Display Style:
Column Style
चुरे क्षेत्रपाखें ल्वं, चागः व फि निकासी मयायेत सर्वाेच्चया अन्तरिम आदेश
बछलाथ्व, नवमी ११४१, असार ५ शनिबाः
चुरे क्षेत्रया ल्वं, चागः व फि मिइगु निर्णय थथें कार्यान्वयन मयायेत सर्वोच्च अदालतं अन्तरिम आदेश बिउगु दु ।
उगु रिटया खँय्ु सु्नुवाइलिपा संवैधानिक इजलासं अन्तरिम आदेश जारी याःगु खः । रिट निवेदनया सुनुवाइया नितिं प्रधानन्यायाधीश चोलेन्द्र शमशेर जबरां थःगु नेतृत्वय् न्यायाधीश दीपक कार्की, मीरा खडका, हरिकृष्ण कार्की व विश्वम्भर प्रसाद श्रेष्ठ दुथ्यागु इजलास गठन यानादीगु खः ।
वरिष्ठ अधिवक्ता दिनेश त्रिपाठी व अधिवक्ता डा. पुण्यप्रसाद खतिवडा लिसेंयापिन्सं सरकारं आर्थिक दँ २०७८÷०७९ या बजेटपाखें याःगु उगु निर्णय कार्यान्वनय् थथें रोक तयेत माग यासें सर्वोच्चय् रिट दायर याःगु खः ।
संसद विघटन याना सरकारं अध्यादेश पाखें आर्थिक दँ २०७८÷०७९ या बजेट हःगुलिं उगु बजेटया वैधतया नं व्याख्या यायेत रिट निवेदकं माग याःगु खः । संवैधानिक इजलासं अन्तरिम आदेश जारी याना सरकारयात ‘कारण देखाउ आदेश’ बिउगु दु ।
खुसिबाः चलःया हुनिं लिपांगु ५न्हू दुने १६म्ह सीत, २२म्ह स्वापूतिं सम्पर्कविहीन
बछलाथ्व, नवमी ११४१, असार ५ शनिबाः लहनान्यूज
लिपांगु ५न्हू दुने तच्वकं वाः वयेधुंका वःगु खुसिबाः, चलः व डुबानय् लाना १६म्ह सीगु दु ।
प्रकोपय् लाना २२म्ह स्वापूतिं छखेलाःगु दुसा १६ म्ह घाःपाः जूगु दु । सीपिंलय् सिन्धुपाल्चोक व डोटीइ ३म्ह ३म्ह व सप्तरी, काभ्रे, गोरखा, अर्घाखाँची, पाल्पा, कास्की, कालिकोट, प्युठान , जुम्ला व बाजुराय् छम्ह छम्ह दूगु गृह मन्त्रालयं न्ह्यथंगु दु । खुसिबाः, चलः व डुबानय् लाना आःतक्क १६म्ह घाःपाः जूगु दु प्रहरी प्रधान ज्याकुथिं न्ह्यथंगु दु । उपिं मध्ये १० म्ह मिज ४म्ह मिसा व निम्ह मिसा मचा दु ।
बेपत्ता जूपिं २२म्ह मध्ये २०म्ह सिन्धुपाल्चोकया दु । बाजुरा व रूपन्देहीइ छम्ह छम्ह वेपत्ता दु । वेपत्ता जूपिनि मालेज्या न्ह्यानाच्वंगु न्ह्यथंगु दु । खुसिबाः व चलःखय् लाःपिं सिन्धुपाल्चोकय् ९४म्ह व सल्यानं ८म्ह याना सच्छि व २म्हसिया उद्धार जूगु प्रहरीं न्ह्यथंगु दु । अथेहे यार्सागुम्बा मनुेत वंपिं मनाङया ७०म्हसिया नं उद्धार जूगु दु ।
