प्रधानमन्त्री केपी शर्मा ओलीं थौं सिन्धुपाल्चोकय् खुसिइ बाः वया व चलः वःगु प्रभावित जुगु थाय् हेलम्बु व मेलम्चीइ अवलोकनया लागि वंगु दु।

प्रधानमन्त्री ओली आः हेलम्बु वंगु दु सा अन लिपा मेलम्ची वनेगु ज्याझ्वः दु। प्रधानमन्त्री ओली मेलम्ची घ्याङय् स्थानीय तहया जनप्रतिनिधि व स्थानीयवासीपि नाप छलफलया लागि गणेशबगर वनेगु ज्यााझ्वः दु।

प्रम ओलीं मेलम्ची आयोजनाया मुख्य सुरुङया हवाइ निरीक्षण यायेगु ज्याझ्वः दु। प्रधानमन्त्रीया नाप भौतिक पूर्वाधार तथा यातायातमन्त्री वसन्तकुमार नेम्वाङपि न वंगु खः।

वाग्मती प्रदेशसभाया बैठक स्थगन जुगु दु। प्रदेश सरकारं प्रस्तुत यागु बजेटय् छलफल यायेत आह्वान यागु बैठक अवरुद्ध जुया जयाच्वंगु खः।

प्रदेशसभा सचिवालयं निन्हु न्ह्यः सूचना जारी यागु बैठक थौं च्वनिइगु धका धागु खः। सचिवालयया कथं थौं स्थगन बैठक आइतवाः ११ः३० बजे च्वनिइ धका धागु दु।

आव २०७८÷८९ या लागि प्रदेश सरकारं प्रस्तुत यागु बजेटय् विद्युतीय बस सरकारं खरीद याना सञ्चालन यायेगु, सरकारं हे सञ्चारमाध्यम सञ्चालन यायेगु लगायतया विषय असहमतियासे विपक्षीपिन्स प्रदेशसभा बैठक अवरुद्ध याना वयाच्वंगु खः।

थौं बैठक न अवरुद्ध जुइ खना स्थगन जुगु धका सत्तापक्षया छम्ह प्रदेशसभा सदस्यं धागु दु।

किपू नगरपालिका व चन्द्रागिरि नगरपालिका जोडे जुगु दीखु ताँया शिक्षा, विज्ञान तथा प्रविधि मन्त्री कृष्णगोपाल श्रेष्ठं छगु ज्याझ्वः दथुइ उलेज्या यानादीगु दु।

मन्त्री श्रेष्ठ नाप भौतिक पूर्वाधार तथा यातायात मन्त्री वसन्त नेम्वाङ्गपाखे न शिलान्यास यानादीगु खः । ताँ उलेज्या लिपा मूपाहाँ मन्त्री श्रेष्ठं थुगु दीखु ताँया महत्व बारेय् थःगु खँतयादीसे भुमिगतकालय् पार्टीया ज्याय् खटे जुइत येँ दक्षिण–पश्चिम इलाय् स्वागु दीगु ताँ खः धका धयादीगु खः। जननेता मदन भण्डारीयात थानकोटपाखे किपूलि हया थुगु ताँय् च्वना येँया उत्तरी भागया न्हिइपुगु बल्खु खुसिइ स्वया भावी योजनाया खँ ल्हानागु धका कनादीगु खः।

उगु ज्याझ्रवलय् किपू नगरपालिकाया मेयर रमेश महर्जनं थुगु दीखु ताँ ऐतिहासिक व भावना नाप स्वागु खँ कनादीसे किपू व तिनथानाया ऐतिहासिक सम्बन्ध दुगुलि थुगु ताँ स्यगु कारण भावना न तापागु धका कनादील। यक्को पटक थुगु ताँ दयकेगु कुतः यासां सफल जुइमफुगु धासे नगरपालिकाय् थःपि वया न टेण्डर तक याये धुकुगु सा आन्तरिक कारण थुगु ताँ दयके मफुगु मन्त्रीपि कृष्णगोपाल श्रेष्ठ व वसन्त नेम्वाङ्ग कुतलं व निर्माण व्यवसायीपिनिगु लगनशीलतां जिर्णअवस्था थुगु ताँ पुनः निर्माण याये दया थःपि लयतायागु धका धयादीसे सकसित सुभाय् दु धका धयादीगु खः।

उप–प्रमुख सरस्वती खड्कां लसकुस यानादीगु उगु ज्याझ्वलय् महाशाखाया डि.जि. सडक विभागया महानिर्देशक ई.अर्जनुजंग थापा, वडा नं. ३ या अध्यक्ष राजेन्द्र महर्जन सुभाय् बियादीगु खःसा वडा नं. २ या अध्यक्ष रमेशमान डंगोलं ज्यााझ्वः न्ह्याकादीगु खः।

फोटो : ज्ञानकुमार महर्जन (नगर सन्देश) 

आर्थिक वर्ष २०७८÷७९ या बजेट व कार्यक्रम संशोधनसहित सर्वसम्मतिइ पास जुगु दु। नगरसभाया गुक्वःगु अधिवेशनया खुक्वःगु बैठकय् भचा संशोधनयाना सर्वसम्मतिइ पास जुगु दु।

