Display Style:
Column Style
राष्ट्रपति विद्यादेवी भण्डारीं संविधानया रक्षा मया, पूर्वराष्ट्रपति यादव
लहनान्युज | सिल्लाथ्व सप्तमी ११४१, फागुन ७ शुक्रवाः
पूर्वराष्ट्रपति डा. रामवरण यादवं वर्तमान राष्ट्रपति विद्यादेवी भण्डारीं संविधानया रक्षा मयागु धका धयादीगु दु । शोभाकर पराजुली च्वयादीगु लिखिनत समाजवाद व वीपी कोइराला नाप वीपी विचार संग्रह सफू जनकपुरधामय् बिमोचन यानादीसे डा. यादवं धयादीगु दु, ‘राष्ट्रपतिं संविधानया पालना यानादीगु मया । रक्षा यानामदी ।’
प्रधानमन्त्रीं संसद बिघटनया सिफारिस यायेवं राष्ट्रपतिं दलदुनेया विवादं संसद विघटन याये मज्यु धका धयादीगु दु । ‘छि थःगु दल दुनेया विवाद समाधान यानादीस व, समाधान मजुसा सदनय् झाँस। मेगु नाप सहमति कयादीसँ । मेगु दलं साथ बिउसा सरकार चले याकादीस। मखुसा अविश्वासया प्रस्ताव फेस यानादीस । व संविधानं स्टेप कथं झाँस धका धायेमाःगु खः’ डा. यादवं धयादीगु दु। वयकलं राष्ट्रपति भण्डारीें दलीय आवद्धता मत्वतुगु आशय प्रकट यानादीगु दु ।
‘वयकः ला राजनीतिक दलय् मदु, जि न कांग्रेसपाखे राष्ट्रपति जुयागु इलय् तत्कालिन सभापति गिरिजाप्रसाद कोइराला समक्ष राजीना बियागु खः। वयकलं न बियादीगु दु जुइ जि आशा यायें’ डा. यादवं धयादीगु खः । लोकतन्त्रया थाः राजनीतिक दल खः धयादीसे वयकलं धयादीगु दकलय् तधःगु दल विभाजित जुगु व मेगु दल कांग्रेसया अवस्था न ठीक मजुगु धका धयादीगु दु । ‘दकलय् ऐतिहासिक, लोकतन्त्र व समाजवादीया पर्यायवाची जुगु पार्टीया अवस्था छु दु ? ठीक दु ?’ वयकलं न्ह्यसः तयादीगु दु ।
ओलीं सरकारं संविधान हाचां गाइमखु : प्रधानमन्त्री ओली
लहनान्यूज | सिल्लाथ्व सप्तमी ११४१, फागुन ७ शुक्रवाः
प्रधानमन्त्री केपी शर्मा ओलीं आःया सरकारं संविधान हाचां गाइमखु धयादिगू दु ।
थःगु नेतृत्वया सरकारं लोकतन्त्रया लँपु त्वः मफिकिइगु तकं प्रधानमन्त्री ओलीं भलसाः प्वंकालिद ।
प्रजातन्त्र दिवसया लसताय् थौं येँया तिन्ख्यलय् जूगु ज्याझ्वलय् वय्कलं नागरिकया अभिमत अःखः थः मवनेगु समेत धयादिल ।
राष्ट्रिय एकतालिसें न्ह्यःने वनेमाःगु आःया आवश्यकता जूगु धासें प्रधानमन्त्री ओलीं मेगु दँ तक्क नेपाः अल्पविकसित देशं विकासशील देय्लय् न्ह्यावनिगु धयादिल । देय्यात अस्थिरतापाखें तापाकेत जनअनुमोदित प्रक्रियाय् वनेगु लँपु ताजा जनादेश जूगु धासें वय्कलं क्वछिनातःगु ईलय् हे चुनाव जुइगु ठोकुवा यानादिल ।
