साहित्यकार डा. बानिरा गिरी ७५ दँय् म्हिगः आइतवाः चान्ह्यः मन्त ।

हृदयघातया कारण येँया बानेश्वरय् च्वंगु सिभिल अस्पतालय् म्हि चान्ह्यः १० बजे गिरी मदुगु धका परिवारपाखे धागु दु। मदुम्ह गिरी स्वदँ निसे अल्जाइमर्सपाखे पीडितम्ह खः।

वयकः नेपाली साहित्यय् विद्यावारिधियाम्ह न्हापाम्ह मिसाम्ह खः । डा. गिरीया ‘एउटा एउटा ज्यूँदो जंगबहादुर’ व ‘जीवनथाय् मरु’ कवितासंग्रह नाप स्वंगू उपन्यास ‘निर्बन्ध’, ‘कारागार’, व ‘शब्दातीत शान्तन’ प्रकाशित जूइ धुकुगु दु।

‘शब्दातीत शान्तन’ न वयकलं २०५६ सालय् साझा पुरस्कार कयादीगु खः। डा. गिरीया जहाना नाप छम्ह काय् व छम्ह म्ह्याय् दु।

विपक्षी दलपिनिगु गठबन्धनं संसद विघटनविरुद्ध सर्वोच्च अदालतय् दायर याइगु रिटय् हस्ताक्षर यायेत नेकपा एमालया माधवकुमार नेपाल पक्षया सांसदपि सिंहदरबारय् वंगु दु।

विपक्षी दलपिनिगु गठबन्धनं संसद विघटनविरुद्ध थौं सर्वोच्च अदालतय् दायर याइगु रिट तयार जुइंव नेपाल पक्षया सांसदपि सिंहदरबारय् वंगु खः।

थौं हस्ताक्षर यापि माधव नेपाल, जिवनराम श्रेष्ठ, निरादेवी जैरु, लक्ष्मी चौधरी, बिरोध खतिवडा, सोमप्रसाद पाण्डे, रामकुमारी झाक्री, लक्ष्मी चौधरी, झपट रावल, सोमप्रसाद पाण्डे लगायतपि खः।

छत्रपाटी निःशुल्क चिकित्सालययात थौं न्युरोड टिमपाखे न्यागु लाख ग्वाहालि यागु दु ।

याकन हे ३५ वेडया कोविड अस्पतालया रुपं सञ्चालन जुइ त्यंगु थुगु अस्पतालयात ग्वहालि यायेगु कथं थौं न्युरोड टिम (एनआरटि) पखे न्यागु लाखया चेक चिकित्सालयया अध्यक्ष डा.मनोजमान श्रेष्ठयात  लल्हागु खः।

उगु चेक लल्हाना काये धुका चिकित्सालयया अध्यक्ष डा. श्रेष्ठं याकन हे आसिइयू नाप ३५ वेडया कोविड अस्पतालया संचालन यायेगु तयारी जुइ धुकुगु धका धयादीगु दु।