Display Style:
Column Style
प्रधान सिरपाः साहित्यकार शान्तराजयात
नृपेन्द्रलाल श्रेष्ठ | गुंलाथ्व पुन्ही ११४१, भाद्र ६ आईतवाः
साहित्यकार शान्तराज शाक्ययात छगू समारोहया दथुइ सिरपाः दाता कवियत्री प्रधानया काय् मञ्जुर प्रधानं सिरपाःया दसिपौ व नगद झीद्वः तका लःल्हागु दु।
मदुम्ह कवियत्री मन्दिरा प्रधानया नामय् ४९ दँ न्ह्यः स्थापित थुगु सिरपाः नेपालभाषा साहित्य ख्यलय् योगदान ब्यूपिं साहित्यकारतय्त बिया वयाच्वंगु खः। बाखं कनेगु व न्यनेगु परम्परायात पुनर्जीवन ब्यूगु, थीथी बाखं च्वमिया पुलांगु कृतियात आधुनिक पुस्तायात म्हसीकेत, नेपाल व नेपाली भाषाया बाखंया माध्यमं उकिया नैतिक, सांस्कृतिक हसनायात प्रचार याय्त योगदान ब्यूगुलिं शाक्ययात उगु सिरपाः ब्यूगु खः।
लकडाउनया इलय् न थःगु फुर्सदया इलय् साहित्यकार शाक्यं फेसबुकपाखें बाखं न्यंकेगु यानावया च्वंगु खः न्हियान्हिथं नियमित रुपं वाचन याइगु विश्वप्रसिद्ध बाखं, नेपालभाषाया लोकबाखं, ऐतिहासिक बाखं वाचन व शैली यक्व हे न्यँमिपिनिगु नितिं त्वःफिके मज्यूगु ज्याझ्वः जूगु खः। ‘लकडाउन आपाःसिगु नितिं समस्या बीगु, दुःख बीगु ई जुल तर, जिगु लागिं धाःसा ह्वःताः जुल । फुर्सदया ईयात फेसबुक माध्यमयात छ्यलाः बाखं कनेगु न्ह्याकाबलय् शुरुइ न्यँमिपिन्सं गुकथं काइ धइथें ताःगु खः’ साहित्यकार शाक्यं धयादिल ‘लिपा वःगु प्रतिक्रियां जितः तसकं उत्साहित दय्कल, छन्हु जक बाखं कनेमफुत धाःसां मनूतय्सं जितः म्हं मफुतला धकाः न्यनाहइगु, थुकथं सिरपाः चूलाइ धकाः ला बिचाः तक नं मयाना ।’
अथेहे, वरिष्ठसिने पत्रकार विजयरत्न असंबरें कोरोना संक्रमणया इलय् मनूत तसकं चिन्तित, ग्याःचिकुया दथुइ छेँय् हे कुंकाः च्वनेमाःबलय् शाक्यं फेसबुकया माध्यमं साहित्यया श्रीवृद्धिया लागिं बियादीगु योगदानयात च्वछानादिगु खः।
संचाःकःमि सुनील महर्जनं साहित्यकार शान्तराज शाक्यया बाखं वाचन, भाव सम्प्रेषणया कला व नैतिक, सांस्कृतिक चेत युक्त बाखं कोरोनाकालय् छेँय् कुंकाच्वनेमाःपिं मनूतय्त याउँक सासः ल्हाय्गु ‘भेन्टिलेटर’ थें जूगु बिचाः तयादिल ।सिरपाः ज्याझ्वःया कजिः सुरेन्द्रभक्त श्रेष्ठं भाषा, साहित्यय् योगदान ब्यूपिन्त हःपाः बीत सिरपाःया महत्वया विषयस थःगु बिचाः तयादिल।
मलेसियां शनिवाः छन्हुं हे २४म्हेसिया सीम्ह नेपाः थ्यंकेहल
गुंलाथ्व पञ्चमी ११४१, भाद्र ६ आइतबाः
