पर्वत केन्द्रविन्दु जुया थौ भुखाय् ब्बःगु दु। थौ बहनि ७ बजे जुया ८ मिनेटय् पर्वतया मोदी गाउँपालिका लेस्पार–क्याङ जःखः केन्द्रविन्दु जुया भुखाय् ब्बःगु खः।

उगु भुखाय् ३.८ म्याग्निच्यूड मापन जुगु दु धका खानी लिसे भूगर्भ विभागं धाःगु दु।

राष्ट्रपति रामचन्द्र पौडेलयात नेपाया निति प्यगु देशया राजदूतं ओहोदाया प्रमाणपत्र पेस याःगु दु। राष्ट्रपति कार्यालयया कथं नवनियुक्त राजदूतपिन्स राष्ट्रपति भवनय् बिस्क बिस्क ज्याझ्वलय् थः थःगु ओहोदाया प्रमाणपत्र पेस याःगु खः।

राष्ट्रपति कार्यालयया कथं जापान, तुर्कमेनिस्तान, जनवादी लोकतान्त्रिक गणतन्त्र लाओस व इस्लिामक गणतन्त्र इरानया राजदूत तयेस ओहोदाया प्रमाणपत्र पेस याःगु खः।

उगु ज्याझ्वलय् जापानया नवनियुक्त राजदूत मेडा तोरु, तुर्कमेनिस्तानया शालार गेल्डिनाजारोभ, आलोसया बाउन्मी भ्यान्मानी व इरानया डा.इराज इलाहीं राष्ट्रपति पौडेलयात ओहोदाया प्रमाणपत्र पेस याःगु दु।

नेकपा (माओवादी केन्द्र)या नायः पुष्पकमल दाहाल ’प्रचण्डं’ देय्या राजनीतिक अवस्था बांलाः मजू धकाः धयादीगु दु।

थौं सुर्खेत विमानस्थलय् प्रेस सेन्टर सुर्खेतं ग्वासाः ग्वःगु पत्रकार नाप लायेगु ज्याझ्वलय् नायः प्रचण्डं लिपांगु इलय् मुलुकया राजनीतिक अवस्था अझ स्यना वनाच्वंगु दु धकाः धयादीगु खः। सरकारं हःगु अध्यादेशया विरोध यानादिसें विपक्षीतय्गु पाखें मंकाः वक्तव्य पिथना धकाः वय्कलं धयादिल।

पूर्वप्रधानमन्त्रीतकं जुयादीधुंकम्ह वय्कलं थत्थें हे विशेष अधिवेशन सःतेत माग यायेधुंकाः तिनि सरकारं थ्व हे माघ १८ गते अधिवेशन आह्वान याःगु धकाः धयादिल।

वइगु अधिवेशनय् विपक्षी दलया नेताया हैसियतं सरकारया ज्याखँया बारे जनतायात छुं अनुरोध याये धइगु वय्कःया धापू खः।

राष्ट्रपति रामचन्द्र पौडेलं संविधान व लोकतान्त्रिक शासन प्रणालीया दुगःक्वें थें जुयाच्वंगु निकायं जनता व विकासयात केन्द्रय् तयाः ज्या यायेमाःगु धयादीगु दु।

जिल्ला समन्वय समितिया प्रमुख व उपप्रमुख नापं जिल्ला समन्वय समिति महासङ्घ नेपालया पदाधिकारीलिसे थौं राष्ट्रपति भवनय् नाप लायेगु ज्याझ्वलय् वय्कलं उगु खँ धयादीगु खः। राष्ट्रपति पौडेलं थथे धयादिल “थी थी कठिनाइ वःसां नं स्वंगूलिं तहया सरकारं, नीजि ख्यः, गैरसरकारी ख्यःया ज्याय् समन्वय व अनुगमन यायेगु थेंजाःगु महत्वपूर्ण जिम्मेवारी निर्वाह यानावयाच्वंगु हे दु, संविधान व लोकतान्त्रिक शासन प्रणालीया दुगःक्वें थें जुयाच्वंगु निकायं जनता व विकासयात केन्द्रय् तयाः न्ह्याःवनेमाः धइगु जिं तायेका।”

वय्कलं बजेट, योजना व कार्यादेशकथं ज्या जुयाच्वंगु दु कि मजू धइगु अनुगमन व समन्वय यायेगु ज्याय् थःपिनिगु भूमिका व क्रियाशीलतायात अप्वयेकाः देय्या ध्यान आकर्षित यायेत नं इनाप यानादिल। राष्ट्रपति पौडेलं धयादिल, “गां, नगर व वडाय् योजना, प्रक्रिया, कार्यादेश कथं ज्या जुयाच्वंगु दु कि मदु धइगु बारे भतिचा होसियार व सतर्क जुयाः क्रियाशीलता अप्वयेकेगु खःसा विकासया ज्या नं न्ह्याःवनी, बजेटया पाय्छि कथं छ्यलाबुला नं जुइ।

थुकिं देय्या विकास यायेत योगदान बिइ।” वय्कलं थःगु भूमिकायात थःथःम्हं क्रियाशील व जागरुक जुयाः प्रभावकारिता अप्वयेकेत नं समन्वय समितिया प्रमुख व उपप्रमुखपिंत इनाप यानादिल। संविधानं सङ्घ, प्रदेश व स्थानीय सरकारया व्यवस्था याःगु धकाः धयादिसें राष्ट्रपति पौडेलं गाउँपालिका व नगरपालिकादथुइ समन्वय नापं विकास निर्माणसम्बन्धी ज्याय् सन्तुलन दयेकेगु कथं अनुगमन यायेगु कथं महत्वपूर्ण जिम्मेवारीलिसें जिल्ला समन्वय समितिया व्यवस्था जूगु न्ह्यथनादिल।

राष्ट्रपति पौडेलं महासङ्घया ३० क्वःगु स्थापना दिवस ज्याझ्वःया सफलताया भिंतुना नं बियादिल।

कृषि नापं वन विज्ञान विश्वविद्यालयया कार्यकारी परिषदं स्वम्ह डीन व छम्ह निर्देशक नियुक्त याःगु दु ।

विश्वविद्यालयया उपकुलपति प्राडा शारदा थपलियाया कथं कृषि सङ्कायकय् अर्जुनकुमार श्रेष्ठ, भेटेनेरी सङ्कायकय् प्रा डा भूमिनन्द देवकोटा व वन सङ्कायकय् प्रा वासुदेव पोखरेल नियुक्त जुयादीगु खः।

परिषदं प्राडा निराजन भट्टराईयात अनुसन्धान निर्देशक कथं नियुक्त याःगु खः। विश्वविद्यालयकय् १० म्ह निर्देशक तय्गु दरबन्दी दु।