प्रधानमन्त्री ओलीं गुगुनं कथंया अलमल यायेगु व लोकतन्त्रयात अलमल याकेगु ज्याय् सुनानं यायेमज्यूगु धासें वयकलं चिचिधंगु मतभेदयात त्वःता वृहत्तर राष्ट्रिय हितया नितिं छप्पं जुया न्ह्यने वनेमाःगु धयादिल ।
लुँया भाः म्हो जुइगु झ्वलय्
सिल्लाथ्व सप्तमी ११४१, फागुन ७ शुक्रवाः
थौं लुँया भाःलय् द्वछिं कुहाँवःगु दु । म्हिग तोलाया ८९द्वः २सःलय् कारोबार जूगु लुँ थौं धाःसा द्वःछि कुहाँवया ८८द्वः व २सःलय् कारोबार जुयाच्वंगु नेपाल सुनचाँदी व्यवसायी महासंघ न्ह्यथंगु दु ।
अथेहे वः तोलाय् ३० म्हो जूगु दु । वः थौं तोलाय् १३सः व ५तकाये कारोबार जुयाच्वंगु महासंघं न्ह्यथंगु दु । वः म्हिग तोलाया १३सः व ३५तकाये कारोबार जूगु खः ।
अथेहे वाःलय् लुँया भाःलय् २द्वः व ७सःलं कुहाँवःगु दु । आईतबाः ९०द्वः व ९सः लय् कारोबार जूगु लुँया भाः शुक्रबाःतकया दुने ८८द्वः व २सः तक्क थ्यंगु दु । अन्तराष्ट्रिय बजारय् लुँया भाःलय म्हो जुइवं स्थानीय बजारय् नं लुँया भाःलय् म्हो जूगु नेपाल सुनचाँदी व्यवसायी महासंंघं जानकारी विल । अथेहे वंगु छवाःया वः या भाःलय् धाःसा १५ तका जक कुहाँवःगु दु ।
आईतबाः वःया प्रतितोला १३सः व २० तका ध्येबाय् कारोबार जूगु खः । अथेहे शुक्रबाः १३सः व ५ तका प्रतितोला थ्यंगु खः ।
अन्तराष्ट्रिय बजारय् लुँ प्रति औन्स १७सः व ७० तका डलरया हाराहारीइ कारबोबार जुयाच्वंगु दु । हलिंयंकया कोरोना खोपया सकारात्मक समाचारं लुँया भाःलय् छुं भचा दनावःगु खः ।
थौं न्याक्वःगु निर्वाचन दिवस
लहनान्युज | सिल्लाथ्व सप्तमी ११४१, फागुन ७ शुक्रवाः
‘निर्वाचनय् दक्वं, न्ह्याबलें, नापं’ धइगु नारालिसें निर्वाचन आयोगं थौं न्याक्वःगु निर्वाचन दिवस हनाच्वंगु दु ।
वि.सं. २०१५ फागुन ७ गते आम चुनाव न्ह्यानाः बालिग नेपालीं मताधिकार छ्लयेखंगु दिंयात लुमंकाः २०७३ सालनिसें फागुन ७ गतेयात निर्वाचन दिवसया रुपं हनेगु याःगु खः ।
दिवसया झ्वलय् प्रमुख निर्वाचन आयुक्त दिनेशकुमार थपलियां आः जुइत्यंगु प्रतिनिधिसभा दुजःया चुनावय् सक्रियता लिसें ब्वति कायेत आह्वान यानादीगु दु ।
आयोगं चुनावया व्यवस्थापनया ६त्या दशक ताःहाकःगु अनुभव व संवैधानिक निकायया हैसियतय् थःगु स्थापनाया ५४ दँ पूवंकेधुंकूगु दु । प्रमुख आयुक्त थपलियां निर्वाचनया यात्राय् संवैधानिक गतिशीलता कथं आयोगयात निरन्तर न्ह्याःवनेत योगदान, हःपाः, ग्वाहालि व हौसला ब्यूपिं अग्रजया मेहनत, परिश्रम, साहस व दृढताया सम्मान अले प्रशंसा यानादीगु दु । सरकारं वइगु वैशाख १७ गते व २७ गतेया लागिं निर्वाचनया मिति क्वःज्यूगु दु ।
