प्रधानमन्त्री केपी शर्मा ओलीविरुद्ध सर्वोच्च अदालतय् थौं मङ्गलवाः अवहेलना मुद्दा दर्ता जूगु दु । अदालतय् विचाराधीन विषययात प्रभावित यायेगु कुतः याःगु व कानुन व्यवसायीपिनिगु मानमर्दन याःगु द्धपनय् प्रधानमन्त्री ओलीविरुद्ध सर्वोच्चय् निम्ह अधिवक्तापिन्स निवेदन बिःगु दु ।

अदालतया अवहेलना याःगु धाःसे वरिष्ठ अधिवक्ता कुमार शर्मा आचार्य व मेम्ह अधिवक्ता कञ्चनकुमार न्यौपाने न पेस याःगु निवेदन मङ्गलवाः दर्ता जुगु सर्वोच्च अदालतया सञ्चार विज्ञ किशोर पौडेलं जानकारी बिःगु दु । उगु निवेदनय् प्रधानमन्त्री ओली न पार्टी कार्यकर्ता भेलाय् कानुन व्यवसायी व अधिवक्तापिन्त टीकाटिप्पणीं अदालतय् विचाराधीन विषय प्रभावित यायेगु कुतः जुगु धका आरोप बिःगु खः।

सर्वोच्च अदालतय् विचाराधीन प्रतिनिधि सभा विघटनया मुद्दामा बहस पैरवी यानाच्वपि कानुन व्यवसायीपिन्त व्यङ्ग्य यागुलि प्रधानमन्त्रींया प्यखेरं आलोचना जुयाच्वगु दु। अदालतया अवहेलना आरोप ठहर जुलकि दच्छि कैद सजाय वा झीद्धःतका जरिबाना वा निगु न व्यवस्था दु।

वःगु २४ घण्टाया दुने थौं देयन्यक ३०३ म्हेसित कोरोना भाइरस (कोभिड १९) संक्रमण पुष्टि जुगु दु ।

देयन्यकया प्रयोगशालाय् ४५७४ म्हसित परीक्षण याःगुलि १३० म्ह मिसा व १७३ म्ह मिजंपिन्त संक्रमण पुष्टि जूगु दु ।

थ्व नाप आःतक कुल संक्रमित जूपि २ लाख ७० हजार ९२ म्ह थ्यःगु दु । उकि मध्ये २ लाख ६४ हजार ८२३ म्ह संक्रमणमुक्त जूगु दु सा  २०१७ म्ह सी धुकुगु दु धका स्वास्थ्य तथा जनसंख्या मन्त्रालयं धाःगु दु ।

आःतक देयन्यक ३२५२  म्ह संक्रिय संक्रमितपि दु। उकि मध्ये २५०३ म्ह होम आइसोलेसनय् च्वना च्वंगु दु ।

शहिद सप्ताहया ज्याझ्वः  कथं थौं मंगलवाः येँया सिफलय् शहिद धर्मभक्त माथेमायात मृत्युदण्ड बिगु थासय् श्रद्धाञ्जलीसभा ज्याझ्वः जुगु दु। शहिद सप्ताहया न्हापागु दिं कथं  माघ १० शुक्रराज शास्त्रीं सहादत प्राप्त याःगु थासय् श्रद्धाञ्जली सभा याना येँय् महानगरपालिकां उगु ज्याझ्वः याःगु खः।

थौं शहिद सप्ताहया स्वन्हू दिं अर्थात माघ १३ गते सिफलय् श्रद्धाञ्जलीसभा याःगु खः। श्रद्धाञ्जली सभाय् न्ववासें महानगरया मेयर विद्यासुन्दर शाक्यं निरंकुशतापाखें नेपाली जनतायात मुक्त याकेत ज्यान बिउपिं शहिदतयगु कारण देशय् संघीय लोकतान्त्रिक गणतन्त्र स्थापना जुगु धका धयादिगु खः। शहिदतयगु योगदानया उच्च मुल्याङकन यासें वयकपिनिगु लुमन्ति चीरकालतक दयेमाः धकाः महानगरपालिकां प्यम्ह शहिदया पूर्ण कदया झ्वाःता निर्माण यानागु धका धयादिगु खः। येँय् महानगरपालिकां प्यम्हेसित (गंगालाल श्रेष्ठ, दशरथ चन्द, धर्मभक्त माथेमा, शुक्रराज शास्त्री) मृत्युदण्ड बिगु थासय् पूर्ण कदया सालिक निर्माण याःगु खः।

