माधवकुमार नेपाल नेतृत्वया पार्टी यागु नां नेकपा एमाले मजुइगु जुगु दु। एमाले विभाजन यायेवं नेता नेपालं थःगु नेतृत्वय् नेकपा एमाले समाजवादी दर्ताया लागि बुधबाः निवेदन बिगु खः।

अय्न राजनीतिक दलसम्बन्धी अध्यादेश कथं नियमावली बिहीबाः जक वंगुलि शुक्रबाः हाकनं निवेदन बिइगु तयारी दु। अथेहे वंगु दिं एमाले समाजवादी नेता डा. विजय पौडेल आयोग वंगु खः।

आयोगया अधिकारीपिन्त नापलाना सर्वोच्च अदालतं २३ फागुनया फैसला कथं छगु पार्टीया नां विशेषण झुण्डे याना मेगु दल दर्ता याये मज्यु धका धागु दु।

पौडेलं नेकपा एमाले समाजवादी मजुसे नेपाल कम्युनिस्ट पार्टी एकीकृत समाजवादी तयेज्यु ला धका न्यंगु खः। नेपाल समूहया नेतापिनिगु कथं नेपाल कम्युनिस्ट पार्टी एकीकृत समाजवादी वा नेपाल कम्युनिस्ट पार्टी समाजवादी नांया पार्टी दर्ता जुइगु सम्भावना दु।

सरकारं प्रभुराम शर्मायात प्रधान सेनापतिइ नियुक्त यायेगु सिफारिस यागु दु।

बिहीबाः च्वंगु मन्त्रिपरिषदया बैठकं नेपाली सेनाया कायममुकायम प्रधान सेनापति शर्मायात प्रधान सेनापति नियुक्त यायेगु राष्ट्रपति समक्ष सिफारिस यागु दु।

सरकारया प्रवक्ता ज्ञानेन्द्रबहादुर काकीया कथं भदौ २५ गते निसे लागू जुइगु कथं शर्मा प्रधान सेनापति नियुक्त यागु खः।

दल विभाजनयात अपूकुगु कथं सरकारं जारी यागु अध्यादेश विरुद्ध सर्वोच्च अदालतय् खुगु रिट दर्ता यागु दु।

सर्वोच्च अदालत प्रशासनया कथं अधिवक्ता अर्जुनकुमार अर्याल व सकुन्तला भुसाल, अधिवक्ता निकेशकुमार लम्साल व अनुपा अर्याल, अधिवक्ता प्रवेश केसी, अधिवक्ता श्रीकान्त बराल, अधिवक्ता दलबहादुर धामी व अधिवक्ता सरोज बुढाथोकी व आशिष श्रेठं बिस्क बिस्क रिट दर्ता यागु खः।

सरकारं संसदीय दल व केन्द्रीय समितिं २० प्रतिशत ल्याखं दल विभाजन याये दइगु राजनीतिक दलसम्बन्धी ऐनयात संशोधन याना भदौ २ गते अध्यादेश हःगु खः। संसद अधिवेशन दुगु अवस्थाय् छक्कल अधिवेशन अन्त्य याना सरकारं कन्ह्य कुन्हु हे अध्यादेश जारी यागु खः। उगु अध्यादेश जारी जुइवं नेकपा एमालेया नेता माधवकुमार नेपालं नेकपा एमाले समाजवादी व जनता समाजवादी पार्टीया महन्थ ठाकुर पक्षं जसपा लोकतान्त्रिक दर्ता यागु खः।

कानुन व्यवसायीपिन्स थुगु अध्यादेश संविधान विपरीत जुगु व संसद छले याना हःगु धासे खारेज यायेत व अध्यादेश हया दुगु दल दर्ताया ज्या न खारेज याये माःगु आदेश माग यागु दु। थुगु रिटय् भदौ ११ गते शुक्रबाः पेशी तोके यागु दु।

सरकारं बाग्मती प्रदेशया प्रदेश प्रमुखयात हिइगु दु।

आःयाम्ह प्रदेश प्रमुख विष्णुप्रसाद प्रसाईंयात चिइका यादव शर्मा प्रदेश प्रमुख नियुक्तिया लागि सिफारिस यायेगु प्रधानमन्त्री निकट स्रोतं जानकारी बिगु दु।

प्रदेश प्रमुखय् सिफारिस जुम्ह शर्मा माधव नेपाल निकटयाम्ह खः। वंगु असार २८ गते शेरबहादुर देउवा प्रधानमन्त्री नियुक्ति जुइवं सरकारं प्यम्ह प्रदेश प्रमुख हिउगु दु।

लुम्बिनीइ अमिक शेरचन, गण्डकीइ पृथ्वीमान सिंह गुरुङ, प्रदेश २ य् हरिशंकर मिश्रपिन्त नियुक्त याये धुकुगु दु।

सरकारं भदौ ७ गते साःया कुन्हु देयन्यक च्वंपि नेवाः समुदायपिन्त सार्वजनिक विदा बिगु दु।

थौं बिहीबाः च्वंगु मन्त्रपरिषद बैठकं भदौ ७ गते साःया कुन्हु नेवाः समुदायपिन्त सार्वजनिक विदा बिइगु निर्णय यागु दु धका सरकारया प्रवक्ता कानुन न्याय तथा संसदीय मामिलामन्त्री ज्ञानेन्द्रबहादुर कार्कीं जानकारी बिगु दु।

थ्व स्वया न्ह्यः साःया कुन्हु स्वनिगः दुने जक सार्वजनिक विदा बियाच्वंगु खः। सरकारं भदौ १४ गते कृष्ण जन्माष्टमीया दिं न सार्वजनिक विदा बिइगु निर्णय यागु दु।

मन्त्रिपरिषदया बैठकं नेपाली सेनाया बलाधिकृत रथी प्रभुराम शर्मायात महारथी दर्जाय् पदोन्नती यासे प्रधान सेनापति नियुक्तिया लागि राष्ट्रपति समक्ष सिफारिस ययेगु निर्णय यागु दु धका मन्त्री कार्की न धागु दु।

आः शर्मा कायम मुकायम प्रधान सेनापति खः।