Display Style:
Column Style
२४४२ म्ह संक्रमण पुष्टि, ३४५६ म्ह संक्रमणमुक्त व ५१ म्ह सीत
रसिया श्रेष्ठ | बछलाथ्व दशमी ११४१,असार ६ आईतवाः
वंगु २४ घण्टाया दुने २४४२ म्हेसित कोरोना भाइरस संक्रमण पुष्टि जुगु दु।
स्वास्थ्य तथा जनसंख्या मन्त्रालयया कथं ६६७७ म्हेसिगु पीसीआर विधिपाखे परीक्षण यागुलि १४२१ म्ह व ४२४९ म्हेसिगु एन्टिजेन परीक्षणय् १०२१ म्ह याना २४४२ म्हेसित संक्रमण पुष्टि जुगु दु।
मन्त्रालयया प्रवक्ता डा. कृष्ण पौडेलया कथं संक्रमणदर २१.३ प्रतिशत दु। अथेहे वंगु २४ घण्टाय् ३४५६ म्ह संक्रमणमुक्त जुगु दु।
अथेतु, कोरोना भाइरस संक्रमणं ५१ म्ह सीगु दु।
सेयर बजारय् तधःगु अंकय् गिरावट, १२ अर्बया जक कारोबार
लहानान्युज | बछलाथ्व दशमी ११४१,असार ६ आईतवाः
वाःया न्हापागु दिं थौं आइतवाः सेयर बजारय् तधःगु अंकय् गिरावट वःगु दु।
कारोबार सुरु छु मिनेट तक थहावःगु सेयर कारोबार मापक नेप्से परिसूचक बजाः बन्द जुगु इलय् तधःगु अंकय् क्वहावःगु दु। ३ हजार थ्यका न्हगु रेकर्ड दयकूगु नेप्से परिसूचक आइतवाः २ हजार ९ सय ५ य् रोके जुगु दु। नेप्सेय् अप्वो थे कारोबार जुइगु अधिकांक कम्पनीया सेयर भाः क्वहावःगु दु सा बजारय् समूहगत सवइन्डेक्सपि दक्को ह्यागु खनेदुगु खः। नेप्से परिसूचक ६३ दशमलव २८ अंकं घटे जुया २ हजार ९ सय ०५ दशमलव ३२ अंकय् क्वहावंगु दु।
वंगु बिहीवाः ११ अर्ब स्वया कम कारोबार जुगुलि आइतवाः धासा करिब १२ अर्बया कारोबार जुगु खः। न्हिच्छि यकं १ लाख २८ हजार २ सय ८१ कारोबारपाखे २३० कम्पनीया २ करोड ७३ लाख ४४ हजार ५ सय कित्ता सेयर किनबेच जुगु खः।
उकि मध्ये कारोबार रकम ११ अर्ब ८१ करोड ९४ लाख २८ हजार २ सय ८९ रूपैयाँ थ्यंगु दु। आइतवाः यक्काये हे कम जक कम्पनीपिनिगु सेयर थहावंगु दु। थौं थहावंगु ऋणपत्र खनेदुसा यक्को गुमे जुगु फाइनान्स व विकास बैंक समूह खनेदु।
डा.सुदिप श्रेष्ठ खुक्वःगु कोबायाशी फाउण्डेशन पुरस्कार—२०२० पाखे सम्मानित
लहानान्युज | बछलाथ्व दशमी ११४१,असार ६ आईतवाः
नेपालय् क्यान्सरया उपचारय् उल्लेखनीय योगदान याःगु आधारय् जापानया कोबायाशी फाउण्डेशनं नेपाल क्यान्सर हस्पिटल एण्ड रिसर्च सेन्टर हरिसिद्धिया कार्यकारी अध्यक्षलिसें वरिष्ठ क्यान्सर रोग विशेषज्ञ डा.सुदिप श्रेष्ठयात खुक्वःगु कोबायाशी फाउण्डेशन पुरस्कार—२०२० लःल्हागु दु।
५ लाख जापानी येन नगद नाप ‘हेल्थकेयर प्रोफेसनल’ पाखेंया उगु सिरपा डा.श्रेष्ठयात शनिबाः जापानय् जूगु क्यान्सर सम्वन्धि भर्चुअल विशेष सम्मेलनय् लःल्हागु खः। फाउण्डेशनं २०७६ फागुनय् सिरपा बिइगु घोषणा याःगु खः।
कोरोना महामारीया कारण फाउण्डेशनया औपचारिक ज्याझ्वः स्थगित जूगु खःसाः थुगुसि नं कोरोना महामारीया कारण नेपाः व जापानय् लकडाउन जूयाच्वंगुलिं उगु सिरपा डा.श्रेष्ठयात शनिबाः जूगु भर्र्चुअल सम्मेलनपाखे बिगु खः।
सिरपाय् नगद नाप हनापौं थुगु वाःया दुने नेपालय् थ्यनिगु धागु दु। थाइल्याण्डया डा.अरुनी देचाफुनकुल व हङ्गकङ्गया प्रा.डा.टोनी मोकयात नं खुक्वःगु कोबायाशी फाउण्डेशन सिरपा लःल्हागु खः ।
