रामचन्द्र पौडेलया नेतृत्वय् वातावरण ह्यूपाः सम्बन्धी संयुक्त राष्ट्रसङ्घीय महासन्धिया पक्ष राष्ट्र तयेगु सम्मेलन कोप–२९ य् नेपालें जलवायु ह्यूपाःया असर म्हो यायेगु निति जलवायु संरक्षणया विषय स्पष्टताया ना िन्ह्यब्बःगु भ्रमण फलदायी जूगु दु।

अजरबैजानया बाकुय् जूगु उगु सम्मेलनय् ब्बति कया राष्ट्रपति पौडेल स्वदेश लिहा झागु दु। त्रिभुवन अन्तर्राष्ट्रिय विमानस्थलय् अतिविशिष्ट कक्षय् जूगु उगु पत्रकार सम्मेलनय् परराष्ट्र मन्त्रालयया सहसचिव नाप प्रवक्ता अमृतबहादुर राई न ‘हिमालनिसे समुद्र तक एकीकृत भावनां जलवायु संरक्षण यायेमागु’ धका नेपालं ल्ह्वं विषयय् भ्रमणं थप जोडबल थ्यःगु धका स्पष्ट यानादीगु खः।

“जलवायु वित्त, हानिनोक्सानी व अल्पविकसित देशं फय् मालाच्वंगु पीडा कम यायेत हलियक च्वपिन्त प्रविधि व वित्तीय ग्वहालि यायेमाः धका नेपालं धारणा उजागर यायेत भ्रमणं थप बल थ्यःगु  दु”, धका वयकलं धयादीगु दु उगु बैठक थ्व हे मङ्सिर ७ गते तक न्ह्यागू सम्मेलनय् जलवायु ह्यूपाःसम्बन्धी विषयगत क्षेत्रय् जुइगु वार्ता, सहलह व पारित जुइगु दस्तावेजय् नेपाःया राष्ट्रिय हित याःगु प्रत्याभूत यायेत वन व वातावरण मन्त्रालया नेतृत्वय् नेपाःया प्रतिनिधिमण्डल याःगु सक्रिय सहभागिता दु धका प्रवक्ता राई न जानकारी बियादीगु खः।

देशय् समग्र आर्थिक परिसूचकया अवस्था, विद्यमान आयोजनाया प्रगति, समस्या व समाधानया उपायबारे सहलह यायेत राष्ट्रिय विकास समस्या समाधान समितिया ५३ क्वःगु बैठक सिंहदरबारय् सुरु जूगु दु।

प्रधानमन्त्री केपी शर्मा ओलीया अध्यक्षताय् प्रधानमन्त्री नाप मन्त्रिपरिषदया कार्यालयय् जूयाच्वंगु बैठकय् राष्ट्रिय गौरवया आयोजना व आयोजनाया विद्यमान समस्या नाप वया कारण व समाधानया उपायबारे सहलह यायेत थी थी १५ गु कार्यसूची तःगु दु।

उगु कार्यसूचीइ शासकीय सुधार, राष्ट्रिय प्राथमिकता वःगु आयोजनाय् वन क्षेत्रया उपयोग, आयोजना बैंक, सार्वजनिक खरिद प्रयोजनया निति जिल्ला दररेट, बालसुधार गृह सञ्चालन व सडक बालबालिका मुक्त अभियान, सङ्घ, प्रदेश व स्थानीय तहय् सरकारी भवन, समपूरक अनुदान, झींखुक्वःगु आयोजनाय् कार्यान्वयन योजना, आयोजनाया बहुवर्षीय ठेक्का व्यवस्थापन, विद्युत् महसुल सङ्कलन विनियमावली, अनिवार्य व निःशुल्क शिक्षा, सार्वजनिक सेवाय् इन्टर्नसिप, विपद् उत्थानशील पूर्वाधार निर्माण, विपद् लिपागु पुनःनिर्माण व पुनःस्थापना याःगु खः।

बैठकय् उपप्रधानमन्त्री नाप अर्थमन्त्री विष्णुप्रसाद पौडेल, मन्त्रीगण, प्रदेश सरकारया मुख्यमन्त्रीपि, प्रधानमन्त्रीया मुख्य सल्लाहकार, सरकारया मुख्यसचिव, प्रधानसेनापति, सङ्घ व प्रदेश सरकारया सचिव तयेगु ब्बति दुगु खः।

प्रधानमन्त्री केपी शर्मा ओलीें कार्यान्वयन जूगु झीदँ लिपा संविधानया समीक्षा व मूल्याकंन जुइमाः धका धयादीगु दु।

कान्तिपुर कन्क्लेभ २०२४ या समापन सत्रया परिसंवादय् प्रधानमन्त्री ओलीें लोकतान्त्रिक व्यवस्था, गणतन्त्र व संघीयताया मुल मर्मय् च्वय् क्वय् जुइ मखु धका धयादीगु दु। देशय् स्थिरता, सुशासन व विकासया निति लागि वर्तमान सत्ता समीकरण जुगुलि थुकियात सार्थक दयकेगु जुइ धका धयादीसे वयकलं धयादीगु दु छु न दलया बहुमत मदुगु अवस्थाय् लोकतान्त्रिक व्यवस्थाया निति आन्दोलन याःगु मुख्य दल नेपाली काङ्ग्रेस व नेकपा (एमाले) दथुइ सहकार्य जूगु खः धका धयादीगु खः।

