सिन्धुपाल्चोकया खुसिबालं लिच्वः लाःगु मेलम्ची नगरपालिकालिसें पाँचपोखरी, थाङपाल व हेलम्बु गाँ पालिकायात येँ महानगरपालिकां राहत व उद्धारया नितिं ३गू क्वःति आर्थिक ग्वहालि याःगु दु ।

थौं येँ महानगरपालिकाया प्रमुख विद्यासुन्दर शाक्य, मू प्रशासकिय अधिकृत राजेश्वर ज्ञवालिलिसेंया टोलीं मेलम्ची थ्यंका उगु स्वंगु पालिकायात ग्वहालि ध्येबा लःल्हागु खः । येँ महानगरपालिकापाखें येँ महानगरया भगिनी स्वापू दूगु मेलम्ची नगरपालिकायात २गू क्वःति व मेगू निगू पालिकायात ५०-५०गू लखःया आर्थिक ग्वहालि यायेगु घोषणा थ्वसिबें न्ह्यः हे प्रमुख शाक्य यानादिगु खः । ग्वहालि ध्येबा हस्तारणया शाक्यलिसेंया टोलींं सिन्धुपाल्चोकया मेलम्ची व इन्द्रवती खुसिइ वःगु बालं स्यंकूगु थाय्या स्थगलत निरीक्षण तकं यानादिगु खः ।

खुसिबालं क्षति याःगु थाय्या निरीक्षण यायेगु व ग्वहालि ध्येबा लःल्हायेगु योजना लिसें मेलम्ची थ्यंकझाम्ह शाक्यं सम्बोधन यासें सिन्धुवासीपिन्सं छुं भतिचा सां उगु ध्येबां ग्वहालि जुइगु भलसा कयागु धयादिल । “मेलम्ची, हेलम्बु व पाँचपोखरी थाङपाललिसें येँ मानगरपालिकाया स्वापू दयाच्वंगु दु”, शाक्यं धयादिल, “थनया खुसिया लखं येँया बासीपिन्सं लःया प्या चायेका च्वंगु दु । उकिं नं थनया नगरपालिकालिसें जिमिगु क्वात्तुक स्वापू दु । थ्व ग्वहालि ध्येबा तःधंगु मखु । तर नं थनया वासीपिन्सं फयेमाःगु स्याःचाःलय् छुं भतिचा सां मल्हम तयेगु याई धैगु जिमिसं मनंतुना ।” शाक्यं अनया क्षतिया हिसाबय् ग्वहालि ध्येबा म्हो जूगु नं धयादिल ।

मेलम्चीलिसें झिगू क्वात्तुगु सम्बन्ध दु, उकिं थनया वासिन्दापिन्त जूगु दुःखया ईलय् साथ बिइगु झिगू कर्तव्य खः धयादिल । थनया मावीय व भौतिक क्षतिया परिपूर्ति उगु ध्येबां याये फइमखु तर थ्व दुःख व संकटया ईलय् येँ महानगरपालिका नं थनया जनतापिनिगु साथ दु धैगु हसना बिइत नं जिपिं थन वयागु मेयर शाक्यं धयादिल । वयकलं मावनीय विपदया ईलय् संयमता तया न्ह्यावनेत नं सुझाव बियादिल । “देयंकया नागरिकपिन्सं खुसिबाः व चलखं स्याःचाः फयेमालाच्वंगु दु ।

येँ महानगरपालिकां भगिनी सम्बन्ध स्थापित यानातःगु नगर मेलम्ची व मेगु निगू गाँपालिकाया जनतापिं नं आः विपदय् लानाच्वंगु दु । उकिं म्हो हे जुसां नं मल्हम तयेत जिपिं थन वयाच्वनागु दु ।” शाक्यं धयादिल, कोरोनालिसें मेलम्चीया जनतापिन्सं मेगु विपदया सामना यायेमालाच्वंगु दु । थ्व विपद्यात धैर्य तया सामना यायेत नं वय्कलं इनाप यानादिल । ज्यावलय् स्वास्थ्यमन्त्री शेरबहादुर तामाङं येँ महानगरपालिकां याःगु उगु ग्वहालि च्वछायेबहःगु धयादिल । मेलम्चीवासीपिन्त स्याःचाः जुबलय् मल्हम तयेत महानगरया प्रमुखया टिमलिसें थन झाया यानादिगु ग्वहालिया नितिं थनया जनता व क्षेत्रपाखें शुभाय् देछानादिल । “थ्व दुःखया ईलय् यानादिगु ग्वहालिं जिमित अझ उर्जा कायेफत” मन्त्री तामाङ धयादिल ।

