बाँकेय् बुधवाः चान्ह्य व बिहीवाः सुथय् याना झीम्ह कोरोना संक्रमितपि सी धुकुगु दु ।

सीपि गुम्ह बाँकेयापि व छम्ह जाजरकोटयाम्ह खः। बाँकेया नरैनापुर गाउँपालिका–१ बाँकेयाम्ह ५६ दँ दुम्ह मिजंम्ह विहीवाः सुथय् ७ बजे व नेपालगञ्ज उपमहानगरपालिका–१९ या ७७ दँ दुम्ह मिम्हजं विहीवाः सुथय् ४ः३० बजे भेरी अस्पतालय् मदुगु खः।

अथेहे नेपालगञ्ज १० या ७८ दँ दुम्ह मिजंम्ह भेरी अस्पतालय् वंगु चान्ह्य १ः४० बजे मदुगु खः। नेपालगञ्ज १० या हे ७८ दँ दुम्ह मिसाम्ह बुधवाः बहनि ७ः३० बजे मदुगु खः। बाँकया नेपालगञ्ज उपमहानगरपालिका–१२ या ४५ दँ दुम्ह मिजंम्ह बुधवाः बहनि ६ः१५ बजे, नेपालगञ्ज–१ या ५८ दँ दुम्ह मिजंम्ह बुधवाः बहनि १० बजे, नेपालगञ्ज–१० या २७ दँ दुम्ह मिजंम्ह बुधवाः बहनि २२ः२० बजे व नेपालगञ्ज उपमहानगरपालिका ४ बाँकेया ५५ दँ दुम्ह मिजंम्ह बुधवाः बहनि १२ः३० बजे भेरी अस्पतालय् मदुथ खः।

अथेतु, भेरी नगरपालिका ४ जाजरकोटया ४३ दँ दुम्ह मिसाम्ह बुधवाः बहनि ९ बजे भेरी अस्पताल नेपालगञ्जय् मदुगु खः। थ्व नाप बाँके जिल्लाय् कोरोना संक्रमणं सीपि १२७ म्ह त्यंगु दु।

नेपालभाषा साहित्यया ख्यलय् समालोचक नाप हाइजनिक इन्द्र माली थौं बिहीवाः सुथय् मन्त ।

वयकः येँया गंगालाल हृदय रोग प्रतिष्ठानय् वासः याकेगु झ्वलय् मदुगु खः । ताः ई न्ह्यवनिसें मुटुया ल्वचं ग्रस्त जुयादीम्ह खः। नेपालभाषा ख्यलय् हाइकुु चिनाख हयेगुलि तधःगु भुमिका दुम्ह खः।

वयकलं हाइकु बिकास यायेगुलि न्हापागु हाइकुु पत्रिका पिकया उकिइ प्रकाशक व सम्पादक हाइकु निलापौं न पिकयादीगु खः। अथेहे वयकलं तःखँग्वः धुकुया सम्पादक न जुयादीम्ह खः।

मदुम्ह माली नेपालभाषा एकेदमिया संस्थापक जुयादीसा वय्कः पुलांम्ह सदस्य–सचिव नं जुयादीधुंकूम्ह खः ।

मदुम्ह मालीयाके कोरोना भाइरस पोजेटिभ नं खनेदुगुलिं वय्कःया शव व्यवस्थापन यायेत नेपाली सेना याये त्यंगु सुचं प्राप्त जूगु दु ।

महाराजगञ्जय् च्वंगु त्रि.वि. शिक्षण अस्पतालया न्हूगु भवनय् कोभिड उपचार कक्ष दयेकेगु तयारी जुयाच्वंगु दु ।

उगु कोभिड उपचार कक्षया तयारीबारे जानकारी कायेगु निति येँ महानगरपालिकाया प्रमुख विद्यासुन्दर शाक्य, उपप्रमुख हरिप्रभा खड्गी श्रेष्ठ व वडा ३ या वडाध्यक्ष दिपक के.सी. अस्पतालय् झायादीगु दु । अस्पतालया कार्यकारी निर्देशक प्रा. डा. दिनेश काफ्लें आः कोभिड उपचार पद्धतिया अभ्यास व न्हूगु तयारीया बारे स्थलगत अवलोकन याकादीगु खः ।

व  हे झ्वलय् महानगरया प्रमुख शाक्य, उपप्रमुख खड्गीलिसें नं आकस्मिक कक्ष, कोभिड उपचार कक्ष, सघन उपचार कक्षया निरीक्षण न यानादीगु खः । अस्पतालय् क्यान्सरया वासः यायेत दयेकूगु सुरेश वाग्ले क्यान्सर सेन्टरयात आःया लागिं कोभिड उपचार कक्ष दयेकेत्यंगु खः । अन १४० बेड क्षमताया कक्षय् आः सच्छि तक वेड न्ह्याकेगु योजना दु धका धयादीगु खः ।

अवलोकन यायेगु झ्वलय् प्रमुख शाक्यं तयादीगु जिज्ञासाया लिसः ब्युसें कार्यकारी निर्देशक प्रा. डा. काफ्लें जनशक्ति परिचालन व स्रोत व्यवस्थापनया कोणं महामारी व्यवस्थापन हाथ्यां दु धका धयादीसे कक्षय् थौंनिसें हे ४० वेड न्ह्याःगु नं काफ्लें जानकारी याकादिल । ‘समस्या अप्वया वंसा थुगु कक्षलिसें सघन उपचार कक्ष तकं दुगु गणेशमान भवनयात नं स्वानाः सेवा विस्तार याना यंकेगु जुइ’ काफ्लें धयादिगु खः।