आः दँच्छि व च्यालालिपा थःम्हेसिया काङ्ग्रेस सभापति शेरबहादुर देउवायात सत्ता हस्तान्तरण यायेगु जुइ धका धका वयकलं धयादीगु दु।राष्ट्रिय स्वतन्त्र पार्टीया सभापति रवि लामिछानेयात अनुसन्धानया झ्वलय् हिरासतय् काःगु बिषय न्यगु न्ह्यसलय् प्रधानमन्त्री ओलीं संसदीय समितिया प्रतिवेदन याःगु आधारय् ज्वंगुलि दोष व निर्दोषया फैसला अदालतं याःगु धका धयादीगु खः।

“जिं भ्रष्टाचार याये मखु व याके बिइमखु धका स्पष्ट दुु। गल्ती याइपिन्त कारबाही यायेगुलि मनूया ख्वा स्वये मखु।धयाच्वनागु हे दु।“ प्रधानमन्त्री ओलीं धयादीगु दु, “झीमिसं लोकतन्त्रया निति यक्को जेलनेल नया वयापि खः। देशय् ब्याक गेयर तया लिउने वने फइ मखु न्हुगु पुस्ताया नामय् पिहावइगु तथ्यहीन आधारय् ब्बः बिइगु ज्या बालागु खः। न्यायालयया ज्याय् दबाब व मखु प्रचारपाखे प्रभावित यायेगु ज्या बालागु खः।

येँ जिल्ला अदालतं पशुपतिनाथ विकास कोषया गौशाला धर्मशालाय् मारवाडी सेवा समितिया गुगुं नं कथंया हक मदुगु व्याख्या याःगु दु। मारवाडी समुदायं धर्मशालाय् थःपिनिगु मोहियानी हक दुगु दाबी याना वयाच्वंगु खः ।

अदालतं करारया शर्त पालना मयाःगु अवस्थाय् पशुपति विकास कोषं सम्झौता अन्त्य यायेफइगु फैसला नं याःगु दु। फैसलाया खण्ड २३, २४ व २५ य् मारवाडी सेवा समिति व पशुपति विकास कोष दथुइ ब्वलंगु विवादया विस्तृत व्याख्या याःगु दु।जिल्ला अदालतं मारवाडी सेवा समितिपाखे प्रमोद अग्रवालं दायर याःगु फिरादय् दाबी मगाःगु धासें खारेज जुइगु फैसला नं याःगु दु ।

फैसलाया पूर्ण पाठय् मारवाडी सेवा समितिं पशुपति क्षेत्र विकास कोष लिसे याःगु सम्झौताय् मोहियानी हक मदुगु खँ स्वीकार यायेधुंकूगु व थ्व स्वयां न्ह्यः सर्वोच्च अदालतं याःगु फैसलाय् नं थ्व विषय क्वःजीधुंकूगुलिं आः हाकनं उगु विवाद न्ह्यथने आवश्यक मदुगु खँ न्ह्यथनातःगु दु ।

धर्मशालाया ९ रोपनी स्वयां अप्वः जग्गा उपभोग याःगु बापत मारवाडी सेवा समितिं पशुपति विकास कोषयात दछिया ५१ हजार तका जक बाः पुला वयाच्वंगु खः। अदालतं उगु बाः नं युक्तिसंगत मजूगु फैसला याःगु दु ।

येँ जिल्ला अदालतया फैसलाविरुद्ध मारवाडी सेवा समितिं उच्च अदालत यलय् पुनरावेदन याइगु जूगु दु। जिल्ला अदालतया पूर्ण पाठ वयेवं समितिं पुनरावेदन यायेत्यंगु खः।

नमोबुद्ध नगरपालिका–११ स्थित ऐतिहासिक व पर्यटकीयस्थल नमोबुद्धय् जात्रा सुरु जूगु दु।उगु जात्रा बौद्ध धर्मावलम्बीतय्स नमोबुद्धय् मदुपिन्त लुमका ‘मत च्याकेगु’ याइ ।

कात्तिक शुक्ल पून्हि कुन्हु न्हिच्छि मत च्याकेगु  याइसा कन्ह्यः शनिवाः तक मेला जुइगु याइ। पुन्हिया दिं शान्तिया प्रतीक गौतमबुद्धया पूर्वजन्म ‘राजकुमार’ न देहत्याग याना धुँयात जीवन लःल्हागु कथं कायेगु याइ।

“किंवदन्ती कथं बुद्धं लुम्बिनीइ पुनर्जन्म कायेधुका जीवन त्याग याःगु भूमि, ‘नमोबुद्धाय नमः’ पाखे नमोबुद्ध नां जुगु धका धाइ। द्वापरयुगय् वहे राजकुमारया अस्थिपञ्जर गाडे याना चैत्य दयकूगु, जीवन त्याग याःगु थाय् पूजा यायेगु व मत च्याकेगु निति बौद्ध धर्मालम्बीपि वनेगु याइ”।

विशेषयाना तामाङ व नेवाः समुदायया धर्मावम्बी तयेगु मेला जुइ धका नमोबुद्धया मूल लामा गुरु कान्छा लामां धयादीगु दु। वयकःया कथं तत्कालीन पञ्चलादेश (पनौती राज्य)या जुजु व लानि सत्यवतीया स्वम्ह काय् पूर्वपाखे गन्धमान पर्वत (गुँ) सिकार म्हित्येगु झ्वलय् चिंधिकम्ह काय् राजकुमारया नय् पित्याना प्वाथय् दुम्ह धुँयात थःगु हि व म्हय् च्वंगु ला व हि नका थःम्हेसिया देहत्याग याना जीवन लःल्हागु खः।