चलः व खुसिबाःया हुनिं बन्द जूगु थी थी थाय्या सडक सुरक्षाकर्मीया ग्वहालिइ सञ्चालनय् वःगु दु । नापं वाःया हुनिं दार्चुला, हुम्ला, सुर्खेत, कालिकोट, सल्यान, दैलेख लिसेंया जिल्लाय् चलः वना पंगः थनेज्या जूगु सडक चायेकेगु कुतः न्ह्यानाच्वंगु दु ।
थुखे खुसिबाः चलःया हुनिं आः तक्क सच्छि व ९९ खा छेँय् क्षति जूगु दु । १२ गू ताँ, छगू ब्वनेक ु व ७गू सरकारी ज्याकुथिइ क्षति जूगु न्ह्यथंग्ु दु । आः तक्क ५सः व २८ खा छेँया द्वःछि ७सः व ६०म्ह मनू विस्थापित जूगु प्रहरीं न्ह्यथंगु दु । प्रहरीया कथं थ्वहे दथुइ ५सः व १६म्ह पशु चौपाय सीगु दु ।
येँ महानगरपालिकाया नगरसभा निन्हूया नितिं लिछ्यात
लहनान्यूज | बछलाथ्वः अष्टमी ११४१, असार ४ गते शुक्रबाः
येँ महानगरपालिकां सार्वजनिक याःगु आर्थिक दँ २०७८/०७९ या नीति लिसें ज्याझ्वःया सहलह आइतबाः तक्कया नितिं लिछ्याःगु दु ।
असार ३ गते महानगर प्रमुख विद्यासुन्दर शाक्यं ९क्वःगु नगरसभाया न्हापांगु मुँज्याय् नीति लिसें ज्याझ्वः सावर्जनिक यानादिगु खः । तर उपमेयर हरिप्रभा खड्गीलिसें जनप्रतिनिधिपिन्सं नीति लिसें ज्याझ्वःबारे अध्ययन यायेत निन्हूया दिंया माग यासेंलि प्रमुख शाक्यं थौं जुइगु सहलह निन्हूया नितिं लिछ्यानागु धयादिल ।
“येँ महानगरपालिकाया ९गू क्वःगु अधिवेशन म्हिगः निसें न्ह्यात । म्हिगःया मुँज्याय् नेपाली कांग्रेसया पाखें उपमेयर लिसें यक्वः हे प्रतिनिधिपिं अनुपस्थित जुयादिल”, शाक्यं धयादिल, “दक्वसियाया उपस्थिति सहलह याना सर्वसम्मत कथं नीति लिसें ज्यावः पारित यायेगु विगतया परम्परा कथं म्हिगः मूँज्याया मुँज्या लिछ्याना थौं तयागु खः । जिं म्हिगः हे उपमेयरलिसें मेमेपिं प्रतिनिधिलिसें न सहलह याना । थौं सुथय् नं उपमेयरलिसें कांग्रेसया जनप्रतिनिपिंलिसें सहलह याना । वय्कपिन्सं नीति लिसें ज्यावः अध्ययन यायेत निन्हूया ई प्वयनादिल । उगु हे कथं थौं मुँज्या च्वना आइतबाः ११ ताः ईलय् सभागृहलय् हे सहलह यायेगु याना ९क्वःगु अधिवेशन लिछ्यानागु खः ।”
प्रमुख शाक्यं असार १० गते निसें बजेट हयेमाःगु कानूनी बाध्यतायात तकं ध्यान तया नेपाली कांग्रेसपाखेंया जनप्रतिनिधिलिसें दुवाय्क सहलह यानागु नं धयादिल । “वंगु दँय थें थुगुसी नं सर्वसहमतिं हे नीति लिसें ज्यावः व बजेट पारित यायेकथं न्ह्यावने”, वय्कलं धयादिल, वंगु दँय् नं झिपिं सर्वसम्मति न्ह्यानागु खः । जित भलसाः दु थुगुसी नं दक्वसियागु