कोभिड–१९ या न्हुगु भेरियन्ट विश्वव्यापी रुपं फैलै जुगु अवस्थाय् स्वास्थ्यया मापदण्ड अपने याना उच्च सतर्कताया दथुइ न्याय क्षेत्रया २२ म्ह न्यायाधीश व १३९ म्ह कर्मचारी याना जम्मा १६१ म्हेसित कोरोना संक्रमण जुगु दु ।

सर्वोच्च अदालतया सहप्रवक्ताया कथं बुधवाः तक सर्वोच्च, उच्च व जिल्ला अदालतय् सच्छि स्वया अप्वोसित कोरोना संक्रमण पुष्टि जुगु दु।

कोरोनां पूर्वमन्त्री मोतीप्रसाद पहाडी मन्तकोरोना सङ्क्रमित जुया भेरी अस्पताल नेपालगञ्जय उपचार याना च्वम्ह पूर्वमन्त्री मोतीप्रसाद पहाडी मन्त ।

नेपालगञ्ज उपमहानगरपालिका–१० य् च्वम्ह ७७ दँ दुम्ह पूर्वमन्त्री पहाडीयात उपचारया झ्वलय थौंं बिहीवाः सुथय् १ः४० बजे मदुगु खः ।

उच्च रक्तचाप व मधुमेहपाखे पीडितम्ह वयकः कोरोना सङ्क्रमित जुया होम आइसोलेशनय् च्वना च्वम्ह अक्सिजनया मात्रा कम जुगुलि बुधवाः सुथय् भेरी अस्पतालय् भर्ना यागु खः ।

न्हिनय् स्वास्थ्यमा सुधार जुसा चान्ह्य अवस्था स्यंगू खः धका अस्पतालया प्रमुखं जानकारी बिगु खः ।

डोल्पाया पुलाम्ह राजनीतिज्ञ पहाडी विसं २०५३ य् शेरबहादुर देउवा नेतृत्वया सरकार कानून राज्यमन्त्री, लिपा वन तथा भूसंरक्षण व आपूर्तिमन्त्री जुइ धुकुम्ह खः।

प्रतिनिधिसभाया प्यम्ह सांसद व संसद सचिवालयया स्वम्ह कर्मचारीयात कोरोना भाइरस संक्रमण पुष्टि जुगु दु ।

संघीय संसदया प्रवक्ता डा. रोजनाथ पाण्डेया कथं म्हिगः बुधवाः पीसीआर परीक्षणया लागि स्वाब बिगुलि प्यम्ह सांसद व स्वम्ह कर्मचारीयात कोरोना भाइरस संक्रमण खनेदुगु धका धागु दु ।

वैशाख २७ गते प्रधानमन्त्री केपी शर्मा ओलीं विश्वासया मत कायेगु प्रयोजनया लागि संसदया विशेष अधिवेशन सःतूगु खः ।

अधिवेशन सुरु जुइ न्ह्यः सांसदपिनिगु पीसीआर परीक्षण यागु खः ।

येँ महानगरं अस्पताल, सुरक्षा जाँच व कार्यालयय् वये वनेगु थाय्, एम्बुलेन्स सवारी साधनया नियमित निसंक्रमण याना च्वनागु दु ।

थुकिइया लागि तग्वंगु जेट मेसिन प्रयोग यानाच्वंनागु दु । ‘संक्रमण अप्वोगु अवस्था दु । थुगु इलय् सरकारं जारी यागु स्वास्थ्य सुरक्षा मापदण्ड पालना यायेगु हे महामारी नियन्त्रणय् भरपर्दो माध्यम खः ।’

महानगरया प्रमुख प्रशासकीय अधिकृत राजेश्वर ज्ञवालीं धयादीगु दु, ‘बन्दाबन्दीया इलय् न मनूत अत्यावश्यक न्ज्याय् पिहा वये मालेफु ।

थथे मनूत आवतजावत जुइ थाय्, सुरक्षा जाँच यायेगु थाय् व अस्पतालय् केन्द्रीत जुया निसंक्रमणया ज्या जुयाच्वंगु दु।’ महानगरं वंगु  दँय् न बन्दाबन्दीया इलय् न सार्वजनिक थासय् निसंक्रमण यानगु खः धका प्रमुख प्रशासकीय अधिकृत ज्ञवाली धयादीगु दु ।

सरकारं वीर अस्पतालया न्हुगु भवन नाप स्वनिगः दुने प्यंगु मेगु कोभिड अस्पताल सञ्चालन यायेगु कार्ययोजना न्ह्यन हःगु दु।

प्रधानमन्त्री नाप मन्त्रिपरिषदया कार्यालयं जारी यागु कोभिड रोकथाम, नियन्त्रण व उपचारया लागि दयकूगु कार्ययोजनाय् वीर अस्पतालया न्हुगु भवन, ख्वपया खरिपाटी, दहचोक व इचंगु नारायणय् आईसीयू सहितया कोभिड अस्पताल शनिबार तक सञ्चालन यायेगु धका धागु दु।

वीर अस्पतालया न्हुगु भवनय कोरोना संक्रमितपिनिगु लागि कम्ती न ५०० शय्या सहितया बिइगु तयारी दु ।

अथेहे, ख्वपया खरिपाटी, येँया दहचोक व इचंगु नारायणय् न आईसीयू सेवा सहितया कोभिड अस्पताल वैशाख २५ दुने सञ्चालनय् हयेगु कार्ययोजना दु।