स्वनिगः दुने वःगु २४ घण्टाया दुने थप २४४ म्हेसित कोरोना संक्रमित जूगु दु धका स्वास्थ्य तथा जनसंख्या मन्त्रालयं धाःगु दु ।

संक्रमित पुष्टि जूपि सच्छिम्ह मिसापि व १४४ म्ह मिजंपि खः।

अथेहे येँ जक १९९म्हेसित कोरोना पुष्टि जूगु दु।

अथेतु ख्वपय् १८ म्ह व यलय् २७ म्हेसित संक्रमितपि थपे जूगु दु।

देयन्यकं संक्रमित पुष्टि जुपि ६१३ म्ह दु।

नेकपा प्रचण्ड–माधव समूहया शीर्ष नेतापिन्स मदननगर बल्खुइ पार्टी कार्यालय दयेकेगु घोषणा याःगु दु।

केन्द्रीय कमिटी बैठक क्वचायेवं निम्ह अध्यक्षपि पुष्पकमल दाहाल प्रचण्ड व माधवकुमार नेपाल नाप वरिष्ठ नेता झलनाथ खनाल व अमृतकुमार बोहोरा बल्खु वःगु खः ।

तत्कालीन एमालेया पार्टी कार्यालय भुखाचं क्षतिग्रस्त जूगु खः। नेतापिन्स मदन भण्डारीया शालिकय् माल्यार्पण न याःगु खः। थुगु थाय् थःपिनिगु सम्बन्ध स्वागु धका धाःसे पार्टीया भवन दयेकेगु धका धाःगु खः।

अध्यक्ष नेपाल नें केपी ओली थुलि अलोकतान्त्रिक जुइ धका थःपिन्स कल्पना  हे मयानगु धका वरिष्ठ नेता खनालं ओली आःन कम्युनिस्ट जुइ मफुगु धका धाःगु खः।

अध्यक्ष प्रचण्डं सकसित मिले याना पार्टीयात एकतावद्ध दयेकेगु धारणा तयादीगु खः।

नेपाल कम्युनिस्ट पार्टीया केन्द्रीय सदस्य प्रभु साह न नेपालय् निम्ह अध्यक्ष प्रणाली असफल जूगुलि थुगु पद्धति अपने मयायेत इनाप याःगु दु ।

नेकपा दुने विवादय् प्रचण्ड व माधव समूहय् दुम्ह नेता साह न निम्ह अध्यक्षीय प्रणालीया गल्ती हाकनं मयायेत सचेत याःगु खः ।

निम्ह अध्यक्षीय प्रणालीइ अध्यक्षपि दथुइ टकराव जुया थौं पार्टी क्षतविक्षत जक मखु, सिंगो व्यवस्था हे अस्तव्यस्त जूया देश अन्योलग्रस्त स्थितिइ थ्यःगु दु। माक्र्सवादी मान्यता व लेनिनवादी संगठनात्मक सिद्धान्तविपरीत निर्माण जूगु निम्ह अध्यक्षीय प्रणाली अवस्तुवादी व अवैधानिक जूगु कारण देशय् गम्भीर घात जुगु धका वयकलं धयादीगु खः।

प्रधानमन्त्री केपी शर्मा ओलीें संसद विघटन याना थः प्रचण्ड नेतृत्वय् साथ बियागु खः तर थुगु समूह वःगु दिं थे निम्ह अध्यक्षीय प्रणालीयात भिंकिगु सट्टा पुनरावृत्ति याःगु धका साह नं धयादीगु खः।

निम्ह अध्यक्षीय प्रणाली नेतृत्व सम्बन्धी विश्वव्यापी मान्यता विपरीत व नेपालय् न असफल सिद्ध जुइ धुकुगु धका धयादीगु खः। म्हिगः जुगु केन्द्रीय कमिटी बैठकय् माधवकुमार नेपालयात अध्यक्ष दयेकेगु निर्णय यायेवं साह न बैठकय् आपत्ति प्वकादीगु खः।

नेपाल कम्युनिस्ट पार्टीया अध्यक्ष पुष्पकमल दाहाल प्रचण्डं सचिवालय सदस्य रामबहादुर थापा बादलयात थःग्ु पक्षय् हयेमफुगु स्वीकार यानादीगु दु। 

थौं बिहीवाः जुगु केन्द्रीय कमिटी बैठकय् प्रचण्डं उगु बैठकय् हयेमफुगु धका  जानकारी बिःगु खः। वयकलं बामदेव गौतम व बादल कमरेडयात पार्टी वयेत इनाप याना न मवल धका धयादीगु खः। बामदेव कमरेड सकारात्मक दु धका धयादीगु खः। प्रचण्डे बबरमहलया कार्की पार्टी प्यालेसय् जुयाच्वंगु बैठकय्  जानकारी बिःगु खः।

वयकल बादलनाप दुपि कुलप्रसाद केसी व सुर्य सुवेदी ‘पथिक’ बैठकय् सहभागी जुइ धुकुगु दु धका धयादीगु खः। सरकारं संसद विघटन यायेवं निगु कित्ताय् विभाजित नेकपाय् गु कित्ताय् वनेगु धका बादल गन मवस्य च्वंगु खः ।

तर थौं बिहीवाः प्रधानमन्त्री केपी शर्मा ओली समूहया भेलाय् सहभागी जुगु खः।

जनता समाजवादी पार्टी नेपालया नेतापि प्रतिनिधिसभाया बैठक आह्वान यायेत सभामुख अग्नी सापकोटायात इनाप याःगु दु।

थौं बिहीवाः सिंहदरबारयय् संसद् सचिवालयय् वना सभामुख सापकोटाया ज्याकूथि जसपा नेतापि बाबुराम भट्टराई, उपेन्द्र यादव व लक्षमणलाल कर्णपि वना अथे इनाप याःगु खः। प्रधानमन्त्रीयात प्रतिनिधिसभा विघटन यायेगु अधिकार संविधान बिःगु मदु उकि संसद् जीवित दु धकाा  निष्कर्ष सहित सभामुख सापकोटायात बैठक आह्वान यायेत इनाप याःगु खः।

अथेहे जसपां संसद् विघटनया विरुद्धय् घोषणा याःगु आन्दोलनया तयारी सुरु याःगु खः । जसपाया केन्द्रीय कार्यकारिणी समितिं वःगु मंगलवाः च्वंगु बैठकं संसद् विघटनया विरोधय् आन्दोलनया ज्याझ्वः यायेगु धका धाःगु खः ।

जसपा थ्व स्वया न्ह्यः केन्द्रीय कार्यकारिणी समितिया बैठकपाखे पुस १० गते प्रधानमन्त्री व राष्ट्रपतिया पुत्ला दहन यायेगु, पुस ११ गते मसाल जुलुस पिकायेगु व पुस १२ गते बृहत प्रदर्शन यायेगु ज्याझ्वः क्वछि धुकुगु दु।