मलेसियां शनिवाः छन्हुं हे २४म्हेसिया सीम्ह नेपाः थ्यंकेहःगु दु ।
रोजगारीया झ्वलय् मलेसियाय् वंपिं थीथी ईलय् सीपिं नेपामिपिन्त नेपाल वायुसेवा निगमया वाइडबडी विमानय् तयाः येँ थ्यंकेहःगु खः ।
वैदेशिक रोजगार बोर्डं मलेसियां गुम्ह सीम्ह अले १५म्हेसिया अस्थु यानाः जम्मा २४म्ह सीम्ह नेपाः थ्यंकेहःगु धागु दु । कोभिडया हुनिं नियमित उडान जुइमफयाः सीपिन्त छक्वलं हःगु बोर्डं धागु दु ।
९म्हेसिया सीम्ह विमानस्थलं तप्यंक्क सम्बन्धित छेँजःयात लःल्हाःगु दुसा अस्थुया नितिं छेँजःपिन्त विमानस्थलय् सःताः जिम्मा ब्यूगु धागु दु । झण्डै निगू दशक थुखय् देय्या आर्थिक मेरुदण्डया मू लिधंसाया रुपय् रेमिट्यान्सयात कयाःवःगु दु ।
रेमिट्यान्सयात आर्थिक जँ धाःसां विदेशय् ध्यबा कमे यायेत वंपिं सीपिनिगु ल्या न लिपांगु ईलय् अप्वःगु दु । औसत न्हिच्छिया ३म्ह सीम्ह विदेशं वइगु वैदेशिक रोजगार वोर्डं धागु दु ।
बोर्डया धलःकथं वंगु दँय् द्वछि २सः व ४२म्ह नेपामि विदेशय् सीगु दु । थ्व ल्या न्हापांगु दँय् ६सः व ७४म्ह जक खः ।
थौं नेवाः तयेसं गुंपुन्हि व तागाधारीपिन्सं जनैपूर्णिमा तःजिक हनाच्वन
लहनान्यूज | गुंलाथ्व पञ्चमी ११४१, भाद्र ६ आइतबाः
थौं गुंलाथ्व पुन्हि, अर्थात गुंपुन्हि । सकल नेवाःतय् क्वाति त्वनेगु लिसें ब्यांचित जा नकाः गुंपुन्हि हनाच्वंगु दु ।
गुता बूबःया क्वाति दयेकाः त्वनेगु दिं जूगुलिं हे थौंया दिंयात गुंपुन्हि धाःगु धापू नं दु । कय्गू, बकुलाः, भुटी, सिमी लिसें थीथी कथंया प्रोटिनयुक्त बूबः तयाः क्वाक्क त्वनीगु ति जूगुलिं थुकियात क्वाति धाःगु खः । क्वाति त्वनेबले म्हयात तागत दइगु मान्यता कथं क्वाति त्वनीगु खः । गुंलाया ई धइगु रोगव्याधीनिसें थीथी महामारी न्यनेफइगु ई खः । थ्व हे इलय् धार्मिक गतिविधिलिसें क्वाति त्वंसा अज्याःगु रोगव्याधीं मुक्त जुइफइगु विश्वास समाजय् दु ।
व लिसें थौंया दिंयात ब्यांजा नकेगु पुन्हि नं धाः । वा बालीयात रक्षा याइगु विश्वासय् बुँइ वनाः ब्यांचित जा नकःवनेगु चलन दु । व्याचां बुँइ च्वनाः वा बालीयात हानी याइपिं कीनाप मेमेगु हानिकारण चीजं रक्षा याइगु मान्यता दु ।
ब्रम्हू, क्षेत्रीतय् डोरो चीगु थौंया दिं सनातनी नेवाःतय् धाःसा गुंपुचः चीगु याइ । ईकापःका लिसें थीथी ज्वलं प्वःचिनाः हलुखं म्हासुकातःगु कां चिनाः दयेकातइगु गुंपुचः द्यःब्रम्हतय् ल्हातं चीगु याइ ।
