सरकारं कोरोना खोप निजी कम्पनीयात हयेके बिइगु तयारी याःगु दु।

थुकिया लागि मन्त्रिपरिषदं निश्चित मापदण्ड तया निर्णय यायेगु स्वास्थ्य तथा जनसंख्यामन्त्री हृदयेश त्रिपाठीं जानकारी बिःगु दु । मन्त्रालयं बिहीवाः ग्वसाः ग्वःगु पत्रकार सम्मेलनय् मन्त्री त्रिपाठीं धाःगु दु, ‘निजी कम्पनीं हःगु खोप सरकार धासा न्याइ मखु ।

निजी प्रयोजनय् बिइ फइ।’ सरकारं हःगु खोप धाःसा निःशुल्क जुइ धका वयकलं धयादीगु दु। मन्त्रिपरिषद् या लिपागु निर्णय कथं २० लाख डोज कोरोना खोप निवाः दुने हे वइ।

सरकारं भारतया सेरम इन्स्टिच्युटं उत्पादन याःगु कोरोना खोप ‘कोभिसिल्ड’ प्रतिडोज प्यंगु डलरया दरं न्यायेगु निर्णय याःगु दु।

सरकारं छवाःया दुने निकःतक इन्धनया भाः थकाःगुया विरोधय् अनेरास्ववियू (रञ्जित तामाङ समूह) नं बिहीवाः नेपाल आयल निगमया केन्द्रीय कार्यालय न्ह्यने प्रदर्शनसहित धर्ना बिःगु दु ।

सुथय् देयन्यकया क्याम्पस न्ह्यने विरोध प्रदर्शन याःगु खःसा न्हिनय् अनेरास्ववियू नं बबरमहलय् आयल निगम कार्यालय न्ह्यने धर्ना बिया नाराबाजी याःगु दु ।

अनेरास्ववियूया नेता सुरेन्द्र बस्नेतं निगमया कार्यालय घेराउ यासे पेट्रोलियम पदार्थया मूल्यवृद्धि विरोधय् ज्ञापनपत्र तक बिःगु खः । अनेरास्ववियूया नेता कार्यकर्तापिन्त प्रहरीं आयल निगमया मू गेट न्ह्यने हे रोके याःगु खः।

अन हे च्वना नारा च्वयातःगु प्लेकार्ड ज्वना प्रदर्शन सुरु याःगु खः । प्रदर्शनयात लक्षित यासे आयल निगमया कार्यालय न्ह्यने अप्वो नेपाल प्रहरीया टोली खटे यानातःगु खः।

बकोरोना भाइरस (कोभिड(१९) महामारीया कारण प्रभावित थुगुसिया शैक्षिक सत्र जेठय् क्वचाइगु जुगु दु।

संशोधित नियमावली कथं थुगुसिया शैक्षिक सत्र जेठय् क्वचाइगु व असार १ गतेनिसे न्हुगु शैक्षिक सत्र सुरु यायेगु निर्णय जुगु शिक्षा मन्त्रालयया प्रवक्ता दीपक शर्मां जानकारी बिःगु दु। वयकःया कथं, ‘संशोधित शिक्षा नियमावलीयात आधार मान याना जिमिसं थुगुसिया शैक्षिक सत्र निला लिउने यकिइगु निर्णय यानागु खः ।’

संशोधित शिक्षा नियमावलीइ, ‘महामारी वा अथेहे मेमेगु विपद् वा विकट हिमाली क्षेत्रया कारण शैक्षिक सत्र ह्यूपाः हयेमाःगु अवस्था वःसा मन्त्रालयं शैक्षिक सत्र ह्यूपा हये फइ’ धइगु वाक्या उल्लेख दु । छगु शैक्षिक सत्रय् न्यूनतम १८० दिं अर्थात् द्धःछिगु घन्टा ब्बनेमाः। सामान्यतयाः वैशाख निसे शुरू जुया चैतय् शैक्षिक सत्र क्वाचाइ।

सार्वजनिक बिदा, साप्ताहिक बिदाबाहेक करिब निसःदिं स्कूल सञ्चालन जुइ । उकिइ कासा व अतिरिक्त क्रियाकलाप न समाबेस जुइ।

सरकारं थ्व हे वइगु फागुन २३ गतेनिसे ज्येष्ठ नागरिकपिन्त कोभिड–१९ विरुद्धया खोप बिइगु जुगु दु। स्वास्थ्य तथा जनसङ्ख्या मन्त्रालयं इन्सिडेन्ट कमाण्ड सिस्टमया बुधवाः च्वंगु बैठकं फागुन २३ गतेनिसे ६० दँ दुपि व स्वया थःपि नागरिकपिन्त खोप बिइगु धका मन्त्रालयया प्रवक्ता डा जागेश्वर गौतमं जानकारी बिःगु दु ।

भारत सरकारं उपलब्ध याःगु कोभिड–१९ विरुद्धया ‘कोभिशिल्ड’ खोप वःगु माघ १४ गतेनिसे बिइगु सुरु जुगु खः। न्हापागु चरणय् स्वास्थ्यकर्मी, अग्रपङ्क्ति ज्या याइपि सुरक्षाकर्मी, एम्बुलेन्स व शववाहनया चालक व सहचालक, मिसा स्वास्थ्य स्वयंसेविका लगायतपिन्त माघ १४ गतेनिसे २४ गतेतक  त्यस खोप बिःगु खः।

मन्त्रालयया प्रवक्ता डा. गौतमया कथं आःतक निगु लाख ६३ हजार ४८२ म्हेसिया खोप काये धुकुगु दु ।