वःगु २४ घण्टाया दुने देयन्यक ८९ म्ह कोरोना संक्रमण पुष्टि जूगु दु ।

४ हजार ३९९ म्हेसित नमुना परीक्षण यागुलि ४० म्ह मिसा व ४९ म्ह मिजंपिन्त कोरोना भाइरसया संक्रमण खनेदुगु दु धका स्वास्थ्य तथा जनसंख्या मन्त्रालयं धाःगु दु ।

थ्व नाप नेपालय् कोरोना संक्रमितपि आःतक २ लाख ७४ हजार ८१० म्ह थ्यःगु दु । उकि मध्ये थप छम्ह सीउगु दु । थ्व नाप आःतक ३ हजार ११ म्ह सी धुकुगु दु ।

अथेहे वःगु २४ घण्टाय् ४२ म्ह कोरोनामुक्त जुगु दु । अथेहे थ्व नाप २ लाख ७० हजार ९२७ म्ह कोरोना संक्रमणमुक्त जुइ धुकुगु दु ।

नेकपा विप्लव समूहया महासचिव नेत्रविक्रम चन्द विप्लवं पुष्पकमल दाहाल प्रचण्ड व बाबुराम भट्टराई न मखुगु लँ ज्वःगु दु धका धयादीगु दु।

गृह जिल्ला कपिलवस्तुया शिवगढीइ पार्टी निकट महिला संघया राष्ट्रिय सम्मेलनय् सम्बोधन यासे वयकलं जनयुद्ध लिपा प्रचण्ड व बाबुरामं मखुगु लँ ज्वःगु व उकिया हे लिच्वः कथं थौया राजनीतिक परिस्थिति उत्पन्न जुगु धका धाःगु खः। माओवादी व एमालेया एकतापाखे झण्डै निगु तिहाइया सरकार दुगुलि प्रचण्ड मखुगु लँ लिगुया कारण नेकपा संकट वःगु दावी याःगु खः ।

बिप्लवं बाबुराम भट्टराई न मखुगु लँ लिगुलि मधेशवादी दलया नेता जुगु धका टिप्पणी यानादीगु खः। सरकारं थःगु पार्टीयात प्रतिवन्ध याःगु न गलत खः धका धयादीगु दु । विप्लवं पुँजीवादी व्यवस्था असफल जुगु धका धयादीसे वैज्ञानिक समाजवाद व पुँजीवादी व्यवस्था दथुइ ठीक जुगु धका जनमत संग्रह याये माःगु माग याःगु दु ।

यलय् लगातार खुवाःतक्क न्ह्याःगु बृहत निशुल्क स्वास्थ्य शिविरय् करिब ७सःम्हेसिनं स्वास्थ्य परीक्षण याकूगु दु । यल महानगरपालिका– १६ वडाया ग्वसालय् अरनिको समाजया ग्वाहालिइ माघ १७ निसें फागुण २२ गते शनिबाःपतिकं वडाया थीथी थासय् जूगु शिविरपाखें ७ सः स्वयां आपाः मनूत लाभान्वित जूगु खः ।

वंगु शनिबाः ज्येष्ठ नागरिकपिन्त लक्षित यानाः जूगु शिविरय् ९० दं च्वय्या स्वम्ह लिसें १६० म्हेसिनं स्वास्थ्य परिक्षण याकूगु वडा सदस्य लिसें ज्येष्ठ नागरिक समितिया कजि पञ्चबज्र बज्राचार्यं जानकारी बियादिल । शिविरय् मधुमेह, पिसाब, प्वाः अले कलेजो व जनरल ल्वय्या जाँच याःगु खः । कोरोना संक्रमण तीब्र गतिं न्यनाच्वंगु इलय् नियमित स्वास्थ्य परीक्षण याकेमफुपिं स्थानीय वासिन्दा शिविरपाखें लाभान्वित जूगु खनेदुगु अरनिको समाजया नायः डा. सर्वोत्तम श्रेष्ठं धयादिल । अथे हे, स्वास्थ्य सेवाय् सकसिगु सहज पहुँच व आर्थिक स्तर कमजोरपिं मनूतय्त लक्षित यानाः वडां स्वास्थ्य शिविर न्ह्याकागु वडाअध्यक्ष निर्मलरत्न शाक्यं धयादिल ।

स्वास्थ्य सेवायात जनमुखी दय्केत महानगरपालिकां पहल याय्माःगुलिइ वडाअध्यक्ष शाक्यं बः बियादिल । शिविरया समापन समारोहस शिविर सुथां लाकेत ग्वाहालि याःपिं चिकित्सक, नर्स, वासः व्यवसायी, वडाया स्वास्थ्य कार्यान्वयन समिति महापाल व धौैगःया स्वास्थ्य सेवक, व्यवस्थापन सहयोगी युवा स्वयंसेवक व सञ्चारकःमिपिन्त प्रशंसा पत्र ब्यूगु खः ।

येँया छत्रपाटीस्थित छत्रपाटी निःशुल्क चिकित्सालय आः स्थानीय सामुदायिक अस्पतालया रुपं विकास जुइधुंकूगु दु ।

गरीब व असहायपिन्त सितिकं व मेपिन्त सहुलियत दरय् उपचार सेवा बियावःगु थुगु अस्पतालय् न्हिं हे तःधंगु ल्याखय् स्वास्थ्य सेवा काय्त मनूत थ्यनाच्वनी । अन वइपिं विरामीतय्त सुविधाया नितिं लाइन च्वने म्वाय्केत टोकन सिस्टम लागु याःगु दु । वंगु फागुन १९ गते बुधबाःया दिंनिसें विद्युतीय माध्यमं विद्युतीय मेशिनय् तियाः अःप्ुक टोकन काय्गु व्यवस्था यानागु जानकारी चिकित्सालयया नायः डाक्टर मनोजमान श्रेष्ठं बियादिल ।

छगु ज्याझ्वः दथुइ लोकंव्हाःगु संकिपा राजमतिया नकिं हिसिला महर्जनं चिकित्सालयया टोकन सिस्टमा शुरुवात यानादिल । महर्जनं टोकन कयाः सम्वन्धित ल्वय्या चिकित्सकयाथाय् वनाः चिकित्सालयया न्हूगु प्रविधिया शुभारम्भ यानादिल ।

चिकित्सालयस टोकन सिस्टम न्ह्याःगुलिसें विरामीतय् टोकन कयाः याउँक टोकन नंबर कथं स्वास्थ्य परिक्षण याकेदइगु न्हूगु प्रविधिया विकास जूबलय् छत्रपाटी निःशुल्क चिकित्सालयया आकर्षण अझ अप्वःगु खनेदु ।