बुधवाः सेयर कारोबार मापक नेप्से परिसूचक दोहोरो अंकं क्वहावंगु दु ।

नेप्से परिसूचक १३.०९ अंकं क्वहा वया २ हजार ७ सय ८० दशमलव ८१ अंकय् क्वहा वंगु दु। थौं न्हिच्छि थहाक्वहा वया नेप्से परिसूचक घटे जुगु दु।

आइतवाः, सोमवाः व मंगलवाः थहावंगु खःसा थौं धासा नेप्से क्वहावंगु दु । लगातार थहा वना छन्हु कुहावनिइ लगानीकर्तापिन्स ‘करेक्शन’ धका धाइ ।

नेप्से परिसूचक घटे जूसा सेयर कारोबार रकम धासा न्हुगु रेकर्ड तःगु दु। मंगलवाः ११ अर्ब ३५ करोड रुपैयाया कारोबार जुया न्हुगु रकेर्ड कायम जुगुलि थौं बुधवाः तोडे यासे न्हुगु रेकर्ड कायम जुगु दु।

बुधवाः ११ अर्ब ९५ करोड ८० लाख ९७ हजार रुपैयाँया सेयर कारोबार जुगु खः । बुधवाः २ करोड ५१ लाख कित्ता स्वया अप्वो सेयर किनबेच जुगु दु ।

बैंकिङ, व्यापार, होटल व पर्यटन, फाइनान्स व म्युचुअल फण्ड घने थहावंगु दु। बाँकी दक्को समूह घटे जूगु खः । बुधवाः यक्को कमे यागुलि समता घरेलु लघुवित्त न्हापागुे नम्बरय् खने दु सा रुरु जलविद्युत कम्पनी निगुगु थासय् दु ।

नेपाल फाइनान्स, गोर्खाज फाइनान्स लगायतया कम्पनीया सेयर भाः थहावंगु दु ।

अथेहे यक्को क्वहावंगु न्यागु शिर्ष कम्पनीइ हाइड्रोपावर कम्पनी खनेदुगु दु । ङादी पावरं यक्को गुमे यागु दु सा युनियन मोदी व नेपाल हाइड्रो खनेुगु दु ।

लुँ वहःया भाः थौं क्वहा वंगु दु ।

म्हिगः छन्हु हे तोला खुसः थहावना ९३ हजार चार सय रुपैयाँय् कारोबार जुगु लुँ थौं तोलाय् सच्छि क्वहा वंगु दु ।

लुँ तोलां थौें ९३ हजार तीन सय रुपैयाँ कायम जुगु दु धका नेपाल सुनचाँदी व्यवसायी महासंघं धागु दु ।

अथेहे, वहः या भाः न थौं क्वहा वंगु दु। म्हिगः तोलां ३५ रुपैयाँ थहावना १३ सय ९० रुपैयाँय् कारोबार जुगु खः ।

थौं वहः तोलाय् २० रुपैयाँ घटेर जुया १३ सय ७० रुपैयाँ थ्यंगु दु धका महासंघं धागु दु ।

रुपन्देहीइ उपचार यानाच्वपि थप च्याम्ह कोरोना संक्रमितकपि सीगु दु ।

च्याम्ह मध्ये खुम्ह रुपन्देहीइ व छम्ह पाल्पा व नवलपरासी पश्चिमय् च्वपि खः। बैसाख २८ गते लुम्बिनी प्रादेशिक अस्पतालय् इमर्जेन्सीइ भर्ना जुम्ह बुटवल १३ या ८० दँ दुम्ह मिसाम्ह बुधवाः सुथय् ६ः५८ बजे मदुगु धका अस्पतालया प्रवक्ता डा. विष्णु गौतमं जानकारी बिगु दु ।

अथेहे मंगलवाः इमर्जेन्सी भर्ना जुम्ह ओमसतिया गाउँपालिका रुपन्देहीया ४७ दँ दुम्ह मिजंम्ह थौं बुधवाः सुथय् ५ः३० बजे मदुगु खः । अथेहे तिनाउ गाउँपालिका–६ पाल्पाया ६० दँ दुम्ह मिसाम्ह मंगलवाः बहनि ४ः२० बजे, बुटवल–१३ या ५२ दँ दुम्ह  मिजंम्ह मंगलवाः बहनि ७ः१० बजे व बुटवल– ७ या ६० दँ दुम्ह मिजंम्ह बुधवाः सुथय् ७ः३० बजे बुटवल धागो कारखानाया कोभिड अस्पतालय् मदुगु धका अस्पतालया प्रवक्तां धागु दु।

अथेहे भिम अस्पतालय् जेठ ३ गते भर्ना जुम्ह ओमसतिया रुपन्देहीया ५७  दुम्ह मिजंम्ह मंगलवाः चान्ह्य १२ः४० बजे, वैशाख २५ गते भर्ना जुम्ह रामग्राम–६ नवलपरासीया ४६ दँ दुम्ह मिजंम्ह बुधवाः सुथय् ५ बजे व जेठ २ गते भर्ना जुम्ह लुम्बिनी साँस्कृतिक नगरपालिकाया ४५ दँ दुम्ह बुधवाः सुथय् १ बजे मदुगु खः।

पूर्वप्रहरी महानिरीक्षक खड्गजित बराल ९३ दँय् मन्त।

बुधवाः थःगु हे छेँय् मदुगु खःसा थौं न्हिनय् हे पशुपति आर्यघाटय् अन्त्येष्टि याइ धका वयकःया छ्य न धागु दु ।

बराल २०२९ सालनिसे २०३५ साल तक प्रहरी महानिरीक्षक जुयादीगु खः ।

वयकः पूर्वसांसद नाप बमाया लागि पूर्वराजदूत तक जुयादीइ धुकुम्ह खः।

लमजुङया भुलभुलेय् हाकनं भुखाय् ब्बगु दु।

भूकम्प मापन केन्द्रया कथं आः सुथय् ८ बजे जुया २६ मिनेटय् ५.३ म्याग्नेच्युटया भुखाय् ब्बगु खः ।

उगु हे थासय् सुथय् ५.८ म्याग्नेच्युटया भुखाय् ब्बगु खः।