कोरोनां सङ्क्रमित जुया पत्रकार दिनेश दाहाल मन्त ।

वंगु १ गते कोरोना सङ्क्रमण पुष्टि जुइवं होम आइसोलेशनय् च्वनाच्वम्ह दाहालयात सासः ल्हायेत समस्या जुइवं  १० गतेसुमेरु अस्पतालय् भर्ना जुगु खः।

अस्पतालय् वासः यायेगु झ्वलय दाहाल थौं सुथय् ४० दँय् मदुगु खः। निगु दशकनिसें पत्रकारिताय् यानाच्वम्ह दाहालं जनप्रहार साप्ताहिकय् ताईतक सम्पादकया रुपय् ज्या यानादिगु खःसाः लिपांगु इलय् सिपोष्ट न्यूज डटकमया सम्पादक व प्रकाशक जुया पत्रकारिता याना च्वनादिम्ह खः।

कोरोनाया देयन्यक ८ म्ह पत्रकारपि मदय धुकुगु दुसाः ६५०म्ह मल्याकं पत्रकारपि सङ्क्रमित जुयाच्वंगु दु ।

नेपाः राष्ट्रिय पार्टीया अध्यक्ष डा विजय सैजुं अस्पताल भर्ना जुयादिगु दु।

वयकयात सासः ल्ह्यायेत थाकुलिं ह्याम्स अस्पतालय् म्हिगः भर्ना जुयागु धकाः सामाजिक संजालपाखे जानकारी बियादिगु दु।

वयकलं कोरोना रिर्पोट नेगेटिभ वगु तर छातीया समस्या जुया सासः ल्ह्याये थाकुगुलिं अस्पताल भर्ना जुइमाःगु धकाः सामाजिक संजालपाखे जानकारी बियादिगु खः।

कोरोना संक्रमण पुष्टि जूपि प्रतिनिधिसभा सदस्यपिनिगु ल्याः १८ म्ह थ्यंगु दु ।

वैशाख २२,२३ व २४ गते यागु पीसीआर परीक्षणया रिपोर्टय् प्रतिनिधिसभाया १८ म्ह व राष्ट्रियसभाया छम्ह सांसदयात कोरोना संक्रमण खने दुगु दु।

संघीय सांसद, संसद सचिवालयया कर्मचारी नाप संसदीय मामिला पत्रकार लगायत १ हजार २३५ म्हेसिगु पीसीआर परीक्षण यागुलि १६० म्हेसित पोजेटिभ खनेदुगु खः ।

कोरोना संक्रमण खनेदुपि मेपि १४१ म्ह संघीय संसद सचिवालयया कर्मचारी, मर्यादापालक, स्वकीय सचिव, सुरक्षाकर्मी, संसदीय मामिला पत्रकार नाप अन्तर्राष्ट्रिय सम्मेलन केन्द्र (आईसीसी)या कर्मचारीपि खः।

गण्डकी प्रदेशय् थप स्वम्ह कोरोना संक्रमितपि सीउगु दु ।

कोरोना संक्रमणपाखे निम्ह कास्कीयापि व छम्ह पर्वतयाम्ह मदुगु दु धका गण्डकी प्रदेश स्वास्थ्य निर्देशनालयं धागु दु ।

कास्कीया पोखरा महानगरपालिका–१३ या ४८ दँ दुम्ह कोरोना संक्रमित मिसाम्ह शुक्रवाः बहनि ५ः४० बजे पोखरा स्वास्थ्य विज्ञान प्रतिष्ठानय् उपचार यायेगु झ्वलय् मदुगु खः ।

उम्ह मिसा वैशाख १३ गते कोरोना संक्रमण पुष्टि जूगु खः । अथेहे पोखरा महानगरपालिका–१० या ८१ दँ दुम्ह मिजंम्ह शुक्रवाः बहनि ७ः२५ बजे मणिपाल शिक्षण अस्पतालय् उपचारया झ्वलय् मदुगु खः धका निर्देशनालयं धागु दु।

अथेतु, पर्वतया कुश्मा नगरपालिका–१ या ४० दँ दुम्ह कोरोना संक्रमित मिजंम्ह शुक्रवाः बहनि ५ः१८ बजे मदुगु खः।

थ्व नाप गण्डकी प्रदेशय कोरोना संक्रमणं सीपि २५१ म्ह थ्यंगु दु ।

ऐतिहासिक दोलखाया भीन्द्यःयात हाकन चःति वगु दु ।

भीमेश्वर नगरपालिका वडा न २ य् च्वंगु भीन्द्यःयात थौं न्हिनय् १२ः१५ बजे मदिक्क चःति वयाच्वंगु भीमेश्वर मन्दिर गुठी व पुजा व्यवस्थापन समितिया अध्यक्ष धागु दु।

सकारात्मक वा नकरात्मक परिर्वतन, अनिष्टया घटनाया पुर्वसुचकया रुपय् काइगु भीन्द्योयात चःति वइगु इलय भक्तजनत मुनाः गं थाइगु, धुपाँय् मत च्याकिगु नाप देगःया मू पुजारी पङखां गायेकिगु याइ।