कोभिड–१९ विरुद्धया खोप ‘कोभिशिल्ड’ न्ह्यगू हे प्रदेशय् छ्वय्गु तयारी दु।

भारतं अनुदानय् उपलब्ध याःगु खोप न्ह्यःगु प्रदेशय् छ्वयत स्वास्थ्य तथा जनसङ्ख्या मन्त्रालयया प्रवक्ता प्राडा जागेश्वर गौतमं जानकारी बिःगु दु । भारतपाखे हःगु खोप स्वास्थ्य सेवा विभाग टेकुया केन्द्रीय चिस्यान केन्द्रय् तया तःगु दु। वयकःया कथं प्रदेशपाखे जिल्ला अस्पतालय् खोप आवश्यकताया आधारय् वितरण याइगु व आइतवाः तक दक्को प्रदेशय् खोप थ्यनिइ। न्हापागु चरणय् खोप अस्पतालयात हे खोप केन्द्र दयेका बिइगु 

न्ह्यःगु प्रदेश व ७७ जिल्ला यााना करीब ३०० अस्पतालय् खोप बिइगु। स्वनिगलय् १० गु स्वया अप्वो अस्पतालय् खोप वितरण याइ । खोप स्वास्स्थ्य संस्थाय् ज्या याइपि कोभिड–१९ व्यवस्थापनय् न्ह्यने वनिपि स्वास्थ्यकर्मी, सहयोगी कर्मचारी, एम्बुलेन्स व शववाहन चालक, कोभिड–१९ या सङ्क्रमणपाखे सीपिनिगु शवया व्यवस्थापनय् खटे जुइपि सुरक्षाकर्मी, स्थानीय तहय् ज्यायाइपि फोहोर व्यवस्थापन व सरसफाइकर्मीपिन्त बिइ ।

न्हापागु खोप बिइ धुका लच्छि महिना वा प्यला लिपा निक्वःगु मात्रा बिइ धका मन्त्रालयया प्रवक्ता डा गौतम धाःगु खः । खोप बिइ शुरु जगु छवाः लिपा हे दक्को खोप बिइगु धका मन्त्रालयं यायेगु तयारी दु ।

किपू नगरपालिकाया मेयर रमेश महर्जन नं छगु ज्याझ्वः दथुइ किपू नगरपालिका वडा नं. २ या हिलेय् पुनः निर्माण याःगु बुँगाःया उलेज्या यानादीगु दु।

किपू नगरपालिकाया ग्वाहालि वातावरण व जनस्वास्थ्य संस्था (एन्फो) द्यइच्म्ब् या आर्थिक ग्वाहालिं नगरपालिकां सार्वजनिक सेवाया केन्द्रय् एकीकृत शहरी लः व्यवस्थापन परियोजना अन्तर्गत थुगु बुँगाःचा पुनः निर्माण याःगु खः।

किपू नगरपालिकापाखे नगरया दुने च्वपि चिनी ल्वय् व उच्च रक्तचापया विरामीपिन्त निःशुल्क रुपय् वासः बिइगु ज्याझ्वः कार्यान्वयन यायेगु कथं छगु ज्याझ्वःयासे किपू नगरपालिका व कीर्तिपुर अस्पताल दथुइ सम्झौता याःगु खः ।

उगु सम्झौता पत्र कीर्तिपुर नगरपालिकाया मेयर रमेश महर्जनया उपस्थितिइ उप–मेयर सरस्वती खड्का व कीर्तिपुर अस्पतालया निर्देशक डा. पेरु प्रधानं ल्हाचिं तयादीगु खः। उगु ज्याझ्वलय् किपू नगरपालिकाया प्रमुख प्रशासकीय अधिकृत सीता परियार, स्वास्थ्य तथा फोहोरमैला व्यवस्थापन समितिया संयोजक तथा वडा नंं १ या अध्यक्ष हर्ष महर्जन, स्वास्थ्य शाखा प्रमुख सन्तमान मानन्धर व कीर्तिपुर अस्पतालया मेडिकल निर्देशक डा.निजिता ताम्राकार, डा. वसन्त महर्जन पिनिगु न उपस्थिति दुगु खः।

