वंगु २४ घण्टाया दुने देयन्यक ८ हजार १३६ म्हेसित कोरोना संक्रमण पुष्टि जूगु दु।

स्वास्थ्य तथा जनसंख्या मन्त्रालयं बिगु जानकारी कथं थौं मंगलवाः थीथी जिल्लाय् २० हजार २८६ म्हेसित पीसीआर परीक्षणं ८ हजार १३६ म्हेसित कोरोना पुष्टि जुगु खः।

आःतक नेपालय् कोरोना संक्रमितपि ४ लाख ७२ हजार ३५४ थ्यंगु दु। अथेहे २४ घण्टाया दुने ६ हजार ८९१ म्ह कोरोना संक्रमणमुक्त जुगु दु ।

थ्व नाप कोरोना सक्रमणमुक्त जूपि ३ लाख ५२ हजार ४१४ म्ह थ्यंगु दु ।

अथेहे वंगु २४ घण्टाया दुने देयन्यक १९६म्ह कोरोना सक्रमित जुया सीउगु दु।

येँ कोभिड संक्रमणया तसक जोखिम जुगुलि थीथी समुदायपिन्त थौंनिसें एन्टिजेन्ट परीक्षण यायेगु न्ह्याःगु दु ।

येँ महानगरपालिका व इपिडिमियोलोजी तथा रोग नियन्त्रण महाशाखां मंकाः रुपं परीक्षण न्ह्याकूगु खः । थुकिया शुरुवात कालीमाटी तरकारी अले फलफुल बजारं न्ह्याकूगु खः

‘स्वास्थ्य मन्त्रालय व सीसीएमसीं आःतक्क संक्रमणया दर अप्वः थायया पहिचान यानागु दु । थज्याःगु थासय् वनाः वृहत परीक्षण यायेगु जुइ’ महाशाखाया मेडिकल टेक्नोलोजिष्ट धनप्रसाद पौडेलं धयादिल ।

संक्रमण जूपि सक्रिय अवस्था सिकेत थ्व पायछि विधि जूगु धका पौडेलं धागु दु । परीक्षण याःपिं दक्वसित रिपोर्ट मवःतले आइसोलेसनय् च्वनेत धाःगु दु।

परीक्षणया लिच्वलं लक्षणलिसेंया विरामीयात अस्पताल छ्वयेत व लक्षण मदुपिन्त होम आइसोलेसनय् च्वनेत लिसें निगरानी यायेत अःपुइगु महाशाखाया ल्याव टेक्निसियन निरीक्षक भोला अधिकारीं धयादिल। वयकःया कथं सुयां शरीरय् कोभिडया भाइरस दुहां वनेधुंकाः लक्षण खनेदयेत न्यान्हु । वयां न्ह्यः सुइकें कोभिड दु कि मदु सीकेत थ्व परीक्षण प्रभावकारी जूगु वयकःपिन्सं धयादिल ।

न्हापांगु चरणय् करीब १० द्वः मनूया एन्टिजेन्ट परीक्षण जुइ । कन्हय् वडा ३२ या तरकारी बजारय् परीक्षण यायेगु ज्याझ्वः दु ।

तरकारी बजारलिसें यक्व मनूत मुनीगु थाययात न्हापांगु प्राथमिकताय् तयागु महानगरया कोभिड फोकल पर्सन ज्ञानबहादुर ओलीं धयादिल । परीक्षणया लागिं १५ स्वास्थ्यकःमिया टोली परिचालन याःगु दु ।

नेकपा एमाले लुम्बिनी प्रदेश कमिटी सचिवालय सदस्य सतमान पुनमगर मन्त ।

बाँकेया कोहलपुरस्थित नेपालगन्ज मेडिकल कलेजय् उपचारया झ्वलय् ६० दँ दुम्ह पुन थौं मंगलवाः सुथय् मदुगु धका एमाले लुम्बिनी प्रदेशया सचिवं जानकारी बिगु दु।

वयात छु दिं जक कोरोना संक्रमण पुष्टि जुगु खः । सासः ह्यायेगु समस्या वया वैशाख ३१ गते जिल्ला अस्पताल रुकुम पश्चिम हःगु खः ।

अन कोहलपुर छ्वंगु खः । वयात जेठ १ गते हेलिकप्टरं कोहलपुर यकूगु खः।

मंगलवाः सेयर बजारय् न्हगु रेकर्ड कायम जुगु दु ।

सेयर कारोबार मापक नेप्से परिसूचक ३४ दशमलव ५९ अंकं थहावंना सेयर कारोबार मंगलवाः ११ अर्ब ३५ करोड रुपैयाँ च्वय् थ्यंगु दु, थ्व आःतक हे दकलय् अप्वो खः।

थुकि याना सेयर लगानी याइपि लयतागु दु। नेपाल उद्योग वाणिज्य महासंघ पुँजी बजार फोरमया सभापति अम्बिका प्रसाद पौडेलं सेयर बजाः आःतक हे दकलय् अप्वो कारोबार जुगु लसताया खँ खः धका धयादीगु खः ।

मंगलवाः १ करोड १५ लाख ९ सय ६१ कारोबार जुगुलि २ करोड ३१ लाख ३१ हजार ६ सय १५ कित्ता सेयर किनबेच जुगु खः।

किनबेच सेयर ल्याः आःतक हे दकलय् अप्वो खः।

कोरोना संक्रमणं सप्तरीया सप्तकोशी नगरपालिकाया उपमेयर आशा चौधरी मन्त।

वासः यायेगु झ्वलय् थौं मंगलवाः सुथय् विराटनगरया नोवेल अस्पतालय् मदुगु धका जिल्ला स्वास्थ्य ज्याकुथिं जानकारी बिगु दु ।

निवाः न्ह्यः ज्वरो, सेखं मुसु व सासः ल्हायेगुलि समस्या जुगुलि एन्टिजेन परीक्षणय् कोरोना संक्रमण पुष्टि जूगु खः।