निर्वाचनया लागि झण्डं १ क्वःति ६३ लख मतदाता अद्यावधिक जूगु व २०द्वः मतदान केन्द्र दइगु न्ह्यथंगु दु ।
थौं प्रजातन्त्र दिवस, निषेधया राजनीति मयायेत पूर्व जुजु ज्ञानेन्द्र शाहया हसना
लहनान्युज | सिल्लाथ्व सप्तमी ११४१, फागुन ७ शुक्रवाः
थौं प्रजातन्त्र दिवस स्वदेश अले विदेशस्थित थीथी नियोगय् थीथी ज्याझ्वः यानाः हनाच्वंगु दु ।
जनक्रान्तिया माध्यमं राणाशासन न्हंकाः देशय् प्रजातन्त्र घोषणा जूगु दिंया हनाय् थीथी ज्याझ्वः यानाः थुगु दिवस हनी ।
प्रजातन्त्रया हे जगय् लोकतन्त्र जुयाः देशय् आः संघीय लोकतान्त्रिक गणतन्त्रात्मक शासन व्यवस्था स्थापना जूगु दु ।
२००७ सालय् जुजु त्रिभुवन व राजनीतिक दलतय् मंकाः कुतलय् सच्छि व ४ दँया जहाँनिया राणाशासन न्हंकाः प्रजातन्त्र स्थापना जूगु खः ।
प्रजातन्त्र स्थापनाया लागिं जूगु संघर्षय् शुक्रराज शास्त्री, दशरथ चन्द, धर्मभक्त माथेमा व गङ्गालाल श्रेष्ठं विसं १९९७ माघय् बलिदानी बियादीगु खः ।
प्रजापरिषद् नामं राजनीतिक दल भूमिगत रूपं स्थापना यानाः प्रजातन्त्र स्थापनाया लागिं जनताय् जागरण हःगु द्वपनय् वय्कःपिन्त तत्कालीन राणा शासकतय्सं मृत्युदण्ड ब्यूगु खः ।
नेपाली राष्ट्रिय कांग्रेस व नेपाल प्रजातन्त्र कांग्रेसया २००६ सालय् एकीकरण धुंकाः दयेकूगु नेपाली कांग्रेसया संस्थापक नेता बिपी कोइरालाया नेतृत्वय् जूगु सशस्त्र व निर्णायक आन्दोलनं नेपालय् २००७ साल फागुन ७ गते प्रजातन्त्र स्थापना जूगु खः ।
थ्व हे दथुइ, प्रजातन्त्र दिवसया लसताय् राष्ट्रपति विद्या भण्डारी, उपराष्ट्रपति नन्दबहादुर पुन, प्रधानमन्त्री केपी शर्मा ओली लिसें थीथी दलया नेतातय्सं भिंतुना बियादीगु दु ।
वय्कःपिन्सं जनताया संघर्षया बलिदानीं चूलाःगु उपलब्धीयात सकसिनं संरक्षण यायेमाःगु धयादीगु खः ।
थ्वहे लसताय् पूर्व जुजु ज्ञानेन्द्र शाहं निषेधया राजनीति याइपिन्त चेतावनी बियादीगुदु ।
७१क्वःगु प्रजातन्त्र दिवसया लसताय् हसना जारी यासें पूर्व जुजु शाहं नेपाल जनता व जुजुया सहमतिं खडा जूगु व थुकिया अस्तित्व रक्षा नं सहमतिं जक जुइगु यथार्थया अवज्ञां निषेध व विभेदया राजनीति जुयाच्वंगु धयादिल ।
वय्कलं देय् न्हियान्हिथं जटिलताय् तक्यनावंगु महसुस आम नेपाःमिं यानाच्वंगु धासें सकसिनं मातृभूमिया पवित्र चा छातीइ तयाः आत्म समीक्षा यायेगु ई वःगु न्ह्यथनादिल ।
पूर्व जुजु शाहं जनताया आस्था, मनंतुना व जनभावना अन्ततः अमर जुइगु धासें थुकियात हुइत स्वयां हुइ मफइगु नं धयादीगु दु ।