कोरोना भाइरसविरुद्धया न्हापागु खोप बिइपि स्वास्थ्य संस्थाया मनूतयेगु विवरण थौंतक सूचीकृत याये त्यःगु दु। खोप बिइपि मनू तयेगु विवरण विद्युतीय प्रणालीपाखे तयार याना मन्त्रालयय् छ्वयेत दक्को स्वास्थ्य संस्थायात निर्देशन बिःगु दु व थौंतक १ लाख स्वया अप्वो मनू तयेगु सूचीकृत जूगु धका स्वास्थ्य तथा जनसंख्या मन्त्रालयं धाःगु दु।

भारत सरकारपाखे अनुदानय् वःगु कोभिशिल्ड खोप बिइत सङ्घ, प्रदेश व पालिकाय् सूचीकृत जूगु दक्को प्रकारया स्वास्थ्य संस्थायात मन्त्रालयया वेबसाइटय् लगइन याना तोकेयाःगु ढाँचाय् विद्युतीय प्रणालीपाखे निन्हुया दुने छ्वयत मन्त्रालयं निर्देशन बिःगु दु ।

स्वास्थ्य संस्थाय् ज्यायाइपि कोरोनाया सङ्क्रमण व्यवस्थापनय् न्ह्यने खटे जुइपि स्वास्थ्यकर्मी, सहयोगी कर्मचारी, एम्बुलेन्स व शववाहन चालक, कोभिड–१९ या सङ्क्रमणपाखे ज्यान वःपि शवया व्यवस्थापनय् खटे जुइपि सुरक्षाकर्मी, पालिकाय् ज्यायाइपि फोहोर व्यवस्थापन व सरसफाइकर्मीया सूची सम्बन्धित संस्था प्रमुखपाखे प्रमाणित याना मन्त्रालयं विद्युतीय प्रणालीइ छ्वयेगु धका मन्त्रालयया डाक्टर जागेश्वर गौतमं जानकारी बिःगु दु।

भारत सरकारं कोभिड–१९ विरुद्धया खोप कोभिशिल्ड वःगु बिहीबार १० लाख मात्रा सरकारयात उपलब्ध याःगु खः।

सरकारं न्हापा खोप काइपि प्राथमिकताय् स्वास्थ्यकर्मी, सरसफाईकर्मी, एम्बुलेन्स चालक लगायत पिन्त तःगु खः।

येँ महानगरपालिका दुने २५ गु सामूदायिक विद्यालयय् विज्ञान, प्रविधि, इन्जिनियरिङ, मानविकी व गणित शिक्षा प्रवद्र्धनया लागि आविष्कार (स्टीम क्लब) ज्याझ्वः सञ्चालन यायेत्यःगु दु।

येँ महानगर दुने छनोट जुगु २५ गु ब्बनेकुथिंइ न्हापागु चरणया लागि उगु ज्याझ्वः सञ्चालनया लागि सम्झौतापत्रय् हस्ताक्षर याःगु दु। ब्बनेकुथि विज्ञान व प्रविधि स्यनेगु विकास यायेगु, व्यक्तिगत अभिरुचिया विकास व प्रयोग यायेगु मञ्च उपलब्ध यायेगु, आविष्कारमुलक स्यनेयेगु प्रवद्र्धनया उदेश्य सुरुवात यायेत ज्याझ्वः सञ्चालनया लागि येँ महानगरपालिकां छनोट याःगु उगु ब्बनेकुथियात छगु छगु लाख अनुदान बिःगु दु।

