Display Style:
Column Style
पशुपत्तिइ छाइगु भेटी आः मोबाइलपाखें हे पुलेफइगु
लहनान्यूज | सिल्लाथ्व त्रयोदशी ११४१, फागुन १३ बिहीवाः
पशुपत्ति मन्दिरय् छाइगु भेटी आः मोबाइलपाखें हे पुलेफइगु जूगु दु ।
बैंक अफ काठमाण्डू लिमिटेडं पशुपत्ति लागाय् डिजिटल डोनेशन बक्स न्ह्याकुसेंलि क्यूआर कोड स्क्यान याना दान यायेफइगु जूगु खः ।
पशुपत्ति लागाय् थौं बैंक अफ काठमाण्डूं ग्वःसाग्वःगु डिजिटल भुक्तानी ज्याझ्वलय् दानपात्र बक्सया शुभारम्भ यासें गर्दै राष्ट्र बैंकया गर्भनर महाप्रसाद अधिकारीं सरकारया डिजिटल नेपाल अभियानयात ग्वःहालि याइकथं राष्ट्र बैंकं डिजिटल भुक्तानी जोड बियागु धयादिल ।
बैंक अफ काठमाण्डूया मू कार्यकारी अधिकृत शोभनदेव पन्तं सर्वसाधारणया ध्येबा सुरक्षा व सदुपयोग यायेत पशुपत्ति लागाया ४गू थासय् डिजिटल दानपात्र तयागु धयादिल ।
राष्ट्र बैंकया योजनाकथं देय्या दक्वः नागरिकया पहुँचय् थ्यनिकथ डिजिटल कारोबारयात न्ह्याकेमाःगु पन्तं धयादिल ।
पशुपत्ति दर्शनया नितिं वइपिं भक्तजनपिन्सं याउँक सुरक्षित कथं ध्येबा पुलेत बैंक अफ काठमाण्डूं डिजिटल दानपत्रया सुरुवात याःगु खः ।
नेपाली कांग्रेसया नेता नवीन्द्रराज जोशी अस्पताल भर्ना
लहनान्युज | सिल्लाथ्व चतुर्दशी ११४१, फागुन १४ शुक्रवाः
नेपाली कांग्रेसया केन्द्रीय दुजः नाप पुर्वमन्त्री नवीन्द्रराज जोशीयात मस्तिष्कघात जूगु दु।
म्हिगः बिहिवाः चान्हय् उसाँय् समस्या खनेदये धुंकाः जोशीयात वीर अस्पताल भर्ना याःगु खः ।ं वीर अस्पतालय् हे वासः याकाः वयाच्वंम्ह जोशीयात थौं शुक्रवाः सुथय् नर्भिक अस्पताल रिफर याःगु खः ।
छेँजःपिन्स बिःगु जानकारी कथं जोशीया अवस्था गम्भीर जूगु व शल्यक्रियाया तयारी जुयाच्वंगु दु धका धाःगु दु।
जोशीया थ्वसिबें न्ह्यः नं छातीइ समस्या खनेदयाः वयाच्वंगु खः ।
येँ हाकन बर्डफ्लूया आतंक
लहनान्यूज | सिल्लाथ्व त्रयोदशी ११४१, फागुन १३ बिहीवाः
येँया तारकेश्वर नगरपालिकाय् हाकन बर्डफ्लूया संक्रमण लूगु दु । पंक्षीयाके खनेदइगु थ्व संक्रमण आः वयाः तारकेश्वर नगरपालिका–१ साङ्लाफाँटय् लहिनातःपिं खायाके लूगु धागु दु ।
थ्वहेजुयाः विक्रम गौतम व कमल गौतमया खा फार्मं ६द्व ५सः व २५म्ह लेयर्स जातया खा स्याःगु अनुगमनया पुचलं धागु दु । थ्वहेदथुइ फार्मय् दुपिं ३द्व ५सः व ७०गः खें व द्व ४सः व ५०गु किलो दाना न नष्ट याःगु दु ।
अथेहे खा नष्ट याःगु थाय्लिक्कया सरिता शाहलं लहिनातःपिं २द्व ९सः व ६०म्ह ब्रोइलरया खाचा स्याःगु खः ।
फार्मय् दुगु ७सः व ५०गु किलो दाना न नष्ट याःगु धागु दु । तारकेश्वर नगरपालिका–१ य् बर्डफ्लूया हुनिं थ्वसिवे न्ह्यः द्वछि व ४सः मल्याक हँय् न स्यायेधुंकूगु दु ।
येँनाप सुर्खेतय् न बर्डफ्लूया संक्रमण लूगु दु । आः वयाः पशुसेवा विभागं थीथी थासय् संक्रमण जू मजू धइगु विषय स्पष्ट यायेत अनुगमन यानाच्वंगु दु ।
विप्लब पुचःया मुस्ताङ इन्जार्ज फिल्टरयात ज्वन