सर्वसहमतिं हे न्ह्याय्गु जुई । नीति लिसें ज्याझ्वःलय् अहसमति तयेमाःगु छुं नं मदु । अझ दुवायेक सहलह याना वनेमाःगु धैगु वय्कपिनिगु सुझावयात पाय्छिकथं कयागु दु ।” नगरसभाय् पेश जूगु नीति लिसें ज्याझ्वःयात अझ परिपक्व यायेत वय्कपिंपाखें अझ बाँलागु सुझाव वइगु भलसा कयागु नं मेयर शाक्यं धयादिल । “बजेट न्ह्यब्वइगु उपमेयर हे खः, जिं थ्वः विषयया जानकारी वय्कपिन्त बियागु दु ।
बजेट तर्जुमा समितिया संयोजक हे उपमेयर जुगुलिं उगु विषय् वय्कपिं जानकार जुयादि धैगु भलास कयाच्वना ।” शाक्यं धयादिल, जिमिसं १० गते बजेट पेश यायेगु जुई । व लिपाः नं व्यापक कथं सहलह याना बजेट पास यायेगु खः ।” शाक्यं नीति लिसें ज्याझ्वःलय् सच्छिगु बेडया “काठमाडौं महानगर विशेष अस्पताल” निस्वनेगु, विद्युतीय सवारी करय् शतप्रतिशत छुट बिइगु, कोभिड१९या महामारीपाखें लिच्वःलय् लाःपि करदातापिन्त विशेष छुट, सहुलियत बिइगु, महानगरवासिपिन्त नागरिक स्वास्थ्य विमा कार्यक्रम, छगू वडा छगू नमूना ब्वनुकू ज्याव, सहरी स्वास्थ्य क्लिनिकपाखें विशेषज्ञ चिकित्सकलिसेंया निःशुल्क सेवा थें जाःगु महत्वपूणर् ज्यावः हयागु जानकारी नं बियादिल ।
स्वनिगलय् ५०८ म्ह संक्रमण पुष्टि
लहानान्युज | बछलाथ्व अष्टमी ११४१,असार ४ शुक्रवाः
स्वनिगलय् सक्रिय संक्रमितपि ११ हजार ९६८ म्ह दु।
उकि मध्ये येँ जक ६ हजार ७३५ म्ह सक्रिय संक्रमितपि दु। आःतक यलय् २ हजार ९८३ म्ह व ख्वपय् २ हजार २५० म्ह सक्रिय संक्रमितपि दु।
स्वनिगः दुने जक वंगु २४ घण्टाय् ५०८ म्ह संक्रमण पुष्टि जुगु दु। वंगु २४ घण्टाय् १३ हजार ३७ म्हेसिगु स्वाब नमुना परीक्षणय् देयन्यक २ हजार ७६८ म्हेसित संक्रमण खने दुगु धका स्वास्थ्य तथा जनसंख्या मन्त्रालयं धागु दु। व
गु २४ घण्टाय् देयन्यक ४ हजार २० म्ह कोरोनामुक्त जुगु दु।
४०२० म्ह संक्रमणमुक्त, २,७६८ म्ह संक्रमण पुष्टि व ४४म्ह सीत
रसिय श्रेष्ठ | बछलाथ्व अष्टमी ११४१,असार ४ शुक्रवाः
वंगु २४ घण्टाया दुने २,७६८ म्हेसित कोरोना भाइरस संक्रमण पुष्टि जुगु दु।
स्वास्थ्य तथा जनसंख्या मन्त्रालयया कथं ७५६९ म्हेसिगु पीसीआर परीक्षणय् १९६३ म्ह व ५४६८ म्हेसिगु एन्टिजेन परीक्षणय् ८०५ म्ह याना २,७६८ म्हेसित संक्रमण पुष्टि जुगु दु।
कोरोना संक्रमणं वंगु २४ घण्टाय् ४४ म्ह सीगु दु। अथेहे, ४०२० म्ह संक्रमणमुक्त जुगु दु।