मेयर शाक्यं धर्मभक्तया लुमन्तिइ वयकया पुख्यौली थाय् येँय् महानगर वडा नं. २३ या ओमबहालय् ‘सहिद धर्मभक्त माथेमा पार्क’ निर्माण जुगु धासें वयकलं धर्मभक्तया हे लुमन्तिइ ‘शहिद धर्मभक्त माथेमा मानवसेवा आश्रमया लागि नं महानगरं बजेट फ्यानागु धका धयादिगु खः। अथेहे शहिद गंगालालया लुमन्तिइ गंगालाल हृदय केन्द्रय् अक्सिजन प्लाण्ट तयेत महानगरं सम्झौता जुइ धुकुगु दु धका धयादिगु खः। वयकलं शहिदतयगु लुमन्तिइ येँय् महानगरया हे पहललय् ८० दँलिपा जुसाः नं पूर्णकदया झ्वाःता निर्माण यायेगु अवसर प्राप्त जुगु धासें लसता प्वकादिल।

उगु ज्याझ्वलय् उपमेयर हरिप्रभा खड्गी श्रेष्ठं राजनीतिक ह्यूपाः हयेगु नितिं शहिदया म्हगस अन्तरसम्बन्धित जुगु धयादिल। बिकासपाखें देययात समृद्ध यायेत व नागरिकपिन्त खुसी यायेत शहिदया म्हगसः लुमंकुसें मग्यासें जिम्मेवारी पूरा यायेगु वयकलं धयादिल। सभाय् महानगरया वडा नं. ७ या वडाध्यक्ष शुद्धकुमार डंगालं शहिदया म्हगसः पूंवकेत भौतिक समृद्धिलिसें चेतनाय् नं समृद्धि जुइमाःगु टिप्पणी यानादिल।

शहिद माथेमायात माघ १३ गते सिफल पाचाया सिमाय् यंःखाना मृत्युदण्ड बिःगु खः। वयक वि. सं. १९६६ साल आश्विन ९ गते अबु सुब्बा आदिभक्त व मां चन्द्रकुमारी देवीया कोखं येँया ओमबहालय् जन्म जुयादिगु खः। नागरिक स्वतन्त्रताया पक्षय् मग्यासें सः तपिं शुक्रराज शास्त्री, धर्मभक्त माथेमा, गंगालाल श्रेष्ठ व दशरथ चन्दयात राणातयसं १९९७ सालय्  मृत्युदण्ड ब्यूगु लुमन्तिइ शहिद दिवस हना वयाच्वगु खः। शहिद सप्ताहया ल्यदनिगु ज्याझ्वलय् माघ १५ गते गंगालाल श्रेष्ठ व दशरथ चन्दं अमरत्व प्राप्त यागु ठाय् शोभा भगवतीइ श्रद्धाञ्जली सभा जुइसाः माघ १६ गते शान्तिबाटिकां नसचां उलां शहिद स्मारक लैनचौरय् ज्ञात अज्ञात सहिदप्रति श्रद्धाञ्जली सभा जुइ ।

थौं लुँ तोलां प्यसः थहावःगु दु । छापावाला लुँ तोलां प्यसः थहा वना ९२ हजार ८०० रुपैयाँ थ्यःगु दु ।

छापावाल लुँ सोमवाः तोलाया ९२ हजार ४०० रुपैयाँ न कारोबार जूगु खः । अथेहे तेजाबी लुँ तोलाय् प्यसः थहा वःगु दु धका नेपाल सुनचाँदी व्यवसायी महासङ्घ न धाःगु दु।

तोलाया ९१ हजार ९०० रुपैयाँ न सोमवाः कारोबार जुगु तेजाबी लुँ थौं धाःसा तोलाय् ९२ हजार ३०० रुपैयाँ न कारोबार जुगु दु ।

अथेतु वहः तोलाा न न्यातक थहावःगु दु। वहः तोलाया १२६० रुपैयाँ न सोमवाः कारोबार जुगु खःसा थौं वहः तोलाया १२५५ रुपैयाँ थ्यःगु दु धका महासङ्घ न धाःगु दु ।