कोभिड–१९ भाइरसया कारण नेपाल प्रहरीका प्रहरी नायब उपरीक्षक (डीएसपी) समीरचन्द्र खरेल मन्त।

प्रहरी अस्पताल, महाराजगञ्जय् उपचारया झ्वलय् खरेल थौं सोमवाः मदुगु  धका प्रहरी प्रधान कार्यालय, नक्सालं धागु दु।

संयुक्त राष्ट्र संघया शान्ति मिसनय् वना लिहा वया प्रहरी प्रधान कार्यालय, नक्सालय् ज्या याना च्वम्ह खः।

वंगु १३ महिनाय् ५७७ भेन्टिलेटर व ४०० इन्टेन्सिभ केयर युनिट (आईसीयू) बेड थपे जुगु दु धका स्वास्थ्य तथा जनसंख्या मन्त्रालयं धागु दु।

थ्व नाप देयन्यक अस्पतालया भेन्टिलेटरया ल्याः ९०४ गु थ्यंनेवं आईसीयू बेडया ल्याः ३ हजार थ्यनिइ। सोमवाः ग्वसाः ग्वंगु पत्रकार सम्मेलनय् स्वास्थ्यमन्त्री हृदयेश त्रिपाठीं १८० भेन्टिलेटर व ६३० बेड आईसीयू थपे यायेगु प्रक्रिया सुरु जुगु धका धागु दु। आईसीयू व भेन्टिलेटरय् तया उपचार याये मापि संक्रमितपि ल्याः न्हिया न्हिथं अप्वोया च्वंगुलि भेन्टिलेटर व आईसीयू बेड थप यायेगु प्रक्रिया न्ह्याकगु धका धयादीगु खः ।

हाई डिपेन्डेन्सी युनिट (एचडीयू) बेड ल्याः सरकारी अस्पतालय् २ हजार ७५ व निजीइ ७७८ थपे याना सञ्चालनय् हया व १ हजार ४०० एचडीयू बेड थप यायेगु प्रक्रिया न्ह्याकेगु धका धागु दु । कोभिड–१९ या बिरामीपि उपचारया लागि देयन्यकं सरकारी व निजी याना १५७ अस्पताल सूचीकृत याना सञ्चालन जुया च्वंगु दु धका वयलक धागु दु, उकि मध्ये निजी क्षेत्रय् ४५ अस्पताल नाप सम्झौता याना कोभिड–१९ या बिरामीपिन्त निःशुल्क उपचार यायेगु व्यवस्था मिले यागु दु।

अस्पतालय् ३२ गु अक्सिजन प्लान्ट सञ्चालनय् दुगु व १९ गु प्लान्ट थप यायेगु झ्वलय् दु धका धागु दु। स्वंगु लिक्विइड अक्जिसन ट्यांक दुगुलि आः १७ गु थ्यकिइगु प्रक्रिया न्ह्यने वंगु दु धका मन्त्री त्रिपाठीं धागु दु।

कोरोना भाइरस (कोभिड–१९) या संक्रमणं वंगु २४ घण्टाया दुने थप १८५ म्ह सीगु दु सा ७४२५ म्ह संक्रमित थपे जुगु दु।

देयन्यकया प्रयोगशालाय् १९ हजार ८४६ म्हेसिगु नमुना पीसीआर टेष्ट यागुलि ७२२० म्ह  व ६०७ एन्टिजेन टेष्ट यागुर्लि  २०५ म्हेसित संक्रमण पुष्टि जुगु धका स्वास्थ्य तथा जनसंख्या मन्त्रालयं धागु दु।

थ्व नाप सक्रिय संक्रमितपि आः १ लाख १५ हजार ४४७ म्ह थ्यंगु दु । उकि मध्ये १ लाख ८ हजार ७१ म्ह होम आइसोलेसनय् च्वना च्वंगु दु। ७ हजार २७६ म्ह संस्थागत आइसोलेसनय् च्वना च्वंगु दु, उकि मध्ये १६९७ म्ह आईसीयूलय् च्वना उपचार याना च्वंगु दु। वंगु २४ घण्टाय् ७१३५ म्ह संक्रमणमुक्त जुगु दु।

थ्व नाप कोरोना संक्रमणपाखे मुक्त जुपि ३ लाख ९८ हजार ४८३ म्ह थ्यंगु दु। आःतक संक्रमितपि ५ लाख २० हजार ४६१म्ह मध्ये ६५३१ म्ह सी धुकुगु दु।

कोभिड १९ सङ्कट व्यवस्थापन अध्यादेश पालना मयाइपिन्त दच्छिया कैद व न्यागु लाख तक जरिबाना जुइफु धका धागु दु।

जिल्ला प्रशासन कार्यालय येँ थौ सोमवाः विज्ञप्ति पिकाया अध्यादेश पालना मयाइपिन्त दच्छि कैद व ५ लाख तका जरिबाना जुइगु जानकारी बिगु दु ।

अध्यादेश कथं जारी जुगु मापदण्ड पालना याये मागु व पालना मयातकि खुला तक कैद वा स्वंगु लाख रुपैयाँ वा निगुलि सजाय जुइफु धका जिल्ला प्रशासनं धागु दु। अथेहे सू न मनूखं आदेश उल्लङ्घन यातकि छगु लाख तक जरिबाना जुइगु व छु न संस्थां आदेश उल्लङ्घन यातकि ५ लाख तक जरिबाना जुइफु धका उगु सूचलय् धयातःगु दु।

थुगु जरिबाना तोके यायेगु अधिकार प्रमुख जिल्ला अधिकारीयात बिगु दु। अथेहे मास्क मतस्ये सार्वजनिक थासय् आवतजावत यातकि सच्छि, विना ज्या पिहावनिपिन्त निसः, अत्यावश्यक बाहेकया सवारी साधन चले याइपि निगु पाङ्ग्रे सवारी साधनय् निद्धः, मेगु गाडीइ न्याद्धः तका जरिबाना यायेफु धका प्रमुख जिल्ला अधिकारी कालीप्रसाद पराजुलीं विज्ञप्तिपाखे धागु दु।

वंगु दँय् थे थुगुसि लकडाउनय् सेयर बजाः छगु नाप मेगु रेकर्ड तया वनाच्वंगु दु ।

म्हिगः आइतवाः सेयर कारोबार मापक नेप्से परिसूचक २ हजार ८ सय २० स्वया अप्वोगु रेकर्ड तयावया च्वंगु दु ।

अथे हे थौं न बजारय् न्हुगु रेकर्ड तःगु दु। सोमवाः नेप्से परिसूचक नाप सेयर कारोबार रकम ऐतिहासिक रेकर्ड तःगु दु।

थौं सोमवाः छन्हु हे १३ अर्ब रुपैयाँ स्वया अप्वो सेयर किनबेच जूगु खः ।

थ्व नेपाली सेयर बजाःया इतिहासय् दकलय् अप्वोे कारोबार जुगु खः ।