वय्कलं खुसिबालं लिच्वः लाःगु थाय्या समस्या समाधानया नितिं योजना दयेकेत इनाप यासें माःगु ग्वहालि यायेत तयार जूगु नं धयादिल । अथेहे मेलम्ची नगरपालिकाया प्रमुख डम्बर बहादुर अर्यालं थुगु ग्वहालिं क्षति व्यवस्थापन याये अपुइगु धयादिल । वय्कलं थुगु ग्वहालिं येँ महानगरपालिकालिसें स्वापूतिइ अझ क्वात्तुइगु भलासा प्वंकादिल । ज्यावलय् पाँचपोखरी थाङपाल गाँपालिकाया अध्यक्ष टासी लामां नं येँ महानगरपालिकां याःगु ग्वहालिया प्रशंसा यानादिल ।

वय्कलं येँ महानगरपालिका लिसें मेलम्ची नगरपालिका भगिनी सम्बन्ध दूगु नगर खः । उगु नगरयात थ्वसिबें न्ह्यः नं नगरनगर साझेदारी ज्यावः अन्तर्गत महानगरपालिकां मेलम्ची नगरपालिका वडा नं. १० मेलम्ची बजाः लिकसं इन्द्रावती खुसिया किनारय् लःया फोहोरा, हेलिप्याड, पर्यटक विश्रामस्थल, बालबालिका खेलकुद कक्षलिसेंया रमणीय व पर्यटकीय मेलम्ची सिटी पार्ट निर्माणया नितिं छगु क्वःति व ५०गू लखः ध्येबा अनुदान बिइगु सम्झौता पौलय् ल्हाचिं तया ग्वहालि यानादिगु धयादिल ।

वंगु २४ घण्टाय् येँ स्वया बागलुङय् कोरोना संक्रमण जूपि अप्वो खनेदुगु दु।

स्वास्थ्य तथा जनसंख्या मन्त्रालयया कथं सोमवाः बागलुङय् ३०५ म्हेसित कोरोना संक्रमण पुष्टि जुगु खः।

अथेहे येँ २८५ म्हेसित कोरोना संक्रमण खनेदुगु खः। थ्व स्वया न्ह्यः म्हिगः आइतवाः बागलुङय् २२२ म्ह कोरोना संक्रमितपि थपे जुगु खः।

थःत अभियन्ता धका धया वयाच्वम्ह ज्वाला संग्रौलायात स्वन्हुया लागि हिरासतय् तयेत प्रशासनं अनुमति बिगु दु।

अभद्र व्यवहार सम्बन्धी कसूरया अनुसन्धानया लागि हिरासतय् तयेत जिल्ला प्रशासन कार्यालय, काठमाडौं न अनुमति बिगु खः।

काठमाडौंया प्रमुख जिल्ला अधिकारी कालिप्रसाद पराजुलीं काठमाडौं प्रहरी माग यागु कथं अनुसन्धानया लागि अनुमति बिगु दु।

संग्रौला नाप वया भात हिमाल उपाध्याय व शर्मिला वाइवायात न कुनेत अनुमति बिगु खः।

युवा संघया नेतृ खुश्बु (नविता) घिमिरे न बिगु किटानी जाहेरीया आधारय् संग्रौला ज्वंगु खः।

वंगु २४ घण्टाया दुने थप २२९७ म्ह कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ६ हजार ५८३ म्हेसित यागु पीसीआर परीक्षणय १,५८४ म्ह व ४ हजार ३२१ म्हेसित एन्टिजेन परीक्षणय् ७१३ म्ह याना २२९७ म्हेसित संक्रमण पुष्टि जुगु खः।

अथेहे वंगु २४ घण्टाया दुने कोरोना भाइरस संक्रमणं ४६ म्ह सीगु दु । अथेतु, ३ हजार १३० म्ह संक्रमणमुक्त जुगु दु। आःतक सक्रिय संक्रमितपि ५३ हजार ९४० म्ह दु।

नेपालभाषा मंकाः खलः यलया निवर्तमान अधक्ष्य किरण शाक्य गुथि संस्थानया प्रशासक पदय् नियुक्त जुयादीगु दु ।

शाक्य नेपाल सरकारया भूमि व्यवस्था, सहकारी व गरिबी निवारण मन्त्रालय अन्तर्गतया गुथि संस्थानया प्रशासक पदय् नियुक्त जुगु खः ।

वयकलं थौं हे पदबहालि यानादीगु खः।