेज्या यानादीगु दु। सरकारं आवश्यकता कथं सार्वजनिक हितया लागिं भवन छ्यलेफइगु कथं भवन न्ह्याकागु समाजया नायः चन्द्र महर्जनं जानकारी बियादिगु खः।

उगु भवनया कला, शैली खनाः सर्वसाधारणलिसें शेरबहादुर देउवा नं तसकं दंग जुयादीगु दु । भवनया उलेज्या धुंकाः प्रधानमन्त्री देउवां धयादिगु दु ‘थ्व भवन नेवाः कला संस्कृतिया सुन्दरतम भवन खः । थुकिं सकसितं ल्वःवंकी’ न्यातया उगु भवन मौलिक कलात्मक शैलीइ दय्कातःगु दु । प्रधानमन्त्री जक मखसें देय्या हे न्हापांम्ह मिसा मुख्यमन्त्री वागमती प्रदेश मुख्यमन्त्री अष्टलक्ष्मी शाक्यं सम्भवतः थुकथंया भवन दय्कूगु देशय् हे न्हापांगु जूगु धासें वाग्मती प्रदेशय् थुकथंया भवन मदुगु दावी यानादिल । भवनया लागिं जग्गा मदुम्ह अष्टमान महर्जनं दान बिया भवनया लागि ५० लाख न ग्वहालि यानादीगु खः।

समारोहस गृहमन्त्री बालकृष्ण खाँणं नेपालयात अन्तर्राष्ट्रियस्तरय् म्हसीकेत नेवाः समुदायया कला, संस्कृति, भाषाया विशिष्ट योगदान दुगु धासें थुकिया संरक्षणय् सरकार गम्भीर जुइगु प्रतिबद्धता प्वंकादिल । अथहे उर्जा, जलस्रोत तथा सिँचाई मन्त्री पम्फा भुसालं धन, सम्पति, जग्गा जमिनया लागिं स्याय्गु पालेगु ज्या तकं जुइगु सन्दर्भय् मदुम्ह महर्जनं सामाजिक हितया लागिं जग्गा दान याःगुया नैतिक सन्देश महत्वपूर्ण जूगु बिचाः तयादिल । समारोहस वाग्मती प्रदेशया मुख्यमन्त्री शाक्यं वृद्धाश्रम भवन सकसिगु त्याग, तपस्या व मिहिनतं दय्कूगु धासें कलात्मक शैलीइ दय्कूगु थुगु भवन वाग्मती प्रदेशया हे तःधंगु सम्पति जूगु धयादिल ।