नेकपा एमाले संसदीय दलया नेता केपी शर्मा ओली नं प्रधानमन्त्रीया लागि थःगु दाबी प्रस्तुत यागु दु।

ओली एमालेया १२१ व जनता समाजवादी पार्टी –जसपा)या १६ सांसदपिनिगु हस्ताक्षर ज्वना दाबी पेश यागु खः।

थ्व स्वया न्ह्यः नेपाली कांग्रेसया सभापति शेरबहादुर देउवाया पक्षय् १४९ सांसद मूकुगु खः ।

वया लिपा प्रधानमन्त्रीया दाबी यायेत विपक्षी गठबन्धनया नेतापि शीतल निवास वंगु खः ।

संविधानया धारा ७६ (५) कथं सरकार गठनया लागि दावी पेश यायेत विपक्षी दलपि राष्ट्रपति कार्यालय शीतलनिवास थ्यंगु दु।

नेपाली कांग्रेसया सभापति शेरबहादुर देउवायात प्रधनमन्त्री दयकेगु माग यासे १४९ म्ह सांसदपिनिगु हस्ताक्षर ज्वना नेतापिनिगु शीतलनिवास थ्यंगु दु।

देउवायात प्रधानमन्त्री यायेगु लागि नेपाली कांग्रेस, नेकपा माओवादी केन्द्र, नेकपा एमालेया माधवकुमार नेपाल पक्ष व जनता समाजवादी पार्टीया बाबुराम भट्टराई उपेन्द्र यादव पक्षया सांसदपिनिगु समर्थन यागु दु।

नेपाली कांग्रेसया सभापति शेरबहादुर देउवां प्रधानमन्त्री नियुक्तिया लागि राष्ट्रपतिसमक्ष दाबी पेश याइगु जुगु दु।

देउवां थःगु पक्षय् १४९ म्ह सांसदपिन्स हस्ताक्षर मूकुगु दु। शुक्रवाः सिहदरबारय् च्वंगु कांग्रेस, माओवादी केन्द्र, नेकपा एमालेया माधवकुमार नेपाल समूह व जनता समाजवादी पार्टीया उपेन्द्र यादव पक्षया शीर्ष नेतापिनिगु बैठकं देउवायात प्रधानमन्त्रीया रुपय् न्ह्यने यंकेगु सहमति जुगु दु।

माओवादी केन्द्रया नेता वर्षमान पुनया कथं देउवाया पक्षय् १४९ म्ह सांसदपिनिगु हस्ताक्षर मूकुगु दु। कांग्रेसया ६१म्ह, माओवादी केन्द्रया ४९ –छम्ह स्वतन्त्र नाप ), माधव नेपाल समूहया २७ म्ह व जसपाया १२ म्ह सांसदपिन्स हस्ताक्षर यागु खः।

राष्ट्रपति विद्यादेवी भण्डारीं ७६(५) कथं प्रधानमन्त्रीया नियुक्त यायेत संसदं बहुमत प्राप्त आधारय् प्रस्तुत यायेत थौं बहनि ५ बजे तक ई बिगु खः ।

अष्ट्रेलियां नेपालय् कोरोना भाइरस (कोभिड–१९) संक्रमण न्यूनीकरण यायेगु लागि ग्वाहालिया घोषणा यागु दु।

अष्ट्रेलियाया विदेशमन्त्रालयं छगु विज्ञप्ति जारी यासे नेपालयात कोरोना महामारी नियन्त्रणया लागि उपकरण खरिदया लागि ७० लाख डलर बिइगु धका धागु दु। थुगु ग्वाहालि राष्ट्रसंघ व एनजीओपाखे यायेगु धका उगु विज्ञप्तिइ धयातःगु दु।

अष्ट्रेलियां बंगलादेश व श्रीलंकायात न ग्वाहालिया घोषणा याये धुकुगु दु। बंगलादेशयात ५० लाख व श्रीलंकायात ५५ लाख डलर ग्वाहालि यायेगु धका विज्ञप्तिइ उल्लेख दु।

अष्ट्रेलियाया विदेशमन्त्री मेराइज पेन न धागु दु, ‘अष्ट्रेलियां ग्वाहालि प्रत्यक्षरुपं दकलय् अप्वो माःपिन्त ग्वाहालि यायेगु जुइ।

प्रधानमन्त्री केपी शर्मा ओलीं नेपाली काँग्रेसया सभापति शेरबहादुर देउवायात  राष्ट्रिय सरकारया प्रस्ताव तःगु दु । 

शुक्रवाः सुथ् फोन याना राष्ट्रिय सरकारया प्रस्ताव यानागु धका ओलीं धागु दु।

बालुवाटारय् सम्पादकपिन्त ओलीं धागु दु, ‘थौं सुथय् शेरबहादुर देउवायात फोन याना धयागु दु– छिकपिन्स सरकार दयकादीस । जिगु ग्वाहालि दु ।’

तर वैकल्पिक सरकार दयके मफुसा राष्ट्रिय सरकार दयकेगु प्रस्ताव यानागु दु धका ओलीं धागु दु। ‘राष्ट्रिय सरकार दयकेगु खःसा झासँ जिगु हे नेतृत्वय् ।

सकसित मिले याना मंकाः भूमिका म्हित्यः’, धका ओलीं धागु दु। ओलीं मेमेगु विकल्पबारे न प्रस्ताव तःगु दु।