लुँया भाः थौं प्यसः थहा वंगु दु ।

लुँ तोलां प्यसः थहावना ९० हजार ४ सय रुपैयाँ थ्यंगु दु धका नेपाल सुनचाँदी व्यवसायी महासङ्घं धागु दु।

म्हिगः लुँ तोलां ९० हजार रुपैयाँ थ्यंगु खः। अथेहे, थौं वहः तोलां न्यातक थहावना १२ सय ९५ रुपैयाँ थ्यंगु दु।

थौं विश्व योग दिवस हने त्यःगु दु। सन् २०१४ निसे थुगु दिवस हरेक दँया जुन महिनाया २१ तारिखय् माने याना वयाच्वंगु खः।

सन् २०१६ य् युनेस्को तक योगयात थःगु अभौतिक सांस्कृतिक सम्पदाया रुपय् दर्ता यागु खः। अथेहे सरकारं योग दिवस माने यायेत शिक्षा, विज्ञान तथा प्रविधिमन्त्री कृष्णगोपाल श्रेष्ठया अध्यक्षताय् मुख्य समारोह समिति गठन यागु खः।

कोरोना भाइरसया सङ्क्रमण कारणं समिति थौं थुगु दिवस भर्चुअल माध्यमपाखे हने त्यःगु खः।

थौं प्रधानमन्त्री केपी शर्मा ओलीं विशेष अतिथ्यताय् भर्चुअल माध्यमपाखे ज्याझ्वः जुइ धका शिक्षा विज्ञान तथा प्रविधि मन्त्रालयं धागु दु।

स्वनिगलय् जारी निषेधाज्ञा छवाः थपे यागु दु। तर प्रावधान छ्वासूकुगु दु।

येँ, ख्वपय् व यलया जिल्ला प्रमुख जिल्ला अधिकारीपिनिगु आइतवाः थौं सनिलय् ५ बजे च्वंगु बैठकं असार ११ गते तक निषेधाज्ञा थप यायेगु निर्णय यागु दु। येँया प्रमुख जिल्ला अधिकारी कालिप्रसाद पराजुलीया कथं थपे जुगु निषेधाज्ञाय् निजी सवारी साधन जोर–विजोर प्रणालीइ चले याये दइ। बार कथं पसः सञ्चालन याये दइ।

निषेधाज्ञाया ईलय् ट्याक्सी न जोर विजोर प्रणाली कथं चले याये दइ। तर मेगु सार्वजनिक सवारी साधन धासा चले याये दइ मखु। हार्डवेयर पसः न्हिन्हि चले याये दइ, मेगु व्यवसाय बार तोके यागु दु धका काठमाडौया सहायक प्रमुख जिल्ला अधिकारी उमाकान्त अधिकारीया कथं आर्थिक गतिविधियात सहज दयकेगु कथं प्रशासनं थथे निर्णय यागु दु धका धाथु दु ।

उपत्यका प्रशासनं व्यवसाय सञ्चालन यायेगु कथं निषेधाज्ञा थपे यागु दु। येँया प्रमुख जिल्ला अधिकारी कालीप्रसाद पराजुलीया कथं आः बारया आधारय् व्यवसाय सञ्चालन याये दइगु जुगु दु।

वयकःया कथं आइतवाः, मंगलवाः व बिहीवाः लुँ वहः, भाँडा, विद्युतीय, घरायसी सामान बिक्री यायेगु पसः सञ्चालन याये दइगु जुगु दु। अथेहे, अटोमोबाइल व उकिया पार्टपूर्जा मिइगु पसः न चायकये दइगु जुगु दु।

सोमवाः, बुधवाः व शुक्रवाः सपिङ मल, खेलकुद सामग्री पसः, लं, लाकां पसः न चायकें दइ। अथेहे फेन्सी, कस्मेटिक, गिफ्ट व टेलरिङ न चायके दइ।

बारया आधारय् चायके दइगु पसः सुथय ११ निसे ४ बजे तक चायके दइगु निर्णय जुगु धका प्रजिअ पराजुलीं धागु दु। खाद्यान्न, फलफूल व तरकारी पसः चाहिं हरेक दिं ११ बजे तक चायके दइ।