थौं हे यलया क्वन्ति महाःद्यःयाथाय् नं मेला जुइ । उगु क्षेत्रय् म्वः ल्हुयाः नीसी यानाः पूजापाठ याइ । सिलु तीर्थ अर्थात गोसाइँगुण्ड वनेमफुपिं थन हे वयाः क्वन्तिया पुखूलिइ म्वः ल्हुइबले सिलु तीर्थय् वंगुति हे धर्म लाइगु तकं धार्मिक मान्यता दु ।
थौं नेपाःया तागाधारी समुदायपिन्सं थौं रक्षाबन्धन अले यज्ञोपवित अर्थात, जनै धारण यानाः थ्व पर्व हनेगु चलन दु । साउन शुक्ल पूर्णिमाया दिंकुन्हु चुडाकर्म यानातःपिं तागाधारी समुदायपिन्सं वैदिक मन्त्रोच्चारणलिसे मन्त्रण यानातःगु यज्ञोपवित धारण याइसा चुडाकर्म मयानीपिं तागाधारी व मेमेगु समुदायपिन्सं नाडीइ रक्षाबन्धन धारण याइ ।
थौं सुथंनिसें खुसि, पुखू अले तीर्थमा वनाः म्वः ल्हुयाः शुद्ध जुयाः विधिपूर्वक जनै व रक्षाबन्धन धारण याइगु खः । जनैया ६गू शिखायात ब्रह्मा, विष्णु, महेश्वर व ज्ञान, कर्म व योगया कथं स्वीकार यानातःगु दु । जनैयात ब्रह्मसूत्र वा ज्ञानया काःया कथं कायेगु याः । राक्षसं लिनातःपिं देवगणतय्तयात गुरु बृहस्पतिं रक्षा विधान तयार यानाः डोरो धारण याकाः संरक्षण याःगु पौराणिक बाखँलिसे थ्व पर्व स्वाः ।
अथेहे वामन अवतारय् भगवान विष्णुं जुजु बलीयात मन्त्र साधना यानातःगु डोरो धारण याकाः वचनवद्ध याकाः स्वंगुलिं लोक काःगु बाखँलिसे न थ्व पर्व स्वाः । थौं काश्यप, अत्रि, गौतम, भारद्वाज, जमदग्मी, वशिष्ठ व विश्वामित्र ऋषियात कुश, हाकुहाम्वः अले जलया तर्पण बिइगु जूगुलिं थ्व पर्वयात ऋषि तर्पणी पूर्णिमा न धायेगु याः ।
पुन्हिया छन्हु न्ह्यः मांबाः मदुपिन्सं सँ खानाः छ्यनय् स व तुलसीया मठय्च्वंगु चा ईलाः म्वः ल्हुइगु अले छछाक जक नयेगु न चलन दु । जनैपूर्णिमा हनेत थौं येँया पशुपतिनाथ, रसुवाया सिलु तीर्थ, यलया क्वन्ति महाद्यःलिसेया थासय् मनूतय् भीड जुइगु याः ।
पशुपतिनाथयात न थौं हे जनै हीकीगु जुयाः मूल पूजारीं छन्हु न्ह्यः हे न्हूगु जनै चिइमाःगु चलन दु । जनै हिलेत भगवान पशुपतिनाथ तकं सिलु तीर्थय् थ्यंकीगु धार्मिक विश्वास दु ।
येँ महानगरपालिकां न्ह्याकल ‘छम्ह स्यनामि छगः ल्यापटप’ अभियान
लहनान्यूज | गुंलाथ्व पञ्चमी ११४१, भाद्र ६ आइतबाः
येँ महानगरया कन्या मन्दिर माध्यमिक विद्यालयय स्यनामिपिन्त ल्यापटप लःल्हागु दु । ‘छम्ह स्यनामि, छगः ल्यापटप’ अभियान अन्तर्गत शनिबाः ब्वनेकुथिया २७म्ह स्यनामिपिन्त ल्यापटप लःल्हागु खः ।
वडा अध्यक्षपिं नीलकाजी शाक्य व नविन मानन्धर लिसें महानगरया शिक्षा अधिकृत मोतीराज खनालं संयुक्त कथं ल्यापटप वितरण यानादिगु खः ।