कोभिडया सघन उपचार कक्ष न्ह्याकेत महानगरं भेन्टिलेटर न्यायेत ग्वाहालि यानाबीगु नितिं काफ्लें इनाप यानादिल । व हे झ्वलय् महानगर प्रमुख शाक्यं महानगर संस्थागत साझेदारितालिसें कोभिड रोकथाम व नियन्त्रणया लागिं दिगो व परिणाममुखी ज्या यायेगु योजनाय् दुगु धयादिल । जटिल अवस्थाय् थ्यंपिं कोभिड विरामीया वासः यायेत अस्पतालपाखें वःगु प्रस्तावया बारे याकनं हे निर्णय बीगु प्रमुख शाक्यं धयादिल ।

अस्पतालया सूचना अधिकारी रामविक्रम अधिकारीया कथं अस्पतालं आः २ ५० वेड कोभिड विरामीया लागिं फ्यानातःगु दु । व मध्ये २१८ विरामीं वासः याकाच्वंगु दु । अस्पतालय् वासः याकेत वइपिं कोभिड विरामीमध्ये थुगु पालय् निम्ह सीधुंकूगु दु । अस्पताललिसेया सहकार्य सकारात्मक व नजिताउन्मुख जूगु वडा ३ या वडाध्यक्ष केसीं धयादिल ।

महानगरया ग्वाहालिइ अस्पतालय् कोभिडया वासः यायेत ५ सः वेड थ्यंकेगु योजना कथं ज्या जुयाच्वंगु के.सी.या धापू खः । 

कोविड नियन्त्रणया लागि क्वारेन्टीन, आइसोलेसन थे संरचना दयकेगु जनशक्ति व स्रोत व्यवस्थापनय् महानगरं संस्थागत सहकार्यय् संयन्त्र दयकेगु जुइ धका येँ महानगरया प्रमुख विद्यासुन्दर शाक्यं धयादगु दु।

नेपाली सेना उपत्यका पृतना हेडक्वाटर नारायणहिटीइ प्रमुख जिल्ला अधिकारी कालीप्रसाद पराजुली, पृतनापति उपरथी आनन्द अधिकारी, महानगरया उपप्रमुख हरिप्रभा खड्गी श्रेष्ठपि नाप च्वंगु बैठकय् प्रमुख शाक्यं अथे धयादीगु खः। उगु ज्याझ्वलय् स्वनिगलय् कोविडया संक्रमण रोकथामय् नेपाली सेनां याना च्वंगु ज्या व थप प्रयासया बारेय् छलफल जुगु खः ।

उगु ज्याझ्वलय् प्रमुख शाक्यं धयादीगु दु, ‘चि चिधःगु आइलोसन दयकेगु इलय् अक्सिजन लगायत सामाग्री व जनशक्तियात थाकुइ फु। अन्यागु थासय् विरामीपिन्त सन्तोषजनक सेवा बिइ फइमखु। अन छु न कारण जोखिम जुइफु धका धयादीसे जिम्मेवारी काइपि दइमखु । उकिइ झीमिसं नेपाली सेना, नेपाल प्रहरी, शसस्त्र प्रहरी व त तधःगु अस्पतालनाप सहकार्य याना उपि नाप दुगु क्षमता बढे याये चाहेजु ।

थज्यागु थासय् कोविडको उपचार संयन्त्र दिगो, भरपर्दो व प्रभावकारी जुइ।’ अथेहे वयकलं धयादीगु दु, ‘येँया दक्को वडाय् दुगु आइसोलेसन सेन्टरय् विरामी थ्यकेत व  त तधःगु अस्पतालय् थ्यकेत उलि हे काइ। जिमिगु चाहना धइगु विरामीपिनिगु इलय् हे उपचार याये दयेमाः ।’

उगु छलफलय् आइसोलेसन सेन्टर सञ्चालन यायेत नेपाली सेनानाप महानगर नाप  सहकार्य, स्रोत परिचालन, आ नेपाली सेनां याना वयाच्वंनागु शव व्यवस्थापनय् महानगरया ग्वाहालि, वीरेन्द्र सैनिक अस्पताल व महाङ्काल स्थित अस्पतालय् कोविड वार्ड सञ्चालन यायेगु लगायत बिषय छलफल जुगु खः ।

उगु बैठकय् पृतनापति उपरथी अधिकारीं धयादीगु दु, ‘कोविड व्यवस्थापनय् नेपाली सेनाया सक्रियता ज्या याना च्वनागु दु।’ महामारी रोकथामय् थप प्रयासया विषय खँ ल्हानादीसे, ‘अवस्था, सहजता व अनुकुलता स्वया निर्णय समीक्षा व सुधार याना वने।’ आः अक्सिजनया अभाव मदु । तर, चाहे जुगु थासय् थ्यकेत थाकुया च्वंगु दु ।

नू तयेस व उद्योगं सिलिन्डर मुकातःगुलि थज्यागु अवस्था वंगु खः। उगु बैठकय् उपरथी सीताराम खड्का, पृतनाया चिफ अफ स्टाफ सहायक रथी कुमार लामा, मेडिकल सर्भिसया महानिर्देशक उपरथी देवेन्द्रबहादुर खत्री, सेनानी राजनसिंह अधिकारीपिनिगु दुगु खः।