वंगु २४ घण्टाय् ४ हजार ५२२ म्ह कोरोना भाइरस संक्रमण पुष्टि जुगु दु ।

१२ हजार २०४ म्हेसिगु पीसीआर परीक्षणय् ३ हजार ७०३ म्ह व ४ हजार ७०९ म्हेसिगु एन्टिजेन परीक्षणय् ८१९ म्ह याना ४ हजार ५२२ म्हेसित संक्रमण पुष्टि जुगु दु।

कोरोना संक्रमणं वंगु २४ घण्टाय् ४१ म्ह सीगु दु। अथेहे ४ हजार ९५४ म्ह संक्रमणमुक्त जुगु दु। नेपालय् कोरोना संक्रमित जूपि ६ लाख २६ हजार ३४३ म्ह थ्यंगु दु।

उकि मध्ये आःतक ५ लाख ६४ हजार ८८२ म्ह कोरोनामुक्त जुगु दु सा आःतक ८ हजार ८१३ म्ह सी धुकुगु दु।

मन्त्रालयया कथं आःतक देयन्यक सक्रिय संक्रमितपि ५२ हजार ६४८ म्ह दु। उकि मध्ये ४९ हजार ४२५ म्ह होम आइसोलेसनय् च्वनाच्वंगु दु ।

३ हजार २२३ म्ह संस्थागत आइसोलेसनय् दु। संक्रमित मध्ये ७६१ म्ह आईसीयू व २१८ म्ह भेन्टिलेटरय् उपचार यानाच्वंगु दु।

लगातार प्यन्हु तक तधःगु अंकं करेक्सन वगु सेयर बजाः थौं मंगलवाः धासा यूटर्न जुगु खनेदु। वंगुवाःया बुधवाः घटे जुगु बजाः थौं धासा कोरोवालय् लय ज्वंगु दु।

मंगलवाः ७९.४४ अंक थहावंगु बजाः २९१३.८४ बिन्दु थ्यःगु दु। थ्व २.८० प्रतिशतं थहावंगु खः। थौं सेन्सेटिभ इडेक्सय् तक १६.१९ अंक थहावंगु दु। थौं बजाःया दक्को समूहया परिसूचक बाउँसे च्वंगु दु। उकिइ न फाइनान्स, विकास बैंक व जलविद्युतया लगानीकर्तापिन्स अप्पो कमे यागु दु। मंगलवाः जम्मा २२५ कम्पनी यागु कारोबार जुगु खः ।

थौं १ लाख १२ हजार ५० पटक कारोबार जुगु खः। थुगु कारोबारपाखे १ करोड ९७ लाख ७० हजार ६ सय ३८ कित्ता सेयर किनबेच जुगु ख ।थौं कारोबार रकम धासा म्हो जुगु दु। बजाः घटे जुसा वगु निन्हु स्वया ११ अर्ब च्वय् कारोबार जुगुलि मंगलवाः १० अर्ब २८ करोड ६२ लाख ६९ हजार ९ सय ५७ रुपैयाँ कारोबार जुगु दु। मंगलवाः करीव स्वंगु दर्जन कम्पनीया भाः सर्किट लेवलय् थहावंगु दु।

खुगु कम्पनीया भाः १० प्रतिशत स्वया अप्वो जुगु दु। थौं जानकी फाइनान्स, बरुण हाइड्रोपावर, हाइड्रो इलेक्ट्रोसिटी एण्ड इन्भेष्टमेन्ट कम्पनी, ङादी ग्रुप पावर कम्पनी व पन्चकन्यामाई हाइड्राया भाः पोजेटिभ सर्किट वःगु दु। थौं पुनर्बिमा कम्पनी दकलय् अप्वो कारोबार जुगु खः।

सर्वोच्च अदालतं प्रधानमन्त्री केपी शर्मा ओलीं संसद विघटन लिपा यागु मन्त्रिपरिषद विस्तारयात बदर यागु दु।

मंगलवाः प्रधानन्यायाधीश चोलेन्द्रशम्शेर जबरा व न्यायाधीश प्रकाशकुमार ढुंगानाया इजलासं मन्त्रिपरिषद विस्तार बदरया अन्तरिम आदेश जारी यासे सर्वोच्च अदालत स्रोतं धागु दु।

थ्व नाप वर्तमान मन्त्रिपरिषदया २१ म्ह मन्त्री पदमुक्त जुगु दु। जेठ ७ गते संसद विघटन याये धुका प्रधानमन्त्री केपी शर्मा ओलीं जेठ २१ य् छम्ह उपप्रधानमन्त्री, ९ म्ह मन्त्री व स्वम्ह राज्यमन्त्रीयात हटे यागु खः।

उपप्रधानमन्त्री नाप १० म्ह मन्त्री व निम्ह राज्यमन्त्री नियुक्त यागु खः। जनता समाजवादी पाटीया राजेन्द्र महतो व एमालेया रघुवीर महासेठयात उपप्रधानमन्त्री दयकूगु खःसा अर्थमन्त्री विष्णु पौडेलयात न उपप्रधानमन्त्री बढुवा यागु खः।

२७ जेठय् न्ह्यम्ह मन्त्री व छम्ह राज्यमन्त्री थप यासे मन्त्रिपरिषदयात पूर्णता बिगु खः।