वंगु २४ घण्टाया दुने कोरोना संक्रमणं थप १९० म्ह मन्त। अथेहे ८३०५ म्हेसित कोरोना संक्रमित पुष्टि जुगु दु ।

अथेके थौं ६५४३ म्ह संक्रमणमुक्त जुगु दु । स्वास्थ्य तथा जनसंख्या मन्त्रालयया कथं २२ हजार ८७ म्हेसिगु नमुना परीक्षण यागुलि ८३०५ म्हेसित संक्रमण पुष्टि जुगु खः।

अथेहे संक्रिय संक्रमितपि १ लाख १५ हजार ८५२ म्ह थ्यंगु दु। उकि मध्ये १ लाख ८ हजार ३८ होम आइसोलसेसनय् च्वना च्वंगु दु। संस्थागत आइसोलेसनय् ७ हजार ८१४ म्हसंक्रमितपि दु।

कि मध्ये १७४८ म्ह आईसीयूलय् च्वना च्वंगु दु सा ४९२ म्ह भेल्टिलेटर सपोर्ट तयातःगु दु।

मन्त्रालयया कथं आःतक ४ लाख ८८ हजार ६४५ म्ह कोरोना संक्रमण पुष्टि जुइ धुकुगु दु। उकि मध्ये ५ हजार ८४७ म्ह सी धुकुगु दु ।

अथेहे ३ लाख ६६ हजार ९४६ म्ह संक्रमणमुक्त जुइ धुकुगु दु। वंगु २४ घण्टाय् जक ६५४३ म्ह संक्रमणमुक्त जूगु दु धका मन्त्रालयं धागु दु।

शेयर बजार कारोबार मापक नेप्से परिसूचक थौं बिहीवाः ६ अङ्क स्वया अप्वो थहावंगु दु।

नेप्से ६ दशमलव ३७ अङ्क थहावना २७८७ दशमलव १८ अङ्क थ्यंगु दु धका नेपाल स्टक एक्सचेन्ज लिमिटेडं धागु दु। थौं खुगु समूहया सूचक थहा वंगु दु सा च्यागु समूहया सूचक घटे जुगु दु।

दकलय् अप्वो विकास बैंक समूहया परिसूचक एक सय १३ दशमलव ४४ अङ्क थहा वंगु दु सा जीवन बीमा समूहया परिसूचक ७८ दशमलव ८५ अङ्क घटे जुगु दु ।

थौं नौ अर्ब ३० करोड रुपैयाँ स्वया अप्वो दुई करोड एक लाख कित्ता शेयर किनबेच जुगु खः।

नेपाल रिइन्स्योरेन्स लिमिटेडया थौं दकलय् अप्वो ३४ करोड ७० लाख रुपैयाँ बराबरया शेयर कारोबार जुगु खः।

थौं गुडविल फाइनान्स कम्पनी लिमिटेड व मन्जुश्री फाइनान्स लिमिटेडया शेयर मूल्य १० प्रतिशत बढे जुगु दु।

पाँचथर पावर कम्पनी लिमिटेडया शेयर भाः धासा क्वहावंगु दु।

वाग्मती प्रदेशय् राष्ट्रियसभा उपनिर्वाचनया मतदान क्वचाःगु दु।

बिहीवाः न्हिनय् ३ बजे तक १०५ म्ह प्रदेशसभा सदस्य व स्थानीय तहया प्रमुख व उपप्रमुख २३३ म्ह याना ३३८ म्हेसिया मतदान यागु खः।

स्थानीय तहया न्याम्ह व प्रदेशसभा न्याम्हेसिया मतदान मयागु धका निर्वाचन अधिकृतया कार्यालयं धागु दु। उपनिर्वाचनय् वागमती प्रदेशसभा सदस्यपि ११० म्ह व बागमती प्रदेशअन्तर्गतया पालिका प्रमुख व उपप्रमुख २३८ म्ह याना ३४८ म्ह मतदातापि दु। मतदातापि मध्ये प्रदेशसभा सदस्य पशुपति चौलागाई छु दिं न्ह्य मदुगु खःसा विवेकशील साझा पाटीया स्वम्हसिया मतदान बहिस्कार यायेगु घोषणा यागु खः।

