नेकपा एमालेया अध्यक्ष नाप पूर्व प्रधानमन्त्री के.पी.शर्मा ओलीं किपू नगरपालिका व चन्द्रागिरि नगरपालिका स्वागु माक्वाःचा नाप स्वागु ताँ व चन्द्रागिरि नगरपालिकाया वडा नं. १५ य् दयकातःगु भिराडील खाइके साकुरा पार्कया अबलोकन यानादीगु दु।

एमालेया अध्यक्ष ओलीय जहान राधिका शाक्य, किपू नगरपालिकाया मेयर रमेश महर्जन, उप–मेयर सरस्वती खड्का, वडा नं. २ या अध्यक्ष रमेशमान डंगोल नाप सदस्यपि सजिता महर्जन व ध्रुवप्रसाद अधिकारी, वडा नं. ६ या सदस्य उत्तम नेपाल लगायतपि न उपस्थिति दुगु खः।

लुँया भाः थौं तोलां प्यसः थहावंगु दु।

थौं लुँया भाः प्यसः थहावना तोलाया ९१ हजार २ सय रुपैयाँ तोके यागु दु धका नेपाल सुनचाँदी व्यवसायी महासङ्घं धागु दु।

अथेहे वहः न तोला झीन्यातका थहाःगु दु। वहः थौं झीन्यातका थहावना तोला ११ सय ९५ रुपैयाँ कारोबार जुगु दु धका महासङ्घं धागु दु।

यलय् च्वंगु क्वन्ति महाद्यःया देगः जिर्णोद्धार सम्पन्न जुगु दु।

थौं छगु ज्याझ्वः दथुइ जिर्णोद्धारया अनावरण प्रधानमन्त्री शेरबहादुर देउवां यानादीगु दु। वंगु २०७२ वैशाख १२ व २९ गते ब्बगु भुखाचं देगः क्षति जुगु खः।

झण्डै ३ करोड रुपैयाँ उगु देगः जिर्णोद्धार यागु खः।

येँं महानगरपालिकाया मेयर विद्यासुन्दर शाक्यं येँया कला, संस्कृति, सम्पदा व भाषाया संरक्षण मयाइपिन्स आः चुनाव त्याके फइमखु धका धागु दु। येँ धइगु नेपाःया हे मू सांस्कृतिक नगर जुगु कारणं थनयागु कला, संस्कृति, भाषा, सम्पदाया संरक्षण यायेफतकि जक थुगु नगरया अस्तित्व कायम जुइगु  विचाः तयादीगु दु।

नेपालभाषा केन्द्रीय विभाग, पाटन क्याम्पसय् थौं छगु ज्याझ्वलय न्ववानादीसे मेयर शाक्यं येँ महानगरपालिकाय् थःपि निर्वाचित जुया वये धुका  थनयागु संस्कृति, सम्पदा व भाषा संरक्षणय् यक्को लगानी याये धुकागु दु। वयकल धयादीगु दु, ‘कुमारी संस्कृति आः विश्वय् परिचित नेपाःया संस्कृति खः उकिइ थुगु संस्कृतिइ छु न प्रकारया समस्या मवयेमाः धका जिमिसं वर्तमान जीवित देवी कुमारीया लागि मासिक ५० हजार, जीवित देवता गणेश व भैरवया लागि मासिक ३०–३० हजार विशेष भत्ताया व्यवस्था यानागु दु। अथेहे भूतपूर्व कुमारीया लागि मासिक १५ हजार व गणेश नाप भैवरया लागि मासिक १२–१२ हजारया व्यवस्था यानागु दु।

कुमारीया हेरचाह याइम्ह चिताइदार परिवारया लागि न मासिक ५० हजार बियागु दु।’ येँ महानगरपालिकां नकतिनि हे कक्षा १ निसे ८ तक शुरु याना नेपालभाषाया पाठ्यक्रम येँ देय् म्हसीके थःपिन्स शुरु जक यानागु व आः लिपा वइपि जनप्रतिनिधिपिन्स न थुकियात अझ थपे याइगु विश्वास यानादीगु दु,‘उकिइ सु ना थथे याइ उमिस जक आः चुनाव त्याके फइ।’

उगु हे ज्याझ्वलय न्ववानादीसे येँ महानगरपालिकायण उपमेयर हरिप्रभा श्रेष्ठ खड्गीं येँया संस्कृति धइगु हे आः विश्वय् नेपाःया संस्कृति धका परिचित जुगु दु व थुगु संस्कृतियात येँया नेवाः समुदायपिन्स बचे याना वयच्वंगु कारणं नेवाः समुदायपिनिगु भाषा, संस्कार, संस्कृतियात संरक्षण यायेत महानगरपालिकां प्राथमिकताय् तया वयाच्वनागु दु धका धयादीगु खः।

केन्द्रीय विभागं नेपालभाषाय् स्नातकोत्तर विषयया पठनपाठन शुरु यागु ४१ दँ थ्यंगु लसताय् जुगु उगु  ज्याझ्वलय् नेपालभाषाया महाकवि सिद्धिादास महाजुया दक्को कृति संकलन ‘सिद्धिमाः’ लगायत सफू पितब्बज्या जुगु दु। अथेहे नेपालभाषा केन्द्रीय विभागय् संग्रहित करिब ३० हजार सफूयात न डिजटाइज याना ई–पुस्तकालय रुपान्तरण यायेत येँ महानगरपालिकां ५० लाख बजेट विनियोजन यागु जानकारी बिगु खः।

नेपालभाषा केन्द्रीय विभागया प्रमुख प्रा.डा.ओमकारेश्वर श्रेष्ठ सभाध्यक्षताय् जुगु उगु ज्याझ्वलय् त्रिभुवन विश्वविद्यालयया उपकुलपति डा. धर्मकान्त बास्कोटा, पाटन संयुक्त क्याम्पसया प्रमुख डा. लक्ष्मण कुँवरपिन्स न न्ववानादीगु ख।