ज्याझ्वःया मू पाहाँ वडा २५ या अध्यक्ष शाक्यं, “विद्यालयपाखें रचनात्मक ज्याझ्वः त महानगर हजि, छिकपिनिगु ज्याझ्वः बारे जिपिं महानगरय् सहलह याय् ।” धयादिल ।
ज्याझ्वलय् शिक्षा अधिकृत खनालं, चालू आर्थिक दँय् महानगरं शिक्षक पिनिगु लागि ल्यापटप न्यायेत बजेट विनियोजन यानागु जानकारी बियादिगु खः । वितरण जूगु उगु ल्यापटप राष्ट्रपति शैक्षिक सुधार ज्याझ्व, महानगरया केन्द्रीय बजेटपाखें व विद्यालयया थःगु हे आयपाखें चुलागु ध्येबा न्यानाबिउगु खः ।
ल्यापटप वितरण ज्याझ्वलय् शिक्षक संघपाखें नारायण गौत्तम, अखिल नेपाल शिक्षक संगठनपाखें डिल्लीराज शर्मा, एकीकृत शिक्षक संगठनपाखें बाबुराम घिमिरें थःगु विचा तसें लक्षित समूहया अभिभावकपिन्त मोवाइल वा ल्यापटप पहुँच अप्वेकेमाःगुलि बः बियादिल ।
ज्याझ्वलय् कन्या मन्दिरया निमित्त प्रधानाध्यापक बद्रीनाथ भट्टराईं शिक्षकपिन्सं थः पिं नं स्यनेगु व विद्यार्थीपिन्त नं स्यनेगु व्यवहार अप्वःगु धयादिल । गुकिं संस्थागत यायेत बः बिउगु धयादिल ।
गाइजात्रा नेवाः तयेगु जक खःला? येँ महानगरया मेयर शाक्य
नृपेन्द्रलाल श्रेष्ठ | गुंलाथ्व चतुर्दशी ११४१, भाद्र ५ सनिवाः
न्हापानिसे हना वयाच्वंगु सायाः (गाईजात्रा) कुन्हु संघीय सरकारं स्वनिगलय् सार्वजकिन बिदा बियावया च्वंगु खः।
थुगु दँ धासा संघीय सरकारं सायाः (गाईजात्रा) कुन्हु नेवाः तय्त नेपाः देय् न्यक सार्वजनिक बिदा बिइगु धका छु दिं न्ह्य नेपाल सरकारं घोषणा यागु दु। अथेहे बागमती प्रदेश सरकारं प्रदेश यकं बिदा बिइगु घोषण यागु दु।
थुगु बिषययात कया येँ महानगरपालिकाया मेयर बिद्यासुन्दर शाक्यं संघीय सरकारं सायाः (गाईजात्रा) कुन्हु नेवाः तय्त नेपाः देय् न्यक सार्वजनिक बिदा व बागमती प्रदेश सरकारं प्रदेश यकं बिइगु बिइगु घोषणा यागुलि अन्योल जुगु धका लहनान्युजयात धयादीगु दु। ईद, ल्होसार देयन्यक नेपाःमि पिन्त सार्वजनिक बिदा बिइगु याः। सायाः (गाईजात्रा) छाय् नेवाः तयेत जक सार्वजनिक बिदा बिइगु खः धका मसील धका धयादीगु खः।
छु न संस्कृति छु न समुदायया जुइ मखु उकि संघिय सरकारं सायाः (गाईजात्रा) नेवाः समुदाय जक मधासे निर्णय भिंकेमाः धका धयादीगु दु। स्थानीय सरकार संघीय सरकारया निर्णय कथं बिदा बिइगु कि बागमती प्रदेश सरकारया निर्णया पालना यागु अन्योल जुगु दु धका येँ महानगरया मेयर शाक्य धयादीगु दु।
