वःगु २४ घण्टाया दुने थप ३०२ म्हेसित कोरोना भाइरस (कोभिड–१९) या संक्रमण पुष्टि जुगु दु।

देयन्यकया प्रयोगशालाय् ३ हजार ५४५ म्हेसिगु नमुना परीक्षण यागुलि १३३ म्ह मिसा व १६९ म्ह मिजंयात संक्रमण पुष्टि जुगु दु । थ्व नाप आःतक कुल संक्रमितपिनिगु ल्याः २ लाख ६८ हजार ९४८ म्ह थ्यःगु दु ।

उकि मध्ये २ लाख ६३ हजार ३४८ म्ह संक्रमणमुक्त जुगु दु सा १९८६ म्ह सी धुकुगु दु धका स्वास्थ्य तथा जनसंख्या मन्त्रालयं धाःगु दु। आःतक देयन्यक ३ हजार ६४१ म्ह संक्रिय संक्रमित दु ।

झिंछक्वःगु नेवाः एकता दिवस सांस्कृतिक नगर खोनाया खुदोलय् जुगु दु ।

नेवाः देय् दबूया नायः नाप झिंछक्वःगु नेवाः एकता दिवसया मंकाः संयोजन पुचःया कजि नरेश ताम्राकारया सभाधक्ष्यताय् ज्याझ्वः जुगु खः । उगु नेवाः एकता दिवसया व्यवस्थापन पुचःया नायः नेपाल डंगोलं लसकुस न्वचू बियादीगु ज्याझ्वलय्ं फाष्ट ट्राकया लिसें खोनाय् देय् कुरुप यायेगु कथं सरकारं झिगुलिं मल्याक परियोजनात हयेत्यंगु धका धयादीगु खः ।

ज्याझ्वलय् नेवाः न्ह्यलुवाःलिसें पुलांम्ह मन्त्री तीर्थराम डंगोल व नेवाः न्ह्यलुवाःलिसें पुलांम्ह राज्यमन्त्री दिलीप महर्जनं थीथी जातीय नेवाः समुदायया सकल खलः पुचःयात नेवाःत छधी छप्पं जुयाः न्ह्यांवनेगु नितिं प्रतिबद्धता प्वंकादीगु खःसा नेवाः न्ह्यलुवा पुष्पराज राजकर्णिकारं नं नेवाः आन्दोलनय् न्ह्यलुवाः जुयाच्वंगु खलः पुचःया प्रतिनिधिपिन्त प्रतिबद्धता प्वंकेगुलि नेतृत्व यानादीगु खः ।

लुँ तोलां थौं निसः तका क्वहावःगु दु ।

म्हिगः बिहीवाः ९३ हजार एक सय रुपैयाँय् कारोबार जुगु छापावाल लुँ थौं शुक्रवाः तोलां ९२ हजार ९ सय रुपैयाँ कायम जूगु दु धका नेपाल सुनचाँदी व्यवसायी महासंघं धाःगु दु।

अथेहे महासंघं तेजावी लुँ तोलां ९२ हजार ४ सय रुपैयाँ तोके याःगु दु। बिहीवाः तेजावी लुँ तोलाया ९२ हजार ६ सय रुपैयाँय् कारोबार जूगु खः ।

अथेतु वहः तोलाय् न झीन्यातका क्वहावःगु दु। बिहीवाः १२७५ रुपैयाँ तोला जुगु खःसा थौं शुक्रवाः वहः तोलां १२६० रुपैयाँ कायम जूगु दु ।पोहेलाथ्व नवमी ११४१, माघ ९ शुक्रवाः

जसपा येँ जिल्ला अध्यक्ष श्याम प्रजापतियात मां लक्ष्मी प्रजापति मन्त ।

वयकः थौं सुथय् ३ताः इलय् हृदयघात जुयाः छेँय् हे मदुगु खः । वयकःया थांैं सुथय् उसाँय् अवस्था स्यनावंगु खनेदयाः वासः यायेत शहिद गंगालाल राष्ट्रिय हृदय रोग केन्द्रय् यंकूगु खःसा अन चिकित्सकं वय्कः मदय धुंकूगु घोषणा याःगु खः । वय्कःयात वंगु निदँ न्ह्यःनिसें नुगः सम्वन्धि समस्या जुयाच्वंगु दुगु खः ।

मदुम्ह प्रजापतिया थौं हे येँया लुतिइ अन्त्येष्टि याःगु दु । मदुम्हेसित वय्कःया काय् श्यामकृष्ण प्रजापतिं मि तयादीगु खः ।

६०दँ दुम्ह प्रजापतिया छम्ह काय् श्यामकृष्ण व म्ह्याय् छम्ह दु ।