नेपाः सेयर बजारया (आईपीओ) आवेदनय् न्हुगु रेकर्ड कायम जूगु दु । नेपाल इन्फ्रास्ट्रक्चर बैंकया आईपीओय् १५ लाख २९ हजार ४६० ले १८ करोड १२ लाख ८६ हजार ७२० कित्ताया लागि आवेदन वःगु खः।

थ्व स्वया न्ह्यः चन्द्रागिरी हिल्स लिमिटेडय् १२ लाख ७७ हजारं आईपीओया लागि आवेदन बिःगु खः। ८ अर्ब रुपैयाँ आईपीओया लागि १८ अर्ब १२ करोड ८६ लाख ७२ हजार रकमया माग जुगु धका बैंकया धितोपत्र निष्काशन व बिक्री प्रवन्धक एनआइबीएल एस क्यापिटल न धाःगु दु। बैंकं ८ अर्ब रूपैयाँ बराबरया ८ करोड कित्ता सेयर प्रारम्भिक निष्कासन वःगु शुक्रवाः बजारय् हःगु खः ।

८ करोड मध्ये १ लाख ६० हजार कित्ता कर्मचारीया लागि व ४ लाख कित्ता म्यूचअल फण्डया लागि खः । बाँकी ७ करोड ५८ लाख ४० हजार कित्ता साधारण सेयर धाःसा सर्वसाधारणउा लागि छुटे याःगु खः ।

आवेदकपिनिगु ल्याः स्वया प्रति ५० कित्ता स्वया अप्वो आवेदन बिउपिन्ति आवेदन ५० कित्ताया हाराहारीइ सेयर लाइगु खनेदु ।

नेपाल सरकारं छुं दिं न्ह्यः पिकाःगु ‘नागरिक एप’ य् सुरक्षाया खतरा दुगु धका आईटी विज्ञपिन्स धाःगु दु ।

सरकारी सेवा एकीकृत रुपं बीगु उदेश्यं सरकारं परीक्षणया लागि थुगु ऐप सार्वजनिक याःगु खः । उगु ऐप साइबर सुरक्षा विज्ञपिन्स धाःसा थ्व एपय् सुरक्षा उपाय विश्वसनीय मजुगु धका धाःगु खः।

एप्सपाखे सरकारं सछिगुलिं मल्याक सरकारी सेवा बीफइ कथं तयार यानागु धका धाःगु खः ।

थगु एप्सं आःया निति प्यान नम्बर, नागरिकता, राहदानी, मतदाता परिचयपत्र, नागरिक लगानी कोष, सञ्चयकोष, शैक्षिक उपलब्धि सम्बन्धी विवरण स्वये फइ धका धाःगु खः ।

भारतं थौंनिसे नेपाल नाप न्ह्यने च्वगु छिमेकीया लागि कोरोनाविरुद्धया खोप उपलब्ध याकेगु जुगु दु ।

भारतं विदेश मन्त्रालयं म्हिगः मंगलवाः जारी विज्ञप्ति कथं नेपाल नाप भुटान, माल्दिभ्स, बंगलादेश, म्यानमार लगायतया देशय् कोरोनाविरुद्धया खोप उपलब्ध याकेगु धका धाःगु दु। भारतय् दयेकेगु खोप आपूर्तिया लागि याःगु इनाप कथं छिमेकी देय् खोप उपलब्ध याकेत्यःगु खः ।

अनुदान ग्वाहालि कथं खोप उपलब्ध यायेत्यनागु धका जारी याःगु विज्ञप्तिइ उल्लेख याःगु दु । भारतं थ्व स्वया न्ह्यः हे थुगु कोरोनाविरुद्धया खोप बिःगु सुरु याये धुकुगु दु।

छिमेकी देय् यात अनुदान बिउसां भारतय् पर्याप्त मात्राय् खोप उपलब्ध दु धका अनया सरकारं धाःगु दु ।