लुँया भाः थौं ८०० क्वहावल
लहानान्युज | बछलाथ्व दशमी ११४१,असार ६ आईतवाः
लुँया भाः थौं न क्वहावःगु दु।
थौं लुँ तोलां च्यासः क्वहावःगु दु। वंगु शुक्रवाः तोलां ९० हजार ८ सय रुपैयाँ कारोबा जुगुलि थौं तोलां ९० हजार कायम जुगु दु धका नेपाल सुनचाँदी व्यवसायी महासङ्घं धागु दु।
थेहे वहः न झीन्यातका क्वहावंगु दु। वंगु शुक्रवाः तोलां थौं १२ सय ९० रुपैयाँ कारोवार जुगु दु धका महासङ्घं धागु दु।
निजामति सेवाया विशिष्ट पद खाली जुल
बछलाथ्व दशमी ११४१, असार ६ गते आइतबाः
निजामति सेवाया विशिष्ट पद सचिव पद खाली जुयावंगु दु ।
लोकसेवा आयोगय् पदाधिकारी नियुक्त यायेत लिबाबलय् थुगु अवस्था वःगु खः । थ्वयान्ह्यः पदाधिकारी नियुक्तिया नितिं सिफारिस याःसा नं संसदीय मजूबलय् ज्या यायेफया च्वंगु मदुनि ।
नेपाल सरकारया थी थी निकायलय् नेतृत्व बिइमाःगु सचिव पद खाली दु । प्रधानमन्त्री लिसें मन्त्रिपरिषद्या ज्याकु, खानेपानी मन्त्रालय, कृषि तथा पशुपंक्षी मन्त्रालयया पशुपंक्षी स्वइम्ह सचिव, शिक्षा,विज्ञान तथा प्रविधि मन्त्रालयया विज्ञान तथा प्रविधि स्वइम्ह सचिव, राष्ट्रिय मानव अधिकार आयोग, राष्ट्रिय पुननिर्माण प्राधिकरण गण्डकी प्रदेश व कर्णाली प्रदेशया सचिव पद खाली दु ।
थ्वहे असार १ गते निसें उपराष्ट्रपतिया ज्याकु नं सचिवबिहीन जूगु दु । नेपाल सरकारया थी थी निकायलय् निजामती सेवाया प्रशासनया ३४म्ह, न्याय सेवाया १३म्ह, इन्जिनियरिङपाखें ८म्ह व वन अले संघीय संसदय् छम्ह छम्ह दुथ्याइगु याना ६९म्ह सचिव पद दइगु व्यवस्था दु । थ्व बाहेक नेपाल सरकारया मुख्यसचिव, सर्वोच्च अदालतय् मुख्य रजिष्ट्रार व संघीय संसदय् महासचिव दइगु व्यवस्था दु ।
मन्त्रालय लिसें मेगु सरकारी निकायलय् नेतृत्व बिइमाःगु सचिव पद खाली जूबलय् ज्याकुया ज्या व बढुवा जुइत योग्य जूपिं सहसचिवपिनि वृत्तिविकास व पदोन्नतिइ लिच्वः लाःगु दु । थुकथं ताः ई मन्त्रालय व निकायत खाली जूबलय् उपिं निकायया ज्या व प्रभावकारीताय् तप्यंक लिच्वः लाइगु लोकसेवा आयोगया पूर्व अध्यक्ष उमेश मैनालीं धयादील ।
थुखे लोकसेवा आयोगय् पदाधिकारी नियुक्त याःसा नं ज्या जुइ फूगु मदुनि । वंगु वैशाख २६ गते लोकसेवा आयोगय् पदाधिकारी नियुक्त जूगु खः । थुकथं नियुक्त पदाधिकारीया संसदीय सुनुवाई मजूबलय् ज्या न्ह्याये फयाच्वंगु मदु । नियुक्त जूगु ४५न्हू दुने संसदीय सुनुवाई मजूसा स्वत्ः नियुक्त जुइगुय व्यवस्था दु । लोकसेवा आयोगय् पदाधिकारीं ज्या याये मखंतले फुक्क बढुवा प्रक्रिया दिनाच्वनिइ ।
थज्यागु अवस्थाय् सरकारं बढुवाया नितिं योग्य जूपिं व न्ह्योने दूपिं मध्येपाखें छम्हसिर्त कायम मुकायम बिया थथेंया नितिं गठ फ्यने फइगु पूर्व अध्यक्ष मैनालीया छ्याता दु । नेपाल सरकारया थी थी निकायया प्रशासनिक नेतृत्व बिइगु पद खाली जूबलय् खाली जूगु निकायया जक मजुसें सरकारया प्रभावकारीताय् तकं लिच्वः लाइगु खनेदु ।