सिल्लाथ्व त्रयोदशी ११४१, फागुन १३ बिहीवाः
प्रतिबन्धित नेत्रविक्रम चन्द ‘विप्लब’ पुचःया मुस्ताङ जिल्ला इञ्चार्ज पदम पुन (फिल्टर) यात म्याग्दीइ नं ज्वंगु दु ।
म्याग्दीया मालिका गांपालिका–२ नं पुनयात इलाका प्रहरी ज्याकू दरवाङया टोलीं ज्वंगु जिल्ला प्रहरी ज्याकुथिं न्ह्यथंगु द्ु ।
पुनयात बिहीबाः सनिलय् हे बेनीइ हःगु दु । राज्यविरुद्धया अपराधय् ल्हाः तःगु द्वपनय् पुनयात ज्वनागु प्रहरीं धाःगु दु ।
पुन एनसेलया टावर, डोजरलिसेंया निर्माण उपकरण च्याकाब्यूगु, चन्दा असुली लिसेंया ज्याखँय् जूगु प्रहरीया द्वपं दु ।
वय्कः लिपांगु इलय् चन्द पुचःया मुस्ताङ जिल्ला इञ्चार्ज जुयाच्वंगु प्रहरीया प्रारम्भिक अनुसन्धानं सी दुगु दु ।
चन्द पुचः व सरकार दथुइ वार्ताया चर्चा न्ह्यानाच्वंगु इलय् पुनयात ज्वंगु खः ।
सरकारलिसे वार्ताया लागिं थुगु पुचलं ज्वनातःपिं नेता रिहाइया सर्त तःगु दु ।
सरकारं चन्द पुचःयात निदँ न्ह्यःनिसें प्रतिबन्ध तयातःगु दु ।
न्हूगु राजनीतिक घटनाक्रमलिसें जःलाखला देय्या राजदूतपिं सक्रिय, प्रधानमन्त्री ओलीं न राष्ट्रपति भण्डारीयात नापलानादिल
लहनान्यूज | सिल्लाथ्व त्रयोदशी ११४१, फागुन १३ बिहीवाः
नेपालया न्हूगु राजनीतिक घटनाक्रम विकास जूगुलिसें नेपालया निगू जःलाखला देय् चीन व भारतया राजदूतत नं सक्रिय जूगु दु ।
चिनियाँ राजदूत होउ यान्छी व भारतीय राजदूत विनय मोहन क्वात्रां न्हूगु राजनीतिक घटनाक्रमया बारे सीकेत कांग्रेसया सभापति शेरबहादुर देउवायात भु्इजःसिइ नापलाःगु दु ।
निम्हं राजदूतं नेपालया लिपांगु विकसित राजनीतिक घटनाक्रमया विषयस देउवालिसे सहलह याःगु धाःगु दु ।
प्रधानमन्त्री केपी शर्मा ओलीया नेतृत्वय् दुगु सरकारया संसद् विघटन यायेगु पुस ५ गतेया निर्णययात राष्ट्रपति विद्यादेवी भण्डारीं स्वीकृत यानादीगु खः । तर उगु पलाःयात सर्वोच्च अदालतं फागुन ११ गते बदर यानाब्यूगु खः ।
थुखे सर्वोच्च अदालतं संसद पुनस्र्थापनाया फैसला यायेधुंकाः न्हापांगु खुसी राष्ट्रपति विद्यादेवी भण्डारी व प्रधानमन्त्री केपी शर्मा ओली नापलाःगु दु ।
प्रधानमन्त्री ओली म्हिगः सनिलय् शीतल निवास वनाः राष्ट्रपतियात नापलानादीगु खः । राष्ट्रपति व प्रधानमन्त्री दथुइ करिब घौछित्या खँल्हाबल्हा जूगु स्रोतं कंगु दु ।
सर्वोच्चं संसद पुनस्र्थापनालिसें १३ न्हु दुने संसदया न्हापांगु मुँज्या सःतेत राष्ट्रपति व प्रधानमन्त्रीया नामय् निर्देशनात्मक आदेश बी धुंकाः शीतलनिवास थ्यंम्ह प्रधानमन्त्री ओलीं न्हूगु राजनीतिक पलाःबारे सहलह यायेत राष्ट्रपति भण्डारीयात नापलानादीगु खः ।
संसद विघटनया पलाः सर्वोच्च अदालतं पुइकाबी धुंकाः राष्ट्रपति भण्डारीयात महाभियोग तयेगु बारे नं दलतय् दथुइ नं अनौपचारिक सहलह जुयाच्वंगु अवस्थाय् प्रधानमन्त्री शीतलनिवास थ्यंकादीगु खः ।
प्रधानमन्त्री ओली व राष्ट्रपति भण्डारी दथुइ संसदया मुँज्या गबले सःतेगु धइगुबारे सहलह जूगु धाःगु दु ।