निर्वाचनय् प्रदेशसभा सदस्यपि ४८ म्ह व पालिका प्रमुख व उपप्रमुखया मतभार १८ कायम यागु खः । वाग्मती प्रदेशपाखे छम्ह राष्ट्रियसभा सदस्यया लागि जुइगु मतदानय् नेकपा एमालेपाखे रामबहादुर थापा बादल, नेपाली कांग्रेस, नेकपा माओवादी केन्द्र, जनता समाजवादी पार्टी व एमालेया माधवकुमार नेपाल समूहया समर्थनय् डा. खिमलाल देवकोटा व नेपाल मजदुर किसान पाटीया कृष्णबहादुर तामाङ उम्मेदवार जुयादीगु खः। थौं बिहीवाः हे मतगणना याइगु व बहनि तक लिच्वः वइ धका निर्वाचन अधिकृतया कार्यालयं धागु दु।

नेकपापाखे निर्वाचित गृहमन्त्री थापायात दल त्यागसम्बन्धी कानूनया आधारय् नेकपा माओवादी केन्द्रं पदमुक्त यायेवं उगु थाय् खाली जुया उपनिर्वाचन जुगु खः ।

आः कोभिड–१९ या पीसीआर परीक्षण यायेत अस्पताल वा प्रयोगशाला म्वागु दु।

राष्ट्रिय जनस्वास्थ्य प्रयोगशालां आः छेँ वया हे स्वास्थ्यकर्मीपिन्स पीसीआर परीक्षणया स्वाब सङ्कलन यायेगु मापदण्ड जारी यागुलि अस्पताल वा प्रयोगशाला वने मागु बाध्यता हटे जुग दु।

जनस्वास्थ्य प्रयोगशालां छेँय् हे पीसीआर यायेत ‘छेँ हे पीसीआर परीक्षणया लागि नमूना सङ्कलन यायेगु सम्बन्धी मापदण्ड–२०७८’ हःगु दु ।

बिरामी वा सू ना नं इच्छा यानाा स्वास्थ्यकर्मीपिन्त छेँय् हे सःता पीसीआर परीक्षणया लागि स्वाब बिइ फइगु व्यवस्था यागु दु । थ्व स्वया न्ह्यः पीसीआर परीक्षणया लागि प्रयोशगाला वा अस्पताल वने मागु ब्यवस्था दु।

जनस्वास्थ्य प्रयोगशालाया सूचना अधिकारी राजेश गुप्तां मापदण्ड लागू याये धुका आः सूना नं पीसीआर परीक्षणया लागि छेँय् हे स्वास्थ्यकर्मी सःते फइ धका धागु दु ।

वयकःया कथं बिरामी जूपि वा सङ्क्रमण लक्षण खने दुपि मनू तयस प्रयोगशालां खटे जूपिस्वास्थ्यकर्मीपिन्स छेँ हे वया पीसीआरया लागि नमुना संकलन याइ धका धागु दु ।

वयकःया कथं छेँ वया पीसीआर याइगु इलय् तोके यानातगु शुल्कय् अतिरिक्त  ५०० तक अप्वो जुइ धका धागु दु।

आः सरकारी प्रयोगशालाय् कन्ट्याक्ट ट्रेसिङय् लापिन्त निःशुल्क व थः यःथे पीसीआर याइपिन्त द्धःछि नाप निजी प्रयोगशालां निद्धः कायेगु याः।

लुँया भाः थौं न थहावंगु दु।

थौं लुँ तोलां प्यसः थहा वंगु दु ।

प्यसः थहावना थौं ९३ हजार सात सय रुपैयाँ थ्यंगु दु धका नेपाल सुनचाँदी व्यवसायी महासङ्घं धागु दु।

म्हिगः लुँ तोलां सच्छि क्वहावया ९३ हजार तीन सय रुपैयाँ कायम जुगु खः ।

थौं वहःया भाः न क्वहावंगु दु।

म्हिगः तोलाया १३ सय ७० रुपैयाँ जुगु वहः थौं तोलाया १३ सय ६० रुपैयाँ कायम जुगु दु धका महासङ्घं धागु दु।