अनुदानया लागि सम्झौतापत्रय् हस्ताक्षर व चेक हस्तान्तरण ज्याझ्वलय् सम्वोधन यानादीसे येँ महानगरपालिकाया मेयर विद्यासुन्दर शाक्यं न्हुगु बिचाः हया हःगु थुगु ज्याझ्वः व्यवहारिक रुपं लागु यायेत ब्बनेकुथिया प्रधानाध्यापकपिन्त इनाप यानादीगु दु । ‘येँ महानगरपालिकां न्हुगु बिचाःया ज्याझ्वः हयागु खः धकादीसे, ‘सामूदायिक स्कूलया शिक्षकं निजी स्कूलया ब्बनामिपिनिगु चाप अप्वो धका च्यूता कायेगु मखु। गुणस्तरीय शिक्षाया लागि योगदान बिउपि सामूदायिक स्कूल प्रतिया आकर्षण अप्वोकेगुलि केन्द्रित जुइमाः ।’ वयकलें सामूदायिक स्कूलय् राज्यया तधःगु लगानी दु धका धयादीसे राज्यया नीति कथं याउक व गुणस्तरीय शिक्षा बिइत निजी स्वया बालाक्क विद्यार्थी उत्पादन याये माःगुलि बःबियादीगु दु ।

‘गुणस्तरीय शिक्षा बिइ मफुगु निजी स्कूलयात ब्बःबिइगु बालागु मखु धका धयादीगु दु।’ मेयर शाक्यं स्कूलया शिक्षा आः स्थानीय सरकारया मातहतय् वःगु दु धका धयादीसे महानगरपालिका माःगु लगानी यायेत तयार दु धका स्पष्ट यानादीगु दु। ‘जिमिसं पूर्वाधार लगायतया लागि लगानी यायेत तयार दु, धका धयादीसे ‘तर, गुणस्तरीय शिक्षा बिइगु जिम्मेवारी छिकपिनिगु खः धका धयादीगु खः।

येँ महानगरपालिका सहरी योजना आयोगया उपाध्यक्ष सरोज बस्नेतं महानगरपालिकाया न्हगु ज्याझ्वः हःगुलि सफल यायेगु ज्या सकल प्रधानध्यापकपिन्त इनाप यानादीगु खः। ‘जिमिसं न्हापागु चरणया २५ गु स्कूल छनोट यायेगु ज्या जुगु दु। उकि मध्ये शिवपुरी माध्यामिक विद्यालययात हव विद्यालयया रुपमा छनोट यानागु दु।’ धका धयादीगु खः।

न्हापागु चरणया छनोटय् शिवपुरी माध्यामिक विद्याल, बाँसवासी माध्यामिक विद्यालय, धुम्रबराह माध्यामिक विद्यालय, टंगाल माध्यामिक विद्यालय, जनकल्याण माध्यामिक विद्यालय, मित्र आधारभूत विद्यालय, श्रम राष्ट्रिय माध्यामिक विद्यालय, गुह्येश्वरी माध्यामिक विद्यालय, रत्नराज्य माध्यामिक विद्यालय, विश्व निकेतन माध्यामिक विद्यालय, महेन्द्र सरस्वती सेवा आधारभूत विद्यालय, सरस्वती निकेतन माध्यामिक विद्यालय, जनप्रभावत माध्यामिक विद्यालय, नील बाराही माध्यामिक विद्यालय, जनपथ माध्यामिक विद्यालय, गितामाता माध्यामिक विद्यालय, सिद्धि गणेश माध्यामिक विद्यालय, शान्ति शिक्षा मन्दिर माध्यामिक विद्यालय, भक्त विद्याश्रम माध्यामिक विद्यालय, परोपकार आदर्श माध्यामिक विद्यालय, नवयुग माध्यामिक विद्यालय, प्रभाव माध्यामिक विद्यालय, पद्मकन्या विद्याश्रम माध्यामिक विद्यालय, भिमसेनगोला माध्यामिक विद्यालय, कोटेश्वर सरस्वती माध्यामिक विद्यालय लागु दु।