असार १० गते च्वंगु नगरसभाया गुक्वःगु अधिवेशनय् येँ महानगरपालिकाया मेयर विद्यासुन्दर शाक्यं ‘येँ महानगरपालिका आर्थिक विधेयक, २०७८’ पेस यागु खः। उगु बैठकय् उपमेयर हरिप्रभा खड्गी श्रेष्ठं आ.व. २०७८÷७९ या लागि बजेट पेस यानादीगु खः।

उपमेयर श्रेष्ठं कुल १८ अर्व ९५ करोड ७७ लाख १२ हजार रुपैयाँया बजेट पेस यानादीगु खः। कोभिड–१९ या रोकथाम, नियन्त्रण व उपचार, भौतिक पूर्वाधार विकास, फोहोर–मैला व्यवस्थापन, लैङ्गिक समानता व सामाजिक समावेशीकरण, भाषा, संस्कृति व सम्पदा संरक्षण नाप प्रवद्र्धन, विद्युतीय शासन मार्फत् सुशासन प्रवद्र्धन, उद्यमशिलता प्रवद्र्धन थेजागु उदेश्य हासिल यायेगु लक्ष्यसहित प्रस्तुत बजेट संशोधन नाप सम्र्वसम्मतिं पारित जुग दु धका मेयर शाक्यं जानकारी बिगु दु। कुल बजेट मध्ये सामाजिक सुरक्षाभत्ता नेपाल सरकार व प्रदेश सरकारपाखे हस्तान्तरित कार्यक्रम व आयोजनाया खर्च वापत २ अर्ब ८७ करोड ७ लाख दुगु धका महानगरपालिकां जानकारी बिगु दु ।

१६ अर्ब ८ करोड ७० लाख १२ हजार येँ महानगरपालिकाया संचितकोष पाखे खर्च जुइ। महानगरपालिकां बिगु जानकारी कथं नेपाल सरकार व प्रदेश सरकारपाखे प्राप्त शसर्त योजना (शिक्षक तलब, स्वास्थ्य, कृषि आदि)य् १ अर्ब ३२ करोड १४ लाख १० हजार फ्यागु दु।

निशर्त बजेट धाःसा १४ अर्ब ७६ करोड ५६ लाख २ हजार दु। उगु पारित बजेटय् दकलय् अप्वो करदातायात ०७८ पुस मसान्त तक १० प्रतिशत छुट बिगु दु सा  होटलयात थप ८० प्रतिशत छुट बिइगु व्यवस्था यागु दु। ‘व्यवसाय करय् होटल मनोरञ्जन प्रदायक व पर्यटनना सम्बन्धित व्यवसायय ५० प्रतिशत छुट बिइगु व्यवस्था यागु दु,’ बजेटय् ज्येष्ठ नागरिक विशिष्टीकृत सेवा सहितया महानगर विशेष अस्पताल सञ्चालन यायेगु, मेयर उज्यालो कार्यक्रम, कोभिड–१९ या रोकथाम, नियन्त्रण व उपचार, प्रत्येक वडाय् कम्ति न छगु सार्वजनिक चःबि थे जागु विषय बजेटय् समावेश यागु दु।

अथेहे बजेटय् प्रत्येक वडाय् छगु नमुना विद्यालय, प्रत्येक वडाय् न्यूनतम छगु पार्क, ज्येष्ठ नागरिकपिन्त माःगु स्वास्थ्य लगायतया सेवा सुविधा, ज्येष्ठ नागरिक मिलन केन्द्र निर्माण विषय न बजेटय् समावेश यागु दु। अथेहे मानवअधिकार प्रवद्र्धन, लैङ्गिक समानता व सामाजिक समावेशीकरण, आधारभूत शहरी भौतिक पूर्वाधार, संस्कृति तथा सम्पदा संरक्षण, स्थानीय भाषाको संरक्षण व प्रवद्र्धन,उद्यमशिलता प्रवद्र्धन, विद्युतीय शासनया प्रवद्र्धन, युवानाप मेयर, पौरखी मेला, खेलकूदया विकास, जीवन निर्वाहया लागि पारिश्रमिक लगायतया कार्यक्रम न बजेटय् समावेश यागु दु।

मन्त्रिपरिषदया बैठकं नेपाल प्रहरीया प्रहरी नायव महानिरीक्षक (डीआईजीपी) सहकुलबहादुर थापायात अतिरिक्त महानिरीक्षक (एआइजीपी)य् बढुवा यायेगु निर्णय यागु दु।

गृह सचिव महेश्वर न्यौपानेया अध्यक्षताय् जेठ १४ गते च्वंगु बढुवा सिफारिस समितिं थापायात डीआईजीपी न एआइजीइ बढुवा यायेगु लागि सिफारिस यागु दु।

‘थापाया पदस्थापन नाप मेमेपि एआइजीपीया सरुवाया विषय न छलफल जुगु खः, तर क्वछिइ धासा मफत। मेगु बैठकय् पदस्थापन नाप सरुवा जुइफु।’ छु दिं न्ह्यःच्वंगु  मन्त्रिपरिषद बैठकं नेपाल प्रहरीइ छम्ह (एआइजी)या दरबन्दी सृजना यागु खः।

थौंकन्ह्य नेपाल प्रहरीइ प्यम्ह एआइजीया दरबन्दी दुगुलि आः न्याम्ह थ्यंगु दु। डीआइजीपी थापा एआईजीपीइ बढुवा जुइवं पोखरेल नाप प्रहरी महानिरीक्षकया प्रतिस्पर्धाय् थ्यंगु दु।